Kay Sayon ang Iyang Yugo ug Gaan ang Iyang Palas-anon

Ang istorya giasoy bahin sa usa ka tawo nga ginganlan og Jack kinsa adunay minahal nga iro sa pagpangayam nga ginganlan og Cassie. Si Jack mapasigarbuhon kaayo ni Cassie ug kasagaran manghambog unsa siya ka hanas nga iro. Sa pagmatuod niini, si Jack midapit sa pipila ka higala nga motan-aw ni Cassie nga mopasundayag. Human makaabot sa klab sa pagpangayam, si Jack mitugot ni Cassie nga magdagan-dagan sa palibot samtang siya misulod ug nagparehistro.

Sa dihang panahon na sa pagsugod, si Jack matinguhaon na nga mopakita sa talagsaong mga kahanas ni Cassie. Pero, si Cassie lain og linihokan. Siya dili mosunod sa bisan unsa nga mga sugo ni Jack nga sa kasagaran mosunod man gyod siya. Ang tanan niyang buhaton mao ang pagpabilin diha sa iyang kiliran.

Si Jack nahigawad ug naulaw ug nasuko ni Cassie; sa wala madugay siya misugyot nga sila mobiya. Si Cassie dili gani molukso ngadto sa luyo sa trak, ug maong apuradong gipunit siya ni Jack ug daling gibutang sulod sa butangan sa iro. Hilabihan ang iyang kasuko samtang kadtong kauban niya misulog-sulog sa kinaiya sa iyang iro hangtod sa balay. Si Jack wala makasabot ngano nga si Cassie nagpabadlong. Siya gibansay na pag-ayo, ug ang iyang tibuok tinguha kaniadto mao ang pagpahimuot ug pagserbisyo kaniya.

Human makaabot sa balay, si Jack misugod sa paghiling ni Cassie sa mga kadaot, mga liso nga hait, o mga parasito, nga iyang kasagaran buhaton. Sa dihang iyang gitapion ang iyang kamot sa iyang dughan, iyang nahikapan ang medyo basa ug nakita ang iyang kamot nga natabonan sa dugo. Sa iyang kaulaw ug kalisang, iyang nakit-an nga si Cassie adunay taas, lapad nga samad nga lawom diha sa iyang dughan. Siya nakakita og lain sa iyang tuo nga atubangan nga tiil, nga lawom usab.

Si Jack mikugos ni Cassie ug nagsugod sa paghilak. Ang iyang kaulaw kon giunsa niya sa sayop nga paagi paghukom ug pagtagad kaniya hilabihan gayod. Si Cassie lain na og linihokan sayo nianang adlawa tungod kay siya adunay samad. Ang iyang kinaiya naimpluwensya sa iyang kasakit, sa iyang pag-antos, ug sa iyang mga samad. Dili kini bahin sa kakulang sa tinguha sa pagsunod ni Jack o kakulang sa gugma alang kaniya.¹

Ako nakadungog niini nga istorya daghang tuig na ug wala gayod makalimot niini. Pila ka samaran nga mga indibidwal ang ania nato? Makapila kita mohukom sa uban base sa ilang dayag nga panagway ug mga aksiyon, o kakulang sa paglihok, kon kita hingpit nga nakasabot, kita molihok hinuon uban ang kapuangod ug tinguha sa pagtabang imbis modugang ngadto sa ilang mga palas-anon pinaagi sa atong paghukom?

Ako sad-an niini makadaghan sa akong kinabuhi, apan ang Ginoo mapailubon nga mitudlo nako pinaagi sa personal nga mga kasinatian ug samtang ako naminaw sa mga kasinatian sa kinabuhi sa uban. Ako mas hingpit nga nagpasalamat sa ehemplo sa atong minahal nga Manluluwas samtang Siya migahin og daghan sa Iyang panahon sa pagpangalagad ngadto sa uban nga aduna ang gugma.

Ang kasinatian sa kinabuhi sa akong kinamanghoran nga anak nga babaye naglakip sa emosyonal nga mga hagit sa panglawas gikan sa panahon nga siya gamay pang batang babaye. Dihay daghang panahon sa iyang tibuok kinabuhi sa dihang siya mibati nga siya dili na makapadayon. Kami mahangtorong mapasalamaton sa yutan-ong mga anghel kinsa diha atol niadtong mga panahona: naglingkod uban kaniya, naminaw kaniya; naghilak uban kaniya; ug ingon man paghinatagay og talagsaong mga regalo, sa espirituhanong mga pagsabot, ug sa usa ka relasyon sa gugma. Diha sa maong mahigugmaong mga sirkumstansiya, ang mga palas-anon sa kanunay dili na kaayo lisod sa duha ka habig.

