Ug Sila Naninguha Pagtan-aw kang Jesus kon Kinsa Siya

Mga igsoong lalaki, mga igsoong babaye, ug mga higala, niadtong 2013 ang akong asawa, si Laurel, ug ako gitawag aron moserbisyo isip mga lider sa misyon sa Czech/Slovak Mission. Ang among upat ka anak miserbisyo uban kanamo.¹ Kami gipanalanginan isip usa ka pamilya sa maalamon kaayo nga mga misyonaryo ug sa talagsaon nga mga Santos sa Czech ug Slovak. Gimahal namo sila.

Samtang ang among pamilya misulod sa mission field, usa ka butang nga gitudlo ni Elder Joseph B. Wirthlin among nahinumdoman. Sa usa ka pakigpulong nga giulohan og “Ang Dakong Sugo,” si Elder Wirthlin nangutana, “Gihigugma ba ninyo ang Ginoo?” Ang iyang tambag ngari kanato kinsa motubag og oo yano ug lawom: “Paggahin og panahon uban Kaniya. Pamalandong sa Iyang mga pulong. Isangon ninyo ang Iyang yugo diha kaninyo. Paningkamot sa pagsabot ug pagsunod.”² Si Elder Wirthlin dayon misaad og makausab nga mga panalangin ngadto niadtong andam nga mohatag og panahon ug luna alang ni Jesukristo.³

Among gihangop ang tambag ni Elder Wirthlin ug naningkamot sa pagsunod niini sa kinasingkasing. Uban sa among mga misyonaryo, migahin kami og taas nga panahon uban ni Jesus, pinaagi sa pagtuon sa Mateo, Marcos, Lucas, ug Juan gikan sa Bag-ong Tugon ug sa 3 Nephi gikan sa Basahon ni Mormon. Sa kataposan sa matag misyonaryo nga panagtigom, mobalik na usab kami ngadto sa among gitawag nga “Lima ka Ebanghelyo”⁴ magbasa, maghisgot, maghunahuna, ug magkat-on mahitungod ni Jesus.

Para nako, para ni Laurel, ug para sa among mga misyonaryo, ang paggahin og panahon uban ni Jesus diha sa mga kasulatan nakausab sa tanan. Nakaangkon kami og mas lawom nga pagdayeg kon kinsa Siya ug unsay mahinungdanon ngadto Kaniya. Kaming tanan mikonsiderar kon giunsa Niya pagtudlo, unsay Iyang gitudlo, ang pamaagi sa Iyang pagpakita og gugma, unsay Iyang gihimo aron sa pagpanalangin ug pagserbisyo, ang Iyang mga milagro, giunsa Niya pagdawat ang pagbudhi, unsay Iyang gihimo sa malisod nga tawhanong emosyon, ang Iyang mga titulo ug mga ngalan, giunsa Niya pagpaminaw, giunsa Niya pagsulbad ang mga kagubot, ang kalibotan nga Iyang gipuy-an, ang Iyang mga pasumbingay, giunsa Niya pag-awhag nga maghiusa ug magmabination, ang Iyang kapasidad sa pagpasaylo ug pag-ayo, ang Iyang mga wali, Iyang mga pag-ampo, ang Iyang maulaon nga sakripisyo, ang Iyang Pagkabanhaw, ang Iyang ebanghelyo.

Sa kasagaran gibati namo nga sama sa “mubo og pamarog” nga si Zaqueo nga nagdagan aron mokatkat sa sycamore nga kahoy samtang milabay si Jesus padulong sa Jerico tungod kay, sama sa gihulagway ni Lucas, kami “naninguha sa pagtan-aw kon kinsa si Jesus.”⁵ Dili ang Jesus nga gusto namo o ganahan nga Siya mamahimo, apan ang Jesus nga Siya gayod kaniadto ug karon.⁶ Sama sa gisaad ni Elder Wirthlin, kami nakakat-on sa tinuod gayod nga paagi nga “ang ebanghelyo ni Jesukristo mao ang ebanghelyo sa kausaban. Kini modawat kanato isip mga lalaki ug mga babaye sa yuta ug mohashas kanato ngadto sa pagkalalaki ug pagkababaye alang sa mga kahangtoran.”⁷

Espesyal kadto nga mga adlaw. Kami nakabaton og pagtuo nga “alang sa Dios walay dili mahimo.”⁸ Ang sagrado nga mga kahaponon didto sa Prague, Bratislava, o Brno, pagsinati sa gahom ug sa pagkatinuod ni Jesus, padayon nga nag-impluwensiya sa tibuok namong mga kinabuhi.

Among gitun-an kanunay ang Marcos 2:1–12. Ang istorya niini makadani kaayo. Gusto nako nga basahon ang usa ka bahin niini direkta gikan kang Marcos ug dayon ipaambit kini sama sa akong pagsabot niini human sa komprehensibo nga pagtuon ug diskusyon uban sa among mga misyonaryo ug sa uban.⁹

“Paglabay sa pipila ka adlaw mipauli si [Jesus] sa Capernaum ug nadungog nga nahiuli na siya sa ila.

