Feiā ʼāpī paʼari
Hō’ē ānei huru te hia’ai māha ’ore ’e te ’orure hau ?
Tē ora nei te ta’ata pāpa’i i Texas, USA.
E nehenehe te hō’ē hāro’aro’ara’a maita’i a’e i te parau nō te hia’ai māha ’ore e tauturu ia tātou ’ia ti’aturi ē, te vai ra te mahana, e fa’aora te Fatu ia tātou i te fa’atītīra’a.
I roto i tō tātou nei ao tāhuti, ’ua riro te hia’ai māha ’ore ’ei ’ohipa teimaha ’e te fa’a’ino i te orara’a. ’Ia rave pinepine ana’e tātou i te hō’ē ’ohipa nō te ha’amo’e i te orara’a, mai te mā’a, te parau ho’ora’a rā’au, te mau rāve’a tūreiara’a sōtiare, te tihotiho parau, te hōho’a faufau, te ha’avare, te perē moni, ’aore rā, te fa’a’eta’etara’a tino u’ana, e nehenehe tātou e topa ’ōhie noa i roto i te hō’ē ’ohura’a hia’ai māha ’ore.
I tō’u ’itera’a i te mau ta’ata fa’ahiahia, te maita’i, te pūai i te pae vārua, te ha’avī ia rātou iho, ’āti a’e iā’u, ’ia ’aro i te hia’ai māha ’ore—’eiaha i te fati-noa-ra’a i raro a’e i te mau mā’itira’a hape—’ua fāriu atu vau i roto i te mau pāpa’ira’a mo’a ’e i roto i te mau tuatāpapara’a ’āpī nō ni’a i te hia’ai māha ’ore, nō te hāro’aro’a maita’i a’e i teie mau hina’aro ’e te mau fa’ahepora’a nō roto mai i te roro.
Te mau aihere o te hia’ai māha ’ore
E nehenehe te rāterera’a nā roto i te hia’ai māha ’ore e riro mai te ’atu’atura’a i te hō’ē ’āua. E’ita tātou e vaere i te aihere hō’ē taime, a tīa’i ai ’ia ravehia te reira. ’Ua ’ite tātou ē, e rahi fa’ahou atu ā te aihere e tupu mai, nō reira, e hutihuti tāmau māite tātou i te mau aihere nō te pāruru i te mau rā’au tanu.
Mai te mea ē, te ’aro nei tātou i te hō’ē hia’ai māha ’ore, e riro tātou i te ha’aparuparu ’ia topa fa’ahou ana’e tātou, noa atu i muri a’e i te tātarahapara’a ’e te ’imira’a i te tauturu. E nehenehe tātou e māere ’e e ’ino’ino ho’i i te mea ē, teie mau fa’ahemara’a, e pūai ta’a ’ē tō rātou i muri a’e i te mau pu’e tau ’oa’oa roa ’aore rā, te mau pu’e tau pe’ape’a roa o tō tātou orara’a. (Mai te mau aihere e rahi atu te tupura’a i muri a’e i te hō’ē ūa haumārū ’aore rā, te hō’ē vero rahi.)
Hia’ai māha ’ore ’aore rā, ’ōrurera’a hina’arohia
’Ua ’itehia iā’u ē, e fa’a’ohipa o Sātane i te hia’ai māha ’ore ’ei « ha’apāpūra’a » ē, e hina’aro hoa tātou i te ’ino, e’ita roa atu tātou e manuia mai te ’ōmuara’a ra iho, ’aore rā, ’ua fa’aru’e mai te Fatu ia tātou. E fa’a’ohipa te diabolo i te ha’amā nō te ha’aparuparu ia tātou, ma te ha’apāpū ē, noa atu te rahira’a taime tō tātou tātarahapara’a, e tāmau noa te mau fa’ahemara’a i te tupu mai.
E rave rahi tumu e topa ai tātou i roto i te hia’ai māha ’ore, terā rā, e mea pinepine te hia’ai māha ’ore i te ha’amata nā roto i te hō’ē tāmatara’a ’ia fa’ati’a « i te mau hina’aro rahi ’aita i fa’atupuhia ».1 Nō reira, e nehenehe te ’ōrurera’a e arata’i atu i te hia’ai māha ’ore, ’e e nehenehe te hia’ai māha ’ore e fa’atupu i te hara, pinepine ho’i te mau hia’ai māha ’ore i te tupu mai i roto i te paruparu ’eiaha rā i roto i te ’ōrurera’a hina’arohia.2
Aua’e rā, ’ua ’ite tātou ē, e nehenehe te paruparu e hōro’a mai ia tātou i te rāve’a ’ia ha’api’i mai nō ni’a i te aroha ’e e fa’ananea ho’i i te fa’aro’o rahi i roto i te mana fa’aora o Iesu Mesia.3
Tae roa atu i te fa’aorara’a i te fa’atītīra’a
E ’itehia ia tātou i roto i te Buka a Moromona te mau mana’o nō te rātere ’e nō te ape i te marei o te hia’ai māha ’ore mai roto mai e piti nā pupu ta’ata : te nūna’a o Limihi ’e te nūna’a o Alama.
