Te fā o tō’u bāpetizora’a

Hōho’a

man sitting in chapel foyer

Fa’ahoho‘ara’a nā Julia Yellow

’A ora ai au ’ei tamari’i i roto i te mau aroa no te Taipei, Taiwan, ’aore au i ’ite i te hō’ē mea nō ni’a i te mau misiōnare. Nō reira, i te taime mātāmua a fārerei ai au ’ia rāua, ’ua hina’aro rahi au ’ia ’ite i tā rāua parau poro’i. ’Aita i maoro, ’ua tupu te hina’aro rahi i roto iā’u ’ia pe’e i tā rāua mau ha’api’ira’a ’e ’ia fa’a’ohipa i te ’ēvanelia i roto i tō’u orara’a. ’Ua tupu mai tō’u mana’o ē, teie te hō’ē rāve’a e ’ite ai au ē, te vai mau ra ānei te hō’ē Atua.

I roto i te hō’ē ’āva’e, ’ua ha’api’ihia iā’u te ’ēvanelia ’e i te mau fa’auera’a e ha’api’ihia nei nā mua a’e i te bāpetizora’a. ’Ua tae mai te hau i roto iā’u nā roto i te pure, ’ua fāri’i au i tā’u iho heheura’a nā roto i te tuatāpapara’a i te mau pāpa’ira’a mo’a, ’e ’aita roa atu vau i ma’iri i te hō’ē purera’a a te ’Ēkālesia. ’Ua fa’aoti a’era vau ’ia bāpetizohia vau.

Te fifi rahi roa a’e tā’u i fa’aruru i tāua taime ra, o te mau fifi ïa tei tupu mai i roto i tō’u mau auta’atira’a ’e te tahi mau hoa tō’u nō te mea, ’ua pāto’i rātou i tō’u fa’aōra’a i roto i te ’Ēkālesia. Ua pure rahi au nō ni’a i teie mau fifi, terā rā, e au ra ē, ’ua ’ino roa atu tō mātou mau auta’atira’a.

’Ua ani au i tō’u mau hoa ’ia haere mai i tō’u bāpetizora’a, ’aita rā rātou i tau’a noa a’e i tā’u anira’a. ’Aita roa atu vau i ta’a fa’ahou, nāhea rā. Nā mua a’e i tō’u bāpetizora’a, ’ua pārahi au o vau ana’e i ni’a i te tōfa i roto i te piha fa’afa’aeara’a o te fare pure, ma te pure ’ia fā mai tō’u mau hoa mai te au i te hō’ē temeio, ’ia nehenehe iā’u ’ia parau ia rātou nō ni’a i te mau tauira’a maita’i tei tupu i roto i tō’u orara’a, ’e ’ia ha’apāpū ia rātou ē, e fa’aotira’a maita’i ta’u e rave nei nā roto i te fāri’ira’a i te bāpetizora’a.

’Aita roa atu tō’u mau hoa i faura mai, terā rā, a nini’i ai au i tō’u ’ā’au i te Atua, ’ua tupu mai te hō’ē mana’o i roto iā’u. I taua taime ra, ’ua fāri’i au i te hō’ē here rahi nō ’ō mai i tō’u Metua i te ao ra. ’Ua ’ite a’era vau ē, tei reira ’oia, ’e ’ua fa’aro’o pāpū ’oia i tā’u pure.

I te ’ōmuara’a, ’ua hina’aro vau ’ia bāpetizohia vau nō te mau mea nehenehe e tupu ra i roto i tō’u orara’a, terā rā, i taua taime ra, ’ua hāro’aro’a a’era vau i te fā o tō’u bāpetizora’a.

Te mana’o tei tupu mai i roto iā’u, e au ïa mai te reo o te Fatu i te paraparaura’a mai ma te marū ’e te ’āfaro ti’a i ni’a iā’u, i te nā ’ōra’a ē, « ’Aita e tītauhia ia ’oe ’ia fa’a’ite i te ha’apāpūra’a i te ta’ata. Tītau-noa-hia ia ’oe ’ia ha’apāpū mai iā’u ē, ’ua ineine ’oe ’ia haere mai iā’u nei ’e ia ha’apa’o tāmau noa i tā’u ’ēvanelia i roto i te toe’a o tō ’oe orara’a ».◼