Ako Nasayud Nga Ang Akong Manunubos Buhi

Pinaagi sa pagsaksi sa Espiritu Santo, matag usa kanato mahimong masayud nga si Jesus mao ang Kristo, ang Anak sa buhi nga Dios.

Gikan sa Kinabuhi ni Joseph F. Smith

Sulod sa sobra sa tunga sa siglo, si Presidente Joseph F. Smith nagserbisyo isip usa ka linain nga saksi sa Manluluwas isip usa ka Apostol, isip usa ka Magtatambag sa Unang Kapangulohan, ug isip Presidente sa Simbahan. Ang iyang pagpamatuod—nga gipamahayag gikan sa mga pulpito sa sulod sa nasud ug sa langyaw nga mga dapit, diha sa mga konseho sa Simbahan, ug diha sa pundok sa iyang kaugalingong pamilya—namulong kabahin sa usa ka kasingkasing ug kalag nga mapasaligon ngadto kang Jesukristo ug sa Iyang mahimayaong ebanghelyo. Ang iyang mga pulong larino; ang iyang mensahe klaro: “Gusto akong mosulti isip usa ka sulugoon sa Dios, nga wala magsalig sa mga pagpamatuod sa tanang mga tawo ug sa matag basahon nga nahisulat, nga ako nakadawat sa pagsaksi sa Espiritu sa akong kaugalingong kasingkasing, ug ako mopamatuod sa atubangan sa Dios, mga anghel ug mga tawo, nga walay kahadlok sa mga sangputanan, nga ako nasayud nga ang akong Manunubos buhi, ug ako makakita kaniya nawong sa nawong, ug mobarug uban kaniya sa akong nabanhaw nga lawas dinhi niini nga yuta, kon ako matinud-anon; kay ang Dios mipadayag niini ngari kanako. Akong nadawat ang pagsaksi, ug ako mohatag sa akong pagpamatuod, ug ang akong pagpamatuod tinuod.”¹

Sa katapusan sa iyang kinabuhi, usa ka espesyal nga funeral service diha sa lubnganan ang gipahigayon didto sa Sementeryo sa Siyudad sa Salt Lake, diin ang mga sakop sa Tabernacle Choir mikanta agig pasidungog sa usa sa iyang paborito nga mga himno, “Ako Nasayud Nga Ang Akong Manunubos Buhi.” Kini nga hugpong sa mga pulong alang kaniya mao ang unod sa iyang hugot nga pagtuo ug ang pokus sa iyang propetikanhong mensahe: “Ako nasayud nga ang akong Manunubos buhi. Ako kining gibati sa tibuok nakong kalag. Ingon ako katagbaw niini sama sa akong pagkatagbaw sa akong kaugalingong pagpakabuhi. Dili ako makabati nga mas sigurado sa akong kaugalingong pagkatawo kaysa akong gibati nga ang akong Manunubos buhi.”²

Ang mosunod nga pagpamatuod gikuha gikan sa usa ka pakigpulong nga gihatag ni Presidente Smith sa usa ka komperensya sa Weber Stake niadtong 18 sa Oktubre 1896.³

Mga Pagtulun-an ni Joseph F. Smith

Ang kinabuhi ug mga pagtulun-an sa Manluluwas mga timailhan sa Iyang kabalaan.

Kitang tanan pamilyar sa kasaysayan sa atong Manluluwas ingon nga kini narekord diha sa Bag-ong Tugon; sa unsang paagi nga Siya natawo sa usa ka birhen; nga Siya nagtubo taliwala sa iyang mga kaigsoonan nga nahimong hingkod nga tawo, ug unsa katalagsaon nga mga butang ang Iyang nahimo bisan sa Iyang pagkabata pinaagi sa gahum sa Iyang pagkadinihugan ug misyon; kon giunsa Niya pagtudlo ang mga abugado ug mga doktor diha sa sinagoga ug diha sa templo, ug kon giunsa Niya pagpalibog niadtong kinsa nagtinguha sa paghimo Kaniya nga sad-an tungod sa usa ka pulong. Kitang tanan pamilyar sa gahum nga Iyang gipakita sa pag-ayo sa masakiton, sa pagpahiuli sa panan-aw sa buta ug pandungog sa bungol, ug sa paghinlo sa sanglahon, ug sa paghimo sa bakul nga molukso sa tumang kalipay.

