Fakakomipiuta Pē
Ko ʻEku Lotua ha Piisi mo e Pea
ʻOku nofo ʻa e tokotaha naʻá ne faʻú ʻi ʻOlikoni, USA.
Naʻe tali ʻe he Tamai Hēvaní ʻeku lotú hili ha ngaahi māhina lahi mei heʻeku kolé.
ʻI he ngaahi taʻu kuo hilí, ʻi heʻeku kei nofo mo hoku husepānití ʻi ʻapi mo ha toko ono ʻo ʻema fānaú, naʻe ʻi ai foki homa ʻapi naʻa mau tokangaʻi ai e kau mahaki toulekeleka loto ngalongaló. ʻI he taimi ko iá, naʻa mau tō ha ngoue lahi pea fakatolonga ha konga lahi ʻo ʻemau meʻakaí. ʻI ha taʻu ʻe taha naʻe ʻikai ke mau maʻu ai ha piisi pe pea, ʻa ia naʻe manako taha ai homau fāmilí kae lelei tautautefito ki he kau mahaki loto ngalongalo naʻa nau fie maʻu ha meʻakai moluú.
Naʻá ku fakakaukau ke u lotua ʻa e fiemaʻu ko ʻení. Naʻá ku kole ki he Tamai Hēvaní ke tataki au ki ha piisi mo e pea ʻoku maʻamaʻá kapau naʻá Ne ʻafioʻi ne lava ke maʻu. Naʻá ku fakaʻamu ke maʻu ʻa e fuaʻiʻakau ko ia naʻe mei maumaú.
Hili ha ngaahi ʻaho siʻi mei ai, naʻá ku ʻave ʻeku fānaú ki ʻapisiasi ki ha ʻekitivitī ʻa e toʻu tupú. Naʻe fakalea mai ha fefine foʻou ʻi he uōtí mo ʻeke mai pe te u fie maʻu ha piisi momoho. Naʻe toki fakatau pē ʻe hono fāmilí ha ʻapi naʻe lahi ha ʻulu piisi ʻi he loto ʻataʻataá, pea naʻe fokotuʻuna ʻa e fuá ʻo ʻikai ke nau lava ʻo fakaʻaongaʻi. Naʻá ku lava ʻo toli ha ngaahi puha piisi lahi pea fakatolonga ia ʻo ʻikai ha totongi.
Ne ʻosi atu ha ngaahi taimi, pea naʻe ʻikai ke u maʻu ha pea. Ne u pehē loto pē naʻe ʻafioʻi ʻe he Tamai Hēvaní ʻoku ou fuʻu femoʻuekina hono fakahū e fānaú ki he akó mo hono fakatolonga e meʻakai mei heʻemau ngoué pea ʻikai ha taimi ki he peá.
Hili ha ngaahi māhina siʻi mei ai, hili hono toli kotoa e fuaʻiʻakaú, naʻá ku ʻi he loki talitaliʻanga ʻi he ʻōfisi ʻeku toketā huí (chiropractor). ʻI heʻeku tangutu aí, naʻe hū mai ha tangata ʻo kamata talanoa mo e tokotaha talitali kakaí. Naʻá ku ʻohovale ʻi heʻeku fanongo ki heʻene ʻeke ange pe naʻá ne ʻiloʻi ha taha naʻe fie maʻu pea. Naʻe ʻi ai ʻene ʻū puha pea i ha ʻaisi pea naʻá ne fie maʻu ke kumi ha ʻapi ʻoku nau fie maʻú kae tamateʻi e ʻaisí he faʻahitaʻu momokó. Naʻá ku lava ʻo fakatau mai ha ngaahi puha pea lalahi mo fakaʻofoʻofa naʻe taki paʻanga pē ʻe tolu ki he puha—ko ha totongi mātuʻaki maʻamaʻa ʻi hono fakafehoanaki ki he meʻa ʻoku ou totongi angamahení!
Naʻe tali ʻe he Tamai Hēvaní ʻeku lotu ʻi he ngaahi māhina kimuʻá, pea naʻá Ne toe fokotuʻutuʻu foki ke tuku ʻaisi ʻa e peá kae ʻoua kuó u maʻu ha taimi lahi ange ke fakatolonga kinautolu.
Naʻe pehē ʻe ʻEletā Paluki P. Heili ʻo e Kau Fitungofulú ʻi ha lea ʻi he konifelenisi lahí: “ʻOku ʻafioʻi kitautolu ʻe he Tamaí, ʻafioʻi ʻetau ngaahi fiemaʻú, pea haohaoa ʻEne tokoniʻi kitautolú. ʻOku faʻa ʻomi e tokoni ko iá ʻi he taimi pē ko iá pe hili ha taimi nounou mei heʻetau kole ki ha tokoni fakalangí. Ko e taimi ʻe niʻihi ʻoku ʻikai tali ʻetau ngaahi holi angatonu mo vivili tahá ʻi he founga naʻa tau ʻamanaki atu ki aí, ka ʻoku tau ʻilo ʻoku ʻi ai ha ngaahi tāpuaki maʻongoʻonga ange ʻoku fakatatali mai ʻe he ʻOtuá. Pea ko e taimi ʻe niʻihi ʻoku ʻikai foaki mai ʻetau ngaahi holi māʻoniʻoní ʻi he moʻui ko ʻení.”1
Kuo tuʻo lahi hono tali vave ʻeku ngaahi lotú, ka ʻoku ʻi ai ha ngaahi meʻa ʻoku ou lotua fakamātoato he ʻaho kotoa pē ʻoku teʻeki ai ke tali mai. ʻOku fakamanatu mai kiate au ʻi hono manatuʻi e ngaahi aʻusia hangē ko ʻeku lotua ha piisi mo e peá, ʻoku ʻafioʻi au ʻe heʻeku Tamai Hēvaní mo ʻeku ngaahi fiemaʻú pea te Ne tokoniʻi lelei au ʻi ha ngaahi founga ʻokú Ne ʻafioʻi ʻoku lelei taha maʻakú.