Te aupurura’a nā roto i te Fa’anahora’a a te mau tamari’i ’e te feiā ’āpī

Te anira’a ia vetahi’ē ’ia tupu i te rahi ’e te tāuturura’a ia rātou i ni’a i te haere’a, o te mana’o tumu ïa o te aupurura’a.

Hōho’a

young man playing keyboard

Hōho’a nā Tom Garner

’Ua rau te mau rāve’a nō te aupuru nā roto i te fa’anahora’a a te mau tamari’i ’e te feiā ’āpī. E tamari’i paha aore rā, e feiā ’āpī paha tā ’outou i ō ’outou iho. E ta’ata fa’atere paha ’outou i roto i te fa’anahora’a ’aore rā, e aupuru paha ’outou i te mau ’utuāfare e tamari’i ’e e feiā ’āpī tō reira. E aore ra, ’ua mātau paha ’outou i te tahi mau tamari’i ’e te feiā ’āpī (that should cover just about all of us). Noa atu te huru o tō ’outou orara’a, te vai nei e rave rahi mau rāve’a nō te fa’a’ohipa i te fa’anahora’a e aore ra, i tōna mau parau tumu nō te ha’amaita’i i te orara’a o vetahi’ē.

’Ia tupu ’āmui i te rahi

I roto i te ’ā’au o te mau tamari’i ’e te feiā ’āpī, te tāmata nei tātou i te mau mahana ato’a ’ia rahi atu tō tātou hoho’ara’a i te Fa’aora, tei fa’aoti maita’i i tāna tāvinira’a. E rave rahi o rātou tei tauturu i roto i te fa’anahora’a tei ha’api’i mai ē, rahi atu tō ’outou haerera’a i mua i roto i te mau tuha’a rau o tō ’outou orara’a, rahi ato’a a’e tō ’outou ’aravihi nō te tauturu ’aore rā, nō te aupuru ’ia vetahi’ē.

Nā roto rā i te fa’anahora’a a te mau tamari’i ’e te feiā ’āpī, ’aita e tītauhia ’ia tīa’i ’ia ’ite ’outou i te hō’ē mea ’ei reira ’e ha’amaita’i ai ia vetahi’ē. Te ’ohipa iho nō te ha’api’ira’a mai, e hōro’a mai te reira i te mau rāve’a nō te aupuru.

Nō te hō’ē tamaiti ’āpī tei pi’ihia o Prophet, e ora ra i Ghana, te ha’amaura’a i te ’ōpuara’a i roto i te fa’anahora’a a te mau tamari’i ’e te feiā ’āpī nō te ha’api’i i te faata’i i te piāna, o te ha’amatara’a noa ïa. Te parau ra o Prophet ē, « E ’ōpuara’a nā’u ’ia tauturu ato’a i te tahi atu mau ta’ata ’ia ’ite i te mea tā’u e ha’api’i mai nei ».

Noa atu ē, aitā ’oia i riro ’ei ’orometua, ’ua tupu a’e nā i te rahi tāna ’ōpua i roto i te hō’ē mea rahi a’e ’aita ’oia i feruri na. I teie nei, e 50 pīahi e ha’api’i nei i te fa’ata’i i te piāna i te fare purera’a, i pīha’i iho ia Prophet. ’E nā vai e ha’api’i nei ia Prophet ’e terā e 50 pīahi ? Nā Alexander M. ’e ’o Kelvin M., 13 matahiti tō rāua to’opiti. ’Ua parau o Kevin ē, « Te hina’aro nei tātou e fa’a’ite i te maita’i i ni’a i te tahi atu mau ta’ata ».

E toru mahana i te hepetoma e ha’api’i teie nā feiā ’āpī i te mau ha’api’ira’a piāna tumu ma te tāmoni ’ore i te mau ta’ata ato’a e haere mai e ha’api’i. ’Ua tupu te hō’ē mea hau atu nō ni’a i te mau ha’api’ira’a nō te piāna. E rave rahi o te mau pīahi tei fa’a’itehia te ’Ēkālesia nā roto i te mau ha’api’ira’a nō te piāna, tei tuatāpapa i muri a’e ra, i te ’evanelia, ’e ’ua fa’aoti ’ia bāpetizohia rātou.

Mai te mea e tūtava tātou ’ia ha’amaita’i ia tātou iho, e nehenehe tā tātou e aupuru ia vetahi’ē nā roto i te anira’a ia rātou ’ia ’āmui mai ia tātou.

Hōho’a

woman preparing food

Hōho’a nā Jonas Rebicki

Hō’ē tāpura ’ohipa manuia nō te aupurura’a

’Ei peresideni nō te Paraimere titi, ’ua ’ite o Sabrina Simões Deus Augusto nō Curitiba, Beresiria, e mea nāhea te mau tuha’a fa’ahotura’a i te ta’ata iho o te fa’anahora’a, i te ha’amaita’i i te mau tamari’i ’e i te feiā ’āpī i roto i tāna titi. ’Ua ’ite ato’a rā ’oia e rave rahi rāve’a nō te fa’a’ohipa i te mau mea tāna i ha’api’i mai nō ni’a i te fa’ahotura’a i te ta’ata iho i roto i tāna ’ohipa tuahine aupuru.

’Ua parau te tuahine Augusto, « ’Ia fa’ahotu ana’e au i te hō’ē tāreni, e nehenehe au e fa’a’ohipa i te reira tāreni nō te ha’amaita’i i te hō’ē ta’ata tā’u e aupuru ra ».

