Paghingpit diha Kaniya

Ang atong Langitnong Amahan ug ang atong Manluluwas, si Jesukristo, adunay gahom sa pagluwas kanato ug pag-usab kanato. Sila makatabang kanato nga mahimong sama Kanila.

Pipila ka tuig ang milabay, usa sa among bata nga mga apo nga lalaki, si Aaron, nagsugod nga adunay mga problema sa panglawas. Siya naluya, adunay mga bun-og, ug makita nga dili himsog. Human sa medikal nga pagsusi, nahiling siya nga adunay grabe nga aplastic anemia, usa ka sakit diin ang iyang uyok sa bukog mihunong sa paghimo og mga red blood cell, mga white blood cell, ug mga platelet. Kon walay pagpanambal ug usa ka sangpotanan nga pagkaayo, ang iyang dugo dili makalapotay [clot] og tarong o makabatok sa mga impeksiyon, maong ang ginagmay gani nga mga pagkatumba, mga pagkaangol, o mga sakit pwedeng dali nga mahimong makapahulga sa kinabuhi.

Sulod sa usa ka panahon, si Aaron regular nga nakadawat og mga pag-abuno [transfusions] sa platelet ug sa dugo aron ipalayo siya sa peligro. Ang mga doktor mipasabot nga ang bugtong nga tambal alang sa sakit mao ang usa ka transplant sa uyok sa bukog, ug ang labing maayo nga kahigayonan alang sa kalamposan mao ang usa ka igsoon nga mahimong donor. Kon usa sa iyang mga igsoon hingpit nga mobagay, ang sangpotanan sa transplant makapaluwas og kinabuhi. Iyang upat ka manghod nga mga lalaki gi-test, ug ang usa, si Maxwell, nakita nga hingpit nga mobagay.

Bisan kon hingpit nga mobagay ang donor, ang usa ka transplant sa uyok sa bukog adunay seryoso gihapon nga risgo sa mga komplikasyon. Ang proseso nagkinahanglan nga ang kaugalingon nga mga selyula ni Aaron diha sa iyang nadaot nga uyok sa bukog patyon pinaagi sa usa ka kombinasyon sa chemotherapy ug radiation sa dili pa modawat sa mga stem cell gikan sa uyok sa bukog sa iyang igsoon nga si Maxwell. Dayon tungod sa naluya nga immune system ni Aaron, gikinahanglan siyang ilain diha sa ospital sulod sa pipila ka semana ug dayon sa balay sulod sa pipila ka bulan uban sa espesyal nga mga pamaagi, mga pagdili [restrictions], ug mga tambal.

Ang gilaoman nga sangpotanan gikan sa transplant mao nga ang lawas ni Aaron dili mosalikway sa mga donor cell ug nga ang mga selyula ni Maxwell anam-anam nga mohimo sa gikinahanglan nga mga red ug white blood cell ug mga platelet diha sa lawas ni Aaron. Ang usa ka malamposon nga donor transplant makapahimo og tinuod kaayo nga kausaban sa panglawas. Sa makapahibulong nga paagi, usa ka doktor mipasabot nga kon si Aaron makabuhat og krimen ug mibilin og dugo diha sa nahitaboan sa krimen, ang mga polis mahimong modakop sa iyang igsoon nga si Maxwell. Kini tungod kay ang dugo ni Aaron magagikan sa gi-transplant nga mga selyula ni Maxwell ug adunay DNA ni Maxwell, ug kini mao ang sitwasyon sa iyang tibuok nga kinabuhi.

