Nagdala Akog Kalipay Inay Kagul-anan: Ang Makaayo nga Dalan sa Pagpasaylo

Ang basahon sa 1 Samuel naglakip og mas dyotay ra nga nahibaloan nga istorya ni David, ang umaabot nga hari sa Israel, ug sa usa ka babaye nga ginganlan og Abigail.

Human sa kamatayon ni Samuel, si David ug ang iyang mga tawo mipalayo gikan kang Hari Saul, kinsa buot mopatay ni David. Sila mihatag og tig-atiman sa mga panon ug mga sulogoon sa usa ka adunahan nga tawo nga ginganlan og Nabal, kinsa dili manggiloy-on. Si David mipadala og 10 sa iyang mga tawo aron motimbaya ni Nabal ug mihangyo og gikinahanglan kaayo nga mga pagkaon ug mga suplay.

Si Nabal mitubag sa hangyo ni David nga nanginsulto ug miabog sa iyang mga tawo nga walay dala.

Nasilo, si David miandam sa iyang mga tawo nga moadto kang Nabal ug sa iyang panimalay, miingon, “Gibaslan niya akog daotan.”¹ Ang usa ka sulogoon misulti kang Abigail, ang asawa ni Nabal, kabahin sa dili maayong pagtratar sa iyang bana ngadto sa mga tawo ni David. Si Abigail daling miandam sa gikinahanglan nga pagkaon ug mga suplay ug miadto aron makig-uli.

Sa dihang si Abigail nakakita kaniya, “miluhod siya sa atubangan ni David,

“Ug miluhod siya sa [iyang] tiilan, ug miingon, Ako maoy pakasad-a, tugoti ako sa pagpakigsulti kanimo. …

“Busa, … ang Ginoo nagpugong kanimo gikan sa pagpakasala tungod sa dugo, ug gikan sa pagpanimalos pinaagi sa imong kaugalingong kamot. …

“… Karon kining gasa nga gidala sa imong sulogoon sa akong ginoo, ipahatag kini ngadto sa mga batan-ong lalaki. …

“Pasayloa, ako nangaliyupo kanimo, ang paglapas sa imong sulogoon nga babaye. …

“Unya si David miingon kang Abigail, Dalaygon ang Ginoong Dios sa Israel, nga nagpadala kanimo niining adlawa aron pagpakigkita kanako:

“Ug dalaygon ang imong gibuhat, ug bulahan ka, kay ikaw may nakapugong kanako sa pagpatay, ug sa pagpanimalos. …

“Unya gidawat ni David ang gigasa ni [Abigail] kaniya, ug giingnan niya [si Abigail], Pauli sa inyo nga malinawon; … ug matuman ang imong gipangayo.”²

Silang duha mibiya sa kalinaw.

Niini nga asoy, si Abigail makita nga usa ka gamhanan nga matang o simbolo ni Jesukristo.³ Pinaagi sa Iyang maulaong sakripisyo, Siya makapalingkawas kanato gikan sa sala ug kabug-at sa pagbati sa kasuko ug kalagot ug mohatag kanato sa atong gikinahanglan.⁴

Sama nga si Abigail andam modawat sa sala ni Nabal ngadto sa iyang kaugalingon, mao usab ang Manluluwas—sa dili matukib nga paagi—angkonon Niya ang atong mga sala ug ang mga sala niadtong kinsa nakapasakit o nakapasilo nato.⁵ Sa Getsemani ug diha sa krus, Iyang giangkon kini nga mga sala. Siya mihimo og paagi alang kanato aron buhian ang mapanimaslon nga kasingkasing. Kana nga “paagi” mao ang pinaagi sa pagpasaylo—nga mahimong usa sa labing lisod nga mga butang nga sukad atong mahimo ug usa sa labing balaan nga mga butang nga sukad atong masinati. Ang dalan sa pagpasaylo, ang maulaong gahom ni Jesukristo modagayday sa atong kinabuhi ug mosugod sa pag-ayo sa mga lawom nga sakit sa kasingkasing ug sa kalag.

