Ang Tubag Mao Si Jesus

Pagkadako nga dungog nga mamulong kaninyo niini nga sesyon sa komperensiya. Karon tawagon ko kamo nga mga higala. Sa Ebanghelyo ni Juan, ang Manluluwas mitudlo nga kita ang Iyang mga higala kon buhaton nato ang gihangyo Niya nga atong buhaton.¹

Ang atong indibidwal ug hiniusa nga gugma sa Manluluwas, ug ang atong mga pakigsaad Kaniya, mao ang mobugkos kanato. Sama sa gitudlo ni Presidente Henry B. Eyring: “Ngadto kaninyo ako gusto mosulti kon unsa ka dako ang gugma ug pagsalig sa Ginoo kaninyo. Ug, mas dugang pa, gusto ko mosulti kaninyo kon unsa ka dako nga nagdepende Siya kaninyo.”²

Sa dihang gitawag ako isip usa ka General Authority ni Presidente Russell M. Nelson, napuno ko sa mga emosyon. Hilabihan kadto. Akong asawa, si Julie, ug ako mahingawaon nga nagpaabot sa Sabado sa hapon nga sesyon sa kinatibuk-ang komperensiya. Makapaubos kadto nga mapaluyohan. Mainampingon nakong giihap ang mga lakang ngadto sa akong gitakda nga lingkoranan aron dili ko masipyat sa akong unang buluhaton.

Sa pagtapos niana nga sesyon, dunay nahitabo nga adunay dako nga epekto kanako. Ang mga sakop sa korum naglinya ug tagsa-tagsa nga mitimbaya sa bag-ong mga General Authority. Ang matag usa mipaambit sa iyang gugma ug suporta. Uban sa kinasingkasing nga abrazo [gakos] miingon sila, “Ayaw og kabalaka, nahisakop ka.”

Sa atong relasyon sa Manluluwas, Siya motan-aw sa kasingkasing ug “walay pagtamod sa mga tawo.”³ Hunahunaa kon giunsa Niya pagpili ang Iyang Apostoles. Siya wala nagpakabana sa estado o bahandi. Siya nagdapit kanato sa pagsunod Kaniya, ug nagtuo ako nga Siya mopaneguro kanato nga kita nahisakop Kaniya.

Kini nga mensahe hilabihang magamit ngadto sa kabatan-onan sa Simbahan. Makita nako kaninyo ang unsay nakita ni Presidente Nelson diha kaninyo. Siya miingon nga “dunay butang nga dili ikalimod nga espesyal mahitungod niini nga henerasyon sa kabatan-onan. Ang inyong Langitnong Amahan adunay dako nga pagsalig kaninyo nga ipadala kamo sa yuta niining panahona. Gipakatawo kamo alang sa kahalangdon!”⁴

Ako mapasalamaton alang sa unsay akong makat-onan gikan sa kabatan-onan. Ako mapasalamaton alang sa unsay gitudlo sa akong mga anak kanako, alang sa unsay gitudlo sa atong mga misyonaryo kanako, ug alang sa unsay gitudlo sa akong mga pag-umangkon kanako.

Dili pa lang dugay kaayo, nagtrabaho ko sa among uma uban sa akong pag-umangkong lalaki nga si Nash. Siya sayis anyos ug adunay usa ka putli nga kasingkasing. Siya ang akong paborito nga pag-umangkon nga ginganlan og Nash, ug nagtuo ko nga ako ang iyang paborito nga uyoan nga namulong sa komperensiya karon.

Samtang gitabangan ko niya nga makakita og solusyon alang sa among proyekto, miingon ko, “Nash, nindot kaayo kana nga ideya. “Giunsa man nimo nga nahimong maalamon kaayo?” Siya mitan-aw kanako nga adunay ekspresyon sa iyang mga mata nga nag-ingon, “Tiyo Ryan, nganong wala god ka nakahibalo sa tubag niini nga pangutana?”

Siya yanong mikibo sa iyang mga abaga, mipahiyom, ug masaligong miingon, “si Jesus.”

Si Nash mipahinumdom kanako niana nga adlaw niining yano apan mahinungdanon nga pagtulon-an. Ang tubag ngadto sa labing yano nga mga pangutana ug ngadto sa labing komplikado nga mga problema kanunayng pareha. Ang tubag mao si Jesukristo. Ang matag solusyon makita diha Kaniya.

Diha sa Ebanghelyo ni Juan, ang Manluluwas miingon ngadto sa Iyang mga disipulo nga Siya mag-andam og dapit alang kanila. Si Tomas naglibog ug miingon ngadto sa Manluluwas:

“Ginoo, wala kami mahibalo kon asa ka paingon busa unsaon man namo pagkatultol sa dalan?

“Si Jesus mitubag, “Ako ang dalan, ang kamatuoran ug ang kinabuhi. Walay makaadto sa Amahan kon dili moagi kanako.”⁵

Ang Manluluwas mitudlo sa Iyang mga disipulo nga Siya “ang dalan, ang kamatuoran, ug ang kinabuhi.” Siya ang tubag ngadto sa pangutana kon unsaon nga moduol ngadto sa Langitnong Amahan. Ang pagbaton og pagpamatuod sa Iyang diosnong tahas sa atong mga kinabuhi mao ang usa ka butang nga akong nakat-onan isip usa ka batan-ong lalaki.

