Wan Tabu Taem long Laef

Sam yia i pas, taem mi stap givim seves olsem wan bisop, mi bin witnesem wan grup blong yangfala we oli faenaemaot hamas oli impoten mo tabu stamba tingting blong olgeta. Oli lanem se “God i Papa blong yumi, mo prapa fasin blong ona long hem, we hem i luk se i klin gud mo i stret gud i olsem. Man i mas givhan long ol pikinini we oli no gat papa blong olgeta, mo long ol widowoman, long ol trabol we i kasem olgeta.”¹

Tru long ol givhan visit, ol yut ia oli kam blong save Sista Orpha Cutler. Hem i wan naes olfala woman we i gat hat problem mo i stap laef hemwan long wan smol trakhaos. Ol fulap nid blong hem i givim wan gudfala janis long ol yangfala boe blong stap givim seves long hem. Sam long ol aktiviti ia hem i blong wasem ol windo blong hem, klinim trakhaos blong hem, mo blong sidaon nomo long rum blong hem long fored mo visitim hem. Taem i go mo ol yang boe ia oli krietem wan gudfala rilesensip wetem Sista Cutler. Hem i bin winim hat blong olgeta.

Afta wan dei, hem i kasem wan nogud nius. Hem i gat kansa we i bigwan finis mo i gat smol taem nomo blong hem i laef. !Nius ia i nogud tumas! Long hamas wik taem nomo, sik blong hem i kam moa nogud, mo hem i no save kam oltaem long sakramen miting. Ol yang boe ia oli kam ol man blong help long saed blong spirit long Orpha taem oli stap mekem ol givhan visit long hom blong hem mo pasem sakremen long hem. Hem i lavem taem blong hem wetem olgeta, speseli janis ia blong save riniu ol kavenan blong hem.

Taem sik blong hem i stap kam moa nogud, hem i muv i go long wan komiuniti kolosap long wan senta we oli save stap kea long hem mo ol nid blong hem mo long wan ples we wan smol grup i stap kam tugeta evri wik blong tekem sakramen. Wan dei, mi kasem wan kol we i kam long senta ia. Wan wokman i askem sapos bae mi karem ol pris, o olsem long toktok blong Sista Cutler “ol boe”, blong visitim hem mo pasem sakramen long hem. Mi talem long wokman ia se bae mifala i gat ona blong mekem hemia.

Long Sandei, mi talem long ol pris abaot rikwes blong Sista Cutler. Oli no tingting tu mo akseptem invitesen ia.

Afta long ol Sandei miting blong mifala, mifala i go long kea senta ia. Long taem we mifala i stap draev, ol yang boe oli tokbaot ol samting we i stap hapen long spot we i jes pas, ol eksam blong olgeta we i stap, mo afta, oli tokbaot fulap abaot ol yang gel we oli wantem tekem olgeta i go long nekis danis blong skul. Hem i bin wan nomol storian blong ol yangfala.

Taem mifala i kasem senta ia, man we i stap lukaot long Sista Cutler i kam talem halo long mifala long doa. Wota blong ae blong hem i fulap, mo hem i talem kwik se, “Bisop Nattress, paoa blong Orpha i stap go daon fulap we fulap Hem i stap wekap mo silip afta wekap mo silip, !mi fraet bae yumi lusum hem nao!” Hem i gohed mo talem, “Wan samting ia nomo we hem i wantem tumas i blong tekem sakramen.”

Afta hem i lukluk ol yangfala boe we oli stap stanap bihaen long mi. Oli werem ol waet set mo nek tae—ol yang boe blong God we oli klin inaf, we oli holem prishud blong Hem, mo stap givim ona long prishud ia. Oli stap long wok blong Lod. Tru long ol wota blong ae blong hem, wokman ia i talem, “!Yufala i luk olsem ol enjel!” Afta hem i tekem mifala i go long rum blong Orpha.

Orpha i stap long wan situesen we i nogud tumas. Hem i stap silip kwaet nomo long bed blong hem. Mi nildaon long saed blong bed blong hem, mi holem han blong hem, mo talem, “Sista Cutler, hemia hem i Bisop Nattress; mi stap ia wetem kworom blong ol pris. Mifala i kam blong pasem sakramen.” Hem i smael smol mo saksakem hed blong hem blong agri.

Ol pris oli stanap long sep blong wan haf sekol taem oli nildaon raon long bed blong hem. Oli putum wan smol pis bred long wan smol plet. Oli blesem, mo oli putum gud pis bred ia long maot blong hem. Mifala i nildaon bakegen. Afta mifala i blesem wan sakremen kap we i fulap long wota, mo mifala i pasem smol wota long hem.

Hemia i bin wan tabu taem long laef. Taem mifala i klosem odinens ia, Sista Cutler i smael mo i wispa: “Tangkyu.”

Mi lukluk raon long rum long ol naesfala yangfala boe ia. Oli no defren tumas long ol boe blong Hileman. Ol toktok blong Aesaea i talem gud olgeta olsem we oli stap long taem ia, “oli girap olsem we oli gat wing olsem bigfala pijin ya igel.”² I tru oli stap long wok blong Lod.

Mifala i bin jenis taem mifala i lego senta ia. Mifala i bin tekpat long wan tabu taem. Sista Culter i bin mekem kavenan laswan wetem God long taem blong hem long wol ia mo oltaem bae hem i tingbaot God. Taem hem i mekem olsem, ol heven oli open, mo hem i kasem blesing ia bakegen blong gat promes blong God blong oltaem gat Spirit blong Hem i stap wetem hem—long taem blong sik mo long ded tu.

Ples i kwaet nomo taem mifala i draev i gobak. Afta wan yang boe i toktok mo hem i talem i simpol nomo se, “Hemia i gud tumas.” Mifala i bin gobak long hom wetem wan niu andastaning blong wanem i rili minim blong tekem nem blong Sevya antap long mifala.

Sista Cutler i lus sam dei afta—mo i stap fetful mo tru long ol kavenan blong hem.

?Yu eva askem yuwan se, tu long ol skripja we oli yusum oltaem long Jos stat long taem we Jos i bin kambak long wol long 1830, hem i ol prea blong sakramen?

Long wol ia we i fulap long ol samting we oli pulumaot tingting i kam isi nomo, bae yumi neva fogetem ol smol mo simpol samting we i karem paoa, atoriti mo laef we i no save finis, i kam. Letem yumi riniu ol kavenan blong yumi evri wik taem yumi tekpat long sakremen blong Hem. Taem yumi mekem olsem, bae yumi faenem pis, mo bae Hem i blesem yumi naoia mo blong oltaem.