Kitang tanan pamilyar sa mga doktrina nga iyang gitudlo; ug kini sa kanunay daw para nako wala magkinahanglan og dugang nga pruweba sa kabalaan ni Jesukristo kaysa doktrina nga Iyang gitudlo nga ang mga tawo kinahanglang mohigugma niadtong kinsa sa dakong pagtamay migamit kanila ug migukod kanila, ug nga sila kinahanglang mobalus og kaayo alang sa dautan. Hangtud sa Iyang panahon ang doktrina nga gitudlo sa kalibutan mao, “mata tungod sa mata, ug ngipon tungod sa ngipon.” [Mateo 5:38.] Mao kini ang pilosopiya sa kapanahonan. Apan si Jesus direktang nagtudlo sa katugbang niini. Iyang gimandoan ang Iyang mga disipulo nga kinahanglang dili sila magbalus sa dautan tungod sa dautan, apan nga sila kinahanglang mobalus og kaayo alang sa dautan. “Kon may mosagpa kanimo sa tuo mong aping, itahan mo kaniya ang pikas usab.” [Mateo 5:39.] Kini nga doktrina bag-o sa kalibutan. Usa kini ka doktrina nga wala mahisubay sa napukan nga kahimtang sa tawo.… Busa, dili kini iya sa tawo. Ang mga tawo dili makahimo sa pagtudlo sa ingon nga doktrina ug motuman niini diha sa ilang mga kinabuhi nga walay inspirasyon ug gahum gikan sa kahitas-an.

“Bulahan ang mga kabus sa espiritu: kay ila ang gingharian sa langit.

“Bulahan ang mga nagmasulub-on: kay sila pagalipayon.

“Bulahan ang mga maaghup: kay sila magapanunod sa yuta.

“Bulahan ang mga gigutom ug giuhaw sa pagkamatarung, kay sila pagabusgon.” [Mateo 5:3–6.]

Basaha ang Wali sa Bukid [tan-awa sa Mateo 5–7], ug dayon pangutan-a ang inyong mga kaugalingon kon kini lapas ba o ibabaw sa tanan nga gitudlo sa tawo sukad. Kini mipanghimatuod sa akong pagtuo nga si Jesus dili lamang usa ka tawo, apan Siya Dios nga gipaila diha sa unod. Kini ang doktrina sa kinabuhing dayon, nga kon ang usa ka tawo mabuhi dili gayud siya mamatay; nga kon siya molakaw siya molakaw diha sa maayong mga dalan; ug kon siya magmasulundon, siya masayud sa kamatuoran, ug ang kamatuoran mohimo kaniya nga gawasnon.

Dayon kita moabut sa adlaw sa Iyang husay, sa dihang ang usa ka tawo kinsa Iyang gipili nga mahimong usa ka Apostol ug usa ka saksi Kaniya nahimong traydor ug miluib sa Ginoo ngadto sa Iyang mga kaaway. Miabut sila dala ang espada ug mga puspus aron sa pagdakop sa tawo sa kalinaw, ang tawo kinsa misalikway sa kabayolente, kinsa wala gayud moisa sa Iyang tingog ni sa Iyang kamot batok sa inosente ug sa maayo, ni sa pagkatinuod batok ni bisan kinsa nga tawo, gawas lamang batok sa ilang dautang mga binuhatan—miabut sila aron sa pagdakop Kaniya ug sa pagtugyan Kaniya ngadto sa binuang nga husay, nga sila unta makakita og rason sa pagpahamtang Kaniya og kamatayon.

Sa usa ka higayon, sa dihang Siya nagtudlo sa mga tawo niining matarung nga mga baruganan ug nagpamatuod nga Siya mao ang Anak sa Dios, sila mipunit og mga bato aron ilabay ngadto Kaniya. Si Jesus mitubag, “Gipakitaan ko kamog daghang mga maayong buhat gikan sa akong Amahan, unsa ba niining mga buhata ang hinungdan nga tungod niini inyo akong pagabatoon?” [Juan 10:32.] Siya walay nabuhat nga dautang mga binuhatan ngadto kanila; ang tanan nga Iyang gibuhat maayo; ug sa gihapon sila nagtinguha sa pagpatay Kaniya. Sa dihang si Pedro nasuko, milanit sa iyang espada ug mitigbas sa dunggan sa ulipon sa labawng sacerdote, si Jesus mibadlong kaniya ug miingon, “Iuli sa sakob kanang imong espada: kay ang tanang maggamit og espada mamatay sa espada.” [Mateo 26:52.] Sa tunga-tunga sa Iyang husay, sa dihang gibugal-bugalan, sa dihang gilatus, sa dihang gikoronahan og mga tunok, ug sa dihang gibiay-biay, Siya wala mobalus og biay-biay, apan mapaubsanong mitugyan sa Iyang kapalaran ug miantus nianang gitugotan sa Dios nga ipahamtang sa dautan ngadto Kaniya.