Si Elder Joseph B. Wirthlin, nagkutlo sa 1 Mga Taga-Corinto, miingon, “Kon ako tigpanultig mga pinulongan sa mga tawo ug sa mga anghel, apan walay gugma, ako usa lamang ka masaba nga agong o piyangpiyang nga nagatagingting.”²

Siya mipadayon:

“Ang mensahe ni Pablo ngadto niining bag-ong pundok sa mga Santos simple ra ug direkta: Walay mahimong kalainan ang inyong gibuhat kon kamo walay gugma. Kamo makasulti og mga pinulongan, makabaton og gasa sa panagna, makasabot sa tanang mga misteryo ug makaangkon sa tanang mga kahibalo; gani kamo adunay pagtuo sa pagbalhin og bukid, kon wala ang gugma nga putli kini dili makahatag kaninyo og kaayohan.

“‘Ang gugma nga putli mao ang tiunay nga gugma ni Kristo’ [Moroni 7:47]. Ang Manluluwas mipakita niana nga gugma.”³

Sa Juan atong mabasa, “Tungod niini ang tanang tawo mahibalo nga kamo akong mga tinun-an, kon kamo maghigugmaay sa usa ug usa.”⁴

Daghan nga mga pakigpulong ang gihatag sa atong mga lider sa Simbahan bahin sa gugma nga putli, pagkahiusa, gugma, kamabination, kapuangod, pagpasaylo, ug kaluoy. Ako nagtuo nga ang Manluluwas nagdapit nato sa pagpakabuhi og mas taas, mas balaan nga paagi⁵—Iyang paagi sa gugma diin ang tanan makabati nga sila tinuod nga nahisakop ug gikinahanglan.

Kita gisugo sa paghigugma sa uban,⁶ dili mohukom kanila.⁷ Hunongon nato ang paghukom sa uban; dili kini atong responsibilidad.⁸ Hinuon, dawaton nato ang pagdapit sa Manluluwas sa pagsunod Kaniya sa pagpakita og gugma ug kapuangod.

“Duol kanako, kamong tanan nga nagbudlay ug nabug-atan ug papahulayon ko kamo.

“Pas-ana ninyo ang akong yugo ug pagtuon kamo gikan kanako; …

“Sayon ang yugo nga akong isangon kaninyo, ug gaan ang ipapas-an ko kaninyo.”⁹

Ang Manluluwas dili mokonsentir sa sala apan nagtanyag kanato sa Iyang gugma ug mohatag og kapasayloan kon kita maghinulsol. Ngadto sa babaye nga nasakpan nga nanapaw, Siya miingon, “Dili usab ako mohukom kanimo: lakaw, ug ayaw na pagpakasala.”¹⁰ Kadtong Iyang hikapon mibati sa Iyang gugma, ug kana nga gugma miayo ug miusab kanila. Ang Iyang gugma nakadasig kanila nga gusto nga mousab sa ilang mga kinabuhi. Ang pagpuyo sumala sa Iyang paagi makahatag og hingpit nga kalipay ug kalinaw, ug Siya midapit sa uban ngadto niana nga paagi sa pagpuyo uban ang kaligdong, kamabination, ug gugma.

Si Elder Gary E. Stevenson miingon, “Kon kita moatubang sa mga pagsulay ug mga kalisod sa kinabuhi, sakit ug mga kadaot, ang Ginoo—atong Magbalantay, atong Tig-amuma—moamuma kanato uban sa gugma ug kamabination. Siya moalim sa atong mga kasingkasing ug mopahiuli sa atong mga kalag.”¹¹ Isip mga sumusunod ni Jesukristo, dili ba angay nga kita mobuhat sa ingon?

