Mau hōho’a nō te fa’aro’o
Sakiusa ’e o Salote Maiwiriwiri
Suva, Fiti
E mea fifi nō’u ’ia ti’aturi i te hau ’e te ’oa’oa tā’u i ’ite i roto i te fare o Maiwiriwiri. Noa atu ē, e piti tā rāua nā tamari’i tei pohe, te ora nei rāua i tō rāua orara’a ma te ’oa’oa ’e te fā i te mau mahana ato’a.
Leslie Nilsson, taʼata pata hōhoʼa
Salote :
E piti matahiti i muri a’e i te pohera’a tā māua tamaiti o Esa i te ma’i māriri ’aita’ata, ’ua pohe tā māua tamāhine i te ma’i ira tuiroro. I roto i te hiero, ’ua tupu te mana’o pūai i roto iā’u ’ia paraparau i te hō’ē tuahine misiōnare pa’ari i reira tei mo’e ato’a e piti tamari’i tau matahiti nā mua atu. ’Ua parau mai ’oia iā’u, « mai te mea e fa’ariro ’oe i tō ’oe ’utuāfare ’ei vāhi mo’a, e nehenehe ’oe e ’ite ’e tei reira tā ’oe nā tamari’i ».
’Ua riro mai te reira ’ei fā nā mātou. Te mau mea ato’a tā mātou e rave, nō te fa’ariro ïa i tō mātou ’utuāfare ’ei vāhi mo’a. Te hina’aro nei mātou ’ia ’ite ē, tei pīha’i iho rāua ia mātou.
’Aita māua i ’ite nāhea ’ia aupuru i te tamari’i i ’ō mai i te pāruru. Terā rā, mai te mea e ’imi tātou i te mau rāve’a ato’a nō te ora ma te parau-ti’a, te ti’aturi nei māua ē, e ’ite rātou i tā tātou mau tauto’ora’a. I roto i tā mātou mau purera’a, e fāri’i poupou mātou ia Esa ’e o Esalynn nā roto i tō rāua i’oa.
I roto i tō mātou fare, noa atu ē, e tupu te tahi mārōra’a, e tāmata mātou i te fa’a’āfaro ’oi’oi i te reira. Te hina’aro nei mātou ’ia vai noa tō mātou fare ’ei vāhi mo’a mai te mea e nehenehe. ’A rave ai mātou i te reira, ’ua fāri’i mātou pā’āto’a i te mana’o ti’aturi ’e te fa’aorara’a ’e te here.
Sakiusa :
Nā roto i te mo’era’a o Esa ’e o Esalynn, i te pae hope’a, ’ua ha’afātata te reira i tō mātou ’utuāfare. Te paraparau ’āmui nei māua ’e te tahi atu mau tamari’i tā māua. Te haere nei mātou i te hiero ’ei ’utuāfare. Te ora nei mātou i tō mātou orara’a ma te ’ōhie, mai te mea e nehenehe, ’e te mā’iti nei i te ’ā’au mēhara i te mau mahana ato’a. Ia paraparau ana’e mātou nō ni’a i te aura’a ’ia tā’atihia ’ei ’utuāfare i roto i te hiero, e riro mai te reira tā’atira’a ’ei ’ohipa ora i roto ia mātou. ’E nā roto i teie mau mea ato’a, e ’ite mau māua ’e tei reira tā māua mau tamari’i.
Hō’ē o te mau mea mātāmua tā māua i rave nō te fa’ariro i tō māua fare ’ei mea mo’a a’e, o te ha’amatara’a ïa i te tai’o i te Buka a Moromona i te mau mahana ato’a. I te ha’amatara’a, ’ua fa’a’ite māua i te mau ’ā’amu ’e te mau hōho’a nō te Buka a Moromona, nō tā māua mau tamari’i ’āpī a’e. I muri iho ’ua fa’a’ite māua i te mau hōho’a video. I teie nei e rahi a’e tā mātou tai’ora’a i te Buka a Moromona. E nehenehe tā’u e fa’a’ite pāpū i te mana o te Buka a Moromona.
E nehenehe ato’a tā’u e fa’a’ite pāpū i te mana i roto i te fa’anahora’a nō te fa’aorara’a. I tō mātou fa’anahora’a i te ’oro’a hunara’a nō Esa ’e nō Esalynn, ’ua fa’aoti mātou ’eiaha e rave mai tei mātarohia i roto i te peu tumu nō te fenua Fiti. O vau ana’e ’e tā’u vahine tei paraparau, ’e ’ua paraparau māua nō ni’a i te fa’anahora’a o te fa’aorara’a. E rave rahi o tō māua mau fēti’i tei tomo mai i roto i te ’Ēkālesia i muri a’e i tō rātou fa’aro’ora’a i teie mau parau mau i roto i te ’oro’a hunara’a.
’Ua ha’api’i o Sakiusa i tōna ’utuāfare ē, ’aita e ho’ira’a i muri i roto i te orara’a, e haere-noa-ra’a i mua. ’Ua parau ’oia ē, « I te mau mahana ato’a, e haere noa tō tātou maita’i i te rahira’a ». E ora rātou i tō rātou orara’a ma te ’ōhie, ’e e fa’atumu rātou i ni’a i te ’ā’au mēhara.
E ’itehia ia Salote te ’oa’oa rahi i roto i te hōro’ara’a i te taime nō tāna mau tamari’i ’e nō te ha’api’ira’a ia rātou i te ’evanelia.
E ’itera’a pāpū pūai tō te ’utuāfare Maiwiriwiri nō tō rātou tā’ati-ra’a-hia i roto i te hiero. Te tāpe’a nei rātou i teie mau parau mau i pīha’i iho i tō rātou māfatu ’ia ha’amana’o ana’e rātou ia Esa ’e o Esalynn.
’A fa’atumu ai rātou i ni’a i te orara’a ’ōhie ’e te haerera’a i mua, ’ua ’itehia i te ’utuāfare Maiwiriwiri te ’ā’au mēhara nō tō rātou mau ha’amaita’ira’a i te mau mahana ato’a. « Te māuruuru nei mātou nō te mau mea tei roa’a ia mātou » te parau ïa a Sakiusa.