Kabilin sa Pagdasig

Akong minahal nga kaigsoonan, ako mapasalamaton nga gikauban kamo niining kinatibuk-ang komperensiya sa Ang Simbahan ni Jesukristo sa mga Santos sa Ulahing mga Adlaw. Among gibati ang inyong hugot nga pagtuo ug inyong gugma bisan asa man kamo. Kita nalig-on sa dinasig nga pagtulon-an, sa puno sa gahom nga mga pagpamatuod, ug sa hilabihan katahom nga musika.

Awhagon ko kamo nga magpadayon sa pagpaningkamot nga mosarang nga makabalik ngadto sa Langitnong Amahan ug ni Jesukristo. Bisan asa kamo diha sa dalan sa pakigsaad, kamo makakaplag og mga panlimbasog batok sa pisikal nga mga pagsulay sa mortalidad o sa oposisyon ni Satanas.

Sama sa giingon sa akong inahan kanako dihang mireklamo ko sa kalisod sa usa ka butang, “Ay, Hal, lisod gyod kana. Ingon ana gyod na. Ang kinabuhi usa ka pagsulay.”

Siya mosulti niana nga kalma, gani uban sa pahiyom, kay siya may nasayran nga duha ka butang. Bisan unsa ang gipanlimbasogan, ang labing importante mao nga makaabot pauli aron ikauban ang iyang Langitnong Amahan. Ug siya nasayod nga siya makahimo niini pinaagi sa iyang hugot nga pagtuo sa Manluluwas.

Siya mibati nga Siya duol kaniya. Sa mga panahon nga siya nasayod nga duol na ang iyang kamatayon, iya kong giistoryahan mahitungod sa Manluluwas samtang naghigda siya sa iyang higdaanan. Dunay pultahan ngadto sa laing kwarto duol sa iyang higdaanan. Siya mipahiyom ug mitan-aw sa pultahan dihang siya kalma nga misulti mahitungod sa pakigkita Kaniya sa dili madugay. Ako makahinumdom gihapon nga nagtan-aw sa pultahan ug naghanduraw sa kuwarto sa luyo niini.

Siya atua na karon sa kalibotan sa mga espiritu. Nahimo niya ang pagtutok kanunay sa ganti nga iyang gitinguha bisan sa katuigan sa pisikal ug personal nga pagsulay.

Ang kabilin sa pagdasig nga iyang gibilin kanamo gihulagway sa mas maayong paagi diha sa Moroni 7, diin si Mormon midasig sa iyang anak nga si Moroni ug sa iyang katawhan. Kini ang usa ka kabilin sa pagdasig ngadto sa usa ka kaliwatan sama sa gihimo sa akong inahan ngadto sa iyang pamilya. Si Mormon mipasa niana nga kabilin sa pagdasig ngadto sa tanan kinsa adunay determinasyon nga mosarang, pinaagi sa ilang mortal nga mga pagsulay, alang sa kinabuhing dayon.

Si Mormon nagsugod sa unang mga bersikulo sa Moroni 7 uban sa pagpamatuod kang Jesukristo, sa mga anghel, ug sa Espiritu ni Kristo, nga nagtugot kanato aron masayod sa maayo gikan sa daotan ug makapili sa husto.

Siya mibutang og una kang Jesukristo, sama sa gibuhat sa tanan kinsa nagmalamposon sa pagdasig niadtong mga nanlimbasog sa pagtungas sa dalan ngadto sa ilang langitnong panimalay:

“Kay walay tawo nga maluwas, sumala sa mga pulong ni Kristo, gawas nga sila magbaton og hugot nga pagtuo diha sa iyang ngalan; busa, kon kini nga mga butang mihunong, niana ang hugot nga pagtuo mihunong usab; ug makalolooy ang kahimtang sa tawo, kay sila sama nga walay katubsanan nga gihimo.