Si Aaron nga naluwas pinaagi sa dugo sa iyang igsoon nakapasiugda og daghang hunahuna mahitungod sa maulaong dugo ni Jesukristo ug sa epekto sa Iyang Pag-ula kanato. Ako gustong motutok karon sa permanente, makahatag og kinabuhi nga kausaban nga mahitabo samtang atong tugotan ang Ginoo nga mohimo og mga milagro kanato.¹

Si Aaron walay gahom sa iyang kaugalingon sa pagbuntog sa sakit. Ang iyang lawas dili makahimo sa mga selyula sa dugo nga gikinahanglan sa pagsuporta sa iyang kinabuhi. Bisan unsa pa ang personal niya nga buhaton, dili siya makaayo sa iyang uyok sa bukog. Sama nga si Aaron dili makaayo sa iyang kaugalingon, dili kita makaluwas sa atong kaugalingon. Bisan unsa pa kita kamaayo, kaedukado, kamaalamon, o kakusgan, kita dili makalimpyo sa atong mga kaugalingon gikan sa atong mga sala, makausab sa atong lawas ngadto sa usa ka imortal nga kahimtang, o makapahimaya sa atong mga kaugalingon. Kini posible lamang pinaagi sa Manluluwas nga si Jesukristo ug sa Iyang walay kinutoban nga Pag-ula. “Walay lain nga agianan ni ngalan nga gihatag ubos sa langit diin ang tawo maluwas diha sa gingharian sa Dios.”² Kini mao ang Iyang maulaong dugo nga makalimpyo kanato ug makabalaan kanato.³

Bisan og si Aaron dili makaayo sa iyang kaugalingon, aron magmalamposon ang transplant gikinahanglan niya nga mahimong andam sa pagbuhat sa unsay gihangyo sa mga doktor—bisan ang lisod kaayo, mahagiton nga mga butang. Bisan og dili kita makaluwas sa atong mga kaugalingon, kon kita motugyan ngadto sa kabubut-on sa Ginoo ug motuman sa atong mga pakigsaad, bukas ang dalan alang sa atong katubsanan.⁴ Sama sa talagsaong proseso sa pag-usab sa mismong DNA sa dugo ni Aaron, kita makapausab sa atong mga kasingkasing,⁵ makadawat sa iyang hitsura diha sa atong mga panagway,⁶ ug mahimong bag-o nga mga linalang diha ni Kristo.⁷

Si Alma mipahinumdom sa katawhan sa Zarahemla sa miaging henerasyon nga nakabig. Namulong bahin sa iyang amahan, si Alma mipasabot nga “sumala sa iyang hugot nga pagtuo dihay usa ka dako nga kausaban nga nahimo diha sa iyang kasingkasing.”⁸ Siya dayon nangutana, “Kamo nakasinati ba niining dako nga kausaban diha sa inyong mga kasingkasing?”⁹ Dili ang katawhan maoy miusab sa ilang kaugalingong mga kasingkasing. Ang Ginoo mihimo sa aktwal nga kausaban. Si Alma klaro kaayo mahitungod niini. Siya miingon, “Tan-awa, siya miusab sa ilang mga kasingkasing.”¹⁰ Sila “mipaubos sa ilang mga kaugalingon ug mitugyan sa ilang pagsalig diha sa tinuod ug buhi nga Dios … [ug] mga matinud-anon hangtod sa kataposan … [ug] nangaluwas.”¹¹ Ang katawhan andam nga mibukas sa ilang mga kasingkaing ug mipakita og hugot nga pagtuo ug dayon ang Ginoo miusab sa ilang mga kasingkasing. Ug pagkagamhanan nga kausaban kadto! Hunahunaa ang kalainan diha sa mga kinabuhi niining duha ka lalaki nga ginganlan og Alma sa wala pa ug human nausab ang ilang mga kasingkasing.¹²

Kita mga anak sa Dios nga adunay halangdong padulngan. Kita mahimong mausab aron mahimong sama Kaniya ug makabaton og “kahingpitan sa himaya.”¹³ Si Satanas, sa laing bahin, gusto nga kita mahimong miserable sama niya.¹⁴ Kita adunay abilidad sa pagpili kon kinsa ang atong sundon.¹⁵ Kon sundon nato si Satanas, kita naghatag niya og gahom.¹⁶ Kon sundon nato ang Dios, Siya mohatag kanato og gahom.

