Feiā ʼāpī
’A fa’ata’ahia ai au nō te tāvini i roto i te misiōni nō California San Bernardino ’ei misiōnare rave tāmau, tei reita ato’a tō’u ’utuāfare i pīha’i iho iā’u. Teie tō’u hōho’a e apa nei i te hō’ē o tō’u mau taea’e i muri a’e i tō’u fa’ata’a-ra’a-hia. Tau ’ohipa tā’u i fa’auru ’a tae mai ai au i teie fāito, terā rā, e ’oa’oa rahi tō’u nō te mau tauira’a tā’u i ’ite i roto iā’u iho ’e i roto i tō’u ’utuāfare.
E piti matahiti nā mua a’e e hope ai tā’u ha’api’ira’a, ’ua tupu te hō’ē ’āti purūmu teimaha i ni’a iā’u. Nā mua a’e i te reira, ’aita vau i rave i te mau mea i tītauhia iā’u ’ia rave. I muri a’e rā i te reira ’āti purūmu, ’ua taui mau tō’u ferurira’a. ’Ua nehenehe ho’i tō’u ora i te ’īritihia i tāua taime ra, ’e ’aita vau i hina’aro ’ia hope mai te reira te huru. ’Ua tauturu mai tō’u episekōpo iā’u ’ia ho’i mai i ni’a i te ’ē’a ti’a : te tai’ora’a i te Buka a Moromona i te mau mahana ato’a ’e te fa’aineinera’a nō te tāvini i te hō’ē misiōni.
E mea au rahi na’u te tū’aro horohoro. I muri a’e i te ’āti purūmu, ’ua ma’iri au i te reira pu’e tau, ’e ’ua feruri noa vau ē, e aha te mea e toe ra nō’u. Terā rā, ’ua fāriu vau i ni’a i te Fatu, ’e ’a nā reira ai au, ’ua fāri’i au i te hō’ē pu’e tau fa’ahiahia i te matahiti i muri a’e. Te vai noa nei ā te tauto’ora’a, terā rā, e aha tei taui, teie ïa, ’oia ho’i, ’aita vau e rave nei i te reira nō’u iho, te rave ra rā vau i te reira nō te Fatu.
Nō tō’u noa ’itera’a i te rahira’a o te mau ha’amaita’ira’a e nehenehe e tae mai nā roto mai i te ’īra’a o te ’ēvanelia, o te mea ïa tei taui iā’u. Nō tō’u fāri’ira’a i terā mau poupoura’a ’e te ’oa’oa, te hina’aro nei au e ha’aparare i te reira nā te ao ato’a nei. E hina’aro rū tō’u ’ia fāri’i te ta’ata i te ’oa’oa tā’u e fāri’i nei i te mau mahana ato’a maoti te ’ēvanelia. ’E nō reira vau e tāvini ai i te hō’ē misiōni : nō te tauturu i « te fa’atupura’a i te tāhuti ’ore ’e te ora mure ’ore o te ta’ata nei » (Mose 1:39).
Garret W., 18 matahiti, North Carolina, USA