“Apan tan-awa, akong hinigugma nga mga kaigsoonan, ako maghukom sa mga maayo nga butang diha kaninyo, kay ako maghukom nga kamo adunay hugot nga pagtuo kang Kristo tungod sa inyong kaaghop; kay kon kamo walay hugot nga pagtuo kaniya busa kamo dili angay nga pagaiphon taliwala sa mga katawhan sa iyang simbahan.”¹

Si Mormon nakakita sa kaaghop isip ebidensiya sa kalig-on sa ilang hugot nga pagtuo. Siya nakakita nga sila mibati nga sila nagkinahanglan sa Manluluwas. Siya midasig nila pinaagi sa pagtutok niana nga hugot nga pagtuo. Si Mormon padayon nga naghatag nila og kadasig pinaagi sa pagtabang nila aron makita nga ang ilang hugot nga pagtuo ug ang kaaghop modugang sa ilang kasegurohan ug sa ilang pagsalig nga molampos sa ilang mga panlimbasog:

“Ug usab, akong hinigugma nga mga kaigsoonan, ako mamulong nganha kaninyo mahitungod sa paglaom. Unsaon nga kamo makakab-ot ngadto sa hugot nga pagtuo, gawas nga kamo magbaton og paglaom?

“Ug unsa kana nga inyong gilaoman? Tan-awa ako moingon nganha kaninyo nga kamo magbaton og paglaom pinaagi sa pag-ula ni Kristo ug sa gahom sa iyang pagkabanhaw, aron mabanhaw ngadto sa kinabuhing dayon, ug kini tungod sa inyong hugot nga pagtuo diha kaniya sumala sa saad.

“Busa, kon ang usa ka tawo adunay hugot nga pagtuo siya kinahanglan nga magbaton og paglaom; kay kon wala ang hugot nga pagtuo wala usab ang paglaom.

“Ug usab, tan-awa ako mosulti nganha kaninyo nga siya dili makabaton sa hugot nga pagtuo ug paglaom, gawas nga siya magmaaghop, ug magmapainubsanon sa kasingkasing.”²

Si Mormon dayon midasig nila pinaagi sa pagpamatuod nga sila padulong nang makadawat sa gasa sa ilang mga kasingkasing nga napuno sa tiunay nga gugma ni Kristo. Iyang gipasabot kanila unsa ang kalahian kon magtambayayong ang mga elemento sa hugot nga pagtuo kang Jesukristo, kaaghop, pagpaubos, Espiritu Santo, ug lig-on nga paglaom bahin sa pagbaton og kinabuhing dayon. Siya midasig nila sa ingon niini nga paagi:

“Kay walay madawat sa atubangan sa Dios, gawas sa maaghop ug mapainubsanon nga kasingkasing; ug kon ang tawo magmaaghop ug magmapainubsanon sa kasingkasing, ug mokumpisal pinaagi sa gahom sa Espiritu Santo nga si Jesus mao ang Kristo, siya kinahanglan gayod adunay gugma nga putli; kay kon siya walay gugma nga putli, siya walay kapuslanan; busa siya kinahanglan gayod nga makabaton og gugma nga putli.”³

Sa paglantaw og balik, akong nakita karon giunsa nianang gasa sa gugmang putli—sa tiunay nga gugma ni Kristo—sa paglig-on, paggiya, ug pag-usab sa akong inahan diha sa pagpanlimbasog sa iyang dalan pauli.

“Ug ang gugma nga putli mainantuson, ug mabination, ug dili masinahon, dili manghambog, dili mangita alang sa iyang kaugalingon, dili dali nga masuko, dili maghunahuna sa daotan, ug dili maglipay diha sa pagkadaotan apan maglipay diha sa kamatuoran, mainantuson sa tanan nga mga butang, matuohon sa tanan nga mga butang, molaom sa tanan nga mga butang, ug molahotay sa tanan nga mga butang.

“Busa, akong hinigugma nga mga kaigsoonan, kon kamo walay gugma nga putli, kamo walay kapuslanan, kay ang gugma nga putli dili mopakyas. Busa, unong ngadto sa gugma nga putli, nga mao ang labing mahinungdanon sa tanan, kay ang tanan nga mga butang gayod mapakyas—

“Apan ang gugma nga putli mao ang tiunay nga gugma ni Kristo, ug kini molahutay sa kahangtoran; ug bisan kinsa nga makaplagan nga aduna niini sa kataposan nga adlaw, kini makaayo uban kaniya.

“Busa, akong hinigugma nga mga kaigsoonan, pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak nga si Jesukristo; aron mahimo kamo nga mga anak sa Dios; nga kon siya moabot, kita mahisama kaniya, kay kita makakita kaniya nga mao gihapon; nga kita mahimo nga makabaton niini nga paglaom; aron mahimo kita nga putli ingon nga siya putli.”⁴

Ako mapasalamaton sa pagdasig gikan sa ehemplo ni Mormon ug pagtulon-an. Ako napanalanginan usab tungod sa kabilin sa akong inahan. Ang mga propeta gikan ni Adan hangtod karon nga adlaw, pinaagi sa pagtudlo ug sa ehemplo, milig-on kanako.

