Pagpaluyo Niadtong Kinsa Gitawag aron sa Pagdumala

Sa akong paghukom, ang usa sa pinakaimportante sa mga buhat nga nahimo diha sa mga komperensya sa Simbahan mao kana diin kita mopataas sa atong mga kamot atubangan sa Ginoo aron sa pagpaluyo sa mga awtoridad sa Simbahan ug sa organisasyon niini ingon nga kini anaa. Apan usa kini sa mga importante nga mga butang nga atong gibuhat nga wala hatagi og importansya sa pipila sa mga tawo. Sa laing pagkasulti, ang pipila sa mga tawo mohimo sa pagpataas sa ilang mga kamot aron sa pagpaluyo sa mga awtoridad sa Simbahan ug dili na maghunahuna pa kabahin niini, ug mobuhat sa daghang higayon nga daw sila nakaagi lamang og usa ka butang diin wala nila hatagi og bisan unsa pa man ka gamay nga importansya. Ako naghunahuna niini nga usa ka sayop nga baruganan…. Kadto kinsa nakigsaad sa pagsunod sa mga sugo sa Ginoo, ug dayon mosupak niana nga pakigsaad pinaagi sa kapakyas sa pagsunod niadto nga mga sugo, walay kalainan ngadto kanila kinsa mipataas sa ilang mga kamot timaan sa usa ka pakigsaad sa pagsuporta ug sa pagpaluyo sa mga awtoridad sa Simbahan ug dayon mapakyas sa paghimo niini. Ang baruganan pareho lang diha sa duha ka mga sitwasyon: kini pagsupak sa pakigsaad nga atong gihimo.²

Kini usa ka grabe nga sayop diha sa presensya sa Labawng Makagagahum alang sa usa ka tawo sa pagbotar aron sa pagpaluyo sa mga awtoridad sa Simbahan ug dayon mopahilayo ug mobatok kanila ug yatakan ang mga tambag nga ilang ihatag; ug kita pagahukman sa Ginoo alang niini.³

Usa kini ka mahinungdanon nga katungdanan nga nakapatong sa mga Santos kinsa mibotar aron sa pagpaluyo sa mga awtoridad sa Simbahan, ang pagbuhat sa ingon dili lamang pinaagi sa pagpataas sa kamot, ang porma lamang, apan diha sa buhat ug sa kamatuoran. Kinahanglan nga walay usa ka adlaw nga molabay apan ang tanang mga tawo nga naglangkob sa Simbahan kinahanglan nga mopataas sa ilang mga tingog diha sa pag-ampo ngadto sa Ginoo aron sa pagpaluyo sa Iyang mga alagad kinsa gibutang aron sa pagdumala ibabaw kanila…. Kini nga mga tawo kinahanglan nga adunay pagtuo sa mga tawo nga mopaluyo kanila diha sa pagtuman sa ilang mga katungdanan, aron nga sila mahimong malig-on diha sa Ginoo….

… Kini sugo sa Ginoo nga kinahanglan kita magpundok … sa pagpaluyo sa mga awtoridad sa Simbahan, sa ingon mibag-o sa atong pakigsaad nga mosuporta sa awtoridad sa Dios nga Iyang gitukod dinhi sa yuta alang sa pagdumala sa Iyang Simbahan. Ug dili ako makatataw og maayo sa kamahinungdanon sa mga Santos sa Ulahing mga Adlaw sa pagtahud ug pagpaluyo diha sa kamatuoran ug sa buhat ang awtoridad sa Balaan nga Priesthood nga gitawag aron sa pagdumala. Sa higayon nga ang espiritu mosulod ngadto sa kasingkasing sa usa ka miyembro sa pagdumili sa pagpaluyo sa gipili nga mga awtoridad sa Simbahan, niana nga higayona siya gipanag-iya sa usa ka espiritu nga hilig sa pagrebelde o panagbingkil; ug kon siya motugot niana nga espiritu nga mogamot og maayo diha sa iyang hunahuna, sa katapusan kini modala kaniya ngadto sa kangitngit ug apostasiya.⁴

