Ikaw Andam Ba Gihapon?

Usa ka Dominggo, samtang nangandam nga moambit sa sakramento human sa pipila ka semana nga mga buluhaton sa komperensiya sa stake, usa ka makainteres ug puno sa gahom nga panghunahuna ang misantop sa akong hunahuna.

Samtang ang priest nagsugod sa paghalad sa panalangin sa pan, ang mga pulong nga kadaghan na kaayo nakong nadungog misulod nga kusganon sa akong hunahuna ug kasingkasing. “Ug mosaksi nganha kanimo, O Dios, ang Amahan sa kahangtoran, nga sila andam sa pagdala nganha kanila sa ngalan sa imong Anak, ug sa kanunay mohinumdom kaniya ug maghupot sa iyang mga sugo diin siya mihatag kanila; nga sila unta sa kanunay makabaton sa iyang Espiritu uban kanila.”¹ Pila na ka higayon nga kita misaksi sa Dios nga kita andam?

Samtang ako namalandong sa kahulogan niadtong sagrado nga mga pulong, ang pulong nga andam karon pa sukad miagni kanako. Usa ka bul-og sa matam-is ug sagradong mga kasinatian mipuno sa akong hunahuna ug kasingkasing uban sa gugma ug pasalamat sa makatubos nga sakripisyo sa Manluluwas ug sa Iyang importante nga tahas sa plano sa Amahan sa katubsanan alang sa akong pamilya ug kanako. Dayon akong nadungog ug gibati ang midulot nga mga pulong sa pag-ampo alang sa tubig. “Nga sila unta mosaksi nganha kanimo … nga sila sa kanunay mohinumdom kaniya.”² Akong nasabtan sa klaro niana nga panahon nga ang pagtuman sa mga pakigsaad siguradong labaw pa sa maayong mga katuyoan.

Ang pag-ambit sa sakramento dili lumalabay nga relihiyosong ritwal nga nagpakita nga basta lamang kita miuyon. Usa kini ka puno sa gahom nga pahinumdom sa katinuod ug kamahinungdanon sa walay kinutobang Pag-ula ug sa panginahanglan sa kanunay nga paghinumdom Kaniya ug pagtuman sa Iyang mga sugo. Ang kaandam sa pagtutok ngadto sa Manluluwas importante kaayo nga kini ang mahinungdanong mensahe sa duha nga kanunayng gikutlo sa mga kasulatan diha sa Simbahan:—ang mga pag-ampo sa sakramento. Ang pagsabot sa kamatuoran sa unsay andam kaayong itanyag sa Langitnong Amahan sa matag usa nato pinaagi sa Iyang Bugtong Anak kinahanglang mosangpot sa kinatas-an natong mga paningkamot sa pagkahimong kanunay nga andam agi og balos.

Ang atong kaugalingon nga espirituwal nga pundasyon lig-on ba nga natukod diha kang Jesukristo?

Kon ang atong espirituwal nga pundasyon mabaw ra o dili lig-on, basin atong mabase ang atong pagkaandam ngadto sa pag-analisar kon kini makaayo ba sa sosyal o kini butang ba nga maghatag og personal nga kahasol. Ug kon kita mohangop sa panglantaw sa kadaghanan nga ang Simbahan una sa tanan naglangkob sa kinaraan o sa mga palisiya nga makasilo sa ubang pundok sa katawhan, dili praktikal nga personal nga mga pagdili, ug mga pasalig sa paggahin og panahon, niana ang atong mga konklusyon mahitungod sa atong pagkaandam sayop ra gihapon. Kita dili angay nga maglaom nga ang baroganan sa kaandam mosikat sa positibong paagi ngadto sa tig-impluwensiya sa social media o sa mga mahiligon sa TikTok. Ang mga lagda sa katawhan tagsa ra kaayong mohaom sa balaanong kamatuoran.

Ang Simbahan maoy pundokanang dapit sa dili perpektong mga tawo kinsa nahigugma sa Dios ug kinsa andam nga mosunod sa Ginoo nga si Jesukristo. Kana nga kaandam nakagamot sa reyalidad nga si Jesus mao ang Kristo, ang Anak sa buhi nga Dios. Kini nga balaang kamatuoran masayran lamang pinaagi sa gahom sa Espiritu Santo. Busa, ang atong kaandam katugbang sa gidaghanon sa oras nga atong ipasalig nga kita maanaa sa balaang mga dapit diin anaa ang impluwensiya sa Espiritu Santo.

Makaayo kanato ang paggahin og mas daghang panahon sa makahuloganong pag-istoryahanay sa paghisgot sa atong mga kabalaka uban sa mahigugmaon nga Amahan sa Langit ug minosan ang pagtinguha og mga opinyon gikan sa ubang mga tawo. Mahimo usab nga mopili kita nga pulihan ang atong inadlaw adlaw nga pagsagap og mga balita ngadto sa mga pulong ni Kristo gikan sa balaang mga kasulatan ug sa propetikanhong mga pulong sa Iyang buhi nga mga propeta.

