Tō tātou ti’aturira’a, tō tātou māramarama, tō tātou pūai

I tō’u fa’atōro’a-ra’a-hia ’ei ’Āpōsetolo, ’ua parau te Peresideni Monson ē (1927–2018), ’ua tītauhia iā’u ’ia riro ’ei ’ite ta’a ’ē nō te i’oa o Iesu Mesia i te ao ato’a nei. ’Aita vau i ha’afaufa’a ’ore i te reira hōpoi’a. ’Ua tuatāpapa pūai au i te mau pāpa’ira’a mo’a ma te ’imi i te mau i’oa ’e te mau ti’ara’a o te Fatu. Teie mau mea ato’a tā’u e fa’a’ite atu ia ’outou, nō roto mai ïa i te mau pāpa’ira’a mo’a o te fa’aha’amana’o ia tātou i tā tātou tīa’ira’a i roto Iāna.

O ’oia te ti’aturira’a nō Iseraela (Ieremia 17:13), e feti’a po’ipo’i ’ana’ana (Apokalupo 22:16), tīa’i māmoe maita’i (Te Parau Ha’api’ira’a ’e te mau Parau Fafau 50:44), e a’o (Isaia 9:6 ; 2 Nephi 19:6), te Ari’i nō te hau (Isaia 9:6 ; 2 Nephi 19:6),e Fa’aora (Roma 11:26), te māramarama o te ao nei (Ioane 8:12), ’e ’ei tahu’a rahi nō te mau mea maitata’i a muri nei (Hebera 9:11). E pūai rahi tōna nō te fa’aora (Alama 34 : 18 ; Te Parau Ha’api’ira’a ’e te mau Parau Fafau 133:47) ’e tei iāna ra te mana ato’a (Te Parau Ha’api’ira’a ’e te mau Parau Fafau 61 : 1).

Te fa’aurura’a, te tāpa’o ’e te fa’atorora’a i te rima, e mau mea ana’e ïa nō te aroha. Tei reira ’Oia ’ia ’ōti’ati’a tātou ’e ’ia tauto’o nō te haere i mua. ’E mai te mea e he’e tātou, Tōna « māramarama o tē ’ana’ana mai nei i roto i te pouri » (Te Parau Ha’api’ira’a ’e te mau Parau Fafau 6:21) ’ua hau roa atu ïa i te ’ana’ana. Te here nei ’Oia ia tātou i roto i tō tātou mau hora ’ana’ana roa a’e ’e tō tātou mau hora pōiri roa a’e.

Te rirora’a ’ei pipi nā Iesu Mesia e ’ere ïa i te mea māna’ona’o-noa-hia. E mea tāpa’o maita’i-hia Tōna haere’a nā Tōna mau ta’ahira’a ’āvae. Mai te mea e pe’e tātou Iāna, e ha’amata tātou i te here i te mea tāna e here. ’Ia fa’a’āpī ana’e tātou i tā tātou mau fafaura’a iāna i te mau hepetoma ato’a nā roto i te ’amura’a i te ’ōro’a mo’a, e tupu ïa tātou i roto i te ’itera’a nō ni’a iāna ’ei Fa’aora nō te ao nei (Te Parau Ha’api’ira’a ’e te mau Parau Fafau 93:9), te Vārua o te parau mau (Te Parau Ha’api’ira’a ’e te mau Parau Fafau 93:9) ’e te parau (Te Parau Ha’api’ira’a ’e te mau Parau Fafau 93:8).

E tō’u mau hoa here, terā te Fa’aora tā’u i ’ite, ’o tā’u e here nei ’e ’o tā’u e ha’amori nei ma tō’u ’ā’au ato’a. Mai roto roa mai i te hōhonura’a o tō’u vārua te fa’a’ite pāpū nei au nōna ’e nō Tōna maita’i ’e te aroha. Ua fafau mai ’oia, « e mau hoa ho’i ’outou na’u, ‘e e noa’a ia ’outou te hō’ē ai’a i pīha’i iho ia’u nei » Te Parau Ha’api’ira’a ’e te mau Parau Fafau 93:45).

I te mau taime ato’a, o Iesu Mesia te pāhonora’a i te mau fifi ’e i te mau tītaura’a o teie orara’a tāhuti nei. ’Ia hāro’aro’a ana’e tātou i tāna ’ohipa ’e tāna ’ēvanelia, e hōro’a mai tō tātou here ’e tō tātou ti’aturi iāna i te pūai i roto ia tātou.