Masabtan kaayo kini nga kita magtapok sa kinatibuk-ang komperensya kaduha sa usa ka tuig alang sa katuyoan sa pagpresentar sa mga ngalan niadtong kinsa napili isip mga opisyales nga modumala sa Simbahan, ug kini masabtan nga kadtong kinsa nag-okupar niini nga mga posisyon nagdepende sa tingog sa mga tawo alang sa pagpadayon sa awtoridad, mga katungod ug pribilehiyo nga ilang gihimo. Ang mga babaye nga mga miyembro niini nga Simbahan adunay susama nga pribilehiyo sa pagbotar aron sa pagpaluyo sa ilang mga opisyales nga modumala sama sa mga lalaki nga mga miyembro sa Simbahan, ug ang pagboto sa usa ka sister nga maayo ang rekord sa Simbahan mahiapil diha sa matag paagi sama sa pagbotar sa usa ka brother.⁵

Karon, samtang ang mga sugo sa Dios alang ngadto sa tibuok kalibutan, adunay pipila ka espesyal nga mga sugo nga magamit lamang sa mga Santos sa Ulahing mga Adlaw. Unsa man kini? Usa niini nga mga sugo mao, nga kita kinahanglan nga motahud niadtong kinsa nagdumala kanato; sa laing pagkasulti, kita kinahanglan nga motahud sa Priesthood. Ako wala mohangyo ni bisan kinsa sa pagtahud kanako, gawas kon ako nagbuhat niana sa higpit nga paagi nga nahiuyon sa espiritu sa akong calling ug sa priesthood nga akong gihuptan. Walay miyembro sa Simbahan nga mapugos sa pagtahud kanako kon ako motikang lapas pa nianang priesthood ug katungod nga gihatag ngari kanako pinaagi sa pagpili sa Dios ug sa tingog sa Simbahan. Apan ako mamulong pinaagi sa Espiritu sa Ginoo diha sa kauyonan sa mga buluhaton sa akong katungdanan, angay kini alang sa matag miyembro sa Simbahan sa pagpaminaw nianang akong gisulti. Kay kon kini gisulti pinaagi sa Espiritu sa Dios ug diha sa kauyonan sa akong katungdanan, kini pulong ug kabubut-on sa Labawng Makagagahum.

“Ug bisan unsa ang ilang ipamulong kon nadasig pinaagi sa Espiritu Santo, mahimo nga Kasulatan, mahimo nga kabubut-on sa Ginoo, mahimo nga hunahuna sa Ginoo, mahimo nga tingog sa Ginoo, ug ang gahum sa Dios ngadto sa kaluwasan.

“Tan-awa mao kini ang saad sa Ginoo nganha kaninyo; O kamo nga akong mga sulugoon” [D&P 68:4–5].

Pribilehiyo kini sa tanan sa pagkasayud kon ako nagsulti ba sa kamatuoran pinaagi sa Espiritu sa Dios o wala. Ngadto sa ang Simbahan ni Jesukristo sa mga Santos sa Ulahing mga Adlaw kini gihatag isip usa ka sugo nga kita kinahanglan nga maminaw sa tingog sa Espiritu nga gipakita pinaagi niadtong mga agianan nga gipili sa Dios alang sa paggiya sa Iyang mga tawo…. Kon ako motambag diha sa pagkadautan, ako pagadad-on ngadto sa hukmanan. Walay tawo nga makatudlo og kadautan ngadto sa iyang mga tawo ug mopadayon diha niini og dugay; kay ang Dios makamatikud kaniya ug mopadayag sa iyang mga sekreto sa iyang kasingkasing; ang iyang katuyoan ug tinguha mapakita ngadto sa mga Santos, ug siya mobarug nga hinukman sa Espiritu sa Dios atubangan sa mga Santos. Kon ikaw moila … sa Presidente sa Simbahan ug siya ug iyang mga magtatambag isip presiding authority, nan ang mga miyembro kinsa dili maminaw sa ilang tambag angay nga kaloy-on, kay siya anaa sa kalapasan. Kini nga mga tawo dili motambag ninyo og sayop….

