Ang Mahangtoron nga Baroganan sa Gugma

Ang mahangturon nga baroganan sa gugma mapakita pinaagi sa pagsunod sa duha ka dakong sugo: Higugmaa ang Dios sa tibuok mong kasingkasing, kalag, hunahuna, ug kusog ug higugmaa ang imong isigkatawo ingon sa paghigugma mo sa imong kaugalingon.¹

Ako nakahinumdom sa akong unang pagpuyo sa tingtugnaw dinhi sa Utah—bisan asang dapita adunay snow. Naggikan ko sa Sonoran Desert, ang unang mga adlaw nalingaw pa ko ato, apan paghuman sa pipila ka adlaw, ako nakaamgo nga kinahanglan ko nga mobangon og mas sayo aron sa paghawan sa snow gikan sa agianan sa sakyanan.

Usa ka buntag, taliwala sa snowstorm, nagkadusingot ko, nagpala sa snow, ug akong nakita ang akong silingan nga nangabli sa iyang garahian atbang sa kalsada. Mas maguwang siya nako, busa naghunahuna ko nga kon mahuman ko og sayo, ako makatabang niya. Mao nga akong gikusog akong tingog, nangutana ko niya, “Igsoon, nagkinahanglan ka ba og tabang?”

Mipahiyom siya ug miingon, “Salamat, Elder Montoya.” Dayon iyang gipagawas ang snowblower sa iyang garahian, ug gipaandar ang makina, ug sa pipila ka minutos iya nang nahawan ang tanang snow atubangan sa iyang balay. Dayon milabang siya sa kalsada dala ang iyang makina ug nangutana nako, “Elder, nagkinahanglan ka og tabang?”

Mipahiyom ko og miingon, “Oo, salamat.”

Kami andam nga motabang sa usag usa tungod kay among gimahal ang usag usa, ug ang panginahanglan sa akong igsoon nahimong akong panginahanglan ug ang akoa nahimong ihaya. Bisan unsa pa ang pinulongan sa akong igsoon o unsa nga nasod ang iyang gigikanan, kami naghigugmaay sa usag usa tungod kay kami managsoon, mga anak sa samang Amahan.

Sa dihang ang pagpangalagad gipahibalo, si Presidente Nelson miingon, “Atong ipatuman ang mas bag-o, mas balaan nga paagi sa pag-amuma ug pagpangalagad sa uban.”² Para nako, ang mas balaan nagpasabot og mas personal, mas lawom, mas nahisama sa paagi sa Manluluwas: “Kon maghigugmaay kamo,”³ sa usag usa.

Dili igo ang paglikay nga mahimong babag alang sa uban; dili igo ang pagbatyag sa timawa diha sa kadalanan ug moagi lang. Atong pahimuslan ang matag oportunidad sa pagtabang sa atong silingan, bisan kon kini ang una ug mao lang ang higayon nga kita nagkahimamat niining kinabuhi.

Nganong ang gugma alang sa Dios mao man ang unang dakong sugo?

Ako naghunahuna nga tungod kini kon unsa Siya kamahinungdanon ngari kanato. Kita mao ang Iyang mga anak, Siya nagtan-aw sa atong kaayohan, kita nagsalig diha Kaniya, ug ang Iyang gugma manalipod kanato. Ang Iyang plano naglakip sa kabubut-on; busa, kita may kalagmitan nga makahimo og mga kasaypanan.

Siya usab motugot kanato nga sulayan ug tintalon. Apan kon makahimo man kita og pipila ka kasaypanan o matumpawak ngadto sa tintasyon, ang plano nagsangkap og usa ka Manluluwas aron kita matubos ug makabalik ngadto sa presensiya sa Dios.

Ang kalisdanan sa atong kinabuhi makahimo og pagduha-duha kabahin sa katumanan sa mga saad nga nahimo ngari kanato. Palihog salig diha sa atong Amahan. Siya kanunay nga motuman sa Iyang mga saad, ug kita makakat-on kon unsa ang Iyang gusto nga itudlo kanato.

