Pag-alima ug Paghatag sa Inyong Pagpamatuod

Ang makapausab nga mga panahon sa kinabuhi moabot kanunay ug dili damhon, bisan kon kamo batan-on pa. Tugoti ko nga mopakigbahin og usa ka istorya mahitungod sa high school nga estudyante, si Kevin, napili nga mobiyahe nga mogawas sa estado alang sa usa ka kalihokan isip usa ka lider nga estudyante, sumala sa iyang kaugalingon nga mga pulong.

“Ang akong turno sa linya miabot, ug ang opisyal og pamustura nga klerk alang sa rehistrasyon nangutana sa akong ngalan. Siya mitan-aw sa iyang lista ug miingon, ‘Ah ikaw diay ang batan-ong lalaki nga gikan sa Utah.’

“‘Ang imong pasabot ako lang usa?’ Nangutana ko.

“‘Oo, usa lang.’ Siya mitunol nako sa akong name tag nga adunay “Utah” nga giprinta ubos sa akong ngalan. Samtang akong kining gi-klip, ako mibati nga ingon og ako gibutangan og timaan.

“Ako misuot sa elevator sa hotel uban sa lima ka laing mga estudyante sa high school nga adunay mga name tag sama sa akoa. ‘Hoy, ikaw ang gikan sa Utah. Ikaw ba usa ka Mormon?’ pangutana sa usa ka estudyante.

“Ako mibati nga wala sa lugar uban niining tanan nga mga estudyante nga lider gikan sa tibuok nasod. ‘Oo,’ ako nagduha-duha nga miangkon.

“‘Kamo ang nagtuo ni Joseph Smith, kinsa miingon nga siya nakakita og mga anghel. Kamo sa tinuod wala motuo niana di ba?’

“Ako wala masayod unsa ang akong isulti. Ang tanang estudyante diha sa elevator nagtan-aw nako. Ako bag-o lang miabot, ug ang tanan nagtuo nga ako lahi. Ako medyo nangatarongan apan dayon miingon, ako nasayod nga si Joseph Smith usa ka propeta sa Dios.’

“‘Diin man kana gikan?’ Ako natingala. Ako wala makahibalo nga ako anaa niini. Apan ang mga pulong gibati nako nga tinuod.

“‘Oo, ako giingnan nga kamong tanan mga walay basehanan,’ siya miingon.

“Uban niana, dihay dili komportable nga pagbati samtang ang pultahan sa elevator miabli. Samtang among gikuha ang among bagahe, siya naglakaw sa hawanan nga nagkatawa.

“Dayon, usa ka tingog sa akong luyo nangutana, ‘Hoy, dili ba ang mga Mormon adunay laing matang sa Biblia?’

“O dili. Ania na usab. Ako milingi aron motan-aw sa laing estudyante nga diha sa elevator uban nako, si Christopher.

“‘Kini gitawag og Basahon ni Mormon,’ ako miingon, gustong mohunong sa pag-istorya bahin sa relihiyon. Ako mipunit sa akong mga bag ug misugod sa paglakaw sa hawanan.

“‘Mao ba kana ang libro nga gihubad ni Joseph Smith?’ siya nangutana.

“‘Oo, mao kana,’ ako mitubag. Ako nagpadayon sa paglakaw, naglaom nga makalikay sa pagkasagmuyo.

“‘Nan, kahibalo ba ikaw unsaon nako nga makuha og usa?’

“Usa ka kasulatan nga akong nakat-onan sa seminary kalit nga akong nahinumdoman. ‘Dili ko ikaulaw ang maayong balita ni Kristo.’¹ Samtang kini misulod sa akong hunahuna, ako mibati og kaulaw nga ako nasagmuyo kaayo.

“Sa nahibiling adlaw sa semana kana nga kasulatan wala nako makalimti. Ako mitubag sa daghan nga pangutana mahitungod sa Simbahan kutob sa akong mahimo, ug ako nakaamigo og daghan.

“Ako nakadiskobre nga ako mapagarbuhon sa akong relihiyon.

“Ako mihatag ni Christopher sa Basahon ni Mormon. Siya dayon misulat nako, nagsulti nako nga siya midapit sa mga misyonaryo sa iyang panimalay.

