Relief Society: Balaanong Gi-organisar alang sa Kaayohan sa mga Santos

Unsa ka maanindot, unsa ka halangdon ug unsa ka gamhanan ang organisasyon sa Relief Society sa Ang Simbahan ni Jesukristo sa mga Santos sa Ulahing mga Adlaw, ug unsa ka dako nga mga responsibilidad ang nakapatong diha kanila!³

Walay lain nga organisasyon nga anaa sa kalibutan nga nagbarug ibabaw sa sama ka taas nga plataporma sa balaan nga katungod nga gihimo niini nga organisayon dinhi sa kalibutan. Ang uban nga mga organisasyon hinimo sa mga kalalakin-an, o hinimo sa mga kababayen-an…. Kini nga organisasyon balaanong gihimo, balaanong gitugutan, balaanong gitukod, balaanong giorden sa Dios sa pag-alagad alang sa kaluwasan sa mga kalag sa mga babaye ug sa mga lalaki. Busa walay lain nga organisasyon nga maikompara niini, nga mahimong maikompara niini, nga makahimo gayud sa pag-okupar sa sama nga baruganan ug plataporma nga mahimo niini, gawas kon ang Ginoo mo-organisar og lain. Ug kon buhaton man niya kini, Siya mohimo niini pinaagi sa mga salabutan sa priesthood, ang sama nga priesthood, ug ang sama nga mga salabutan sa priesthood diin kini na-organisar, ug dili sa lain nga paagi.⁴

Ang mga babaye mahimong mag-organisar og mga club, ug sila mahimong mag-organisar og mga katilingban, ug sila mahimong mopasa og mga balaudnon, mohimo og mga artikulo sa kauyonan, ug mag-establisar og mga balaod alang sa ilang pagdumala, ug tanan nga mga klase sa butang. Ayaw kini kalimti, nga walay usa niana ang mahimong makompara sa usa ka ordinaryo nga Relief Society sa ward sa ang Simbahan ni Jesukristo sa mga Santos sa Ulahing mga Adlaw…. Dili angay alang kaninyo nga pagadumalaon sa mga babaye sa kalibutan; angay alang kaninyo nga modumala sa kalibutan ug modumala labi na ngadto sa mga babaye sa kalibutan, diha sa tanan nga dalaygon, sa tanan nga sama sa Dios, sa tanan nga makapadasig ug makapaputli ngadto sa mga anak sa tawo…. Himoa ang [Relief Society] nga una, himoa kini nga kinaunhan, himoa kini nga kinatas-an, pinakamaayo ug pinakamakahulugan sa bisan unsa nga organisasyon nga anaa sa kalibutan. Kamo gitawag pinaagi sa tingog sa Propeta sa Dios sa pagbuhat niini, nga mahimong pinakahalangdon, mahimong pinakadako ug pinakamaayo, ang pinakaputli ug labing maunungon ngadto sa katungod, ug kini ang inyong buluhaton sa pagtagamtam sa inyong mga pribilehiyo ug sa pagbaton sa tanan nga nahisakop sa inyong calling ug nga kamo kinahanglan nga makapanunod gikan sa Ginoo ug makaangkon sa Iyang mga gasa.⁵

Ako nagtuo nga ang atong Relief Society naghimo og halangdon nga buhat taliwala sa mga tawo…. Kini mahinungdanon nga organisasyon alang sa kaayohan sa Israel, alang sa kaayohan sa mga sister, ug mga inahan, ug mga anak nga babaye sa Zion.⁶

Usa ka pulong o duha kabahin sa Relief Society. Kini usa ka organisasyon nga giestablisar pinaagi ni Propeta Joseph Smith. Busa, kini, ang pinakadugay nga organisasyon sa auxiliary sa Simbahan, ug kini ang labing mahinungdanon. Dili lang kini mohatag sa mga panginahanglan sa mga kabus, sa mga masakiton ug nagkinahanglan, apan kabahin sa buluhaton niini—ug mas dako usab nga bahin—mao ang pag-atiman sa espirituhanon nga kaayohan ug kaluwasan sa mga inahan ug mga anak nga babaye sa Zion; sa pagtan-aw nga walay napasagdan, nga ang tanan napanalipdan batok sa kalisdanan, kalamidad, gahum sa kangitngit, ug sa mga dautan nga naghulga kanila diha sa kalibutan. Katungdanan kini sa mga Relief Society ang pag-atiman sa espirituhanon nga kaayohan sa ilang kaugalingon ug sa tanang mga babaye nga miyembro sa Simbahan.⁷

Asang dapita sa yuta nga kita mangita sa kaayohan, sa espiritu sa kamatuoran, sa sinseridad, sa balaang gugma, sa pailub ug kamaantuson ug pagpasaylo ug paglahutay ug gugmang putli ug uban pa nga gipanalangin nga butang, kon kita dili mangita niini diha sa mga organisasyon nga mopalambo sa mga inahan ug mga anak nga babaye sa Zion. Kon unsa nga gahum ang inyong naangkon, akong minahal nga mga sister, diha sa pagpalambo sa inyong mga katungdanan, diha sa paghimo sa inyong mga calling isip mga anghel sa kalooy ngadto sa mga nag-antus ug nilupigan ug napukan, ngadto sa nahisalaag ug mahuyang ug nangaliyupo, mga gahum nga inyong naangkon ug nga kamo mahimong talahuron taliwala sa mga tawo sa Dios ug taliwala sa bisan kinsa nga mga tawo kinsa gitugutan nga mahimo ninyong makauban!

