Fakavave ki he Temipalé

ʻĪmisi

Temipale Sao Paulo Palāsila

Tā ʻo e Temipale Sao Paulo Brazil naʻe faitaaʻi ʻe Matthew Reier

Lolotonga ʻeku hoko ko ha pīsopé, naʻe kole ʻe heʻemau palesiteni fakasiteikí ki he kau pīsope ʻi homau siteikí ke nau tā ha sīpinga maʻá e kāingalotu honau uōtí ʻaki haʻanau feilaulau ke sila ʻi he temipalé. ʻI he taimi ko iá, naʻe lolotonga faingataʻaʻia fakaʻekonōmika lahi ʻa Polivia. Koeʻuhí ko e hikihiki e feʻamokakí, ʻe kehe e mahuʻinga e koloá ʻi he pongipongí pea hiki ʻo māʻolunga ange ʻi he hoʻataá.

“Te tau lava fēfē ʻo ʻalu ki he temipalé ʻi he taimi ʻoku ʻikai ke tau mei maʻu ai ha meʻakai feʻunga ke kaí?” Ko ʻeku ʻeke ange ia ki hoku uaifi ko ʻAlisá.

Naʻá ne tali mai, “ʻOku ʻikai ke u ʻilo, ka ko e talaʻofa ʻa e ʻEikí te Ne tokonaki [maʻatautolu]” (vakai, Tokāteline mo e Ngaahi Fuakava 118:3).

Neongo homau tūkunga fakapaʻangá, ka naʻá ma fakatou ongoʻi ha fiemaʻu vivili ke ʻalu ki he temipalé. Naʻe hangē naʻe talamai ʻe he Laumālié kiate kimaua, “Fakavavevave, fakavavevave!”

ʻI Tīsema 1981, ko e Temipale Sao Paulo Brazil—ʻa ia ʻoku meimei maile ʻe 2,000 (3,220 km) hono mamaʻó—ʻa e temipale pē ʻe taha ʻi Saute ʻAmeliká. Naʻá ku nō ha $1,000 ke totongi e fononga uike ʻe tahá. Ko ha paʻanga lahi ia, ka naʻá ma ʻiloʻi ʻe ʻaonga ʻa e feilaulaú.

Hili ha fononga pasi lōloa ki he kauʻāfonua ʻo Palāsilá, ne mau heka lēlue ki Sao Paulo. Naʻe ʻikai ha sea ʻe ʻatā ʻi he lēlué, ko ia naʻe pau ai ke mau tangutu ʻi ha vahaʻa sea mo ʻema ongo kiʻi tamaikí. Naʻe siʻi ʻemau meʻakaí, ka naʻe vahevahe mai ʻe ha kakai ne ʻikai ke mau maheni mo kimautolu. ʻI heʻemau aʻu ki Sao Pauló, naʻe meimei pulia homa kiʻi fohá ʻi he tauʻanga lēlué.

Hili e ngaahi meʻá ni mo ha ngaahi faingataʻa kehe, ne faifai pea mau aʻu ki he tauʻanga lēlue ofi ki he temipalé. ʻI heʻemau hū ki tuʻá, naʻa mau lava ʻo sio mamaʻo atu ki he tā tongitongi ʻo e ʻāngelo ko Molonaí ʻi he temipalé. Naʻa mau tūʻulutui ʻo fakamālō ki he Tamai Hēvaní. ʻI heʻemau aʻu atu ʻi ha ngaahi miniti siʻi mei ai, naʻe talitali lelei kimautolu ʻe he palesiteni temipalé.

ʻI he pongipongi ʻo e ʻaho hono hokó naʻa mau maʻu homau ngaahi ouaú pea silaʻi kimaua ko ha ongomeʻa mali mo e fāmili. ʻI he efiafi ko iá, naʻe ʻikai ke mau tomuʻa ʻilo, naʻe tāpuni ʻa e temipalé ʻi he toenga ʻo e taʻú ke monomono.

Kapau naʻa mau tatali ke ʻalu ki he temipalé, naʻe mei fakamole lahi ange ʻemau folaú ʻi he meʻa naʻa mau noó. Kapau naʻa mau aʻu atu ʻi he uike hono hokó, kuo tāpuni ʻa e temipalé. ʻOku mau fakafetaʻi ʻi hono ueʻi kimautolu ʻe he ʻEikí ke mau fakavave ki he temipalé.