“Ako nakakat-on nga dili mosagmuyo sa pagpaambit sa akong pagpamatuod.”²

Ako nadasig sa kaisog ni Kevin sa pagpaambit sa iyang pagpamatuod. Kini usa ka kaisog nga gisubli matag adlaw sa matinud-anong mga miyembro sa Simbahan sa tibuok kalibotan. Samtang ako mopaambit sa akong mga hunahuna, ako modapit kaninyo sa pagpamalandong niining upat ka pangutana:

1. Ako ba nasayod ug nakasabot unsa ang usa ka pagpamatuod?

2. Ako ba nasayod unsaon sa paghatag sa akong pagpamatuod?

3. Unsa ang mga babag sa pagpaambit sa akong pagpamatuod?

4. Unsaon nako nga magpadayon ang akong pagpamatuod?

Ang inyong pagpamatuod mao ang labing bililhon nga kabtangan, sa kasagaran adunay kalabotan sa mainit nga espirituhanon nga mga pagbati. Kini nga mga pagbati sa kasagaran gipaabot sa hilom nga paagi ug gihulagway nga hinay, malumong tingog.”³ Kini mao ang inyong pagtuo o kahibalo sa kamatuoran, gihatag isip usa ka espirituhanon nga saksi pinaagi sa impluwensya sa Espiritu Santo. Ang pag-angkon niini nga saksi mousab unsay inyong isulti ug unsaon ninyo sa paglihok. Ang importante nga mga elemento sa inyong pagpamatuod, nga gikompirmar sa Espiritu Santo, naglakip sa:

• Ang Dios mao ang inyong Langitnong Amahan; kamo mao ang Iyang anak. Siya nahigugma kaninyo.

• Si Jesukristo buhi. Siya mao ang Anak sa buhi nga Dios ug ang inyong Manluluwas ug Manunubos.

• Si Joseph Smith mao ang propeta sa Dios nga gitawag sa pagpahiuli sa Simbahan ni Jesukristo.

• Ang Simbahan ni Jesukristo sa mga Santos sa Ulahing mga Adlaw mao ang gipahiuli nga Simbahan sa Dios dinhi sa yuta.

• Ang gipahiuli nga Simbahan ni Jesukristo gipangulohan sa usa ka buhi nga propeta karon.

Kamo mohatag sa inyong pagpamatuod kon kamo mopaambit og espirituhanong mga pagbati ngadto sa uban. Isip usa ka miyembro sa Simbahan, ang mga oportunidad sa paghatag sa inyong gipamulong nga pagpamatuod moabot diha sa pormal nga mga miting sa Simbahan o sa dili kaayo pormal, sa tinagsa nga pakig-istorya sa pamilya, mga higala, ug sa uban.

Laing paagi sa inyong pagpaambit sa inyong pagpamatuod mao ang pinaagi sa matarong nga kinaiya. Ang inyong pagpamatuod ni Jesukristo dili lang unsay inyong isulti—kon dili kinsa kamo.

Matag higayon nga kamo motingog sa pagsaksi o mopakita pinaagi sa inyong mga aksiyon sa inyong pasalig sa pagsunod ni Jesukristo, kamo nagdapit sa uban sa “pagduol ngadto ni Kristo.”⁴

Ang mga miyembro sa Simbahan nagbarog isip mga saksi sa Dios sa tanan nga mga panahon, diha sa tanan nga mga butang, ug diha sa tanan nga mga dapit.⁵ Ang mga oportunidad sa paghimo niini diha sa internet gamit ang makadasig nga sulod alang sa atong kaugalingon o sa pagpaambit og makabayaw nga sulod nga giandam sa uban walay kataposan. Kita mopamatuod kon kita mohigugma, mopaambit, ug modapit diha sa online. Ang inyong mga tweet, direkta nga mga mensahe, ug mga post magpakita og mas taas , mas balaan kon kamo mogamit usab sa social media sa pagpakita kon sa unsa nga paagi nga ang ebanghelyo ni Jesukristo mihulma sa inyong kinabuhi.

