Kaisog sa Pagpahayag sa Kamatuoran

Niadtong 1982, ako hapit na mahuman sa akong associate degree sa topography sa usa ka teknikal nga eskwelahan.

Sa kataposan sa tuig, usa ka kauban sa klase midapit nako nga makig-istorya. Ako nakahinumdom nga kami mibiya sa ubang mga sakop sa klase ug miadto sa usa ka dapit tupad sa korte sa sport. Sa dihang kami miabot didto, siya nakigsulti nako mahitungod sa iyang relihiyoso nga mga pagtuo, ug wala lamang siya mopakita nako sa usa ka libro, apan iyang gihatag ang libro. Sa tinuod, ako wala makahinumdom sa tanan nga mga pulong nga iyang gisulti, apan ako nahinumdom gayod nianang higayona ug sa paagi nga ako mibati sa dihang siya miingon, “Ako gusto nga mopamatuod kanimo nga kini nga libro tinuod, ug nga ang ebanghelyo ni Jesukristo gipahiuli.”

Human sa among panag-istorya, ako mipauli, mipakli sa pipila ka pahina sa libro, ug gibutang kini sa estante. Tungod kay kami anaa na sa kataposan sa tuig, ug kadto mao ang kataposang tuig sa akong degree sa topography, ako wala kaayo magtagad sa libro, ni sa akong kauban sa klase kinsa mipaambit niini nako. Ang ngalan sa libro matag-anan na ninyo. Oo, kadto ang Basahon ni Mormon.

Paglabay sa lima ka bulan, ang mga misyonaryo miabot sa akong balay; hapit na sila mobiya sa akong pag-abot gikan sa trabaho. Ako midapit nila sa pagsulod pag-usab. Kami naglingkod diha sa gamay nga patyo sa atubangan sa akong balay, ug sila mitudlo kanako.

Sa akong pagpangita sa kamatuoran, ako nangutana kanila unsa nga simbahan ang tinuod ug unsaon nako sa pagpangita niini. Ang mga misyonaryo mitudlo nako nga ako makaangkon niana nga tubag sa akong kaugalingon. Uban sa dakong paglaom ug tinguha, ako midawat sa ilang hagit sa pagbasa sa pipila ka kapitulo gikan sa Basahon ni Mormon. Ako nag-ampo sa kinasingkasing ug tinuod nga katuyoan (tan-awa sa Moroni 10:4–5). Ang tubag sa akong pangutana klaro, ug paglabay sa pipila ka adlaw—sa eksakto gayod niadtong Mayo 1, 1983—ako nabunyagan ug nakompirmahan nga usa ka miyembro sa Ang Simbahan ni Jesukristo sa mga Santos sa Ulahing mga Adlaw.

Karon, kon ako maghunahuna sa nagsunod-sunod nga mga hitabo, klaro nakong nakita unsa ka importante ang kaisog sa akong kauban sa klase sa dihang siya mipamatuod mahitungod sa gipahiuli nga kamatuoran ug mipresentar nako sa mahikap nga ebidensiya sa Pagpahiuli sa ebanghelyo ni Jesukristo, gani ang Basahon ni Mormon. Kanang yanong buhat, apan hilabihan kaimportante ngari nako, nakahimo og komon nga koneksiyon tali nako ug sa mga misyonaryo sa dihang gikahimamat ko sila.

Ang kamatuoran gipresentar ngari nako, ug human sa akong bunyag, ako nahimong disipulo ni Jesukristo. Atol sa misunod nga katuigan, ug sa tabang sa espesyal kaayo nga mga tawo sama sa mga lider, mga magtutudlo, mga higala, ug usab pinaagi sa akong kaugalingong personal nga pagtuon, ako nakat-on nga kon ako mohukom nga mahimong disipulo ni Jesukristo, ako midawat og buluhaton nga dili lamang manalipod sa kamatuoran, apan sa pagpahayag usab niini.

Kon kita mouyon nga motuo sa kamatuoran, mosunod niini, ug kon kita maningkamot nga mahimong tinuod nga mga disipulo ni Jesukristo, kita dili makadawat og sertipiko nga dunay garantiya nga kita dili makahimo og mga sayop, nga kita dili matintal nga mopalayo gikan sa kamatuoran, nga kita dili sawayon, o gani nga kita dili makasinati og mga kasakit. Apan ang kahibalo sa kamatuoran nagtudlo nato nga kon kita mosulod sa higpit ug pig-ot nga dalan nga modala nato balik ngadto sa presensya sa Langitnong Amahan, kanunay adunay usa ka paagi aron makalingkawas niini nga mga problema (tan-awa sa 1 Mga Taga-Corinto 10:13); adunay posibilidad kanunay nga duhaduhai una ang atong pagduhaduha sa dili pa magduhaduha sa atong pagtuo (tan-awa sa Dieter F. Uchtdorf, “Dali, Pakig-uban Kanamo,” Liahona, Nob. 2013, 21); ug sa kataposan, kita adunay garantiya nga kita dili gayod mag-inusara kon kita moagi sa mga kasakit, kay ang Dios mobisita sa Iyang katawhan taliwala sa ilang mga kasakit (tan-awa sa Mosiah 24:14).