Samtang nagserbisyo ko isip usa ka misyonaryo sa Argentina, si Presidente Howard W. Hunter midapit kanamo sa pagbuhat og usa ka butang nga adunay mahinungdanon nga epekto sa akong kinabuhi. Miingon siya, “Kinahanglang mas makaila kita kang Kristo nga mas labaw pa kay sa atong pagkaila kaniya: kinahanglang mohinumdom kita kaniya nga mas labaw pa kay sa atong paghinumdom kaniya; kinahanglang moserbisyo kita kaniya nga mas kanunay kay sa atong pagserbisyo kaniya.”⁶

Nianang higayona, nabalaka ko kon unsaon nga mahimong usa ka mas maayo nga misyonaryo. Kini mao ang tubag: nga moila kang Kristo, nga mohinumdom Kaniya, ug nga moserbisyo Kaniya. Ang mga misyonaryo sa tibuok kalibotan nagkahiusa niini nga katuyoan: “pangimbitar sa uban sa pagduol ngadto kang Kristo pinaagi sa pagtabang kanila nga makadawat sa gipahiuli nga ebanghelyo pinaagi sa pagbaton og hugot nga pagtuo [Kaniya] ug sa Iyang Pag-ula” ug pinaagi sa “paghinulsol, pagpabunyag, pagdawat sa gasa sa Espiritu Santo, ug paglahutay hangtod sa kataposan.”⁷ Ngadto sa atong mga higala nga naminaw sa mga misyonaryo, ako modugang sa akong imbitasyon nga moduol ngadto kang Kristo. Magkauban kita nga maningkamot nga moila Kaniya, mohinumdom Kaniya, ug moserbisyo Kaniya.

Ang pagserbisyo og misyon usa ka sagrado nga panahon sa akong kinabuhi. Sa akong kataposang interbiyo uban kaniya isip usa ka full-time nga misyonaryo, si Presidente Blair Pincock namulong sa umaabot nga kausaban sa mga lider sa misyon, samtang siya ug ang iyang asawa hapit na mahuman sa ilang serbisyo. Kaming duha magul-anon nga mobiya sa usa ka butang nga gihigugma namo pag-ayo. Siya nakakita nga naproblema ko sa hunahuna nga dili na usa ka full-time nga misyonaryo. Siya usa ka tawo nga adunay dakong hugot nga pagtuo ug mahigugmaong mitudlo kanako sama sa iyang gibuhat sulod sa miaging duha ka tuig. Siya mitudlo ngadto sa hulagway ni Jesukristo ibabaw sa iyang lamesa ug miingon, “Elder Olsen, ma-OK ra kining tanan tungod kay kini mao ang Iyang buhat.” Ako mibati og kasegurohan nga nasayod nga ang Manluluwas motabang kanato, dili lang samtang kita nagserbisyo apan kanunay—kon tugotan nato Siya.

Si Sister Pincock mitudlo kanamo gikan sa kinahiladman sa iyang kasingkasing gamit ang labing yano nga mga pulongan sa Espanyol. Sa dihang siya miingon, “Jesucristo vive [Si Jesukristo buhi],” ako nasayod nga kini tinuod ug nga Siya nabuhi. Sa dihang siya miingon, “Elderes y hermanas, les amo [Elders ug sisters, gihigugma ko kamo],” ako nasayod nga siya nahigugma kanamo ug gusto nga kami mosunod sa Manluluwas kanunay.

Ang akong asawa ug ako bag-ohay lang nga napanalanginan sa pagserbisyo isip mga lider sa misyon aron maghago uban sa talagsaon nga mga misyonaryo sa Uruguay. Ako moingon nga kini mao ang labing maayo nga mga misyonaryo sa kalibotan, ug ako nagsalig nga ang matag lider sa misyon mobati niana nga paagi. Kini nga mga disipulo mitudlo kanamo kada adlaw mahitungod sa pagsunod sa Manluluwas.

Atol sa regular nga mga interbiyo usa sa among maayo kaayo nga sister nga mga misyonaryo misulod sa opisina. Siya usa ka malamposon nga misyonaryo, usa ka maayo kaayo nga trainer, ug usa ka mapahinungoron nga lider. Siya gidayeg sa iyang mga kompanyon ug gihigugma sa mga tawo. Siya masulundon, mapainubsanon, ug masaligon. Ang among kanhiay nga mga interbiyo nakatutok sa iyang area ug sa mga tawo nga iyang gitudloan. Kini nga interbiyo lahi. Samtang nangutana ko kon kumusta siya, nabantayan nako nga naproblema siya. Miingon siya, “Presidente Olsen, wala ko kahibalo kon kaya nako kini. Wala ko kahibalo kon igo ba gayod ang akong kamaayo. Wala ko kahibalo kon mahimo ba ako nga misyonaryo nga gikinahanglan sa Ginoo nga ako mamahimo.”