Ang mga babag sa pagpaambit sa inyong pagpamatuod mahimong maglakip sa walay kasegurohan sa unsay isulti. Si Matthew Cowley, usa sa unang Apostol, mipaambit niini nga kasinatian samtang siya mibiya sa lima ka tuig mga misyon sa edad nga 17 ngadto sa New Zealand:

“Ako dili gayod makalimot sa mga pag-ampo sa akong amahan sa adlaw nga ako mibiya. Wala pa gayod ako mahadlok sa hilabihan sukad sa akong kinabuhi. Dayon ang iyang kataposan nga mga pulong ngari nako didto sa estasyonan sa tren, ‘Akong anak, ikaw moadto niana nga misyon … ug usahay kon ikaw tawagon sa pagsulti, ikaw maghunahuna nga ikaw nakaandam na pag-ayo, apan kon ikaw mobarog, ang imong hunahuna hingpit nga nablangko.’ Ako nakasinati niana labaw sa kausa.

“Ako miingon, ‘Unsay imong buhaton kon ang imong hunahuna nablangko?’

“Siya miingon, ‘Ikaw mobarog ug uban sa tumang kainit sa imong kalag, ikaw mosaksi nga si Joseph Smith usa ka propeta sa buhi nga Dios, ug ang mga ideya moabot sa imong hunahuna ug mga pulong sa imong ba-ba … ngadto sa kasingkasing sa tanan nga naminaw.’ Ug mao ang akong hunahuna, nga kasagaran blangko atol sa akong … misyon … , mihatag nako og oportunidad sa paghatag og pagpamatuod ngadto sa labing dakong kalihokan sa kasaysayan sa kalibotan sukad sa pagkalansang sa Ginoo. Sulayi kini usahay mga batan-ong lalaki ug mga batan-ong babaye. Kon kamo walay lain nga isulti, pagpamatuod nga si Joseph Smith mao ang propeta sa Dios, ug ang tibuok kasaysayan sa Simbahan moabot sa inyong hunahuna.”⁶

Sa samang paagi, si Presidente Dallin H. Oaks mipaambit, “Ang ubang mga pagpamatuod mas sayon nga moabot pinaagi sa pagbarog aron paghatag og pagpamatuod kaysa pagluhod aron makaangkon og pagpamatuod.”⁷ Ang Espiritu nagsaksi ngadto sa mamumulong ug sa tigpaminaw.

Laing babag, nga gihatagan og gibug-aton sa istorya ni Kevin, mao ang kahadlok. Sama sa gisulat ni Pablo ngadto ni Timoteo:

“Ang gihatag sa Dios kanato wala maghimo kanatong talawan kon dili naghatag kanatog gahom ug gugma. …

“Busa ayaw kaulaw sa pagsaksi alang sa atong Ginoo.”⁸

Ang mga pagbati sa kahadlok dili gikan sa Ginoo apan kasagaran gikan sa kaaway. Ang pagbaton og hugot nga pagtuo, sama sa gibuhat ni Kevin, makapahimo ninyo sa pagbuntog niini nga mga pagbati ug gawasnon nga mopaambit unsay anaa sa inyong kasingkasing.

Ako nagtuo nga ang usa ka pagpamatuod importante nga bahin sa atong pagkatawo, apan, aron kini magpadayon ug kini mas hingpit nga molambo, si Alma mitudlo nga kita kinahanglan nga “moalima sa atong pagpamatuod uban ang dako nga pag-amping.⁹ Kon kita mobuhat, “kini mogamot, ug motubo, ug modala og bunga.”¹⁰ Kon wala kini “kini malawos.”¹¹

Ang matag minahal nga sakop sa Unang Kapangulohan mihatag nato sa direksyon unsaon sa pagbaton og pagpamatuod.

Si Presidente Henry B. Eyring mahigugmaong mitudlo nato nga “ang pagbusog diha sa pulong sa Dios, pag-ampo sa kinasingkasing, ug pagmasulundon sa mga sugo sa Ginoo kinahanglan nga idapat sa samang paagi ug sa kanunay aron ang inyong pagpamatuod motubo ug molambo.”¹²

Si Presidente Dallin H. Oaks mipahinumdom nato nga aron magpabilin ang atong pagpamatuod, “kita kinahanglan nga moambit sa sakramento matag semana (tan-awa sa D&P 59:9) aron mahimong sarang sa bililhong saad nga kita sa ‘kanunay makabaton sa iyang Espiritu uban [kanato]’ (D&P 20:77).”¹³

Ug si Presidente Russell M. Nelson mabinationg mitambag karong bag-o:

“Lig-ona ang [inyong pagpamatuod] kamatuoran. …

“… Amumaha ang inyong kaugalingon gamit ang mga pulong sa karaan ug sa modernong panahon nga mga propeta. Hangyoa ang Ginoo sa pagtudlo kaninyo kon unsaon nga mas maayong makapaminaw Kaniya. Paggahin og dugang nga panahon diha sa templo ug sa buhat sa family history.