… Ako dili gayud gusto nga makita nga moabut ang adlaw nga kining mga tawo, diin inyong gisaligan sa katungod ug gahum aron sa pagdumala, motak-om sa ilang mga ba-ba aron sila dili na makapangahas sa pagsalikway sa sala o sa pagbadlong sa kadautan…. Atong katungdanan ang pagbuhat niini. Kita anaa dinhi alang niana nga katuyoan. Kita mga magbalantay sa mga tore sa Zion [tan-awa sa Ezequiel 3:17–19]. Atong buluhaton ug katungdanan ang pagbadlong sa mga sayop ug mga kabuang diha taliwala sa mga tawo; ug kon ang mga tawo dili modawat niini, sila kinahanglan nga moadto sa ilang kaugalingong pamaagi ug mopas-an sa mga sangputanan. Kadto kinsa dili mosunod sa matarung nga mga tambag mao ang mag-antus, ug dili kadtong nagbadlong sa kadautan.⁶

Kita mosugyot sa pagbuhat sa atong katungdanan sumala sa kahayag nga atong naangkon, pinaagi sa tabang sa mahigugmaong Amahan. Ako mosugyot nga walay buhaton niana nga sakto nga ako wala sa pinakapositibo nga kasigurohan, pinaagi sa paguyon sa akong mga magtatambag, ang among pag-uyon sa hingpit, ug ang among pagsabut nagkahiusa…. Ako dili mosugyot sa pagbuhat og bisan unsa, o tugutan ang bisan unsa nga butang nga pagabuhaton o gitugutan nga makaapekto sa gingharian sa Dios dinhi sa yuta, gawas kon inuyunan sa kadaghanan, o gawas kon kita nagkauyon niini sa hingpit, dayon ako nasayud nga kita aduna sa kalig-on nga naa sa atong luyo, nga ang gahum sa Dios anaa kanato, ug ang mga Santos mopaluyo ug mosuporta sa atong mga kamot.⁷

Ang mga tawo tingali wala makontento sa usag usa, sila tingali wala makontento ngadto sa Presidency, Korum sa Napulog Duha, o sa uban pa, ug tingali moingon sa ilang mga kasingkasing, “Dili ko gusto nianang tawhana; dili ko motuo nga siya ingon ka maayosama nga siya kinahanglan nga mahimo sa ingon, siya adunay daghan kaayong mga sayop ug mga kahuyang ug, busa, ako dili makahimo ug dili mohimo sa pag-ila sa iyang katungod, ingon nga ako walay pagtuo diha sa tawo.” Sa walay pagduhaduha adunay mga tawo, tingali daghan kaayo, kinsa mibati og sama niana, apan ang problema mao, … tungod lamang kay sila wala makontento sa usa ka tawo ug naghambin og lain nga mga pagbati diha sa ilang mga kasingkasing batok sa ilang kaigsoonan, ilang nakalimtan ang mga plano sa Labawng Makagagahum; sila mitalikod batok sa katungod sa Balaan nga Priesthood; ug pinaagi sa ilang pagkabuta mitugot sa ilang mga kaugalingon nga mapahisalaag, ug sa katapusan motalikod sa Simbahan.

Karon unsaon man kini? Ako mosulti kaninyo. Sa unang higayon ang matag tawo kinahanglan nga masayud nga ang Ebanghelyo tinuod, ingon nga kini mao ang pribilehiyo sa matag usa kinsa nabunyagan ug nakadawat sa Espiritu Santo. Ang usa ka tawo tingali adunay kasakit diha sa iyang mga pagbati tungod sa pipila ka personal nga hitabo tali kaniya ug [sa Presidente sa Simbahan ug sa iyang mga Magtatambag]; siya tingali adunay mga pagbati diha sa iyang kasingkasing nga modala kaniya sa paghunahuna nga siya dili makahimo sa pagpaluyo kanato diha sa iyang pagtuo ug mga pag-ampo; apan kon mao kini ang sitwasyon, unsa man nga dalan alang kaniya nga padayunon? Siya kinahanglan nga moingon diha sa iyang kasingkasing, “Ang Dios ang miestablisar sa Iyang Gingharian, ug ang Iyang Priesthood anaa sa yuta; ug bisan pa man sa akong pagkadili gusto nianang pipila ka mga tawo, ako nasayud nga ang Ebanghelyo tinuod ug nga ang Dios magauban sa iyang mga tawo; ug nga kon ako mobuhat sa akong katungdanan ug mosunod sa Iyang mga sugo, ang mga pagbati sa pagkadili gusto mawala ug ang bisan unsang pagduhaduha o kalibog mahanaw, ang espiritu sa Ginoo moabut sa hingpit aron sa paghupay sa akong kasakit ug sa hinayhinay ako makakita,—kon ako anaa sa sayop, diin ako nasayop man, ug dayon hinulsolan ko kini, kay ako nasayud nga matag sayop nga butang mahimo pa nga tarungon.” Sa akong hunahuna ang mga tawo kinahanglan nga mobati og ingon niana.⁸