’Ua vai na nā nūna’a e piti i roto i te fa’atītīra’a nō te hō’ē tau maoro. Rāua to’opiti i te ’itera’a ē, « aore a’era e rāve’a e ti’a ai ia rātou ’ia faaora ia ratou iho » i te tītīra’a (Mosia 21:5). ’A ma’iri ai te tau, ’ua fāriu nā pupu to’opiti i ni’a i te Fatu nō te tauturu.
’Ua vai te nūna’a o Limihi i roto i te tītīra’a nō te mau tumu nō te ’ōfatira’a i te ture. Ma te ’imi ’ore i te tauturu a te Fatu, ’ua ’aro rātou i tō rātou mau ’enemi « i roto i te iria » e toru taime. ’Ua pau rātou i roto i te ’arora’a tāta’itahi. I to rātou ha’amatara’a i te fa’aha’eha’a ia rātou, « i maoro ai te Fatu i te fa’aro’o i tā rātou ti’aorora’a ra… ’ua fa’aro’o a’era rā te Fatu i tā rātou ti’aorora’a, ’e ’ua ha’amata ’oia i te ha’amarū i te ’ā’au o te ’āti Lamana, ’e ’ua ha’amāmā ri’i rātou i tā rātou hōpoi’a » (Mosia 21:15 ; ha’apāpūra’a i ’āpitihia atu). ’Ua ha’amaita’ihia rātou nō tō rātou ha’eha’a tei tupu noa i te rahi, « aita rā te Fatu i fa’aora ia rātou i te tītīra’a ra » e mea maoro i muri mai.
Tei roto te nūna’a o Alama i te tītīra’a noa atu tō rātou parau-ti’a, terā rā, « i nini’i hua atu ra i tō rātou ’ā’au i te [Atua] ». Noa atu tōna ’ite i tō rātou mau hina’aro ti’a, ’ua vaiiho te Atua i te hō’ē ārea taime i rōpū i tō rātou tītīra’a ’e tō rātou fa’aorara’a. ’A tamau noa ai rātou i te turu’i i ni’a iāna, ’ua fafau mai ’oia ē, nāna « e ha’amāmā i te mau hōpoi’a teiaha i tu’uhia i ni’a i tō ’outou tapono, e’ita roa o tō ’outou tapono e māuiui oi vai [noa] a’e ’outou i te tītīra’a ». I tō rātou pae, « ’ua auraro ihora rātou ma te ’ā’au tae ’e te fa’a’oroma’i i te hina’aro ato’a o te Fatu » (Mosia 24:12, 14, 15).
I te pae hope’a ’ua fa’aorahia nā pupu e piti. E ’ua fafau-ato’a-hia mai ia tatou ē, mai te mea e fāriu atu tātou i te Fatu ra i roto i tō tātou fa’atītīra’a, e ti’a māite tātou « ei ite [nōna] e muri nei » ’e « ’ia ’ite pāpū ’outou ē, te hi’o aroha ra te Fatu te Atua ra, i [tōna] ra mau ta’ata i tō rātou mau ’āti » (Mosia 24:14)—e tō rātou mau hia’ai māha ’ore !
’Ia māhanahana ’outou
Mai te mea ē, tei roto ’outou i te hia’ai māha ’ore, a ha’amana’o ē, nā roto i te tauturu a te Fatu, e nehenehe teie taime e riro ’ei repo maita’i nō te fa’atupu i te mau huru Mesia. Mai te mea ē, e rahi tō ’outou ha’eha’a, e ti’a ïa ia ’outou ’ia ha’api’i i te fa’a’oroma’i, te aroha, te fa’a’oroma’ira’a roa, ’e te marū.
’A fārerei i tō ’outou feiā fa’atere nō te autahu’ara’a ’e te feiā e nehenehe e tauturu ’e ’a fa’a’ohipa i te mau mauha’a e rave rahi tā te Metua i te ao ra i hōro’a mai nō te tauturu ’ia ’outou ’ia ’imi i te ti’amāra’a. ’A ti’aturi i te Fatu ; mai te mea ē, e pe’e ’outou iāna ma te itoito, e nehenehe ’oia e taui i teie tītaura’a ha’aparuparu ’e te teimaha ’ei rāve’a pūai nō te ha’amaita’ira’a i te pae vārua.4
Teie te mau parau a te hō’ē Feiā Mo’a i te Mau Mahana Hope’a nei nō Auteraria, a fa’aau ai ’oia i tōna orara’a tahito i tōna orara’a i teie nei : « E au tō’u orara’a tahito mai te hō’ē medebara aihere ’ino, ’e hō’ē noa iho tiare i roto i te mau aihere. [Terā rā] i teienei, ’ua ’ore te mau aihere ’ino, ’e te ’ua’a nei te mau tiare i reira ».5
Mai te mea ē, e ’ūtaru tāmau noa ’outou ’e o vau i tō tātou ’āua, ’e e fāriu atu i te Fatu ra i roto i tō tātou mau tāmatara’a, e fāri’i tātou i te parau fafau tei hōro’ahia i te mau ta’ata o Alama : « ’Ia māhanahana ’outou, ’ei ananahi ho’i e fa’aora ai au ia ’outou i te tītīra’a » (Mosia 24:16).
’A tāmau noa i te ’ūtaru—e māu’ara’a maita’i te ’ō’otira’a !