“ʻOku ʻOmi ʻe he Fakamoʻuí ha ʻAmanaki Lelei Kiate Kitautolu,” Liahona, Sune 2022.
ʻOku Talitali Lelei Kimoutolu ki he Makasini ko ʻEní
ʻOku ʻOmi ʻe he Fakamoʻuí ha ʻAmanaki Lelei Kiate Kitautolu
Laʻitā mei he Getty Images
ʻI heʻeku hoko ko ha tokotaha faifaleʻí, ʻoku fehuʻi mai maʻu pē kiate au, “ʻOkú ke saiʻia moʻoni ʻi hoʻo ngāué? ʻIkai ʻoku fie maʻu ke ke fanongo ki he mamahí, molé, mo e loto-mamahí?” Neongo ʻoku moʻoni ʻoku ou ʻaʻeva ʻi he fakapoʻulí mo kinautolu ʻoku ou tokoniʻí, ka ʻoku ʻikai ke mau nofo ai. ʻOku ou maʻu ʻa e faingamālie ke mamata ki he liliu ʻenau moʻuí ʻo fakafou ʻi he mālohi ʻo e Fakamoʻui ko Sīsū Kalaisí, tautautefito kiate kinautolu ʻi he polokalama fakaakeake mei he maʻunimaá (vakai, peesi 12).
Neongo ʻe lava ke taulōfuʻu ʻa e ngaahi faingataʻa lahi ʻoku tau fehangahangai mo iá, ka ʻoku ʻomi ʻe he Fakamoʻuí ha ʻamanaki lelei—ko ha ʻamanaki lelei te tau lava ʻo maʻu ha nonga ʻi he lotolotonga ʻo ʻetau ngaahi faingataʻaʻiá mo e ʻamanaki lelei te tau lava pea ʻe fakamoʻui kitautolu.
Ko e founga ʻe taha ʻoku tokoniʻi ai ʻe he ʻEikí kitautolu ke tau maʻu ʻa e melinó mo e malú ʻoku fakafou ʻi Heʻene palōfitá (vakai, peesi 4). ʻOku fakafou ʻiate ia ʻa hono ʻomi ʻe he ʻEikí ha faleʻi mo ha fakahinohino fekauʻaki mo e ngaahi faingataʻa ʻoku tau takitaha fehangahangai mo ia ʻi hotau kuongá. Kuo tāpuekina fakafoʻituitui au ʻi heʻeku tokanga ki he faleʻi ʻa Palesiteni Lāsolo M. Nalesoní ʻo hangē ko ʻene poupouʻi kitautolu ke fakatupulaki ʻetau malava ke maʻu ha fakahaá, tuku ke lāngilangiʻia ʻa e ʻOtuá ʻi heʻetau moʻuí, pea maʻu ha fiefia ʻi he fakatomala fakaʻahó.
ʻOku tau fie maʻu lahi ange he taimí ni ʻi ha toe taimi kimuʻa ʻa e fakahinohino ʻa e ʻEikí ke ikunaʻi mo matuʻuaki e ngaahi faingataʻa lahi ʻoku tau fehangahangai mo iá. Tatau ai pē pe ko e hā e faingataʻa ʻokú ke fehangahangai mo iá, ko ʻeku lotú ke ke maʻu ha ʻamanaki lelei ʻi he Fakamoʻuí mo ongoʻi ʻEne ʻofa kiate koé.
Benjamin Erwin
Pule ʻi he Polokalama Fakaakeake mei he Maʻunimaá