Ang Hiyas sa Pulong
Aduna gayoy hiyas diha sa mga pulong sa mga propeta sa karaan ug sa bag-ong panahon kay ang ilang mga pulong mao ang mga pulong sa Ginoo.
Diha sa Basahon ni Mormon, atong mabasa ang usa ka mahinungdanong desisyon nga gihimo ni propeta Alma diha sa usa ka minahal nga bersikulo sa kasulatan. Sa dili pa rebyohon kadtong pamilyar nga mga pulong, palihog ubani ko sa pagkonsiderar sa lisod nga mga kahimtang diin nahimo kana nga desisyon.
Usa ka pundok sa katawhan, mitawag sa ilang kaugalingon og mga Zoramite, mibulag sa mga Nephite1 ug mipundok diha sa mga utlanan sa yuta duol sa mga Lamanite.2 Ang mga Nephite bag-o lang milupig sa mga Lamanite sa usa ka gubat nga wala pay ingon niadto nga nahitabo diin napulo ka liboan ang nangamatay,3 ug kadto “[gikahadlokan] og dako nga ang mga Zoramite mosulod ngadto sa usa ka kasabotan uban sa mga Lamanite, ug nga kini mahimo nga paagi sa dako nga kapildihan.”4 Lapas pa sa mga kabalaka bahin sa gubat, nahibaloan ni Alma nga ang mga Zoramite, kinsa “aduna na sa pulong sa Dios nga gisangyaw ngadto kanila,”5 midangop sa pagsimba sa dios-dios ug “mituis sa mga paagi sa Ginoo.”6 Kining tanan nakapabug-at sa gibati ni Alma ug kini ang “hinungdan sa dako nga kasubo.”7
Nakita ang iyang kaugalingon dinhi niining komplekado ug mahagiton nga mga kahimtang, si Alma namalandong kon unsay angayng buhaton. Sa iyang desisyon, atong mabasa ang mga pulong nga gitagana sa pagdasig ug pagtudlo kanato samtang kita monabigar sa komplikado ug mahagiton nga mga kahimtang sa atong panahon.8
“Ug karon, kay ang pagsangyaw sa pulong adunay dako nga kalagmitan sa pagdala sa mga katawhan sa pagbuhat niana nga diin makiangayon—oo, kini adunay labaw nga gamhanan nga sangpotanan diha sa mga hunahuna sa mga katawhan kay sa espada, o sa bisan unsa pa, diin nahitabo ngadto kanila—busa si Alma naghunahuna nga kini angay nga sila kinahanglan mosulay sa hiyas sa pulong sa Dios.”9
Tali sa daghang posible nga mga solusyon, ang hugot nga pagtuo ni Alma migiya kanila sa pagsalig diha sa gahom sa pulong. Kini dili sulagma nga ang pipila sa labing gamhanan nga mga wali nga makita sa bisan asa diha sa kasulatan gisangyaw diha-diha dayon human niana nga desisyon. Sa mga kapitulo 32 ug 33 sa Alma atong mabasa ang iyang gamhanang diskurso bahin sa hugot nga pagtuo diha ni Ginoong Jesukristo, ug sa kapitulo 34 atong makita ang pagtulun-an ni Amulek bahin sa kaimportante sa Pag-ula ni Jesukristo.
Mga paghulagway sa Hiyas sa Pulong
Gani, sa tibuok kasulatan atong mabasa ang milagrosong mga panalangin nga gibubo niadtong mipili sa pagsulay sa hiyas sa pulong sa Dios sa ilang kinabuhi.10 Dapiton ko kamo sa pagpamalandong uban kanako niining tulo ka ehemplo samtang atong tutokan ang Basahon ni Mormon—usa ka basahon nga gihulagway ni Presidente Russell M. Nelson isip ang “atong giya sa paglahutay sa ulahing mga adlaw.”11
Una, nagpahinumdom sa iyang katawhan kon giunsa sa Ginoo sa pagluwas ang ilang mga amahan, si Alma nagtudlo: “Tan-awa, siya miusab sa ilang mga kasingkasing; oo, siya mipukaw kanila gikan sa lawom nga pagkatulog, ug sila nahigmata ngadto sa Dios. Tan-awa, sila anaa taliwala sa kangitngit; bisan pa niana, ang ilang mga kalag nalamdagan pinaagi sa kahayag sa walay kataposan nga pulong.”12 Tingali inyong gibati nga kamo daw anaa taliwala sa kangitngit. Ang inyo bang kalag nagtinguha nga malamdagan? Kon mao, palihog sulayi ang hiyas sa pulong sa Dios.