Ang importansiya nga atong gibutang diha sa atong pagbalaan sa adlawng Igpapahulay, pagbayad og eksaktong ikapulo, paghupot og balido nga rekomend sa templo, pagtambong sa templo, ug pagtahod sa atong mga sagradong pakigsaad sa templo mao ang lig-ong mga timailhan sa atong kaandam ug ebidensiya sa atong pasalig. Andam ba kitang modugang og mas labaw pa kay sa taphaw nga paningkamot sa paglig-on sa atong hugot nga pagtuo kang Jesukristo?

Ang Langitnong Amahan nahigugma kanato sa hingpit, apan kana nga gugma adunay tugbang nga dagko nga mga ekpektasyon. Siya naglaom kanato sa pagkaandam nga mobutang sa Manluluwas diha gayod sa sentro sa atong kinabuhi. Ang Manluluwas maoy atong hingpit nga ehemplo sa pagkaandam nga motugyan ngadto sa Amahan diha sa tanan nga butang. Siya “ang dalan, ang kamatuoran, ug ang kinabuhi.”³ Siya andam kaayo nga miula sa atong mga sala. Siya andam kaayo nga mopagaan sa atong mga palas-anon, mopakalma sa atong mga kahadlok, mohatag nato og kalig-on, ug magdala og kalinaw ug panabot sa atong mga kasingkasing sa mga panahon sa kalisod ug kasubo.

Sa gihapon ang hugot nga pagtuo kang Jesukristo usa ka pagpili. “Kon [kita wala nay ikadugang pa sa] pagtinguha nga motuo”⁴ sa Iyang mga pulong, aduna na kitay sinugdanang dapit aron makasugod o mahan-ay og balik ang atong panaw sa hugot nga pagtuo. Ang iyang mga pulong, kon matanom sa atong kasingkasing sama sa binhi ug maalimahan og maayo, kini mogamot, ug ang atong hugot nga pagtuo motubo ngadto sa kasiguroan ug mahimong usa ka baroganan sa buhat ug gahom. Ang Basahon ni Mormon maoy atong labing lig-on nga kapanguhaan alang sa pagtubo ug pagpahiuli sa atong hugot nga pagtuo. Ang kaandam mao ang mopasiugda og hugot nga pagtuo.

Ang mortalidad, pinaagi sa balaang plano, dili sayon ug usahay malisod. Hinoon,”kita naingon [aron] kita “makabaton og hingpit nga kalipay”!⁵ Ang pagpunting diha sa Manluluwas ug sa atong sagrado nga mga pakigsaad magdala og malungtaron nga hingpit nga kalipay! Ang katuyoan sa mortalidad mao ang pagprobar sa atong kaandam. “Ang talagsaong tahas sa kinabuhi [ug ang kantidad sa pagkadisipulo] mao ang pakat-on sa kabubut-on sa Ginoo ug dayon mobuhat niini.”⁶ Ang tinuoray nga pagkadisipulo modala ngadto sa hingpit nga kalipay. Kita andam ba nga mobayad sa bugti sa pagkadisipulo?

Ang dalan sa pakigsaad dili usa ka yano nga listahanan, proseso kini sa espirituwal nga paglambo ug nagkalawom nga pasalig ngadto sa Ginoo nga si Jesukristo. Ang mahinungdanong katuyoan sa matag sugo, baroganan, pakigsaad, ug ordinansa mao ang pagtukod og hugot nga pagtuo ug pagsalig diha ni Kristo. Ang atong determinasyon sa pagsentro sa atong kinabuhi kang Kristo, sa ingon gayod, kinahanglan nga makanunayon—dili mag-agad sa kahimtang, dili mag-agad sa sitwasyon, o dili taphaw. Dili kita makatugot nga usahay mohunong o mopahulay gikan sa atong kaandam nga “mobarog ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit.”⁷ Ang pagkadisipulo dili sayon, tungod kay ang pagpakig-uban sa Espiritu Santo labihan ka bililhon.

Labing siguro ang Ginoo naghunahuna sa atong panahon dihang Siya mitudlo sa sambingay sa napulo ka dalagang birhen. Bahin sa lima nga maalamon, Siya miingon nga sila “nakadawat sa Balaan nga Espiritu alang sa ilang paggiya, ug wala malimbongi,”⁸ samtang ang mga lampara sa mga danghag “nangapalong” kay nahutdan sa lana.⁹ Tingali ang mga pulong ni Nephi labing maayong naghulagway niining kaniadto matinud-anong mga miyembro sa Simbahan; “Ug ang uban siya mohupay, ug mopakatulog kanila ngadto sa kalibotanon nga kasiguroan, nga sila moingon: Ang tanan maayo sa Zion.”¹⁰

