Tā Marta tāvinira’a i te mau mahana ato’a
Tē fa’aitoito nei teie māmā ’e te tamāhine ’ia ora ’āmui i te ’evanelia. E e ti’a ia Marta ’ia ora i te ’evanelia nā roto i te tāvinira’a i tōna mā’a nā roto i te mau rāve’a ta’a ’ē mau.
Hōho’a nā Leslie Nilsson.
11 matahiti tō Marta nō te fenua Potiti, ’e mai te mau tamāhine e rave rahi o tōna matahiti, e mea au nāna ’ia haere nā muri iho i tōna mau hoa, ’ia ’amu i te mā’a, ’e ’ia ha’uti i tāna mau pēpē ha’avare. E mea au ato’a nāna ’ia fa’aea i pīha’i iho i tōna māmā. Terā rā, te orara’a i pīha’i iho i tōna māmā, te aura’a ra, e mea ta’a ’ē ri’i te orara’a ’o Marta ’ia fa’aauhia i tō te tahi atu mau tamari’i.
’Ua fānauhia te māmā o Marta, ’o Sonia, ma te hō’ē ha’aparuparura’a o te tino, nō reira, e mea fifi ri’i nōna ia hāre. ’Aita tōna tino tā’āto’a i paruparu, e titau rā ’oia i te hō’ē pere’o’o haerera’a nō te hāhaere. ’Aita tāna e nehenehe e fa’anehenehe iāna iho, e hopu iāna iho i te pape, ’aore rā, nāna iho e ta’uma i ni’a i te ro’i. Nō reira, e mea fifi roa nōna ’ia ora ’oia ana’e iho. ’Ua ti’a ’ia Marta ’ia tāvini ia Sonia nō te mau matahiti i ma’iri a’e nei nā roto i te tāuturura’a iāna i roto i te mau mea e’ita ’ōna iho e nehenehe e rave.
« E vai mā noa tō’u mau vāhi fa’aeara’a ’ia nehenehe i tō’u māmā ’ia orihaere ma te ’ōhie » te parau ïa a Marta. « E fa’afa’aea ato’a vau i te ha’uti, ’ia nehenehe iā’u ’ia hi’ohi’o i tō’u māmā ’e ’ia hi’o ē, te hina’aro ra ānei ’oia i te tauturu. Mai te mea ē, te ha’uti ra vau a pi’i mai ai ’oia, e haere ’oi’oi au nō te mea e nehenehe ē, e ’ohipa rū ».
Terā rā, te tāmata nei ’o Sonia i te vaiiho ia Marta ’ia ora mai tei mātarohia, ia au i tē ti’a iāna. Mai te mea ē, ’aita ’o Sonia e tītau i te hō’ē tauturu, e ha’apāpū ’oia ē, e taime tō Marta nō te ha’uti ’e tōna mau hoa.
Te orara’a i tō rāua fa’aro’o
E taime tō Marta nō te ora i te ’evanelia i te mau mahana ato’a nā roto i te tāvinira’a i tōna māmā. Te rave nei ’oia e rave rahi mau hōpoi’a ’aita i mātarohia e te tahi atu mau tamari’i ’ia rave. ’Ei hi’ora’a, e ti’a ’oi’oi ’oia i ni’a i te po’ipo’i nō te tauturu i tōna māmā ’ia fa’aineine iāna nō te ’ohipa hou te ha’api’ira’a. Ahiri ’aita te tauturu a Marta, ’aita ïa e ti’a ia Sonia ’ia orihaere ’aore rā, ’ia haere i te ’ohipa i te mau mahana ato’a.
E haere ’āmui ato’a o Marta e o Sonia i te purera’a. ’Ua bāpetizohia o Sonia i te va’ura’a tōna matahiti, nō reira, ’ua pa’ari o Marta i roto i te ’Ēkālesia. Te ha’api’i nei o Sonia ia Marta i te faufa’a o te ’evanelia i te mau mahana ato’a. Te hō’ē rāve’a tāna nō te rave i te reira, o te piara’a ïa e rave rahi hōho’a nō Iesu Mesia i roto i tō rāua fare.
’Ua parau o Sonia ē, « ’Ua ’ite au ē, te ora nei te Atua ’e te vai mau nei o Iesu Mesia ». « ’E te hina’aro nei au i te mau ta’ata ato’a e haere mai i tō’u fare ’ia ’ite ē, e mea faufa’a roa te fa’aro’o nō’u. E mea faufa’a ato’a nō’u ’ia ha’api’i i te reira ia Marta, ’ia tupu ho’i ’oia i te pa’arira’a i roto i te reira ’itera’a nō Iesu Mesia ».
