Mga Sundanan sa Pagkadisipulo

Ganihang buntag ang among duha ka anak ug tulo ka apo sa Amihanang Amerika, ug mga katunga sa kalibotan nakakita sa kahayag sa adlaw nga harianong misubang sa sidlakan. Ang laing tulo ka anak ug pito ka apo sa Africa, ug ang laing katunga sa kalibotan nakakita sa kangitngit nga anam-anam nga mikamang paduol kanila samtang ang adlaw misalop sa kapunawpunawan sa kasadpan.

Kining walay kataposan nga pagpunay og abot sa adlaw ug sa gabii usa ka inadlaw-adlaw nga pahinumdom sa mga reyalidad nga nagdumala sa atong kinabuhi nga dili nato mausab. Kon kita morespeto ug mopahiangay sa unsa ang atong buhaton, niini nga mga reyalidad, kita makasinati og kinahiladman nga kalinaw ug panag-uyon. Kon kita dili, dili kita mahimutang, ug ang mga butang dili mahitabo sama sa atong gilaoman.

Ang adlaw ug gabii usa ka ehemplo sa mga sundanan nga gihatag sa Dios ngadto sa tanan kinsa nakapuyo sa yuta, sa mga butang ingon nga sila gayod. Kini usa ka hingpit nga kamatuoran sa atong tawhanon nga pagpakabuhi nga dili nato malikayan sumala sa atong kaugalingon nga mga tinguha ug makalingkawas niini. Ako napahinumdoman niini matag higayon nga ako mosakay og eroplano gikan sa Africa aron sa pag-anhi sa kinatibuk-ang komperensiya, usbon ang orasan sa lawas aron mobalik og 10 ka oras sa usa ka adlaw.

Sa higayon nga kita maningkamot nga makamatikod, atong makita nga ang Langitnong Amahan mihatag kanato og igong mga saksi sa kamatuoran aron sa pagdumala sa atong kinabuhi aron ato Siyang mailhan ug makadawat sa mga panalangin sa kalinaw ug hingpit nga kalipay.

Pinaagi ni Propeta Joseph Smith, ang Espiritu sa Ginoo mipamatuod, “Ug usab, Ako mohatag nganha kaninyo og sumbanan sa tanan nga mga butang, nga kamo dili malimbongan; kay si Satanas anaa sa tanan nga bahin niini nga yuta, ug siya naglihok aron sa paglimbong sa mga nasod.”¹

Si Korihor ang anti-Kristo nahulog sa sama nga panglingla, wala motuo sa pagkaanaay Dios ug sa pag-abot ni Kristo. Ngadto kaniya si propeta Alma nagpamatuod, “Ang tanan nga mga butang nagpakita nga adunay Dios; oo, bisan ang yuta, ug ang tanan nga mga butang nga anaa sa ibabaw niini, oo, ug ang paglihok niini, oo, ug usab ang tanan nga mga planeta diin naglihok sa ilang naandan nga paagi nagsaksi nga adunay Makagagahom nga Tiglalang.”²

Sa dihang si Korihor namugos nga hatagan og timailhan sa dili pa siya makatuo, si Alma mihimo kaniya nga maamang. Nagmapainubsanon tungod sa iyang balatian, si Korihor gawasnong mikompisal nga giilad sa yawa.

Kita dili kinahanglan nga mailad. Ang milagro sa maalamon nga kinabuhi kanunay nga anaa sa atong atubangan. Ug ang daklit nga pagtutok ug paghunahuna sa mga katingalahan sa kalangitan nga napuno sa dili maihap nga mga bitoon ug mga galaksiya nag-aghat sa kalag sa matinuohon nga kasingkasing sa pag-ingon nga, “ Dios ko, … Gamhanan ka!”³

Oo, ang Dios nga atong Langitnong Amahan buhi, ug Siya mipaila sa Iyang Kaugalingon kanato sa tanang higayon sa daghang mga paagi.