Ingon nga ang Presidency sa Simbahan mao ang modumala sa tibuok Simbahan—sa tanang stake, tanang ward, ug sa tanang natad sa misyonaryo dinhi sa kalibutan—ingon man usab kini nga mga tawhana [ang stake presidency] modumala niini nga Stake sa Zion, ug sa tanang ward ug mga branch sulod niini; ug kon sila motawag sa mga tawo aron sa pagpaluyo kanila niana nga matarung, kon ang mga tawo mapakyas sa pagpaluyo kanila ang mga sangputanan makapatong sa mga ulo sa mga tawo ug dili sa mga ulo niining mga tawhana. Kini ilang katungdanan ang pagbadlong sa kadautan ug ang pagsalikway sa dili matarung. Kini ilang katungdanan ang pagtambag ug pag-awhag sa mga tawo nga magmatinud-anon ug magmakugihon sa tibuok nilang Stake…. Gusto ko nga sa tin-aw inyong masabtan kini…. [Ang stake president adunay] katungod sa pagdumala, sa pagtambag, ug sa paggiya, ug sa pagbantay sa mga kaikag sa mga tawo dinhi….

… Kita adunay sinulat nga pulong alang sa ehemplo, alang sa pagpanudlo, alang sa pagpahimangno, alang sa pagbadlong, alang sa pagtambag ug sa pag-awhag. Ang matag tawo kinahanglan nga mobasa ug mosabut niini, ug dayon ang tanan masayud nga ang mga orakulo sa Dios anaa taliwala kanila. Apan kon sila dili mobasa sa pulong sa Dios ni mosabut niini, kon ang mga orakulo mamulong sila tingali dili maminaw ngadto kanila. Ang Stake Presidency mao ang inyong mga orakulo dinhi. Sila gipili sa Ginoo…. Kinahanglan nga kamo mopaluyo ug mosuporta kanila, ug maminaw sa ilang mga tambag. Sila dili mogiya kaninyo sa sayop; sila dili mogiya kaninyo sa kadautan; sila dili mohimo og sayop diha sa ilang pagtambag kaninyo; kay sila nagbarug isip usa ka banwag nga kahayag ngadto sa mga tawo—dili lamang banwag nga kahayag, apan sili nagbarug diha sa ilang dapit isip mga presidente sa Simbahan dinhi niini nga Stake sa Zion, ug ang Dios mopakita sa Iyang kaugalingon pinaagi kanila ngadto sa mga tawo. Dugang pa, kini katungod sa matag lalaki ug babaye sa pagbaton og pagpadayag ug kaalam gikan sa Labawng Makagagahum, aron masayud nga kining mga tawhana buotan, ug nagbuhat sa ilang katungdanan.⁹

Ang usa ka bishop mao ang tigdumalang opisyal sa iyang ward, ug kon ang bishop anaa sa ward, ang iyang mga magtatambag ug kadtong mga miyembro sa iyang ward anaa ubos sa iyang presidency. Siya dili mahimong motugyan niini. Siya dili mahimong mohatag niini ngadto sa uban; o, kon buhaton niya, siya misupak sa usa sa sagrado nga mga baruganan sa pagdumala sa priesthood.¹⁰