’Ua rave o Marta i te mau mea tā tōna māmā i ha’api’i iāna ’e te tāmau noa nei ’oia iho i te ha’api’i mai nō ni’a i te ’evanelia. Hō’ē rāve’a au roa nāna nō te ha’api’i mai ’oia ho’i, nā roto ïa i te tai’ora’a i te mau pāpa’ira’a mo’a, o tē tauturu iāna ’ia ha’amau i te hō’ē auta’atira’a pa’ari ’e te Metua i te ao ra ’e te Fa’aora. « Ia tai’o ana’e au i te mau pāpa’ira’a mo’a, e ’ite au ē, tei pīha’i iho te Mesia iā’u » tāna ïa parau.
’Imi i te tāmāhanahanara’a
Noa atu ē, e mea fifi ’ia fāri’i e rave rahi hōpoi’a, nā roto rā i te haerera’a i te purera’a i te hepetoma tāta’itahi, ’ua tauturu te reira ia Marta ’ia ’imi i te tāmāhanahanara’a i tītauhia e ana nō te tauturu tāmau noa i tōna māmā. « ’Ia fa’aoti ana’e rātou i te mau pure i te ha’amatara’a ’e i te fa’aotira’a o te purera’a ’oro’a, e mea hau roa » tāna ïa parau. « ’Ia tae ana’e au i reira, i te tahi taime, e au ē, te parau maira te Metua iā’u ē, e ta’ata maita’i au, ’e e ti’a iā’u ’ia tāmau noa i te riro ’ei ta’ata maita’i nō te tauturu i tō’u māmā ».
I te mau taime ato’a e feruri ’oia mai te reira, e ha’amana’o ’oia i tōna māuruuru nō tōna māmā. E feruri ’oia ē, ’ua tono mai te Metua i te ao ra i te mau melahi nō te pāturu iāna. « Tē mana’o nei au ē, e ha’apūai ’oia iā’u ’ia ti’a i ni’a ’e ’ia ’oa’oa ’e ’ia te’ote’o nō tō’u māmā » te parau ïa a Marta.
Hō’ē o te mau ha’api’ira’a tā Sonia ’e o Marta i ha’api’i ’āmui mai, ’oia ho’i, e ’ere te orara’a i te mea ’ōhie ’aore rā, i te mea maita’i hope roa— nō te mau huru ta’ata ato’a. Tē parau ra o Sonia ē, « ’Aore hō’ē o tō’u mau fifi e fa’atupu i te ’oto iā’u. ’Ua ’ite au ē, ’ua hōro’a mai te Atua iā’u i teie i’o ’e te toto ’e te mau ivi mai teie te huru nō te mea e mea ta’a ’ē au, ’e ’ua parau mai te Atua iā’u ē, e mara’a te reira iā’u. Te rave nei au i te maita’i roa e mara’a iā’u. E nehenehe tā’u e rave hau atu ā, terā rā, i teie mahana, ’ua nava’i terā no’u. Tē te’ote’o nei au i te mea tā’u e rave nei, i te mea tei fāri’ihia e au, ’e i te mea tā’u e rave ananahi ».
Te ’ite ato’a nei o Marta ē, e maita’i te mau mea ato’a, noa atu ē, e nehenehe te orara’a e fifi roa i te tahi taime, a ’atu’atu ai ’oia i tōna māmā. Te ’ite nei ’oia ē, e mea ta’a ’ē te mau tītaura’a a te mau ta’ata ato’a. Te parau nei ’oia ē, « ’aore e ta’ata e orara’a maita’i hope roa tōna » . Terā rā, noa atu tōna iho mau tītaura’a, te ’ite tāmau noa nei o Marta i te mau ’ohipa maita’i i roto i te mau huru tupura’a ato’a— tōna auta’atira’a e tōna māmā te hō’ē hi’ora’a. « E fifi pae tino tō tō’u māmā, terā rā, e mea māramarama roa ’oia i te pae ferurira’a ’e te mana’o o te ’ā’au. E mau hoa maita’i mau māua ».
Te hi’ora’a i mua
Nō reira, e aha tō ananahi nō Marta ’e nō Sonia ? ’Ua parau o Marta, « Tē hina’aro nei au e pārahi noa i pīha’i iho i tō’u māmā, ’oia mau, te hina’aro nei au e fa’aipoipo, e fānau i te tamari’i, ’e e fa’atupu i te hō’ē ’utuāfare. Terā rā, nō te tau i muri nei, mai te mea ē, e nehenehe tā’u, te hina’aro nei au e ho’o mai i te hō’ē fare nō tō’u ’utuāfare ’e nō tō’u māmā, nō te mea, ’aita vau e hina’aro e fa’aatea roa iāna, noa atu nō te hō’ē noa mahana.
E ti’aturira’a maita’i ato’a tō Sonia nō ni’a i te ananahi, ’e e māuruuru ’oia i te mau taime ato’a nō te auhoara’a ’e te here o Marta. « E mea fa’ahiahia i te fāri’ira’a i te hō’ē tamāhine nehenehe roa. E mea nehenehe roa ’ia fāri’i ia Marta i roto i tō’u orara’a. E horo‘a ’oia nō ō mai i te Atua ra. ’Ua fa’aineine ’oia ia Marta ’ia pārahi mai i pīha’i iho iā’u ».