Gidala Siya ngadto sa mga kahimtang diin ang doktrina nga Iyang gitudlo masulayan, ug diha sa tanan Iyang gipamatud-an ang katinuod sa Iyang pagtulun-an. Bisan taliwala sa Iyang paghingutas diha sa krus, Siya mituaw, “Amahan, pasayloa sila; kay wala sila makasabut sa ilang ginabuhat.” [Lucas 23:34.] Ako mangutana, tinuod ba kini? Kon tinuod man kini, nan ako moingon nga walay tawo nga makapamulong sa ingon nga mga pulong sama niini sa ingon nga panahon; nagkinahanglan kini sa gahum ug espiritu, sa gugma, kalooy, gugmang putli ug pagpasaylo sa Dios mismo. Ako mohatag sa akong pagpamatuod nganha kaninyo nga ang usa ka nilalang nga makahangyo sa Dios sa pagpasaylo sa mga tawo kang kinsa Siya nakadawat sa ingon ka walay hinungdan nga kabangis walay lain kondili Dios. Kon walay laing pruweba kaysa niini mahitungod sa kabalaan sa misyon ni Jesukristo, kini lang gani makakumbinser na kanako nga si Jesus mao ang Manunubos sa kalibutan. Siya nagtudlo ug mihimong ehemplo diha sa Iyang kinabuhi sa mismong mga baruganan nga motubos sa kalibutan.…

Si Jesus mihalad sa Iyang kinabuhi isip usa ka sakripisyo aron sa pagtuman sa plano sa kaluwasan.

Si Jesus … gilansang sa krus. Ang Iyang lawas gikuha gikan sa krus sa Iyang mga higala, gihugasan ug giputos sa limpyo nga panapton, ug gipahimutang sa usa ka bag-ong lubnganan, nga wala pa gayud kalubngi og tawo. Sa wala pa kini, hinoon, si Jesus nagtudlo sa Iyang mga disipulo nga ang Anak sa Tawo pagapatyon. Namulong Siya sa yano nga mga pulong, “Ako gihigugma sa Amahan sa katarungan nga mao kini, kay ako magahalad man sa pagpakamatay sa akong kinabuhi, sa paghalad niini aron mabawi ko ra usab unya. Walay tawo nga makakuha niini gikan kanako, hinonoa ginahalad ko kini sa kinaugalingon kong pagbuot. May kagahum ako sa paghalad niini, ug may kagahum ako sa pagbawi niini.” [Juan 10:17–18.] Siya mianhi aron sa pagtuman sa mga panagna sa mga propeta; kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi [tan-awa sa 1 Mga Taga-Corinto 15:22].… Kon ang sala miabut sa kalibutan pinaagi sa kalapasan sa usa ka tawo, ug ang mga sangputanan niini nga kalapasan midangat ngadto sa tanang katawhan nga walay bisan unsa nga ilang gibuhat, dili kini makiangayon, dili ba angayan lamang nga ang katawhan kinahanglang mahaw-as gikan niining mga sangputanan pinaagi sa buhat sa usa ka tawo? Mao kini ang plano nga gipasiugdahan sa sinugdanan, ug walay laing anaa niini kondili pagkamatarung lamang. Si Jesus mihalad sa Iyang kinabuhi isip usa ka sakripisyo aron sa pagtuman niini. Gipatay Siya sa dautang mga tawo, kinsa masaypunong miakusar Kaniya, ug kinsa mipiyung sa ilang mga mata ug misira sa ilang mga kasingkasing batok sa tinuod nga mga baruganan nga Iyang gitudlo.

Human Siya nalubong, atong mabasa sa Kasulatan nga sa unang adlaw sa semana si Maria Magdalena miadto sa lubnganan; apan tan-awa, giligid na ang bato ug nawala Siya. Iyang gitan-aw ang lubnganan ug nakakita og duha ka mga anghel nga nagsul-ob og puti, “ang usa diha sa ulohan, ug ang usa diha sa tiilan,” [Juan 20:12] ug sila miingon ngadto kaniya:

“Babaye, nganong nagahilak ikaw? Siya miingon kanila, Kay ila mang gikuha ang akong Ginoo, ug wala ako masayud kon diin siya nila ibutang.