Ang Manluluwas naghangyo nato sa pagkat-on bahin Kaniya¹² ug sa pagbuhat sa mga butang nga atong nakita nga Iyang gibuhat.¹³ Siya ang simbolo sa gugma nga putli, sa tiunay nga gugma. Samtang kita hinay-hinay nga makat-on sa pagbuhat unsay Iyang gisugo kanato—dili tungod sa katungdanan o bisan sa mga panalangin nga tingali atong madawat apan tungod gayod sa gugma alang Kaniya ug sa atong Langitnong Amahan¹⁴—ang Iyang gugma mabati sa uban pinaagi nato ug mohimo sa tanan nga Iyang gisugo dili lamang posible apan sa kataposan mas sayon ug mas gaan¹⁵ ug mas magmalipayon kay sa atong mahunahuna. Kini magkinahanglan og pagbansay; kini moabot og katuigan, sama kanako, apan kon kita magtinguha nga ang gugma mao ang gahom nga modasig, Siya mokuha niana nga tinguha,¹⁶ kana nga liso, ug sa kataposan mahimo ngadto sa usa ka matahom nga kahoy, puno sa matam-is nga bunga.¹⁷

Kita mokanta sa usa sa atong ganahan nga mga himno, “Kinsa ako nga mohusga ako usab may sala? Gitago sa kasingkasing kasubo di makita.”¹⁸ Kinsa kanato ang adunay gitago nga mga kasubo? Ang morag masukulon nga tin-edyer, ang mga anak sa nagdiborsyo, ang nag-inusarang inahan o amahan, kadtong adunay pisikal o mental nga mga hagit, kadtong nagkuwestyon sa ilang hugot nga pagtuo, kadtong nakasinati og pagpihig sa kaliwatan o kultura, kadtong mibati nga nag-inusara, kadtong gusto nga maminyo, kadtong adunay wala tinguhaa nga mga adiksyon, ug sa daghan pa kaayong uban nga nag-atubang sa mga mahagitong mga kasinatian sa kinabuhi—kasagaran bisan kadtong kansang mga kinabuhi ingon og perpekto nga tan-awon.

Walay usa nato adunay perpekto nga kinabuhi ni perpekto nga mga pamilya; ako wala usab. Kon kita magtinguha sa pag-empatiya sa uban kinsa nakasinati usab og mga hagit ug mga pagkadili perpekto, kini makatabang nila nga mobati nga sila wala mag-inusara sa ilang mga pakigbisog. Ang tanan kinahanglan nga mobati nga sila gayod nahisakop ug nga gikinahanglan diha sa lawas ni Kristo.¹⁹ Ang dakong tinguha ni Satanas mao ang pagbahin sa mga anak sa Dios, ug siya nagmalamposon kaayo, apan adunay dakong gahom diha sa panaghiusa.²⁰ Ug sa unsa nga paagi kita kinahanglan nga mosuporta sa usag usa niining mahagiton nga panaw sa pagkamortal!

Ang atong propeta, si Presidente Russell M. Nelson, miingon, “Ang bisan unsang pag-abuso o pagpihig ngadto sa laing tawo tungod sa nasyonalidad, kaliwat, sekswal nga kahilig, gender, naabot sa edukasyon, kultura, o ubang mahinungdanon nga mga timailhan makapasilo sa atong Tiglalang! Ang kana nga pagmaltrato makaingon nga kita magpuyo ubos sa atong gidak-on isip Iyang pakigsaad nga mga anak nga lalaki ug mga anak nga babaye!”²¹

Samtang si Presidente Nelson midapit sa tanan sa pagsulod ug pagpabilin diha sa dalan sa pakigsaad nga mogiya balik ngadto sa atong Amahan sa Langit, siya usab mihatag sa mosunod nga tambag: “Kon ang mga higala ug pamilya … mopalayo gikan sa Simbahan, padayon sa paghigugma kanila. Wala kaninyo ang paghukom sa pagpili sa laing tawo sama ra nga kamo dili usab angayan nga sawayon sa pagpabiling matinud-anon.”²²

Mga higala, hinumdoman nato nga ang matag tawo niini nga yuta usa ka anak sa Dios²³ ug Siya nahigugma sa usag usa.²⁴ Aduna bay mga tawo nga inyong masugatan kinsa mibati nga dunay hilig nga mohukom? Kon mao, hinumdomi nga kini talagsaong mga oportunidad alang nato sa pagbansay sa paghigugma sama sa paghigugma sa Manluluwas.²⁵ Samtang kita mosunod sa Iyang ehemplo, kita mahimong makigtambayayong uban Kaniya ug pagtabang sa pag-amuma og pagbati sa gugma ug pagkahisakop diha sa mga kasingkasing sa tanan nga mga anak sa atong Amahan.

“Kita nagahigugma kaniya, tungod kay siya mao man ang unang nahigugma kanato.”²⁶ Kon kita mapuno sa gugma sa Manluluwas, ang Iyang yugo sa tinuod mahimong sayon, ug ang Iyang palas-anon mahimong gaan.²⁷ Niini ako mopamatuod sa ngalan ni Jesukristo, amen.