Ang seguridad nga kalibotanon nagtinguha ug nagsalig sa kalibotanong mga butang imbis kang Kristo—sa laing pagkasulti, nagtan-aw gamit ang mga lente nga kalibotanon imbes sa mga lente nga espirituhanon. Ang Espiritu Santo naghatag nato sa kapasidad nga makakita sa “mga butang ingon nga sila gayod mao, ug … nga sila gayod mahimo unya.”¹¹ “Pinaagi [lamang] sa gahom sa Espiritu Santo [kita] mahimo nga masayod sa kamatuoran sa tanan nga mga butang”¹² ug dili malingla. Atong ibutang si Kristo sa sentro sa atong kinabuhi ug mosaad sa atong kaandam nga mosunod sa mga sugo dili tungod kay kita buta apan tungod kay kita makakita.¹³

Apan unsa man ang mahitungod sa danghag nga mga birhen? Nganong sila dili man andam nga magdala og sudlanan sa espirituwal nga lana? Naglangay-langay lang ba sila? Sila tingali kaswal ra kaayo kay hasol kini o wala kinahanglana. Sa bisan unsang rason, sila nalingla mahitungod sa mahinungdanon nga tahas ni Kristo. Mao kini ang nag-unang paagi ni Satanas sa paglingla ug kon nganong ang ilang mga lampara sa pagpamatuod sa kataposan nahutdan sa espirituwal nga lana. Kini nga sambingay usa ka modernong simbolo sa atong panahon. Daghan ang mibiya sa Manluluwas ug sa ilang mga pakigsaad dugay na sa wala pa sila mobiya sa Iyang Simbahan.

Nagpuyo kita sa dili matag-an nga mga panahon nga dugay nang gitagna sa karaang mga propeta, usa ka panahon nga si Satanas mopayugot “sa mga kasingkasing sa mga katawhan, ug mokutaw kanila ngadto sa kasuko batok niana nga maayo.”¹⁴ Daghan kaayo kanato nagpuyo sa online virtual nga kalibotan nga puno sa kalingawan ug mga mensahe nga nagkontra sa balaanong pagkatawo ug pagtuo kang Kristo.

Ang labing gamhanan nga espirituhanong impluwensiya sa kinabuhi sa usa ka anak mao ang matarong nga ehemplo sa mahigugmaong mga ginikanan ug mga apohan kinsa matinud-anong nagtuman sa ilang kaugalingong sagrado nga mga pakigsaad. Ang maalamong mga ginikanan motudlo sa ilang mga anak og hugot nga pagtuo sa Ginoo nga si Jesukristo, aron sila usab “masayod sa unsa nga tinubdan sila mahimo nga mangita alang sa kapasayloan sa ilang mga sala.”¹⁵ Ang kaswal ug dili kanunay nga pagtuman sa pakigsaad mosangpot sa espirituwal nga kadaot. Ang espirituwal nga pagkadaot sa kasagaran labihan diha sa atong mga anak ug mga apo. Mga ginikanan ug mga apohan, kita andam ba gihapon?

Si Presidente Russell M. Nelson mipasidaan nga “sa umaabot nga mga adlaw, dili na posible ang espirituhanong pagsugakod kon wala ang paggiya, pagdumala, paghupay, ug makanunayon nga impluwensya sa Espiritu Santo.”¹⁶ Kini usa ka klaro ug walay pagkasayop nga pasidaan sa pag-andam sa atong mga lampara ug pagpalambo sa atong espirituwal nga gireserba nga lana. Kita andam ba gihapon nga mosunod sa buhing mga propeta? Unsa ang lebel sa espirituhanon nga lana ang anaa sa inyong lampara? Unsa nga mga kausaban sa inyong personal nga kinabuhi ang maghimo ninyo nga makabaton sa impluwensiya sa Espiritu Santo sa mas kanunay nga paagi?

Karon, sama sa kapanahonan ni Jesus, adunay mga tawo nga dili na mopadayon, dili na andam nga modawat sa bugti sa pagkadisipulo. Samtang ang ngil-ad ug makapungot nga pagpanaway nagkadaghan na sa Simbahan sa Manluluwas ug niadtong nagsunod Kaniya, ang atong pagkadisipulo magkinahanglan og mas dugang nga kaandam nga tul-iron ug lig-onon ang mga espirituwal nga desisyon ug dili mopatalinghog kanila.¹⁷

Kon ang atong espirituwal nga pundasyon lig-ong natukod diha ni Jesukristo, kita dili mapukan ug kita dili angay nga mahadlok.

“Tan-awa, ang Ginoo nagkinahanglan sa kasingkasing ug sa usa ka andam nga hunahuna; ug ang andam ug ang masulundon mokaon sa kaayo sa yuta sa Zion niining kataposan nga mga adlaw.”¹⁸

Hinaot nga sa kanunay kita andam. Sa sagradong ngalan sa Ginoo nga si Jesukristo, amen.