Adunay usa ka tawo nga nag-ingon: “Ako wala nay pagtuo sa bishop. Dili ko ganahan sa bishop. Ako dili motuo kaniya, siya dili kaantigo; siya may pinalabi; siya dili makatarunganon; ug ako dili mopaluyo kaniya sa iyang posisyon diha sa Simbahan.” … Ayaw kini og kalimti; [ang bishop ug ang iyang mga magtatambag] anaa diha, dili tungod kay kita sa atong kaugalingong kabubut-on mibutang kanila diha. Sila anaa diha tungod kay ang Ginoo ang mitudlo niana isip kahan-ayan sa presidency diha sa usa ka ward, pinaagi sa balaan nga katungod, ug ang bishop naghupot sa katungod gikan sa Dios, dili gikan sa tawo….

… Kon ang usa ka tawo moingon nga: “Ako usa ka Santos sa Ulahing mga Adlaw; ako miyembro sa Simbahan, nga may maayo nga rekord sa Simbahan, tungod kay ako nasayud kon unsa ang mga baruganan sa ebanghelyo, ug ako nasayud kon unsa ang baruganan sa pagdumala diha sa Simbahan,” kaysa moingon ana nga tawo og, “ako mosupak sa bishop tungod kay dili ko ganahan niya” o “tungod kay ako walay pagtuo kaniya,” mao ang pruweba niana nga buhat nga siya wala makasabut sa baruganan sa pagdumala ug sa pagpaubos ngadto sa balaan nga katungod. Busa siya nahimong sabaan, badlongon, dili makontrolar, dili kahimut-an, ug angayan nga hatagan sumala sa iyang mga maayong binuhatan o sa mga kasal-anan.¹¹

Ang usa ka tawo tingali walay pagsalig sa iyang Bishop o sa usa o duha niya ka mga Magtatambag; … apan tungod kay siya mibati sa ingon, insakto ba o angay ba alang kaniya isip usa ka Elder sa Israel, sa pagpataas sa iyang kaugalingon isip maghuhukom sa Bishop o sa iyang mga Magtatambag ug sa tibuok Simbahan? Kon ang usa ka tawo mohimo niini nga klase siya mahisama sa pipila ka [mga tawo kinsa miapostasiya gikan sa Simbahan]…. Sa inyong hunahuna makakombinsir ba kamo ngadto niini nga klase nga sila miapostasiya sa Simbahan? Dili; kining mga tawhana lig-on nga nakombinsir diha sa ilang kaugalingong hunahuna nga sila wala moapostasiya. Sila kusganon ug masuk-anon nga molimud nga sila wala gayud moapostasiya o motalikod sa Simbahan…. Kon ako mopataas sa akong kamot batok sa akong Bishop, batok sa Napulog Duha o sa Unang Kapangulohan, tungod kay ako walay gusto kanila, nianang higayona akong gibutang ang akong kaugalingon sa kahimtang nga giokupar karon niining mga tawhana, ug nga kadaghanan sa uban kinsa namatay na napulihan, ug moingon: “Ang Simbahan miapostasiya, si Joseph Smith ug si Brigham Young, ug si John Taylor, miapostasiya, apan ako lig-on diha sa pagtuo; ang tanang mga tawo nahisalaag tungod kay sila wala moila kanako.” Kana ang mahitabo sa tawo kinsa morebelde batok sa katungod sa Priesthood, ug sa samang higayon nanglimbasog sa paghupot sa pagtuo. Walay gitudlo apan usa ra sa usa ka higayon aron sa paghupot sa mga yawe sa gingharian sa Dios mahitungod sa yuta.¹²

Busa, ako moingon nganha kaninyo, tahura ang Presidency sa Stake ug ang inyong mga Bishop, ug ang tanan nga gibutang aron sa pagdumala diha kaninyo. Paluyohi sila diha sa ilang mga posisyon pinaagi sa inyong pagtuo ug mga pag-ampo, ipakita kanila nga kamo motabang kanila diha sa matag maayong pulong ug buhat, ug ang Dios mopanalangin kaninyo tungod niini.¹³

