Mga Importanting Panghitabo sa ika-192 nga Matag Tunga sa Tuig nga Kinatibuk-ang Komperensiya

Ang Temple Square malinawon atol sa ika-192 nga Matag Tunga sa Tuig nga Kinatibuk-ang Komperensiya sa Simbahan. Ang mga alingugngog gikan sa konstruksyon diha sa mga nataran ug tungod sa pagdugang og bag-ong teknolohiya sa daan nga sistema aron makasugakod sa linog ang makasaysayanon nga Salt Lake Temple sa makadiyot gihunong.

Apan ang usa ka lahi nga matang sa kalinaw mipuno sa atong mga panimalay ug mga kasingkasing samtang sa makadiyot atong gihunong ang mga tingog sa kalibotan aron maminaw sa buhi nga mga propeta ug mga apostoles.

“Gikan sa pulpito karon ug ugma, kamo padayon nga makadungog og kamatuoran,” si Presidente Russell M. Nelson mitudlo uban sa lahi nga kidlap sa iyang mata. “Mainampuon nga mohangyo sa Ginoo sa pagkompirma nga unsay inyong nadungog mao ang tinuod” (tan-awa sa pahina 29).

Sa kinatibuk-an sa komperensiya, ang mga mamumulong mitudlo og makapalig-on sa pagpamatuod nga mga kamatuoran, lakip sa paghimo ug pagtuman sa sagrado nga mga pakigsaad (tan-awa sa mga pahina 95 ug 73), magdawat og personal nga pagpadayag (tan-awa sa pahina 16), ug pagkadisipulo (tan-awa sa pahina 77).

“Samtang inyong himoon ang inyong pagpamatuod ni Jesukristo nga inyong kinatas-an nga prayoridad,” miingon si Presidente Nelson, “bantayi ang mga milagro nga mahitabo sa inyong kinabuhi” (tan-awa sa pahina 95).

Pagkahuman sa kinatibuk-ang komperensiya, ang trabaho sa Salt Lake Temple gisugdan na usab. Ang trabaho o mga pagpangandam gisugdan usab sa 125 ka templo sa tibuok kalibotan nga gipahibalo o nasugdan na sa pagtukod. Kini karon naglakip sa 18 ka bag-ong templo nga gipahibalo ni Presidente Nelson sa kataposan nga sesyon sa komperensiya (tan-awa sa pahina 121).

“[Ang Ginoo] [m]ibuhat [sa] Iyang mga templo nga mas dali nga maadtoan,” miingon si Presidente Nelson. “Iyang gipaspasan ang gikusgon sa atong pagtukod og mga templo. Iyang gipalambo ang atong abilidad sa pagtabang sa pagpundok sa Israel” (tan-awa sa pahina 121).