“Sa pagsulti niya niini, siya miliso ug nakita niya si Jesus nga nagtindog, apan wala siya mahibalo nga kadto mao si Jesus.

“Ug si Jesus miingon kaniya, Babaye, nganong nagahilak ikaw? Kinsa may imong gipangita? Sa pagdahum niya nga kadto mao ang magbalantay sa tanaman, si Maria miingon kaniya, Senyor, kon ikaw man ang nagkuha kaniya, tug-ani ako diin mo siya ibutang, ug ako siyang kuhaon.

“Si Jesus miingon kaniya, Maria. Siya milingi ug miingon kaniya sa pinulongan nga Hebreohanon, Raboni; nga sa ato pa, Magtutudlo.

“Si Jesus miingon kaniya, Ayaw na ako pagkupti; kay wala pa ako makasaka ngadto sa Amahan, apan adtoa ang akong mga kaigsoonan, ug suginli sila nga mosaka ako ngadto sa akong Amahan, ug inyong Amahan, sa akong Dios, ug sa inyong Dios.” [Juan 20:13–17.]

Si Maria miadto dayon ug misulti sa mga disipulo nga nakakita siya sa Ginoo, ug mipakita usab Siya ngadto kanila.

Karon, ato kining hunahunaon sa makadiyot. Ania ang usa ka makasaysayanong kamatuoran nga nagsaysay nga si Maria miadto sa lubnganan, ug nakakita og duha ka mga anghel didto, ug pagkahuman nakakita sa nabanhaw nga Manunubos Mismo. Siya adunay pagpamatuod sa langitnong mga mensahero, nga gipamatuoran sa Anak sa Dios Mismo, nga ang Manunubos nabanhaw. Ang iyang mga pulong gipasa ngari kanato diha sa pagpamatuod. Inyo ba kining supakon? Inyo bang kadudahan ang iyang pagpamatuod?… Pagkahuman naapsan Niya ang duha ka mga disipulo kinsa nagbiyahe pagdulong sa Emmaus, ug mikuyog kanila; apan “ang ilang mga mata nahipugngan aron dili sila makaila Kaniya.” [Lucas 24:16.] Si Jesus nangutana kanila unsay nakahimo kanila nga ingon ka magul-anon, ug sila mitubag: “Ikaw ra ba ang bugtong dumoloong sa Jerusalem, nga wala mahibalo sa mga butang nga nanghitabo didto sulod niining mga adlawa.” [Lucas 24:18.] Pagkahuman ang ilang mga mata nabuka, ug sila nakaila Kaniya.

Human niini mipakita Siya sa Iyang mga disipulo. Usa sa mga disipulo nakadungog nga si Jesus nabanhaw, apan miingon siya nga dili siya motuo niini gawas kon siya makakita Kaniya ug ikapasulod niya ang iyang kamot diha sa Iyang kilid ug ang iyang tudlo diha sa inagian sa mga lansang diha sa Iyang mga kamot. Sa unsang paagi nga si Tomas kapareho gayud sa katawhan. Mipakita na usab Siya sa mga disipulo, ug si Tomas kauban nila.

“Dayon Siya miingon kang Tomas, Ihikap dinhi ang imong tudlo, ug tan-awa ang akong mga kamot; ug ambi ang imong kamot, ug ipasulod kini sa akong kilid; ug ayaw na nianang pagkadili matinuohon, hinonoa magmatinuohon.

“Ug si Tomas mitubag ug miingon Kaniya, Ginoo ko ug Dios ko.

“Si Jesus miingon kaniya, Tomas, tungod kay nakita mo ako, ikaw mituo; dalaygon kadtong wala managpakakita, ngani nanagpanuo.” [Juan 20:27–29.]

Pinaagi sa gahum sa Espiritu Santo kita mahimong masayud nga ang atong Manunubos buhi.