Bisan kon kita mobuhat sa unsay matarong, ang mga kahimtang sa atong kinabuhi mahimong mausab gikan sa maayo ngadto sa ngil-ad, gikan sa kalipay ngadto sa kasubo. Ang Dios motubag sa atong mga pag-ampo sumala sa Iyang walay kinutuban nga kalooy ug gugma ug sa Iyang kaugalingong panahon.

• Ang gamayng sapa diin miinom si Elias og tubig naughan.⁴

• Ang pana ni Nephi nga lunsayng puthaw nabali.⁵

• Usa ka batang lalaki gipihig ug gipapahawa gikan sa eskwelahan.

• Ang dugay nang gipaabot nga anak namatay sulod sa pipila ka adlaw gikan sa pagkatawo.

Ang mga sirkumstansiya mausab.

Kon ang mga sirkumstansiya mausab gikan sa maayo ug positibo ngadto sa ngil-ad ug negatibo, kita mahimo gihapon nga magmalipayon tungod kay ang kalipay wala magdepende sa mga sirkumstansiya apan sa atong mga kinaiya ngadto sa mga sirkumstansiya. Si Presidente Nelson miingon, “Ang kalipay nga atong gibati dili kaayo konektado sa mga sirkumstansiya sa atong kinabuhi apan konektado kaayo sa gitutokan sa atong kinabuhi.”⁶

Kita mahimong wala ray buhaton ug maghuwat nga ang mga sirkumstansiya mausab sa ila rang kaugalingon, o kita makapangita o makapahinabo og bag-ong mga sirkumstansiya.

• Si Elijah milakaw ngadto sa Sarefat, diin ang usa ka biyuda mihatag kaniya og pagkaon ug mainom.⁷

• Si Nephi mihimo og usa ka gapasan nga gama sa kahoy ug nakapangayam og mga hayop aron makaon.⁸

• Ang batang lalaki naglingkod nga naminaw ug nagsulat dapit sa bintana, ug karon siya usa na ka magtutudlo sa elementarya.

• Ang magtiayon nakaugmad og usa ka talagsaong hugot nga pagtuo diha sa Manluluwas nga si Jesukristo ug misalig diha sa plano sa kaluwasan. Ang ilang gugma alang sa dugayng gipaabot nga anak kinsa kalit lang namatay mas labaw pa sa ilang pagbangotan.

Sa dihang akong nadunggan ang mga pangutana “Amahan namo, naa ba gayod ka? Sa pag-ampo sa bata naminaw ka ba?,”⁹ gusto kong motubag, “Siya gusto gayod ug Siya kanunayng anaa alang kaninyo ug kanako. Ako Iyang anak nga lalaki, Siya ang akong Amahan, ug Ako nagkat-on nga mamahimong usa ka maayong amahan, sama Kaniya.”

Ang akong asawa ug ako kanunayng naningkamot nga anaa alang sa among mga anak sa bisan unsang panahon, ubos sa bisan unsang kahimtang, ug sa bisan unsang paagi. Matag bata lahi; ang ilang bili ngadto sa Dios dako, ug bisan unsa pa ang mga hagit, ang mga sala, ug mga kahuyang nila, ang Dios nahigugma kanila, ug ingon man usab kami.

Sa dihang akong nadawat kining tawag isip usa ka General Authority, sa kataposang adlaw sa wala pa ang among pagbiyahe ngadto sa Salt Lake, ang tanan nakong mga anak ug ang ilang mga pamilya nagpundok sa among panimalay alang sa usa ka gabii sa pamilya [family home evening], diin mipadayag kami sa among gugma ug pagpasalamat. Human sa leksiyon, akong gihatagan og panalangin sa pagkapari ang matag usa sa akong mga anak. Ang tanan nakahilak. Human sa mga panalangin, ang akong kinamagulangan nga anak nga lalaki mipahayag og mga pulong sa pagpasalamat alang sa tanan tungod sa talagsaong gugma nga among gihatag kanila gikan sa adlaw nga sila natawo hangtod nianang higayona.