Tungod sa akong pagtahod niadtong akong nailhan sa personal ug ilang mga pamilya, ako mipili sa dili pagtinguha nga sutaon ang mga detalye sa ilang mga panlimbasog o hisgotan sa publiko ang ilang talagsaong mga gasa. Apan ang unsay akong nakita nakadasig nako ug miusab nako ngadto sa mas maayo.

Uban sa risgo sa pagtandog sa iyang kapribado, modugang ko og mubo nga report bahin sa pagdasig gikan sa akong asawa. Mainampingon ko kining buhaton. Siya pribado nga tawo kinsa wala magtinguha nga dayegon.

Kami naminyo sulod sa 60 ka tuig. Tungod niana nga kasinatian ako karon nakasabot sa kahulogan niining mga pulong sa kasulatan: hugot nga pagtuo, paglaom, kaaghop, paglahutay, dili mangita alang sa atong kaugalingon, maglipay diha sa kamatuoran, dili maghunahuna sa daotan, ug labaw sa tanan, gugmang putli.⁵ Base niana nga kasinatian, ako makahimo sa pagpamatuod nga ang tanang tawhanong binuhat makahimo sa tanan niadto nga mga maayong buhat diha sa ilang inadlaw adlaw nga pagpakabuhi samtang sila nag-atubang sa mga hagit sa kinabuhi.

Minilyon kaninyo nga naminaw nakaila og sama niining mga tawhana. Daghan kaninyo mao kanang mga tawhana. Tanan kita nagkinahanglan sa ingon nianang makadasig nga mga ehemplo ug mapinanggaong mga higala.

Kon kamo mangalagad sa uban isip ilang tigpangalagad nga sister o brother, kamo nagrepresentar sa Ginoo. Hunahunaa unsay Iyang buhaton o isulti. Siya modapit kanila sa pagduol Kaniya. Siya modasig kanila. Siya makamatikod ug modayeg sa sinugdanan sa mga kausaban nga kinahanglan nilang buhaton. Ug Siya mahimong hingpit nga ehemplo nga angay nilang sundogon.

Wala pay usa ang makahimo niana sa hingpit, apan pinaagi sa pagpaminaw niining komperensiya, kamo masayod nga kamo hapit na. Ang Manluluwas nasayod sa detalye sa inyong mga panlimbasog. Siya nasayod sa inyong talagsaong potensyal sa pagtubo diha sa hugot nga pagtuo, paglaom, ug gugmang putli.

Ang mga sugo ug mga pakigsaad nga Iyang gitanyag kaninyo dili aron sulayan kamo sa pagkontrolar. Kini mga gasa nga mobayaw kaninyo aron madawat ang tanang gasa sa Dios ug makabalik sa panimalay ngadto sa inyong Langitnong Amahan ug sa Ginoo, kinsa nahigugma kaninyo.

Si Jesukristo mibayad sa bugti sa atong mga sala. Unta kita makaangkon niana nga panalangin sa kinabuhing dayon kon kita magbaton og hugot nga pagtuo Kaniya nga igo aron makahinulsol ug mahimong sama sa usa ka bata, putli ug andam nga modawat sa labing mahinungdanon sa tanan nga gasa sa Dios.

Ako mag-ampo nga kamo modawat sa Iyang pagdapit ug nga kamo motanyag niini ngadto sa ubang mga anak sa atong Langitnong Amahan.

Ako mag-ampo alang sa atong mga misyonaryo sa tibuok kalibotan. Unta sila madasig sa pag-awhag sa matag tawo aron magtinguha ug motuo nga ang pagdapit naggikan ni Jesukristo pinaagi sa Iyang mga sulugoon kinsa midala sa Iyang ngalan diha kanila.

Ako mopamatuod nga Siya buhi ug nangulo sa Iyang Simbahan. Ako Iyang saksi. Si Presidente Russell M. Nelson mao ang buhi nga propeta sa Dios sa tibuok yuta. Ako nasayod nga kana tinuod. Sa sagrado nga ngalan ni Jesukristo, amen.