Taime tāmā’ara’a mo’emo’e

Hōho’a

Lonely Lunchtime

’Ua tomo atu o Kali i roto i te fare tāmā’ara’a ’e ’ua hi’o haere a’era. ’Ua horo atu te tā’āto’ara’a o te tahi atu mau tamari’i i tō rātou mau hoa ra ’e ’ua putuputu i ni’a i te mau ’amura’a mā’a. E mea māniania te piha i te mau reo pūai ’e te feiā ’ata ’oa’oa. Te piti noa teie o te mahana ha’api’ira’a, terā rā, e au ra ē, pauroa te ta’ata te vai ra tō rātou hō’ē ta’ata e nehenehe e pārahi i pīha’i iho, ’eiaha rā o Kali.

’Ua u’umi ’oia i tāna āfata fa’ari’i mā’a ’e ’ua haere atura i ni’a i te hō’ē o te mau ’amura’a mā’a. « E nehenehe ānei au e pārahi i pīha’i ia ’oe » ? Te anira’a ïa a kali.

’Ua hi’o maira hō’ē tamāhine rouru ravarava fifihia i ni’a. « ’Ua māpu ’oia i te aho ’e tā’iri’iri a’era i tōna upo’o. « ’Aita. ’Ua riro », tāna ïa parau.

« OK » ’Ua fa’anu’u o Kali i te tahi atu pārahira’a vata ’e ’ua tu’u i tāna āfata fāri’i mā’a i raro.

« E’ita tā ’oe e nehenehe e pārahi i ’ō nei ! Te tāpe’a nei au i te reira pārahira’a », te reo ïa o te hō’ē tamaiti ’ahu toretore matie. ’Ua tūra’i a’era ’oia i te fa’ari’i mā’a a Kali i ni’a i te tahua. Pauroa tōna mau hoa i te atara’a.

’Ua pi’o a’era o Kali i raro ’e ’ua ’ohi fa’ahou maira i tāna fa’ari’i mā’a. ’Ua haere atura ’oia nā roto i te piha tāmā’ara’a ’e ’ua pārahi i ni’a i te hō’ē ’amura’a mā’a ta’ata ’ore. ’Ua ’ite atu ’oia i te hō’ē ta’ata nō te vāhi e fa’aeahia ra e ana ’e’ua tāmata i te tārape iāna, ’ua fāriu ’ē atu rā ’oia. ’Ua tu’atu’a te mata o Kali. Nō te aha ’aita hō’ē ta’ata e hina’aro ’ia riro ’ei hoa nōna ?

’Ua hi’o o Kali i tāna mā’a. ’Aita ’oia i hina’aro fa’ahou e ’amu. ’Ua tāmarō ’oia i tōna nā mata, ’ua tāpiri i tāna āfata fa’ari’i mā’a, ’e ’ua haere atura i rāpae.

’Ua ha’amata a’e nā te mau ta’ata ato’a i te ha’uti ’e tō rātou mau hoa. ’Ua pārahi o Kali ’ōna ana’e i ni’a i te hō’ē pārahira’a ’a hi’o noa ai i te tahi atu mau tamari’i ’ia ha’uti, ’aita ’oia. I muri iho ’ua ’ite atura o Kali i te hō’ē tamaiti fātata mai iāna ato’a te pa’ari, te pārahi ra ’ōna ana’e i ni’a i te aihere. E ’ahu re’are’a tafetafeta tōna, e te rouru taratara i muri.

’Ua fāriu ’ē o Kali. ’Ua ’ite atu ’oia i te hō’ē pupu tamāhine nō tāna piha ha’api’ira’a te ha’uti ra i te ha’uti foursquare. Ua hina’aro ’oia ’ia ani ato’a mai rātou iāna ’ia ha’uti e o rātou.

’Ua hi’o fa’ahou o Kali i ni’a i te tamaiti. ’Ua tārere tōna upo’o, ’e te ’ohi ra ’oia i te aihere nā pīha’i iho i tōna nā ’āvae. ’Ua ha’amana’o a’era o Kali i te hō’ē mea tā māmā e parau i te tahi taime : a ’imi i te mau tamari’i o rātou ana’e.

’Ua tu’atu’a te mata o Kali. ’Ōna ana’e iho ato’a. ’Aita hō’ē ta’ata e tāmata ra ’ia riro ’ei hoa nōna !

Terā rā, i muri iho, ’ua feruri a’era o Kali i te taime a bāpetizohia ai ’oia i te matahiti i ma’iri a’e nei. ’Ua fafau ’oia e fa’aro’o i te Vārua Maita’i. Te tauturu nei paha te Vārua Maita’i iāna ’ia ha’amana’o i te mea tā māmā i parau iāna. Te tāmata nei paha te Vārua Maita’i i te parau iāna ’ia ha’uti e te tamaiti e ’ahu re’are’a tōna.

’Ua māpu o Kali i te aho, ’e ’ua ti’a maira i ni’a. ’Ua tupu te māhanahana i roto i tōna ’ā’au. ’Ua haere ’oia ’e ’ua pārahi i pīha’i iho i te tamaiti i ni’a i te aihere.

Nā ’ō atura ’oia, « E ».

Pāhono mai nei ’oia « E ».

« E aha tā ’oe ’ū au roa » ?

« Um… matie. »

« ’Aita’tu ai. Mea au na’u te tārona » te parau ïa a Kali. « Tē vai ra tā ’oe ’ānimara au roa » ?

’Ua pārahi ha’apāpū maira te tamaiti ’e hi’o mai nei iāna. « ’Ē . Mea au roa nā’u te mo’o rarahi roa ».

« Ooh, o vau ato’a. Tā’u mea au roa, o te triceratops ».

’Ua ’ata ri’i te tamaiti.

I muri iho ’ua ta’i te ōe. ’Ua ti’a o Kali i ni’a ’e ’ua nāna i te tamaiti. ’Ua ’ata’ata ’oia ’a haere ai ’oia i tāna piha ha’api’ira’a ’ōna ana’e. ’Aita paha tōna e hoa rahi, terā rā, ’ua ’oa’oa ’oia ’ia ’ite ē, ’ua ha’amaita’i ’oia i te taime fa’afa’aeara’a o te hō’ē ta’ata.