Ikaduha, sa pagpamalandong sa pagkabig sa Ginoo sa mga Lamanite, nga siya misaksi isip usa ka misyonaryo, si Ammon miingon, “Tan-awa pila ka libo sa atong mga kaigsoonan nga siya mibuhi gikan sa mga kasakit sa impyerno; ug sila gidala sa pag-awit sa matubsanon nga gugma, ug kini tungod sa gahom sa iyang pulong nga ania kanato.”13 Mga kaigsoonan, daghan kaayo kanato kinsa nagtinguha nga atong minahal madala sa pag-awit sa matubsanong gugma. Sa tanan natong mga paningkamot, atong hinumdoman ang pagsulay sa hiyas sa pulong sa Dios, nga ania kanato.
Ikatulo, diha sa Basahon ni Helaman atong mabasa, “Oo, kita makakita nga bisan kinsa ang motinguha nga mosagop diha sa pulong sa Dios, diin buhi ug gamhanan, nga mobuak sa kinahiladman sa tanan nga mga kaigmat ug sa mga laang ug sa mga pagpanghaylo sa yawa, ug modala sa [mga] tawo ni Kristo diha sa higpit ug pig-ot nga agianan lahos niana nga walay kataposan nga bung-aw sa pagkauyamot … ug mapahimutang ang ilang mga kalag … sa tuo nga kamot sa Dios sa gingharian sa langit.”14 Nagtinguha ba kamo nga makamatngon sa tanang kaigmat ug mga laang ug sa mga pagpanghaylo sa yawa nga komon kaayo diha sa mga pilosopiya sa atong panahon? Nagtinguha ba kamo sa paglingkawas sa mga panganod sa kalibog tungod sa naghingapin nga impormasyon aron mas matutokan ang dalan sa pakigsaad? Palihog sulayi ang hiyas sa pulong sa Dios.
Isip usa sa nausab pinaagi sa gahom sa pulong, ako personal nga mopamatuod niining kamatuoran sa matahom nga paagi nga gitudlo sa atong minahal nga propeta, si Presidente Russell M. Nelson: “Para nako, ang gahom sa Basahon ni Mormon makita kaayo diha sa dako nga kausaban nga moabot diha sa mga kinabuhi niadtong kinsa mobasa niini ‘uban sa bug-os nga kasingkasing, uban sa tinuod nga tinguha, nga adunay hugot nga pagtuo kang Kristo.’ Daghan sa kinabig mibiya sa mga butang nga sa una bililhon kaayo ngadto nila aron sa pagsunod sa mga pagtulun-an niana nga basahon. … Kini ang mahimo ninyong labing epektibo nga instrumento sa pagdala sa mga kalag ngadto ni Jesus ang Kristo.”15
Ang Tinubdan sa Hiyas
Dinhi niini ug sa uban nga mga paghulagway, atong masaksihan ang hiyas sa pulong sa Dios diha sa mga kinabuhi sa Iyang mga anak. Kita tingali mangutana, unsa ang tinubdan niana nga hiyas o gahom?