Apan sa pag-ila, pagtuo, ug pagkamatinud-anon ngadto sa Dios, ang atong mga kasingkasing kinahanglan nga madinawaton sa Espiritu sa kamatuoran. Si Alma mitudlo nga ang hugot nga pagtuo pagaunhan og pagkamapainubsanon.⁴ Si Mormon midugang nga imposible alang ni bisan kinsa nga dili “maaghop ug mapainubsanon ang kasingkasing” nga makaangkon og hugot nga pagtuo ug paglaom ug makadawat sa Espiritu sa Dios.⁵ Si Hari Benjamin mipahayag nga ang bisan kinsa nga mopalabi sa himaya sa kalibotan usa ka “kaaway sa Dios.”⁶

Pinaagi sa pagtugyan ngadto sa pagpabunyag aron sa pagpatuman sa tanang pagkamatarong, bisan Siya matarong ug balaan, si Jesukristo mipakita nga ang kamapainubsanon atubangan sa Dios usa ka sukaranan nga kinaiya sa Iyang mga disipulo.⁷

Ang tanang bag-o nga mga disipulo kinahanglan nga magpakita og kamapainubsanon atubangan sa Dios pinaagi sa ordinansa sa bunyag. Sa ingon “tanan kadto kinsa magpaubos sa ilang mga kaugalingon sa atubangan sa Dios, ug magtinguha sa pagpabunyag, ug moduol uban ang masulob-on nga mga kasingkasing ug mahinulsulon nga mga espiritu … pagadawaton pinaagi sa bunyag ngadto sa iyang simbahan.”⁸

Ang kamapainubsanon makapahimo sa kasingkasing sa mga disipulo nga magtinguha sa paghinulsol ug pagsunod. Ang Espiritu sa Dios makadala dayon sa kamatuoran niana nga kasingkasing, ug makakaplag kini nga nahisakop.⁹

Ang kakulang sa kamapainubsanon nga labing dako nga makatampo sa katumanan sa panagna ni Apostol Pablo dinhi niining kataposang mga adlaw:

“Ang mga tawo maghunahuna lamang sa ilang kaugalingon ug sa kuwarta. Hambugiro sila, mapahitas-on, bugalbugalon, masupilon sa ilang mga ginikanan, dili mapasalamaton, ug dili diosnon,

“Wala silay kaluoy, walay puangod, tigbutangbutang, mapatuyangon, bangis, madinumtanon sa maayo.”¹⁰

Ang pagdapit sa Manluluwas sa pagkat-on Kaniya usa ka pagdapit sa pagsalikway sa kalibotanon nga mga pagpangdani ug mamahimong sama Kaniya––maaghop ug malumo ang kasingkasing, mapainubsanon. Kita dayon makadala sa Iyang yogu ug makadiskobre nga kini sayon—nga ang pagkadisipulo dili palas-anon apan hingpit nga kalipay, sama sa maayo kaayong pagkasulti ug balik-balik nga gitudlo kanato ni Presidente Russell M. Nelson.

Ang pagkat-on bahin ni Kristo ug sa Iyang mga pamaagi mosangpot sa atong pagkaila ug paghigugma Kaniya.

Siya mipakita pinaagi sa ehemplo nga uban sa kinaiya sa kamapainubsanon posible gayod ang pagkaila ug paghigugma sa Dios nga Amahan sa tibuok natong pagkatawo ug sa paghigugma sa uban sama sa atong kaugalingon, sa walay pagtagana. Ang Iyang pangalagad sa yuta, diin atol niini Iyang gibutang ang Iyang kabubut-on ug ang Iyang lawas diha sa altar, usa ka sundanan sa aplikasyon niini nga mga baroganan diin ang Iyang ebanghelyo natukod. Ang duha ka baroganan nagpunting sa uban ug kabahin kon unsaon nato pagpakiglambigit sa uban, dili bahin sa pagpangita og personal nga katagbawan o dungog.

Ang milagroso nga kasukwahian niini nga kon kita magpunting sa atong labing maayo nga mga paningkamot sa paghigugma sa Dios ug sa uban, kita makadiskobre sa atong kaugalingong tinud-anay nga balaanong bili isip mga anak nga lalaki ug mga anak nga babaye sa Dios uban sa kompleto nga kalinaw ug hingpit nga kalipay nga dala niini nga kasinatian.