Si Presidente Russell M. Nelson mitudlo nga ang Manluluwas nagtanyag kanato sa abilidad sa pagpasaylo:

“Pinaagi sa Iyang walay kinutoban nga Pag-ula, kamo makapasaylo niadtong kinsa nakapasakit kaninyo ug kinsa dili gayod modawat sa responsibilidad sa ilang pagkabangis nganha kaninyo.

“Sa kasagaran sayon ra kaayo ang pagpasaylo sa usa ka tawo kinsa sinsero ug mapainubsanong nangayo sa inyong pasaylo. Apan ang Manluluwas mohatag kaninyo sa abilidad sa pagpasaylo ni bisan kinsa nga miabusar kaninyo sa bisan unsa nga paagi. Dayon ang ilang masakit nga mga binuhatan dili na makadaot sa inyong kalag.”⁶

Ang pagdala ni Abigail og daghang pagkaon ug mga suplay makatudlo kanato nga ang Manluluwas nagtanyag niadtong kinsa nasakitan ug nasamdan sa tabang nga atong gikinahanglan aron mamaayo.⁷ Kita wala mag-inusara sa pagsulbad sa mga sangpotanan sa mga binuhatan sa uban; kita usab mamaayo ug hatagan sa kahigayonan nga maluwas gikan sa pagbati sa kasuko ug kalagot ug bisan unsang buhat nga mosunod.

Ang Ginoo miingon, “Ako, ang Ginoo, mopasaylo kinsa Ako mopasaylo, apan kamo gikinahanglan nga mopasaylo sa tanan nga mga tawo.”⁸ Ang Ginoo nagkinahanglan kanato sa pagpasaylo alang sa atong kaugalingong kaayohan.⁹ Apan Siya wala mag-ingon kanato sa pagbuhat niini nga wala ang Iyang panabang, Iyang gugma, Iyang pagsabot. Pinaagi sa atong mga pakigsaad uban sa Ginoo, matag usa kanato makadawat sa makapalig-on nga gahom, giya, ug sa tabang nga atong gikinahanglan sa pagpasaylo ug mapasaylo.

Palihog hibaloi nga ang pagpasaylo og usa ka tawo wala magpasabot nga imong gibutang ang imong kaugalingon sa usa ka kahimtang diin magpadayon ka nga masakitan. “Kita mahimong makabuhat sa pagpasaylo og usa ka tawo ug sa gihapon mobati nga giaghat sa Espiritu nga magpalayo gikan kanila.”¹⁰

Sama nga si Abigail mitabang ni David nga dili “mapangdol sa kasingkasing”¹¹ ug sa pagdawat sa gikinahanglan nga tabang, mao usab ang Manluluwas motabang kaninyo. Siya nahigugma kaninyo, ug Siya motagbo kaninyo sa inyong dalan nga “adunay kaluwasan sa Iyang mga pako.”¹² Siya nagtinguha sa inyong kalinaw.

Ako personal nga nakasaksi sa milagro ni Kristo nga miayo sa akong pagbati sa kasuko ug kalagot. Uban sa pagtugot sa akong amahan, ako mopakigbahin nga ako nagdako sa usa ka panimalay diin wala gayod ako kanunay mobati nga luwas tungod sa emosyonal ug berbal nga pagmaltrato. Sa akong kabatan-on ug sa hingkod nga mga tuig, ako naglagot sa akong amahan ug adunay kasuko sa akong kasingkasing gikan niana nga kasakit.

Sa katuigan ug sa akong mga paningkamot sa pagpangita og kalinaw ug pagkaayo niana nga dalan sa paghatag ug pagdawat sa pagpasaylo, nakaamgo ko sa lawom nga paagi nga ang sama nga Anak sa Dios kinsa miula alang sa akong mga sala mao ang sama nga Manunubos kinsa mao usab ang moluwas niadtong kinsa nakapasakit kanako og maayo. Ako dili gayod makatuo sa unang kamatuoran nga dili motuo sa ikaduha.

