Fakatahataha Mai ʻa e Toʻu Tupu ʻo Tahití (French Polynesia) Hili ha Ngaahi Māhina ʻo e Mavahevahé

ʻI he konga kimuʻa ʻo e 2020, ʻi he kamata ke tūʻuta ʻa e mahaki fakaʻauhá ʻi Tahití, naʻe kole ʻe he kau taki fakapuleʻanga mo faka-Siasi fakatouʻosi ki he ngaahi fakatahaʻangá ke taʻofi ʻa e ngaahi fakataha femataaki mata ki he matá.

Ko e ngaahi fakatahaʻanga fakalotofonua ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku ui ko e ngaahi uooti, naʻe fakalotolahiʻi kinautolu ke nau fai ha poupou ki he ngaahi fāmilí mo ha niʻihi fakafoʻituitui kae lava ke hokohoko atu hono ako mo moʻui ʻaki ʻe he kakaí ʻa e ongoongoleleí ʻi ʻapi.

ʻI Sepitemá, ne liliu ai ʻe he Kau Palesitenisī ʻUluaki ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa e ngaahi fakahinohino ko ia ke tokoniʻi e kau taki ʻo e Siasí mo e kāingalotú ke nau foki ʻo lotu mo toe fakahoko lelei atu e ngaahi ʻekitivitií lolotonga e mahaki fakaʻauha COVID-19.

Naʻe tali he taimi pē ko iá ʻe he Uooti Faanuí, ʻo e Siteiki Bora Bora Tahití, ʻa e fokotuʻu ko ʻení ke toe hoko atu e ngaahi ʻekitivitī maʻá e fānaú mo e toʻu tupú ʻi he ʻaho Tokonaki, 19 ʻo Sepitemá. Naʻe fokotuʻutuʻu e ngaahi ʻekitivitií ʻe he toʻu takitaha.

Ko e Palaimelí, ki he fānau taʻu 3-11, naʻa nau fakatahatahaʻi ha ʻekitivitī ngāue taimi lōloa ʻo muimui ʻi he naunau fakalēsoni ako ʻa e Siasí ki he lēsoni ako kotoa ʻo e ongoongoleleí, ʻoku ui ko e “Muimui ʻIate Aú.”

Naʻe pehē ʻe Mahealani Tetuanui, ko ha taki ʻi he houalotu ʻa e fānaú, “Hili ha māhina ʻe ono ʻi ʻapi, naʻá ma loto ke mau lave ki he meʻa kotoa pē kuo ako ʻe he fānaú fekauʻaki mo e Tohi ʻa Molomoná talu mei he kamataʻanga ʻo e taʻú, ʻo tatau ai pē pe ʻi he Palaimelí pe ʻi honau ngaahi ʻapí.”

Naʻe ui ʻa e ʻekitivitií ko e “Lue ʻaki Hoʻo Tuí” pea ko e lue lalo ʻi Faanuí naʻe kilomita ʻe ua. ʻI heʻenau fonongá, naʻe pau ke kumi he kulupu takitaha ha fanga kiʻi pōpoaki, lavaʻi ha ngaahi palopalema, pea mo tali e fehuʻi ʻe 20.

Naʻe pehē ʻe Cinthias Shan, ko e Palesiteni Palaimelí: “Naʻe fiefia moʻoni e fānaú ʻi heʻenau fakataha hili ha taimi lōloa ʻo e ʻikai fai ha felāveʻí. Pea fekauʻaki mo e Tohi ʻa Molomoná, naʻa nau fakatokangaʻi ʻa hono mahuʻinga ke te ʻalu mo ia ʻi hono fakaleleiʻi ʻenau ngaahi palopalemá ʻi he lova kotoa pē, kae pehē foki ki heʻenau moʻui fakaʻahó.”

Ko e polokalama ʻa e Kau Finemuí, ki he taʻu 11–18, naʻe fakangofua e fakataha alēlea ʻa e toʻu tupú ke nau fakakaukauʻi e meʻa ʻoku nau fie fakahokó, pea fokotuʻu ʻe Anahei Sungi, ko e Palesiteni ʻo e kalasí: “Ne mau pehē ke mau tokoni ki he kau mēmipa kotoa ʻo ʻemau kulupú pea fakaafeʻi kotoa mai ʻemau kau finemuí ke teuteu ha ngaahi pisa mo e pai pea ʻave kinautolu ki he kāingalotu māmālohí.”

Naʻe pehē ʻe Tetinia Teriirere, ko e Palesiteni Kau Finemuí: “Ko ʻemau taumuʻá ko ha pisa ʻe tolu mo ha pai ʻe tolu ka ʻi he fakaʻosí naʻa mau ngaohi ha pisa ʻe 12 mo ha pai ʻe fitu ʻi hono maʻu ʻe he kau finemuí ʻa e loto-vēkeveké.” Hili ʻemau maʻu fiefia e pisa mo e pai ʻi he ʻaho ko iá, naʻe toe maʻu foki ʻe he finemui takitaha ha pisa pe ko ha foʻi pai ke ʻalu mo ia ki ʻapi. Naʻe fili ha niʻihi ke vahevahe e meʻa naʻa nau maʻú.

Ne hoko atu atu ʻa Tetinia ʻo pehē, “Naʻe foaki ʻe ha taha ʻo kinautolu ʻene pisá ki he kau fafine ngāue fakafaifekaú, pea foaki ʻe ha niʻihi ki ha kau finemui ʻi ha ngaahi fāmili māmālohí. Naʻa nau fiefia ke toe fengāueʻaki pea naʻe lelei ʻaupito ke toe feʻiloaki mo vahevahe mo e niʻihi kehé.”

Ko e Houalotu ʻo e Kau Talavoú, ki he taʻu 11–18, naʻa nau ngāue ʻaonga ʻaki ʻa e foki ko ʻení ki he ngaahi ʻekitivitī ki hono fakamālohia ʻa e vā fetuʻutaki ʻi he kulupú. Naʻe fai ʻa e fakaafe ki he kau talavoú kotoa ki ha papakiu ke fakafiefiaʻi ʻaki e “foki ki he ngaahi ʻekitivitií” pea pehē ki he ʻaho fāʻeleʻi ʻo e kau talavou mei Māʻasi ki Sepitemá.

Kia Pīsope Tom Teriirere, “Naʻe mahuʻinga ʻa e fakatahá ke fetuʻutaki ai mo e kau talavoú ʻi ha founga fakakaungāmeʻa, pea mo fakakaukau fakataha ki he meʻa te nau fai ke tokoniʻi ʻa e toʻu tupú ke nau kei mālohi mo ofi ange ai ki he ʻEikí.”