“Busa midugok ang daghan kaayong mga tawo nga tungod niini naghuot sila bisan gani diha duol sa pultahan. Samtang si Jesus nagwali sa Maayong Balita ngadto kanila.

“May nangabot nga nagdalag usa ka paralitiko nga giyayongan sa upat ka tawo.

“[Ug] tungod sa kadaghan sa mga tawo, wala sila makaduol kang Jesus. Busa giukab nila ang usa ka bahin sa atop sa tungod gayod ni Jesus ug ilang gitunton ang paralitiko nga naghigda sa iyang higdaanan.

“Nakita ni Jesus nga dako kaayo ang ilang pagtuo kaniya busa miingon siya sa paralitiko, Anak, gipasaylo na ang imong mga sala.”

Human sa usa ka panagsukliay og mga pulong ngadto sa ubang tawo diha sa pundok,¹⁰ si Jesus mitan-aw sa tawo nga paralitiko ug miayo kaniya sa pisikal mismo, nga nag-ingon:

“Bangon, dad-a ang imong gihigdaan ug pauli sa inyo.

“Samtang nagtan-aw silang tanan, mibangon ang paralitiko, gipunit niya ang iyang gihigdaan ug midali paglakaw. Tungod niini hilabihan ang katingala sa mga tawo ug gidayeg nila ang Dios. Sila miingon, Sukad masukad karon pa kita makakitag hitabo nga sama niini.”¹¹

Karon ang istorya sigon sa akong pagsabot niini: Sa sayong bahin sa Iyang pagpangalagad, si Jesus mibalik ngadto sa Capernaum, usa ka gamay nga balangay nga nahimutang sa amihanan nga baybayon sa Dagat sa Galilea.¹² Siya bag-ohay lang nga naghimo og sunod-sunod nga mga milagro pinaagi sa pag-ayo sa masakiton ug pag-abog sa daotang mga espiritu.¹³ Mahinamon nga makadungog ug makasinati sa tawo nga gitawag og Jesus, ang mga tagabalangay nagpundok didto sa balay diin siya gidungog nga mopahulay.¹⁴ Samtang didto sila, si Jesus misugod sa pagtudlo.¹⁵

Ang mga balay niadtong panahona sa Capernaum patag og atop, usa ka andana nga mga puloy-anan, nga nagpundok.¹⁶ Ang atop ug ang mga bongbong magkasagol nga mga bato, kahoy, lapok, ug sulirap, nga adunay hut-ong sa yano nga mga ang-angan sa kilid sa balay.¹⁷ Ang baga nga katawhan dali nga napundok sa balay, mipuno sa lawak diin si Jesus nagtudlo, ug nagkatag hangtod ngadto sa dalan.¹⁸

Ang istorya nakatutok ngadto sa usa ka tawo nga “paralitiko” ug sa iyang upat ka mga higala.¹⁹ Ang paralitiko maoy usa ka matang sa pagkabakol, nga sa kasagaran makasinati og kahuyang ug pagpangurog.²⁰ Akong gihunahuna ang usa sa upat nga miingon ngadto sa uban, “si Jesus ania sa atong balangay. Nakahibalo na kita mahitungod sa mga milagro nga Iyang gihimo ug niadtong Iyang gipang-ayo. Kon ato lang untang madala ang atong higala ngadto kang Jesus, tingali siya usab maayo sa hingpit.”

Busa ang matag usa nila migunit sa usa ka kilid sa banig o higdaanan sa ilang higala ug misugod sa pagdala kaniya latas sa libaongon, pig-ot, dili sementado nga mga kadalanan sa Capernaum.²¹ Nagngulngol ang mga kaunoran, sila miliko sa kataposang eskina ug nakakita nga ang bagang katawhan o, sama sa gitawag sa kasulatan nga, ang “duot” sa katawhan nga nagpundok aron maminaw hilabihan kadaghan nga ang pag-adto kang Jesus imposible.²² Uban sa gugma ug hugot nga pagtuo, ang upat wala moundang. Hinuon, midalidali sila sa pagkatkat sa mga ang-ang ngadto sa patag nga atop, mainampingong gialsa ang ilang higala ug ang iyang higdaanan kuyog kanila, giukab ang atop ibabaw sa lawak diin si Jesus nagtudlo, ug gipaubos ang ilang higala.²³

Hunahunaa nga sa tunga-tunga sa usa unta ka seryoso nga gutlo sa pagtudlo, si Jesus nakadungog og kanaas, mihangad, ug nakakita og nagkadako nga buslot sa kisame samtang ang mga abog ug mga sulirap nangahulog sa lawak. Ang usa ka paralisado nga tawo dayon gipaus-os ngadto sa salog. Sa talagsaong paagi, si Jesus nakasabot nga dili kini usa ka pagsanta apan usa ka butang nga mahinungdanon. Siya mitan-aw sa tawo nga naghigda, mipasaylo sa iyang mga sala atubangan sa kadaghanan, ug giayo ang iyang pisikal nga lawas.²⁴