Panalangini ang inyong mga anak, bisan sila mag-edad og 5 o 50 anyos. Ubani sila; pagmaanaa alang kanila. Bisan tuod og ang pagsangkap usa ka responsibilidad nga gitakda sa balaan nga plano, kita kinahanglan gayod dili makalimot sa pagpaambit og malipayong higayon uban sa atong mga anak.

Ang gugma sa atong Langitnong Amahan alang sa matag usa sa Iyang mga anak tinuod. Siya anaa alang sa matag usa. Ako wala makahibalo kon giunsa Niya kini sa pagbuhat, apan gibuhat Niya. Siya ug ang Iyang Bugtong Anak naghiusa sa paghimo sa buhat ug himaya sa Amahan, “ang pagpahinabo sa pagka-imortal ug sa kinabuhi nga dayon sa tawo.”¹⁰ Sila mipadala kanato sa Espiritu Santo aron mogiya kanato, sa pagpasidaan kanato, ug sa paghupay kanato kon gikinahanglan.

Siya misugo sa Iyang Hinigugmang Anak sa paglalang niining matahom nga yuta. Siya misugo nilang Adan ug Eva ug mihatag ngadto kanila sa ilang kabubut-on. Siya nagpadala og mga mensahero sulod sa daghang katuigan aron nga kita makadawat sa Iyang gugma ug sa Iyang mga sugo.

Siya diha sa Sagradong Kakahoyan nagtubag sa sinsero nga pangutana ni Joseph ug misangpit kaniya sa iyang ngalan. Siya miingon: “Kini ang Akong Hinigugmang Anak. Paminaw Kaniya!¹¹

Ako nagtuo nga ang labing taas nga pagpakita og gugma sa Dios alang kanato nahitabo didto sa Getsemani, diin ang anak sa buhi nga Dios nag-ampo, “Amahan ko, kon mahimo kuhaa kanako kining kupa sa pag-antos! Apan dili ang akong pagbuot maoy matuman kondili ang imo.”¹²

Ako nakamatngon nga ang gamay nga bahin nga akong nasabtan sa Pag-ula ni Jesukristo mopausbaw sa akong gugma alang sa Amahan ug sa Iyang Anak, mopakunhod sa tinguha nga makasala ug magmasinupakon, ug mopausbaw sa akong kaandam aron mahimong mas maayo ug mobuhat og mas maayo.

Si Jesus milakaw nga walay kahadlok ug walay pagduhaduha ngadto sa Getsemani, misalig sa Iyang Amahan, nasayod nga Siya kinahanglan gayod motaak sa pug-anan sa bino nga mag-inusara. Siya miantos sa tanang kasakit ug sa tanang pagpaubos. Siya gibutang-butangan, gihukman, ug gilansang sa krus. Atol sa Iyang kaugalingong paghingotas ug pag-antos diha sa krus, gitutokan ni Jesus ang mga panginahanglan sa Iyang inahan ug sa iyang pinalangga nga disipulo. Siya mihalad sa Iyang kinabuhi.

Sa ikatulong adlaw Siya nabanhaw. Ang lubnganan wala nay sulod; Siya mibarog diha sa tuo nga kamot sa Iyang Amahan. Sila nanghinaot nga kita mopili sa pagsunod sa atong mga pakigsaad ug mobalik ngadto sa Ilang presensiya. Kining kinabuhi dinhi sa yuta dili ang atong kataposang kinabuhi; kita wala mahisakop niining yutan-on nga panimalay, apan kita mga mahangturon nga mga binuhat nagpakabuhi sa temporaryong mga kasinatian.

Si Jesus mao ang Kristo, ang Anak sa Dios nga buhi. Siya Buhi, ug tungod kay Siya buhi, ang tanan nga mga anak sa Dios mabuhi hangtod sa kahangtoran. Salamat sa Iyang maulaon nga sakripisyo, kita magkauban nga makapuyo uban Kanila. Sa ngalan ni Jesukristo, amen.