Sama sa akong gugma alang sa Manluluwas nga mitubo, mao usab ang akong tinguha sa pagpuli sa kasakit ug kasuko uban sa Iyang makaayo nga buhat. Kini ang proseso sa daghang katuigan, nagkinahanglan og kaisog, kahuyang, pagkamalungtaron, ug pagkat-on sa pagsalig sa balaang gahom sa Manluluwas sa pagluwas ug pag-ayo. Ako aduna gihapoy buhatonon pa, apan ang akong kasingkasing wala nay kasuko ug pagbati sa pagpanimalos. Ako gihatagan na og “usa ka bag-o nga kasingkasing”¹³—usa nga nakabati sa lawom ug malungtarong gugma sa usa ka personal nga Manluluwas, kinsa nagpabilin sa akong kiliran, kinsa malumo ug mapailobong naggiya nako ngadto sa mas maayo nga dapit, kinsa mihilak uban nako, kinsa nasayod sa akong kasub-anan.

Ang Ginoo mipadala kanako og mga panalangin nga makapahupay kanako sama sa gidala ni Abigail nga maoy gikinahanglan ni David. Siya mipadala og mga magtutudlo ngari sa akong kinabuhi. Ug ang labing bililhon ug labing makapausab sa tanan mao ang akong relasyon sa akong Langitnong Amahan. Pinaagi Kaniya, mapasalamaton kong nakaila sa maaghop, mapanalipdanon, ug magiyahon nga gugma sa usa ka hingpit nga Amahan.

Si Elder Richard G. Scott miingon: “Dili ninyo mapapas ang nanghitabo, apan kamo makapasaylo.¹⁴ Ang pagpasaylo moayo sa hilabihan, grabing mga samad, kay motugot kini sa gugma sa Dios nga molangkat sa makahilo nga kasilag nga naa sa inyong kasingkasing ug hunahuna. Kini molimpyo sa inyong kaugalingon sa tinguha nga makapanimalos. Kini magmugna og luna alang sa makalunsay, makaayo, makapahiuli nga gugma sa Ginoo.”¹⁵

Ang akong yutan-ong amahan usab adunay milagrosong kausaban sa kasingkasing bag-ohay lang ug mibalik sa Ginoo—usa ka butang nga wala nako damha niini nga kinabuhi. Lain pa nga pagpamatuod ngari kanako sa hingpit ug makapa-usab nga gahom ni Jesukristo.

Ako nasayod nga Siya makahimo sa pag-ayo sa makasasala ug niadtong nakahimo sa sala. Siya ang Manluluwas ug ang Manunubos sa kalibotan, kinsa mitugyan sa Iyang kinabuhi aron kita mabuhi pag-usab. Siya miingon, “Ang Espiritu sa Ginoo ania kanako, kay iya man akong gidihogan aron sa pagwali sa maayong balita ngadto sa mga kabos; gipadala niya ako aron sa pag-ayo sa masulob-ong kasingkasing, sa pagpahibalo sa kagawasan ngadto sa mga binilanggo, ug sa kahiuli sa igtatan-aw ngadto sa mga buta, sa paghatag sa kagawasan ngadto sa mga dinaugdaog.”¹⁶

Ngadto sa tanan kinsa masulob-on ang kasingkasing, nabihag, nasamdan, ug tingali nasakitan o nakasala, Siya nagtanyag og kaayohan, pagkamaulian, ug kaluwasan. Ako mopamatuod nga kadtong nga pagkaayo ug pagkamaulian nga Iyang gitanyag tinuod. Ang tyempo niana nga pagkaayo indibidwal, ug dili kita makahukom sa tyempo sa uban. Importante nga hatagan ang atong kaugalingon sa gikinahanglan nga panahon sa pagpaayo ug magmabination sa atong kaugalingon diha sa proseso. Ang Manluluwas manggiloy-on gayod ug maminaw ug mobarog nga andam sa paghatag og tabang nga atong gikinahanglan.¹⁷

Diha sa dalan sa pagpasaylo ug pagkaayo adunay pagpili nga dili ipadayon ang dili maayo nga mga sundanan o mga relasyon sa atong mga pamilya o bisan asa. Ngadto sa tanan nga anaa sa atong impluwensiya, kita makatanyag og kamaayo alang sa kabangis, gugma alang sa pagdumot, kalumo alang sa kapintas, kahilwasan alang sa kaguol, ug kalinaw alang sa panagbingkil.