“… Himoa ang inyong pagpamatuod nga inyong labing taas nga prayoridad.”¹⁴

Minahal kong mga kaigsoonan, ako mosaad nga samtang kamo hingpit nga makasabot unsa ang usa ka pagpamatuod, ug samtang kamo mopaambit niini, kamo mobuntog sa mga babag nga walay kasegurohan ug kahadlok, mohimo ninyo sa pag-amuma ug pagpadayon niining labing bililhon nga kabtangan, ang inyong pagpamatuod.

Kita napanalanginan nga adunay dili maihap nga mga ehemplo sa karaan og modernong panahon nga mga propeta kinsa maisugon nga mihatag sa ilang mga pagpamatuod.

Human sa kamatayon ni Kristo, si Pedro mibarog ug mipamatuod:

“Kinahanglang mahibaloan ninyong tanan … pinaagi sa ngalan ni Jesukristo nga Nazaretnon nga inyong gilansang sa krus, nga gibanhaw sa Dios, … kining tawhana nagtindog nga maayo na sa inyong atubangan. …

“… Walay bisan unsa pang lain nga ngalan sa silong sa langit nga gikahatag ngadto sa mga tawo, nga pinaagi niini maluwas kita.”¹⁵

Si Amulek, human sa wali ni Alma bahin sa hugot nga pagtuo, kusganong mipahayag: “Ako magpamatuod nganha kaninyo sa akong kaugalingon nga kini nga mga butang mga tinuod. Tan-awa, ako moingon nganha kaninyo, nga ako nasayod nga si Kristo moanhi taliwala sa mga katawhan, … ug nga siya moula sa iyang dugo alang sa mga sala sa kalibotan; kay ang Ginoong Dios namulong niini.”¹⁶

Sila si Joseph Smith ug Sidney Rigdon, sa dihang nakasaksi sa mahimayaong panan-awon sa nabanhaw nga Manluluwas, mipamatuod:

“Ug karon, human sa daghan nga mga pagpamatuod nga gihatag mahitungod kaniya, kini mao ang pagpamatuod, ang kataposan sa tanan, nga kami naghatag kaniya: Nga siya buhi!

“Kay kami nakakita kaniya, gani diha sa tuo nga kilid sa Dios; ug kami nakadungog sa tingog nga nagpamatuod nga siya mao ang Bugtong Anak sa Amahan.”¹⁷

Mga kaigsoonan, ako modapit kaninyo sa pagtinguha og mga oportunidad sa paghatag sa inyong pagpamatuod sa pulong ug sa buhat. Ang mao nga oportunidad miabot nako karong bag-o, sa kataposan sa usa ka miting uban sa mayor sa ulohang siyudad sa Habagatang Amerika, diha sa iyang lugar nga trabahoanan kauban sa pipila sa iyang opisyal sa kabinite. Samtang kami mitapos sa mahigalaon kaayo nga mga pagbati, ako nagduha-duha nga naghunahuna nga ako kinahanglan nga mopaambit sa akong pagpamatuod. Human sa aghat, ako mitanyag og usa ka saksi nga si Jesukristo mao ang Anak sa buhi nga Dios ug ang Manluluwas sa kalibotan. Ang tanan nausab nianang higayona. Ang espiritu diha sa kwarto dili ikalimod. Ingon og ang tanan natandog. “Ang Maghuhupay … nagpamatuod sa Amahan ug Anak.”¹⁸ Ako mapasalamaton nga ako nagmaisugon sa paghatag sa akong pagpamatuod.

Kon ang usa ka higayon nga sama niini moabot, pahimusli kini ug dawata kini. Kamo mobati sa kainit sa Maghuhupay sa inyong kaugalingon kon kamo mobuhat.

Ako mohatag sa akong pagpamatuod ug saksi nganha kaninyo—ang Dios mao ang atong Langitnong Amahan, si Jesukristo buhi, ug Ang Simbahan ni Jesukristo sa mga Santos sa Ulahing mga Adlaw, mao ang Simbahan sa Dios sa yuta karon nga gidumala sa atong minahal nga propeta, si Presidente Russell M. Nelson. Sa ngalan ni Jesukristo, amen.