« E buka nīnamu ’e te reta ’auro ānei tā ’oe » ?
I te tahi taime, i muri a’e i te tā’uera’a i te buka, ’ua tupu mai te mana’o māere ’ia ’ite ē, e aha tō roto i te reira.
Fa’ahōho’ara’a nā Greg Newbold
E rave rahi matahiti i ma’iri a’e nei, ’ua fāri’i au i te hō’ē buka nīnamu e te reta ’auro i ni’a i te tāpo’i, mai roto mai i te mau misiōnare e tāvini ra i roto i te ’āua fa’ehau tei reira ato’a vau nō te ha’api’i i tā’u ’ohipa i roto i te nu’u moana a te hau Marite.
’A ha’amata ai au i te tai’o i te reira buka, ’ua parau maira te hō’ē ta’ata iā’u ē, e mea hape nō te mea e mea ’īritihia mai mai roto mai i te Bibilia. ’Ua fa’atupu te reira i te fē’a’a i roto iā’u nō ni’a i te ti’ara’a mau o te buka, terā rā, ’ua tāpe’a noa vau i te reira. ’Ua tai’o ri’i au i te reira, ’e ’ua tu’u i te reira i roto i tā’u pūtē, i raro a’e roa, e ’ua mo’e roa te reira iā’u.
Hō’ē matahiti hau i muri mai, ’ua fa’aoti au e tāmā i tā’u pūtē. ’Ua ’itehia mai iā’u te buka, ’aita rā tō’u hō’ē ’ana’anatae fa’ahou i te reira, ’e ’ua fa’aru’e atura vau i te reira. Terā rā, ia tae i te hō’ē taime, ’ua tupu i te rahi tō’u hina’aro ’ia ’ite ē, e aha tō roto i tāua buka nīnamu ra ’e te reta ’auro. Te ti’aturi nei au i teienei ē, nō ’ō mai teie mana’o i te Vārua ra, « o te fa’aarata’i atu ’ia rave i te ’ohipa maita’i » (Te Parau Ha’api’ira’a ’e te mau Parau Fafau 11:12).
I te matahiti 2005, ’ua ani mai te hō’ē hoa ’āpī iā’u ’ia fa’aro’o i te mau misiōnare. I te ha’amatara’a, ’ua tupu mai i roto iā’u te mau uira’a ’e te tapitapi nō ni’a i te mau mea tā rātou i ha’api’i mai, terā rā, te vai ra te ti’aturi o te mau misiōnare, ’e ’ua hōro’a mai rātou i te mau pāhonora’a tā’u i feruri ē, ’aita i hape.
I tō’u ’itera’a ē, teie mau misiōnare, hō’ē ā ïa ē, terā tā’u i fārerei e rave rahi matahiti nā mua a’e nei, ’ua ui ’oi’oi atura vau ia rātou, « E buka nīnamu ’e te reta ’auro ānei tā ’outou » ?
’Ua pahoho maira te hō’ē o rātou, « ’Ē, te vai ra » ! « Tōna i’oa, o te Buka a Moromona » !
’Ua ’oa’oa roa vau ia fāri’i fa’ahou i te Buka a Moromona. Oia mau, ’ua ’oa’oa roa vau i te mea ē, ’ua tai’o vau i te reira hau atu i te hō’ē taime, i roto i te roara’a i raro mai i te piti hepetoma ! ’A tai’o ai au ’e a pure ai, ’ua ’ite a’era vau ē, e parau teie nā te Atua.
Ua parau o Elder Rubén V.Alliaud, nō te Hitu Ahuru i te hō’ē mea i roto i te ’āmuira’a rahi o tē tū’ati i ni’a i tō’u ’itera’a nō ni’a i te Buka a Moromona : « te ta’ata tai’o o tē fafau e tuatāpapa ma te ’ā’au tae i te [Buka a Moromona], nā roto i te vārua pure, e’ita ’oia e ha’api’i noa nō ni’a i te Mesia, e ha’api’i ato’a mai rā nō roto mai i te Mesia— mai te mea ihoa rā ē, e rave rātou i te fa’aotira’a e ’tāmata i te maita’i o te parau’[Alama 32 : 5] ’e e’ita e fa’aru’e ’oi’oi i te reira nā roto i te mau mea tā vetahi’ē i parau nō ni’a i te mau mea ’aita roa atu rātou i tai’o ».1
Nā roto i te tai’ora’a i te Buka a Moromona, te purera’a, ’e te ti’aturira’a i roto i te Vārua, ’ua ’ite au i te mau mea rarahi i te tupura’a i roto i tō’u orara’a.