Sa paghatag sa unsay wala mahatag kanimo mao ang gamhanang bahin sa balaang pagkaayo nga posible pinaagi sa hugot nga pagtuo diha kang Jesukristo. Sa pagpuyo sa paagi nga ikaw, sama sa giingon ni Isaias, nagdala og kalipay inay kagul-anan sa imong kinabuhi¹⁸ usa ka buhat sa hugot nga pagtuo nga mosunod sa labing gamhanan nga ehemplo sa usa ka Manluluwas kinsa miantos sa tanan aron Siya makatabang sa tanan.

Si Jose sa Ehipto nagpuyo og kinabuhi nga may kagul-anan. Siya gikasilagan sa iyang mga igsoon, gibudhian, gibaligya ngadto sa pagkaulipon, sayop nga nabilanggo, ug nalimtan sa usa ka tawo kinsa misaad nga motabang. Bisan pa man siya misalig sa Ginoo. “Ang Ginoo nag-uban kang Jose”¹⁹ ug mibalaan sa iyang mga pagsulay ngadto sa iyang kaugalingong panalangin ug pagtubo—ug ngadto sa pagluwas sa iyang pamilya ug tanan sa Ehipto.

Sa dihang nakit-an ni Jose ang iyang mga igsoong lalaki isip usa na ka halangdong lider sa Ehipto, ang iyang pagpasaylo ug lunsay nga panglantaw gipakita diha sa mapuanguron nga mga pulong nga iyang gisulti:

“Apan ayaw ikaguol, o pakasad-a ang inyong kaugalingon, tungod sa inyong pagbaligya kanako: kay ang Dios maoy nagpaanhi kanako una kaninyo aron maluwas ang kinabuhi sa katawhan. …

“Busa dili kamo ang nagpadala kanako nganhi dinhi, kondili ang Dios.”²⁰

Pinaagi sa Manluluwas, ang kinabuhi ni Jose nahimong “nagdala og kalipay inay kagul-anan.”²¹

Si Kevin J. Worthen, presidente sa BYU, miingon nga ang Dios “makahimo sa maayo nga moabot … dili lamang gikan sa atong mga kalamposan apan usab gikan sa atong mga kapakyasan ug ang kapakyasan sa uban nga nakahatag kanato og sakit. Ang Dios ingon niana ka maayo ug ingon niana ka gamhanan.”²²

Ako mopamatuod nga ang labing halangdon nga ehemplo sa gugma ug pagpasaylo mao kana sa atong Manluluwas, si Jesukristo, kinsa diha sa tumang kasakit miingon, “Amahan, pasayloa sila; kay wala sila mahibalo sa ilang gibuhat.”²³

Ako nasayod nga ang atong Amahan sa Langit nagtinguha og maayo ug paglaom alang sa matag usa sa Iyang mga anak. Diha sa Jeremias atong mabasa, “Kay ako mahibalo sa mga hunahuna nga gihunahuna ko alang kaninyo, nagaingon ang Ginoo, mga hunahuna sa pakigdait.”²⁴

Si Jesukristo mao ang inyong personal nga Mesiyas, inyong mahigugmaong Manunubos ug Manluluwas, kinsa nasayod sa mga paghangyo sa inyong kasingkasing. Siya nagtinguha sa inyong pagkaayo ug kalipay. Siya nahigugma kaninyo. Siya mobakho uban kaninyo diha sa inyong kasub-anan ug maglipay aron paghimo kaninyo nga mamaayo. Unta kita moawhag ug modawat sa Iyang mahigugmaong kamot nga kanunayng nakatunol²⁵ samtang kita maglakaw sa makaayo nga dalan sa pagpasaylo mao ang akong pag-ampo sa ngalan ni Jesukristo, amen.