Siya usa ka talagsaon nga misyonaryo. Maayo kaayo sa matag paagi. Pangandoy sa usa ka presidente sa misyon. Ako wala gayod nabalaka mahitungod sa iyang mga abilidad isip usa ka misyonaryo.

Samtang naminaw ko niya, nanglimbasog ko kon unsay isulti. Ako hilom nga nag-ampo: “Langitnong Amahan, kini usa ka talagsaon nga misyonaryo. Siya Imoha. Siya hustong nagbuhat sa tanan. Dili ko gusto nga makasulti sa sayop nga butang. Palihog tabangi ko nga mahibalo kon unsay isulti.”

Ang mga pulong miabot kanako. Ako miingon, “Hermana [Sister], masulob-on kaayo ko nga ikaw mibati niini nga paagi. Tugoti ko nga mangutana kanimo. Kon ikaw adunay higala nga imong gitudloan kinsa mibati niini nga paagi, unsa man ang imong isulti?”

Siya mitan-aw kanako ug mipahiyom. Uban nianang dili masaypan nga diwa ug kombiksiyon sa misyonaryo, siya miingon, “President, sayon ra kana. Ako mosulti kaniya nga ang Manluluwas hingpit nga nakaila kaniya. Ako mosulti kaniya nga Siya buhi. Siya nahigugma kanimo. Ikaw igo ang kamaayo, ug kaya nimo kini!”

Uban sa gamay nga katawa siya miingon, “Tingali kon kana magamit ngadto sa atong mga higala, nan magamit usab kini kanako.”

Kon kita adunay mga pangutana o mga pagduhaduha, tingali mabati nato nga ang mga solusyon komplikado kaayo o nga ang pagpangita og mga tubag makalibog kaayo. Hinaot nga hinumdoman nato nga ang kaaway, gani ang amahan sa tanan nga mga bakak, mao ang arkitekto sa kalibog.⁸

Ang Manluluwas mao ang Agalon sa kayano.

Si Presidente Nelson miingon:

“Ang kaaway abtik. Liboan na ka tuig nga siya mihimo sa maayo nga daotan ug sa daotan nga maayo. Ang iyang mga mensahe ingon og kusog, isog, ug mapagarbohon.

“Hinuon, ang mga mensahe gikan sa atong Langitnong Amahan makita nga lahi. Siya makigsulti sa yano, sa hilom, ug sa labihan kayano nga kita makasabot gayod Kaniya.”⁹

Pagkamapasalamaton nato nga gihigugma kita pag-ayo sa Dios nga Siya mipadala sa Iyang Anak. Siya mao ang tubag.

Si Presidente Nelson bag-ohay lang miingon:

“Ang ebanghelyo ni Jesukristo wala pa sukad mas gikinahanglan kaysa karon. …

“… Kini naghatag og gibug-aton sa dinalian nga panginahanglan alang kanato sa pagsunod sa instruksiyon sa Ginoo ngadto sa Iyang mga disipulo nga ‘panglakaw … sa tibuok kalibotan, ug isangyaw kining maayong balita ngadto sa tanang mga tawo.’”¹⁰

Ngadto niadtong kinsa mopili nga moserbisyo, ako makapamatuod sa mga panalangin nga moabot samtang mopatalinghog kamo sa tawag sa propeta. Ang pagserbisyo dili mahitungod kaninyo, mahitungod kini sa Manluluwas. Kamo matawag ngadto sa usa ka dapit, apan ang mas importante matawag kamo ngadto sa usa ka katawhan. Kamo makabaton og dako nga responsibilidad ug panalangin sa pagtabang sa bag-o nga mga higala nga makasabot nga ang tubag mao si Jesus.

Kini mao ang Simbahan ni Jesukristo sa mga Santos sa Ulahing mga Adlaw, ug kini ang dapit diin kita nahisakop. Ang tanan nga mahigugmaong giawhag ni Presidente Nelson nga atong buhaton modala kanato nga mas duol ngadto sa Manluluwas.

Sa atong talagsaon nga kabatan-onan—lakip sa akong pag-umangkon nga si Nash—sa inyong tibuok kinabuhi, bisan unsa pa ka lisod o makalibog ang mga hagit, mahimo kamong mohinumdom kanunay nga ang tubag yano: kini sa kanunay mao si Jesus.

Sama sa akong nadungog sa daghang higayon nga giingon niadtong atong gipaluyohan isip mga propeta, mga manalagna, ug mga tigpadayag, ako usab moingon nga kami nahigugma kaninyo, kami magpasalamat kaninyo, ug kami nagkinahanglan kaninyo. Kini ang dapit diin kita nahisakop.

Gihigugma nako ang Manluluwas. Ako magpamatuod sa Iyang ngalan, gani si Jesukristo. Ako magpamatuod nga Siya mao “ang mag-uugmad ug maghihingpit sa atong [hugot nga] pagtuo,”¹¹ ug Siya mao ang Agalon sa kayano. Ang tubag mao si Jesus. Sa ngalan ni Jesukristo, amen.