Wan Kwaet Tingting

Taem mi gat samples 10 yia, mama blong mi i stap givim seves olsem wan yut tija long Oklan Kalifonia Stek long Oklan Wod 8. Long wan naet long ol dei blong wok, mifala i stap long japel blong mifala long ol aktiviti blong wod. Praemeri aktiviti blong mifala i finis eli mekem se mi stap pleple wetem ol kasen mo fren blong mi long aktiviti rum, taem mifala i stap wet long mama blong mi we i stap help blong mekem Yut Naet.

Mifala i ple lelu mo haed, be mifala ol pikinini i fulap tumas i mekem se aktiviti rum i fulap. Sam long ol pikinini we oli moa bigwan oli wantem blong go pleple aotsaed from se i gat moa spes aotsaed, mo tu from aotsaed i moa tudak bitim insaed long rum (taem i bitim 7 klok naet nao).

Mi no sua tumas blong folem olgeta. Mi askem sapos mifala i save gohed pleple insaed, be ol fren blong mi oli se, “Bae yumi oraet nomo aotsaed. Yumi fulap ia. Bae ol samting i oraet.” Be yet, mi no wantem trabol, mekem se mi disaed blong askem raet long mama blong mi blong pleple aotsaed.

“No,” hem i ansa blong mama. Nomata we mi no filim gud blong folem ol fren blong mi, mi stil harem nogud from mi nogat raet blong go aotsaed. Mifala i bin gat fulap gudtaem tugeta. “?From wanem mi no save go?” Mi askem. Wan risen ia nomo we mama i gat i from hem i no wantem mi pleple long tudak from bae hem i no save luk mi.

Taem mi tingting tu mo talem long ol fren blong oli gohed be bae mi stap, mi filim i stret. Hem i olsem Spirit i stap talem bakagen long mi se woning blong mama blong mi istret . . . be taem ia, i bin wan taem we mi no strong long hem. Hem i had blong luk ol fren blong mi oli ronaot long doa blong aktiviti rum mo mi stap, mekem se mi jiam mo ron folem olgeta, wetem strong tingting blong no obei long mama blong mi.

Taem mi kasem aotsaed long doa blong japel, mi filim olsem wan han i stap holem mi kambak. Mi stop mo tanem raon, be i nogat man i stap we i holembak mi. Mi sapraes mo mi lego ol fren blong mi oli go aot long japel be mi stap, mo afta mi gobak mo sidaon miwan aotsaed long klasrum we mama blong mi i stap long hem.

Long 10 o 15 minit taem ia we mi stap wet long Yut Naet ia blong i finis, mi stap gotru ol samting we i jes hapen long hed blong mi. Mi harem nogud yet se mi no stap pleple aotsaed wetem ol fren blong mi, be mi gohed blong tingbaot filing ia we mi gat stat long taem we oli askem mi faswan blong aot long japel, mi tingbaot toktok blong mama blong mi blong stap insaed, abaot ‘han’ ia we i holembak mi.

Mi tingbaot sot pis ia we mi bin filim taem mi disaed faswan blong obei long mama blong mi, mo luksave se taem mi stap wet long hem, mi save filim Spirit bakegen, we i stap talem long mi–bakegen–se mi mekem stret joes.

Kasem tedei, mi nogat eni aedia from wanem hem i bin impoten tumas blong mi stap long japel long naet ia, mo i no mata. Mi mi talem tangkyu nomo from Tabu Spirit we i lidim mo kamfotem yumi, iven taem yumi no andastanem . . . mo mi talem tangkyu se tru long fasin blong mi blong stap obei, Spirit i bin letem mifala blong save gat wan gudfala draev i gobak hom afta long ol aktiviti blong mi, mo mama i no rao long mi.