’Ua ha’api’i te tuahine Augusto i te hō’ē o te mau tuahine i fa’ata’ahia nāna e aupuru, nāhea ’ia hāmani i te truffles totora. I teie nei, te hāmani nei te reira tuahine i te mau truffles nō te ho’o, ’ia roa’a mai te tahi moni nō te ’utuāfare. Te parau ra te tuahine Augusto, « Tau ’āva’e i muri a’e, ’ua ha’amaita’ihia vau i te ha’api’ira’a mai te tahi atu tuahine iā’u nāhea ’ia hāmani i te faraoa meri tā’u e nehenehe e ho’o » « Te fa’ahotura’a ’e te fa’a’itera’a i tō tātou mau tāreni, e nehenehe te reira e ha’amaita’i i te orara’a o te tahi ’e te tahi ’e e fa’ahōhonu i tō tātou mau auta’atira’a ’ei mau tuahine aupuru ».

Nāhea te fa’anahora’a a te mau tamari’i ’e te feiā ’āpī e nehenehe ai e tauturu ia ’outou ’ia aupuru ?

’A ani ia vetahi’ē ’ia ’āmui mai i roto i te fa’anahora’a a te mau tamari’i ’e te feiā ’āpī.

E nehenehe ’outou e ani i te mau ’utuāfare o te feiā ’āpī ’e te mau tamari’i tā ’outou e aupuru ra ’ia ’āmui mai i roto i te fa’anahora’a a te mau tamari’i ’e te feiā ’āpī. E nehenehe rātou e ’ana’anatae ’ia ’āmui mai i roto i te mau fa’a’oa’oara’a, te fa’ahotura’a o te ta’ata iho, ’aore rā, i roto i te mau tuha’a tuatāpapara’a ’evanelia o te fa’anahora’a. (Nō te tahi atu mau ha’amāramaramara’a nō ni’a i te aupurura’a nā roto i te Mai, pe’e mai ’a hi’o « Te aupurura’a nā roto i te Mai Pe’e mai, » i roto i te Liahona nō Setepa 2020)
Pāturu i tā rātou mau ’ōpuara’a.

’Ei taea’e ’aore rā, tuahine aupuru nō te mau ’utuāfare e feiā ’āpī tō roto, tei ia ’outou ïa te ti’ara’a nō te pāturu i te mau ’ōpuara’a tā rātou e rave ra i roto i te fa’anahora’a a te mau tamari’i ’e te feiā ’āpī. Noatu ē, nā rātou iho tā rātou mau ’ōpuara’a, mai te mea ē, ’ua ’ite ’outou i te mau mea e ’ana’anataehia e rātou, e nehenehe ’outou e pūpū i tā ’outou tauturu i roto i te mau rāve’a e rave rahi. E nehenehe te reira e ravehia nā roto i te ’imira’a i te mau ’ohipa tā rātou e ’imi ra, e ha’avā i tā rātou hāmanira’a faraoa monamona, ’aore rā, ’ia riro ’ei tino arata’i i roto i te hō’ē tuha’a tā ’outou i ’ite maita’i. ’Ua ’ite ānei ’outou e nāhea ’ia taui i te hinu i roto i te hō’ē pere’o’o uira ? ’Ia tifaifai i te ’ahu mahaehae ? E mea ’aravihi ānei ’outou i roto i te uiuira’a nō te tihēpura’a ’ohipa ? E nehenehe ’outou e pūpū nō te fa’a’ite i tō ’outou ’ite ’aore rā, tō ’outou ’aravihi mai te mea ē, e ’ana’anatae rātou.
’A ani ia vetahi’ē ’ia ’āmui mai i roto i tō ’outou iho fa’ahotura’a.

’Aita te fa’ahotura’a i te ta’ata iho i fa’ata’a-noa-hia nō te mau tamari’i ’e te feiā ’āpī. E nehenehe ’outou iho e ’āmui i roto i te fa’anahora’a, noa atu te fāito o tō ’outou matahiti. Mai te mea e hōro’a ’outou i te taime nō te ha’amaita’i i te tuha’a pae vārua, pae tōtiare, pae tino, ’e pae ferurira’a o tō ’outou orara’a, e ineine maita’i a’e ïa ’outou nō te aupuru i te ta’ata, noa atu o vai te ta’ata tā ’outou e fārerei. ’E mai ia Prophet i Ghana, e nehenehe ’outou e ha’amaita’i ia vetahi’ē nā roto i te anira’a ia rātou ’ia ’āmui mai ia ’outou, nō te fa’anaho ānei i te mau ha’api’ira’a nō te ha’uti i te piāna, nō te haere ānei i te hō’ē ha’api’ira’a yoga, ’aore rā, nō te ha’api’i ’āmui mai ānei i te hō’ē reo.
Fa’ariro i te aupurura’a ’ei ’ōpuara’a.

’A feruri ’ia hōro’a i te taime i te mahana tāta’itahi nō te aupuru. Nā roto ānei i te hāponora’a i te hō’ē parau poro’i, ’aore rā, te tāpe’ara’a ānei i te fare nō te hi’o e aha te huru, ’aore rā, te fa’atupura’a ānei i te hō’ē putuputura’a. E nehenehe ato’a te ravera’a i te taime nō te fa’anaho i te mau ’oro’a mahana fānaura’a o te feiā tā ’outou e aupuru, ’aore rā, te pe’era’a ia rātou i ni’a i te mau tūreiara’a sotiare nō te ’imi ē, e aha tā rātou e ’ana’anatae ’aore rā, i rave ’aita i maoro a’e nei. ’Ia rave ana’e tātou e pae noa a’e minuti nō te feruri i te mau hina’aro o te tahi atu ta’ata, e nehenehe te reira e hōro’a mai i te mau mana’o fa’auruhia o tē nehenehe e fa’atupu i te ta’a-’ē-ra’a.