Kita mahimong usa uban sa Dios ug sa usa’g usa pinaagi sa gugma ug serbisyo. Dayon kita makadawat og pagsaksi sa Espiritu Santo nga ang putli nga gugma, ang bunga nga giingon ni Lehi nga “ hilabihan ka tam-is, labaw pa sa tanan nga [siya] sukad nakatilaw.”¹¹

Ang korona nga nadawat ni Kristo tungod sa paghatag ug pagbuhat sa tanan Niyang abilidad sa pagtakda og sundanan sa paghigugma sa Amahan ug sa paghigugma kanato mao ang pagdawat sa tanang gahom, gani ang tanan nga iya sa Amahan, nga mao ang kahimayaan.¹²

Ang atong oportunidad sa pag-amuma diha sa atong mga kalag og usa ka mahangtoron nga gugma sa Dios ug sa atong silingan magsugod sa panimalay uban sa balaanon nga mga kinaiya nga mokonektar sa Amahan matag adlaw diha sa personal ug pamilya nga pag-ampo sa ngalan sa Iyang Bugtong nga Anak, magkat-on og dungan bahin Kanila pinaagi sa indibidwal ug pamilya nga pagtuon sa ebanghelyo, magsaulog og dungan sa adlawng Igpapahulay, ug ang matag usa naghupot og magamit nga rekomend sa templo, dungan kini nga gamiton kutob sa mahimo.

Samtang tagsa-tagsa kitang molambo sa atong kahibalo ug gugma sa Amahan ug sa Anak, kita molambo diha sa paghatag og bili ug paghigugma alang sa usa’g usa. Ang atong katakos sa paghigugma ug sa pagserbisyo sa uban gawas sa panimalay molambo pag-ayo.

Unsa ang atong buhaton sa panimalay maoy tinud-anay nga pagsulay sa kamalahutayon ug malipayon nga pagkadisipulo. Ang labing tam-is nga mga panalangin sa gipahiuli nga ebanghelyo nga natagamtam sa akong asawa, si Gladys, ug nako diha sa among panimalay nagagikan sa pagkakat-on sa pagkahibalo ug sa pagtahod sa Dios diha sa panimalay ug sa pagpakigbahin sa Iyang gugma ngadto sa among kaliwatan.

Ang gugma alang sa Dios ug pagserbisyo sa usa’g usa nga gipalambo diha sa panimalay ug sa pagserbisyo sa uban gawas sa panimalay sa kadugayan motubo ngadto sa hiyas sa pagkamanggiluy-on.

Kini nahiuyon sa sundanan sa mapahinungoron nga pagserbisyo diha sa gingharian sa Dios nga gipakita kanato sa buhing mga propeta ug mga apostol sa Ginoo. Kita mahiusa kanila.

Nan Kita makahimo sa pagtan-aw, pinaagi kanila, ngadto sa Ginoo “sa matag hunahuna,” aron kita “[dili] [mag]duha-duha” ug “[dili] [ma]hadlok.”¹³

Sama sa buhi nga mga propeta ug mga apostol sa Ginoo, kita makapadayon nga adunay “mga kasingkasing … mapuno sa gugma nga putli ngadto sa tanan nga mga tawo, ug ngadto sa mga sakop sa pagtuo, [adunay] hiyas nga [modayan-dayan sa atong] mga hunahuna nga walay paghunong; … [unya ang atong] pagsalig [mosamot] pagkalig-on diha sa atubangan sa Dios; ug ang doktrina sa pagkapari motuhop diha sa [atong kalag] ingon sa yamog nga gikan sa langit.”

Uban sa buhi nga mga propeta ug mga apostol sa Ginoo, kita usab makaapil sa usa ka mahiyason nga pundok sa pagtuo nga gipalig-on sa mapahinungorong pagserbisyo diin “ang Espiritu Santo [mao ang atong] kauban kanunay, [atong] pagmando dili mausabon nga pagmando sa pagkamatarong ug kamatuoran; ug ang [atong] kamandoan mao ang usa ka walay kataposan nga kamandoan, ug walay pagpugos nga paagi kini mokanap nganha [kanato] hangtod sa kahangtoran.”¹⁴ Kay kini mao ang saad sa plano sa Amahan. Sa ngalan ni Jesukristo, amen.