Ang Manluluwas mitudlo nga kita “mahimo nga hingpit.”¹⁷ Kini tingali mahimong makahadlok kaayo. Ako klarong makakita sa akong personal nga mga kakulang ug nahibalo kaayo sa gilay-on tali kanako ug sa pagkahingpit. Kita mahimong adunay kalagmitan nga maghunahuna nga kinahanglang hingpiton nato ang atong kaugalingon, apan dili kana posible. Ang pagsunod sa matag sugyot sa matag libro sa kalibotan bahin sa pagtabang sa kaugalingon dili makahimo niini. Adunay usa lang ka paagi ug usa ka ngalan diin moabot ang pagkahingpit. Kita “[m]ahimo nga hingpit pinaagi ni Jesus ang tigpataliwala sa bag-o nga pakigsaad, kinsa nagbuhat niini nga hingpit nga pag-ula pinaagi sa pagpaagas sa iyang kaugalingon nga dugo.”¹⁸ Ang atong pagkahingpit posible lamang pinaagi sa grasya sa Dios.

Makahanduraw ba kamo kon unsa kaha kadto ka lisod alang sa among batang apo nga si Aaron nga maghunahuna nga kinahanglan niyang sabton ug buhaton sa iyang kaugalingon ang tanang medikal nga mga proseso nga may kalabotan sa iyang transplant? Kita dili kinahanglang maghunahuna nga gikinahanglan natong buhaton ang unsay mabuhat lamang sa Manluluwas diha sa milagroso nga proseso sa atong pagkahingpit.

Samtang si Moroni mitapos sa iyang rekord, siya mitudlo, “Oo, duol ngadto kang Kristo, ug paghingpit diha kaniya … ug kon kamo molimod sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahom, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo.”¹⁹ Pagkamakahupay ug gamhanan nga kamatuoran! Iyang grasya paigo alang kanako. Iyang grasya paigo alang kaninyo. Iyang grasya paigo alang sa tanan kinsa “gikapuyan ug gibug-atan sa … gipas-an.”²⁰

Sa medikal nga mga pagpanambal sama sa kang Aaron, kanunay nga adunay pipila nga walay kasegurohan sa sangpotanan. Sa pagkatinuod, nagkinahanglan si Aaron og ikaduha nga transplant sa dihang ang una adunay mga komplikasyon. Maayo gani, uban sa usa ka espirituhanon nga kausaban sa kasingkasing, dili kita kinahanglang maghunahuna kon kini mahitabo. Kon kita magpuyo sumala sa Iyang kabubut-on, “mosalig sa hingpit diha sa mga maayo nga buhat kaniya kinsa gamhanan sa pagluwas,”²¹ adunay 100 ka porsiyento nga kasegurohan nga malimpyohan pinaagi sa dugo sa Manluluwas ug sa kataposan mahimong hingpit diha Kaniya. Siya mao “ang Dios sa kamatuoran, ug dili magbakak.”²²

Dili ikapangutana nga kini nga proseso sa kausaban magkinahanglan og panahon ug dili makompleto hangtod human niini nga kinabuhi, apan segurado ang saad. Kon ang katumanan sa mga saad sa Dios ingon og layo pa, kita mohangop gihapon niadto nga mga saad, nasayod nga kini matuman.²³

Ang milagroso nga kausaban sa panglawas ni Aaron nagdala og dakong kalipay sa among pamilya. Hunahunaa ang dakong kalipay sa langit kon mahitabo ang gamhanan nga mga kausaban sa atong mga kalag.

Ang atong Langitnong Amahan ug ang atong Manluluwas, si Jesukristo, nahigugma kanato ug mabination nga mitanyag sa pag-usab kanato ug paghingpit kanato. Sila gustong mobuhat niini. Kini mahinungdanon sa Ilang buhat ug himaya.²⁴ Ako magpamatuod nga Sila adunay gahom sa pagbuhat niini samtang kita moduol ngadto Kanila sa hugot nga pagtuo. Sa ngalan ni Jesukristo, amen.