Sa atong paghunahuna niini nga pangutana, mahinungdanon ang paghinumdom nga ang hugpong sa mga pulong nga “ang pulong,” sama sa gigamit sa kasulatan, adunay duha ka kahulogan. Si Elder David A. Bednar bag-ohay lang nagtudlo nga “usa sa mga ngalan ni Jesukristo mao ‘Ang Pulong’”ug nga “ang mga pagtulun-an sa Manluluwas, ingon nga narekord diha sa balaan nga kasulatan, usab mao ‘ang pulong.’”16
Si propeta Nephi mihulagway sa relasyon tali niining duha ka kahulogan sa dihang siya misulat: “Paminaw kamo ngadto niini nga mga pulong ug tuo kamo diha ni Kristo; ug kon kamo dili motuo niini nga mga pulong tuo diha ni Kristo. Ug kon kamo motuo diha ni Kristo, kamo motuo niini nga mga pulong, kay sila ang mga pulong ni Kristo, ug siya mihatag niini ngari kanako.”17 Busa atong makat-onan nga aduna gayoy hiyas [gahom] sa mga pulong sa mga propeta sa karaan ug sa bag-ong panahon kay ang ilang mga pulong mao ang mga pulong sa Ginoo.18 Minahal kong mga higala, ang pagdawat niining mahangtorong kamatuoran importante kaayo sa atong espirituhanong paglahutay niining ulahing mga adlaw19 nga, sigun sa gipanagna, adunay “gutom ang nasod. Gutomon ang katawhan apan dili sa pan ug uhawon sila apan dili sa tubig, Gutomon sila sa mensahe gikan sa Ginoo.”20
Sa kataposan, ang hiyas sa pulong sa Dios mao ang Ginoo nga si Jesukristo.21 Kon kita mas hingpit nang makasabot na niini, kita makahimo og hangtod sa hangtod nga mahinungdanong koneksiyon tali sa tahas sa Iyang mga propeta ug sa Manunubos Mismo. Ang atong gugma alang Kaniya, ang atong tinguha sa pagpaduol ngadto Kaniya ug sa pagpabilin sa Iyang gugma,22 ang moduso kanato sa pagsulay sa hiyas sa pulong diha sa atong mga kinabuhi—ang hiyas nga modagayday gikan Kaniya isip atong personal nga Manluluwas ug Manunubos23 ug ang hiyas nga modagayday gikan Kaniya pinaagi sa mga pulong sa “pinili nga mga sulugoon sa Ginoo.”24 Kita makasabot nga, ingon man makatabang ang uban nga mga tinubdan sa atong pagtuon bahin sa Manluluwas ug ang mga pulong sa Iyang mga propeta, kini dili gayod ikapuli alang kanila. Kita kinahanglang matinud-anong magtuon niini ug sa kanunay gayod,25 direkta gikan sa tinubdan.26
Ako mopadayag sa akong gugma sa matag usa kaninyo, akong mga kaigsoonan. Niana nga gugma, ako mohangyo kaninyo sa pagsinati sa hiyas sa pulong sa Dios, ilabi na pinaagi sa Basahon ni Mormon, sa matag adlaw sa inyong kinabuhi. Kon kamo mobuhat sa ingon, kamo makasinati niining propetikanhong saad gikan ni Presidente Russell M. Nelson: “Ako mosaad nga kon kamo mainampoon nga magtuon sa Basahon ni Mormon sa matag adlaw, kamo makahimo og mas maayo nga desisyon—matag adlaw. Ako mosaad kaninyo nga kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksiyon sa inyong kinabuhi. Ako mosaad nga kon inyong isubsob kada adlaw ang inyong kaugalingon diha sa Basahon ni Mormon, mapanalipdan kamo batok sa mga daotan niining panahona.”27
Ako mopamatuod nga ang atong Langitnong Amahan mihatag kanato sa pulong tungod kay Siya nahigugma kanato sa hingpit ug gusto nga ang matag usa kanato makapauli aron makapuyo uban Kaniya hangtod sa kahangtoran. Ako mopamatuod nga “ang Pulong … nahimong tawo,”28 gani si Jesus ang Kristo, ug sa Iyang gahom sa pagluwas ug sa pagtubos kanato. Ako nasayod nga ang Iyang hiyas modagayday pinaagi sa mga pulong sa Iyang mga propeta, sa nanglabay na ug sa kasamtangan.
Kini ang pag-ampo sa akong kasingkasing nga kita makaangkon sa kaalam ug kaaghop sa paggunit29 ngadto sa pulong sa Dios ug magpabilin diha sa dalan sa pakigsaad nga mogiya ngadto sa kaluwasan ug sa kinabuhing dayon.30 Hinaot nga kita mopadayon sa pagsinati og dakong kausaban nga anaa sa matag usa kanato pinaagi sa hiyas sa Pulong.31 Sa ngalan ni Jesukristo, amen.