Sa higayon nga kita makakat-on sa kamatuoran, ang Ginoo mohatag nato og oportunidad sa pagbuhat unsay Iyang himoon kon Siya ania karon. Sa tinuod, Siya mipakita nato pinaagi sa Iyang mga pagtulon-an unsa ang angay natong buhaton: “Ug kamo manglakaw pinaagi sa gahom sa akong Espiritu, magsangyaw sa akong ebanghelyo, sa tinagurha, diha sa akong ngalan, mopabati sa inyong mga tingog ingon sa tunog sa usa ka trumpeta, magpahayag sa akong pulong nga sama ngadto sa mga anghel sa Dios” (Doktrina ug mga Pakigsaad 42:6). Ang oportunidad alang sa misyonaryo nga pagserbisyo sa atong kabatan-onan talagsaon!

Palihog, mga batan-ong lalaki, ayaw ilangay ang petsa sa inyong pagpangandam ngadto sa natad sa misyon. Samtang kamo mag-atubang og mga sitwasyon nga maglisod sa paghimo og desisyon sa pagserbisyo og misyon—sama sa paghunong sa inyong pag-eskwela sulod sa usa ka higayon, pagpanamilit sa inyong hinigugma nga walay garantiya nga kamo maka-date niya pag-usab, o bisan sa pagbiya gikan sa nindot nga trabaho—hinumdomi ang ehemplo sa Manluluwas. Atol sa Iyang pagpangalagad, siya usab nag-atubang og kalisod, lakip sa pagpanaway, pagpanggukod, ug sa kataposan ang mapait nga kopa sa Iyang maulaong sakripisyo. Apan sa tanang sirkumstansiya Siya nagtinguha sa pagbuhat sa kabubut-on sa Iyang Amahan ug paghatag sa himaya ngadto Kaniya. (Tan-awa sa Juan 5:30; 6:38–39; 3 Nephi 11:11; Doktrina ug mga Pakigsaad 19:18–19.)

Mga batan-ong babaye, kamo hangpon pag-ayo, kon kamo magtinguha, nga motrabaho sa ubasan sa Ginoo, ug samtang kamo mag-andam sa inyong kaugalingon sa pagserbisyo isip full-time nga mga misyonaryo, kamo dili makalikay sa sama nga mga hagit.

Sa tanan kinsa mohukom nga moserbisyo Kaniya, ako mosaad ninyo nga ang 24 o 18 ka bulan sa pagserbisyo nga molabay sa natad sa misyon sama nga kini molabay kon kamo magpabilin sa balay, apan ang mga oportunidad nga naghulat sa takos nga mga batan-ong lalaki ug mga batan-ong babaye niini nga Simbahan diha sa natad sa misyon talagsaon. Ang pribilehiyo sa pagrepresentar sa Manluluwas nga si Jesukristo ug sa Iyang Simbahan dili mabaliwala. Ang pag-apil sa dili maihap nga mga pag-ampo, pagpalambo ug paghatag sa inyong pagpamatuod sa makadaghang higayon atol sa adlaw, daghang mga oras sa pagtuon sa kasulatan, pakighimamat sa mga tawo nga dili ninyo mahimamat kon kamo magpabilin sa inyong balay, mao ang dili mahulagway nga mga kasinatian. Ang samang lebel nga kasinatian gireserba alang sa kabatan-onan nga tawagon sa Ginoo nga moserbisyo og mga pangserbisyo nga mga misyon. Kamo hangpon pag-ayo ug gikinahanglan. Palihog, ayaw ipagamay ang kaimportante sa usa ka pangserbisyo nga misyon, kay ang pangserbisyo nga mga misyon naghatag usab og dili mahulagway nga mga kasinatian. “Ang bili sa mga kalag mahinungdanon sa panan-aw sa Dios” (Doktrina ug mga Pakigsaad 18:10), lakip sa bili sa inyong kalag.

