Lav blong Tonga

Taem Viliami Nofomuli Nyssen Tonga i kambak hom long misin blong hem long 2014, hem i filim wan bigfala filing blong winim wan samting. Hem i jes finis blong givim seves blong tu yia long Ol Yunaeted Stet blong Saot Karolina Kolumbia Misin, we i haf rod raon long wol longwe long hompeles blong hem long Pasifik Aelan blong Tonga.

Hem i tingbaot wetem glad, “wan eksperiens we i bin jenisim laef blong mi,” taem hem i stap givim seves long wan ful-taem misin blong Jos Ia blong Jisas Kraes blong Ol Lata-dei Sent. Be Viliami i no save se hemia i stat nomo blong ‘bigfala jenis’ we Papa long Heven i gat i stap blong hem.

I no longtaem afta we hem i kambak long hom, Viliami i gohed blong wok long wan lokol pitsa stoa. Hem i stap mekem pitsa bifo olsem wan wok, mo hem i wan wok we hem i laekem tru.

Olsem fulap yang adalt long ol aelan, Viliami i ting se nekis samting blong hem i mekem i blong muv i go long wan kantri we i moa bigwan—maet bae hem i gobak long Amerika—blong lukaot wan laef we i moa gud. Blong stap wok long pitsa stoa bae i helpem hem blong sevem mani blong mekem nekis muv blong hem.

Afta, fo manis nomo afta we Viliami i kambak hom, mama blong hem we hem i lavem tumas i ded. Hem i stap sik wetem sik blong suka mo i leko seven pikinini, fo long olgeta oli stap yet long skul.

Viliami i harem nogud tumas. Taem hem i stap faet agensem harem nogud ia, hem i stap tingting tu long ol yangfala brata mo sista blong hem mo hem i save se drim blong hem blong muv i go long nara ples i mas jenis.

Viliami i putum ol niu gol. Bae hem i stap long Tonga mo mekem ol fulap risponsabiliti blong mama blong hem long hom. Bae hem i faenem tu sam moa ples blong winim mani mekem se hem i save lukaot moa gud long famli blong hem mo bildimap fasin blong stap dipen long hemwan.

Viliami i disaed tu se hem i wantem openem wan pitsa stoa blong hemwan long wan yia taem.

Mo hem i mekem.

Long Mei 2015, hem i openem ‘Ofa ki Tonganiufala pitsa stoa blong hem long kapitol siti blong Tonga, Nuku’alofa. Ofa hem i lav long lanwis blong Tonga. Hem i nem blong mama blong Viliami tu.

Taem Viliami i stap luklukbak long laef blong hem kasem naoia, hem i sapraes tumas long rod we hem i kam long hem. “Sapos yu bin save mi bifo misin blong mi, bae yu sek blong luk mi long ples we mi stap long hem naoia.

“Bifo, mi no bin gat wan tru lukluk blong daereksen. Mi neva tingting long fiuja. Mi no finisim hae skul, mo sam man oli no ting se bae mi save finisim misin blong mi. Mi no bin sua tu,” hem i laf.

“Be blong givim seves long wan misin i bin soem wan defren wol long mi, wan defren stael blong laef. I bin helpem mi blong wantem moa long laef blong mi. I bin tijim mi wanem man i save kasem sapos hem i wok had from.

“I bin mekem testemoni blong mi long Jisas Kraes i kam moa strong.”

Wan skripja we i bin mekem Viliami i kam moa strong long ol had taem afta we mama blong hem i lus, i stap long Doktrin mo Ol Kavenan, Seksen 82:10. “Mi, Lod, mi mas mekem folem promes blong mi taem yufala i mekem wanem mi talem; be taem yufala i no mekem wanem we mi talem, yufala i no gat promes.”

Oltaem hemia i talem long hem bakegen se hem i save winim evri gol blong hem we i stret mo gud, sapos hem i stap obei long ol komanmen blong Papa long Heven . . . mo i tru, Lod i bin blesem hem fulap from hemia.

Wetem wanem we hem i winim long niu bisnis blong hem, Viliami i bin save lukaotem ol brata mo sista blong hem blong oli flatem ol skul blong olgeta mo iven pem wan graon blong bildim wan niu hom blong famli blong hem. Afta, hem i toktok bakegen wetem wan fren we hem i bin save stat long 2015 mo faenem lav blong laef blong hem long gel ia. Hem mo Lupe, tufala i sil blong taem naoia mo taem we i no save finis long Nuku’alofa Tonga Tempol long en blong 2019.

“Yu save, sapos mi save gobak mo toktok long miwan we mi yangfala, bae mi talem, ‘Holemtaet hed blong yu i stap antap. Drim bigwan. No fraet.’”

Viliami i wan witnes we i laef se sapos yumi mekem bes we yumi save mekem, Papa long Heven bae i mekem evri nara samting.