Ako nagtuo niini nga katungdanan sa Simbahan nga mao ang pagdawat ug pag-ila sa matag tawo kinsa naghupot og opisyal nga posisyon niini, diha sa iyang responsibilidad ug diha sa iyang calling. Ako naghupot sa doktrina nga ang katungdanan sa usa ka magtutudlo ingon ka sagrado sama sa katungdanan sa usa ka apostoles, diha sa responsibilidad diin siya gitawag aron sa pagbuhat, ug nga ang matag miyembro sa Simbahan ingon ka dako nga katungdanan nga kinahanglang tahuron sa magtutudlo kinsa mobisita kaniya diha sa iyang panimalay, sama sa iyang pagtahud sa katungdanan ug tambag sa presiding quorum sa Simbahan. Silang tanan adunay Priesthood; silang tanan nagbuhat sa ilang mga calling, ug silang tanan mahinungdanon diha sa ilang mga dapit, tungod kay ang Dios ang mitudlo kanila ug mipahimutang kanila diha sa iyang Simbahan. Kita dili mahimong mobaliwala kanila; o, kon atong buhaton, ang sala mopatong sa atong mga ulo.¹⁴

Kita kinahanglan nga dili motugot sa atong kaugalingon nga magpadayon sa atong inadlaw-adlaw uban sa diwa sa pagbagulbol ug pagpangita og sayop diha sa atong kasingkasing batok niadtong kinsa gipresentar sa atong atubangan aron paluyohan diha sa gisalig nga mga posisyon. Kon kita adunay bisan unsang butang diha sa atong mga kasingkasing batok ni bisan kinsa niini nga mga kaigsoonan, kini atong katungdanan, isip matarung nga mga miyembro sa Simbahan, una, ingon nga gisugo sa Kasulatan, sa pag-adto kanila nga mag-inusara ug sultihan sila sa atong gibati ngadto kanila ug sultihan sila sa hinungdan sa ingon nga pagbati; dili uban sa tinguha sa atong mga kasingkasing sa pagpalapad o sa pagpadako sa problema, apan kita moadto kanila sa diwa sa pakighiuli ug inigsoon nga gugma, sa diwa sa usa ka tinuod nga Kristiyano, aron kon adunay bisan unsa nga pagbati sa kasakit nga anaa kanato mawala kini sa hingpit; ug kon kita adunay kawsa batok sa atong igsoon, nga siya unta anaa sa kahimtang sa pagtarung sa dautan. Kita kinahanglan nga magtinguha sa paghigugma sa usag usa ug sa pagpaluyo sa usag usa isip mga anak sa Dios ug isip mga igsoon diha sa katuyoan sa Zion.¹⁵

Akong mga kaigsoonan, gusto ko nga magpasalamat kaninyo … alang sa pag-uyon nga makita dinhi pinaagi sa pagpataas sa mga kamot niining halapad nga kongregasyon. Ako nakasabut nga kini usa ka ebidensya sa pakigdait, hugot nga pagtuo, ug panaghigala diha sa bahin niining halapad nga kongregasyon ngadto sa tanang mga awtoridad, sa kinatibuk-an ug sa lokal, o sa auxiliary, nga gipresentar sa inyong atubangan, ug nga kamo motuman sa saad nga inyong gihatag ngadto sa Ginoo ug ngadto sa usag usa pinaagi sa pagpataas sa kamot, nga kamong tanan nagpasabut sa pagsuporta ug sa pagpaluyo niini nga mga opisyales sa nagkalainlaing mga organisasyon, gikan sa sinugdanan hangtud sa katapusan, nga kamo dili manglibak kanila, nga kamo dili mangita og sayop diha kanila nga walay hinungdan, nga kamo dili mosulay sa pagpasakit sa ilang impluwensya o pagbabag sa ilang pag-uswag, o mosamok sa ilang makatarunganon nga buhat apan hinoon kamo mobuhat sa tanan nga inyong mahimo aron sa pagtabang kanila, sa paghatag nila og kaayohan, pagpanalangin kanila, ug pagdasig kanila diha sa maayong buhat diin sila nahilambigit.¹⁶