Si Jesus nangalagad sa Iyang mga disipulo human Siya nabanhaw, ug mipanghimatuod diha sa ilang mga panabut sa kamatuoran nga sila wala malingla, apan nga Siya tinuod gayud nga Anak sa Dios, karon nabanhaw gikan sa pagkamatay ngadto sa pagkaimortal ug kinabuhing dayon. Wala sila makakita gamit ang natural nga mata. Mahimo kitang makakita og daghang talagsaong mga butang gamit ang atong natural nga panan-aw, apan mahimo kanang malingla. Mahimo kitang makadungog gamit ang atong mga dunggan, apan mahimo kining malingla. Ang atong natural nga mga pagbati dali nga malingla.… Apan sultihan ko kamo nga kon ang Labawng Makagagahum mopadayag sa Iyang kaugalingon Mismo ngadto sa tawo, Iya kanang gibuhat pinaagi sa gahum sa Espiritu Santo, ug dili pinaagi sa natural nga mata o natural nga dunggan. Siya mamulong ngadto sa tawo ingon nga Siya namulong ngadto kaniya nga wala magsalig sa iyang lawas; Siya namulong ngadto sa espiritu. Busa, kon ang Dios nga Labawng Makagagahum mamulong nganha kaninyo ug mohatag og panghimatuod sa Iyang kamatuoran pinaagi sa gahum sa Espiritu Santo, … kamo masayud ingon nga ang Dios nasayud. Dili kini butang nga inyo lamang nga gituohan; butang nga gipadangat nganha kaninyo pinaagi sa inyong natural nga mga pagbati, diin kamo mahimong masayop o malingla; apan mao kanang gipamulong sa Dios ngadto sa kasingkasing, ngadto sa buhi nga kalag, ngadto sa pagka mahangturon sa tawo, diin, sama sa Dios, dili magun-ob ug mahangturon.

Niini nga paagi nga si Jesus mibuka sa espirituhanon nga mga mata ug panabut sa Iyang mga disipulo human sa Iyang pagkabanhaw, mao nga sila nasayud nga Siya Ginoo ug Kristo. Sila nasayud nga Siya nabanhaw gikan sa pagkamatay. Sila nasayud nga Siya mao ang Anak sa buhi nga Dios, tungod kay ang Dios mipadayag niini ngadto kanila. Busa, sila makasulti sama sa gisulti sa magbabalak,

“Matam-is nga pulong kini:

Ang Manunubos ko buhi.” [“Ako Nasayud Nga Akong Manunubos Buhi,” Mga Himno ug mga Awit sa mga Bata, nu. 38.]

… Kinsa ang makasulti sa kalipay ug sa katagbawan nga moabut ngadto sa kalag sa tawo kinsa nakadawat niini nga pagsaksi gikan sa Labawng Makagagahum nga Dios? Walay tawo nga makapamulong niini. Dili ako makasulti niini nganha kaninyo. Walay mga pulong sa tawo nga makapamulong niini. Mahimo lamang kini nga mabati. Mahimo lamang kini nga masabtan pinaagi sa imortal nga bahin sa tawo. Dili mapamulong ang kalipay nga bation sa tawo kinsa nakadawat niini nga pagpamatuod gikan sa Espiritu Santo.…

Ang Espiritu Santo namulong ngari kanako—dili pinaagi sa dunggan, dili pinaagi sa mata, apan sa akong espiritu, sa akong buhi ug mahangturon nga bahin,—ug mipadayag ngari kanako nga si Jesus mao ang Kristo, ang Anak sa buhi nga Dios. Ako mopamatuod kaninyo nga ako nasayud nga ang akong Manunubos buhi. Dugang pa, ako nasayud nga ako Siyang makita dinhi niini nga yuta, ug nga ako Siyang makita ingon nga Siya mao.… Kay Siya moabut aron sa pagbisita pag-usab sa yuta; dili ingon sa Iyang pag-anhi kaniadto, apan diha sa gahum ug dakong himaya, manimalos diha sa mga dautan ug sa dili diosnon kinsa dili mopatalinghug ngadto sa tingog sa Espiritu, apan kinsa mopatig-a sa ilang mga kasingkasing batok sa kamatuoran ug mosira sa ilang panabut batok sa mga pagpamatuod sa mga sulugoon sa Dios. Sila pagahukman; dili pinaagi sa nadungog sa dunggan, o pinaagi sa nakita sa mata, apan pinaagi sa pagkamatarung sila pagahukman, ug sila pagasilutan tungod kay ang kahayag miabut sa kalibutan ug sila nahigugma sa kangitngit kay sa kahayag.… Ang Ginoo mipadayag niini ngari kanako. Iyang gipuno ang akong tibuok espiritu uban niini nga pagpamatuod, hangtud nga wala nay lawak alang sa pagduhaduha.…