Kon hunahunaon ang Marcos 2 human niana nga istorya, pipila ka mahinungdanong mga kamatuoran nahimong klaro mahitungod ni Jesus isip ang Kristo. Una, kon kita mosulay sa pagtabang sa usa ka tawo nga atong gihigugma aron moduol kang Kristo, mahimo nato kini uban ang pagsalig nga Siya adunay kapasidad sa pagkuha sa palas-onon sa sala ug sa pagpasaylo. Ikaduha, kon kita magdala og pisikal, emosyonal, o ubang mga sakit ngadto kang Kristo, makahimo kita niini sa kahibalo nga Siya adunay gahom sa pag-ayo ug paghupay. Ikatulo, kon kita maningkamot sama sa upat aron modala sa uban ngadto kang Kristo, makahimo kita niini sa kasigurohan nga Siya makakita sa atong tinuod nga intensiyon ug tukma nga motahod niini.

Hinumdomi, ang pagtudlo ni Jesus nabalda tungod sa pagkabuslot sa atop. Imbis nga kasab-an o papahawaon ang upat kinsa mihimo sa buslot nga maoy nakabalda, ang kasulatan nag-ingon nga “nakita ni Jesus nga dako kaayo ang ilang pagtuo.”²⁵ Kadtong nakasaksi sa milagro dayon “nahingangha sila ug gidayeg nila ang Dios, nga naghatag niining gahoma ngadto sa mga tawo.”²⁶

Mga kaigsoonan, tugoti ko nga motapos pinaagi sa duha ka dugang obserbasyon. Bisan mga misyonaryo, mga tigpangalagad, mga presidente sa Relief Society, mga bishop, mga magtutudlo, mga ginikanan, mga managsoon, o managhigala, kitang tanan naglihok isip mga Santos sa Ulahing mga Adlaw nga mga disipulo diha sa buhat sa pagdala sa uban ngadto kang Kristo. Busa, ang mga kalidad nga gipakita sa upat ka managhigala angayan nga hunahunaon ug sundon.²⁷ Sila maisogon, mapahiangayon, mapailin-ilinon, mamugnaon, daling makakita og paagi, malaomon, determinado, matinud-anon, madasigon, mapaubsanon, ug malahutayon.

Dugang pa, ang upat mihatag og gibug-aton sa espirituwal nga importansiya sa komunidad ug pagpakigdait.²⁸ Aron madala ang ilang higala ngadto ni Kristo, ang matag usa sa upat kinahanglan nga mopas-an sa ilang habig nga kilid sa higdaanan. Kon ang usa mamuhi, mosamot og kalisod ang buluhaton. Kon duha ang moundang, ang tahas siguradong mahimong imposible. Ang matag usa kanato adunay gimbuhaton diha sa gingharian sa Dios.²⁹ Samtang kita molihok niana nga gimbuhaton ug mohimo sa atong bahin, atong gipas-an ang atong habig nga kilid sa higdaanan. Bisan anaa sa Argentina o Vietnam, Accra o Brisbane, usa ka branch o usa ka ward, usa ka pamilya o usa ka misyonaryo nga managkauban, matag usa kanato adunay habig nga kilid nga kinahanglan pas-anon. Sa atong pagbuhat niini, ug kon kita mobuhat, ang Ginoo mopanalangin kanatong tanan. Sama nga Siya nakakita sa ilang hugot nga pagtuo, Siya makakita sa atong hugot nga pagtuo ug mopanalangin kanato isip usa ka katawhan.

Sa managlahi nga panahon nakapas-an ko sa kilid sa usa ka higdaanan, ug sa ubang higayon ako ang gipas-an. Kabahin sa gahom niining talagsaon nga istorya ni Jesus mao nga kini nagpahinumdom kanato kon unsa gayod kadako ang atong panginahanglan sa usag usa, isip mga isoon, aron moduol ngadto kang Kristo ug mausab.

Kini ang pipila ka mga butang nga akong nakat-onan pinaagi sa paggahin og panahon uban ni Jesus diha sa Marcos 2.

“Hinaot nga ang Dios motugot nga kita makahimo sa [pagpas-an sa atong habig nga kilid sa higdaanan], nga kita dili moatras, nga kita dili mahadlok, apan nga kita mahimong lig-on diha sa atong hugot nga pagtuo, ug determindo sa atong buluhaton, aron matuman ang mga katuyoan sa Ginoo.”³⁰

Ako mosaksi nga si Jesus buhi, nga Siya nakaila kanato, ug nga Siya adunay gahom sa pag-ayo, sa pag-usab, ug sa pagpasaylo. Sa ngalan ni Jesukristo, amen.