Sa pagbalik ninyo gikan sa inyong pagserbisyo, tingali ang inyong hinigugma wala na maghulat ninyo, apan kamo nakat-on na pag-ayo unsaon paghimo og epektibo nga mga pagkontak. Ang inyong akademya nga mga pagtuon mas makahuluganon uban sa limitado apan makaayo nga mga kasinatian nga makatabang diha sa trabahoan, ug sa kataposan, kamo adunay hingpit nga kasiguroan nga maisugong mipahayag sa ebanghelyo sa kalinaw, nagpamatuod mahitungod sa gipahiuli nga kamatuoran.

Alang niadtong mga minyo ug anaa sa lahi nga mga kahimtang sa inyong kinabuhi, kamo gikinahanglan sa buhat sa Ginoo. Andama ang inyong mga kaugalingon. Pagpuyo og himsog nga kinabuhi, paningkamot alang sa temporal ug espirituwal nga pagbarog pinaagi sa kinaugalingong pagpaningkamot, tungod kay ang mga oportunidad sa pagbuhat unsay buhaton sa Ginoo alang sa Iyang mga anak dili limitado sa usa ka grupo sa edad. Ang labing maanindot nga mga kasinatian sa akong asawa ug nako nga among nasinati sa bag-ohay nga mga tuig miabot samtang nagserbisyo kauban sa espesyal nga mga magtiayon, sa espesyal nga mga dapit, ug nagserbisyo sa espesyal kaayo nga mga tawo.

Ang kasinatian nako sa pagkahuman sa akong degree sa topography mitudlo nako nga kita kanunay manalipod sa kamatuoran kon kita mopahayag niini ug nga ang pagpanalipod sa kamatuoran usa ka pag-angkon og responsibilidad. Ang pagpanalipod sa kamatuoran kinahanglang dili gayod himoon sa agresibo nga paagi apan sa tiunay nga tinguha sa paghigugma, sa pagpaambit, ug sa pagdapit sa mga tawo nga kita nagpamatuod mahitungod sa kamatuoran, maghunahuna lamang mahitungod sa temporal ug espirituwal nga kaayohan sa mga anak sa usa ka mahigugmaong Langitnong Amahan (tan-awa sa Mosiah 2:41).

Sa kinatibuk-ang komperensiya niadtong Oktubre 2021, si Presidente Russell M. Nelson, ang atong minahal nga propeta, mitudlo nga lahi sa unsay gihunahuna sa uban, aduna gayoy butang nga husto ug sayop. Aduna gayoy hingpit nga kamatuoran––mahangturong kamatuoran. (Tan-awa sa “Putli nga Kamatuoran, Putli nga Doktrina, ug Putli nga Pagpadayag,” Liahona, Nob. 2021, 6.)

Ang balaan nga mga kasulatan nagtudlo nato nga “Ang kamatuoran mao ang kahibalo sa mga butang ingon nga sila mao karon, ug ingon nga sila mao sa kaniadto, ug ingon nga sila mao sa umaabut” (Doktrina ug mga Pakigsaad 93:24).

Ang kahibalo sa kamatuoran dili makahimo nato nga mas maayo kay sa ubang mga tawo, apan kini nagtudlo nato unsay kinahanglan natong buhaton aron makabalik ngadto sa presensya sa Dios.

Samtang kamo magpadayon nga matinud-anon diha ni Kristo ug uban sa kaisog dili lamang sa pagpahayag sa kamatuoran apan sa pagpuyo sa kamatuoran, kamo makakaplag sa kahupayan ug kalinaw atol sa kasamok nga inyong masugatan niining mga adlawa.

Ang mga hagit sa kinabuhi makapabati nato nga napilde, apan hibaloi nga kon kita mopakita og hugot nga pagtuo diha ni Jesukristo, ang “[atong] mga kasakit sulod lamang sa mubo nga higayon” sa paglantaw sa gilapdon sa kahangtoran (Doktrina ug mga Pakigsaad 121:7). Palihog, ayaw pagtakda og tagal alang sa kataposan sa inyong mga kalisod ug mga hagit. Salig sa Langitnong Amahan ug ayaw paghunong, kay kon kita mohunong, kita dili gayod masayod sa unsa nga paagi ang kataposan sa atong panaw diha sa gingharian sa Dios.

Padayon sa paghupot sa kamatuoran, magkat-on gikan sa mga tinubdan sa kamatuoran:

• Ang mga kasulatan (tan-awa sa 2 Nephi 32:3).

• Ang mga pulong sa mga propeta (tan-awa sa Amos 3:7).

• Ang Espiritu Santo (tan-awa sa Juan 16:13).

Ako mohatag sa akong pagpamatuod ni Jesukristo ug nga kini mao ang Iyang Simbahan. Kita adunay buhi nga propeta, ug kita kanunay nga mobati nga gawasnon kon kita mopahayag sa kamatuoran uban ang kaisog. Sa ngalan ni Jesukristo, amen.