Kita adunay pagpamatuod sa mga disipulo ni Kristo sa kontinente sa Asya ug sa pagpamatuod sa mga disipulo ni Jesus dinhi niini nga kontinente, nga nagpamatuod sa samang mga kamatuoran. Dayon kita adunay Basahon sa Doktrina ug mga Pakigsaad, nga naglangkob sa mga pinadayag ug mga pagpamatuod sa Dios ngadto sa iyang mga Sulugoon ug mga Santos sa panahon sa atong pagpakabuhi, ang ikatulo nga pagpamatuod kabahin niini nga mga butang. Agig dugang niining tanan, … kita adunay pagpamatuod sa Balaang Espiritu diha sa atong mga kasingkasing, nga dili gayud mahimong ilimud; kay siya kinsa nakadawat niini nga pagpamatuod pinaagi sa inspirasyon sa Espiritu Santo dili gayud malingla. Ang Espiritu sa Dios dili magpamatuod nianang dili tinuod. Busa, kon kamo nakadawat sa pagsaksi sa Balaang Espiritu diha sa inyong kasingkasing, kamo nasayud nga ang inyong Manunubos buhi.…

… Ako mohatag kaninyo sa akong pagpamatuod nga ang Manunubos buhi. Unta kini nga pagpamatuod makakita og dapit diha sa inyong mga kasingkasing.… Kon kita mohigugma sa usag usa ug mobuhat og maayo sa usag usa, nan kita makadala sa mga pagtulun-an sa Ebanghelyo sa Anak sa Dios, sa doktrina ni Kristo, nga giisip nga motubos ug mohimaya sa kalibutan ug modala sa katawhan balik ngadto sa presensya sa Dios, mao ang akong pagampo nga unta kitang tanan adunay kahigayunan sa pagdawat ug sa pagtagamtam.

Mga Sugyot alang sa Pagtuon

Unsa nga mga panghitabo o mga pagtulun-an gikan sa kinabuhi sa Manluluwas ang nakatabang kaninyo nga makadawat og pagpamatuod nga Siya mao ang Anak sa Dios?
Giunsa ni Jesukristo pagbalos og kaayo alang sa dautan sa dihang Siya gigukod? Unsa nga mga panalangin ang miresulta gikan sa pagsunod sa Iyang mga pagtulun-an sa pagbalos og kaayo alang sa dautan? Sa unsa nga paagi nga mas epektibo natong masunod kini nga doktrina? (Tan-awa usab sa Mateo 5:38–47.)
Unsaon nato paggamit ang tambag nga “sa pagtanom sa pulong diha sa inyong mga kasingkasing, nga kamo mahimo sa pagsulay sa pagsusi sa iyang kaayo” (Alma 34:4) ngadto sa mga tudling nga gipasabut ni Presidente Smith gikan sa Wali sa Bukid? (Tan-awa sa Mateo 5:3–6.)
Sa unsang paagi nga ang kalumo mahimo natong kalig-on? Ngano nga ang kalumo lisud man kaayong mapalambo alang sa kadaghanan sa kalibutan?
Sa unsang paagi nga ang katapusang mga pulong sa Manluluwas samtang Siya gilansang sa krus nagpakita og “gugma, kalooy, gugmang putli ug pagpasaylo”? Unsaon man nato pagsunod ang Iyang ehemplo atol sa atong kaugalingong mga panahon sa mga pagsulay?
Sa unsa nga paagi nga ang inyong pagpamatuod napalig-on pinaagi sa pagsaksi ni Maria Magdalena sa nabanhaw nga Manunubos? (Tan-awa sa Juan 20:11–18.)
Sa unsang paagi nga si Tomas “kapareho gayud sa katawhan karon”? Unsa nga mga panalangin ang atong madawat kon kita “wala managpakakita, hinonoa nanagpanuo”? (Juan 20:29.)
Unsa ang inyong nakat-unan gikan ni Presidente Smith kalabut sa paghatag og pagpamatuod kabahin sa Manluluwas?
Unsa ang inyong gibati mahitungod sa pagpamatuod ni Presidente Smith kabahin sa Manluluwas? Sa unsang paagi nga kini nga pagpamatuod makatabang kaninyo nga malig-on ang inyong kaugalingong pagsaksi kabahin ni Jesukristo, ang Anak sa Dios?