Bisan asa nga adunay nagkinahanglan og paghupay, kini nga organisasyon gitukod, o anaa ra sa duol ug andam sa paghatag og kahupay nga gikinahanglan. Bisan asa nga adunay mga sakit, kini nga organisasyon, sa mga branch niini, ang gilainlain nga mga organisasyon niini, anaa aron sa pagtabang niana nga gikinahanglan. Bisan asa nga adunay kakulang sa kasayuran sa mga baruganan sa kinabuhi, sa mga baruganan sa matarung nga pagpuyo, sa mga baruganan sa sakto nga pagpuyo, kini nga organisasyon anaa ra sa duol aron sa paghatag og salabutan, sa pagpasabut ug sa pagtudlo pinaagi sa ehemplo ingon man usab pinaagi sa lagda, niadtong kinsa nanginahanglan sa ingon nga tabang ug sa ingon nga pag-amuma.

Bisan asa nga walay kasayuran o bisan lamang sa kakulang sa panabut kabahin sa pamilya, buluhaton sa pamilya, kalabut sa mga obligasyon nga kinahanglan nga maanaa diha ug nga sa matinuorong paagi maanaa tali sa bana ug asawa ug tali sa mga ginikanan ug mga anak, anaa kini nga organisasyon diha o anaa ra sa duol, ug pinaagi sa tinuod nga mga pagtuga o pagdasig nga gipanag-iya sa organisasyon sila andam sa paghatag og panudlo kalabut niadtong mahinungdanon nga mga buluhaton. Bisan asa nga adunay usa ka batan-ong inahan, nga walay kasinatian nga kinahanglan unta nga siya aduna aron sa pagpadako ug sa pag-atiman sa iyang anak, o sa paghimo sa iyang balay nga maanindot ug matahum ug kahimut-an sa iyang kaugalingon ug sa iyang bana, kini nga organisasyon anaa, diha sa pipila ka bahin niini nga organisasyon, aron sa paghatag og panudlo ngadto nianang batan-on nga inahan, ug tabangan siya sa paghimo sa iyang buluhaton ug sa pagtarung og himo niini. Ug bisan asa nga adunay kakulang sa kasinatian sa paghatag og natural ug makapahimsog ug saktong pagkaon ngadto sa mga anak, o kon adunay panginahanglan sa paghatag og saktong espirituhanong pagpanudlo ug espirituhanong pagkaon ngadto sa mga anak, anaa diha sa dakong mga organisasyon sa mga Female Relief Society sa ang Simbahan ni Jesukristo sa mga Santos sa Ulahing mga Adlaw ug mga organisasyon sa mga inahan ug mga anak nga babaye sa Zion, kadto kinsa andam sa paghatag niana nga pagpanudlo.⁸

Pag-atiman sa mga nanginahanglan sa mas makugihong paagi kaysa bisan kanus-a…. Nahadlok kita nga adunay mga tawo kinsa mahimong nag-antus nga walay gisultihan nga sila nagkinahanglan og panabang. Ang inyong unang katungdanan anaa niining mga tawhana diha sa inyong dapit. Hinumdumi ang mga tigulang ug atimana ang mga ilo ug mga balo.⁹

Kadto usa ka pribilehiyo alang kanako sa pagbisita dili pa lang dugay sa usa sa akong mga lugar diha sa layo nga Stake sa Zion diin ang usa ka makalilisang nga sakit midagsang nianang panahona, ug bisan og kami mibiyahe og pipila ka mga adlaw ug naabut kami sa lugar nga gabii na kaayo, kami gihangyo sa presidente aron sa pagbisita sa pipila nga nangasakit. Among nakita ang usa ka makalolooy nga sister nga nagbuy-od sa higdaanan nga masakiton, diha sa grabe kaayo nga kahimtang. Ang iyang makalolooy nga bana naglingkod sa kilid sa iyang gihigdaan nga puno sa kabalaka sa makalilisang nga sakit sa iyang asawa kinsa usa ka inahan sa ubay-ubay nga gagmay nga mga anak nga nagtapok nga nag-apong. Ang pamilya daw anaa sa kabus kaayo nga kahimtang.

Usa ka buotan nga maayo og barug nga babaye ang miabut sa balay sa wala madugay, nagbitbit og usa ka basket nga gisudlan og makapahimsog nga pagkaon ug pipila ka mga kinahanglan aron magamit sa nasakit nga pamilya. Sa pakisusi among nasayran nga siya gisangunan sa buluhaton pinaagi sa Relief Society sa ward sa pag-atiman ug sa pagtabang sa masakiton nga babaye sa tibuok gabii. Siya andam sa pag-atiman sa gagmay nga mga bata, sa pagsiguro nga sila maayong pagkalimpyo ug gipakaon ug gipakatulog; sa paglimpyo sa balay ug sa paghimo sa tanang butang nga ingon ka komportable kutob sa mahimo alang sa nasakit nga babaye ug sa iyang pamilya. Among nasayran usabnga laing buotang sister ang gisangunan sa buluhaton aron sa pagpuli kaniya sa sunod adlaw; ug padayon, sa matag adlaw, kining makalolooy, nasakit nga pamilya nakadawat sa pinakabuotang pag-atiman ug pagtagad gikan sa mga sister sa Relief Society hangtud mabalik ang kahimsog aron sa paghupay sa tawo nga nasakit gikan sa iyang mga pag-antus.

Among nasayran usab nga kini nga Relief Society organisado kaayo ug disiplinado nga ang tanan nga nasakit sa lugar nakadawat og susama nga pagtagad ug mga pagtabang alang sa ilang kahupayan. Ako walay nakit-an sukad nga ingon ka klaro nga ehemplo sa pagserbisyo ug kaanindot niining halangdon nga organisasyon sama sa ehemplo nga among nasaksihan dinhi, ug ako naghunahuna nga unsa kini katahum nga butang nga ang Ginoo midasig ni Propeta Joseph Smith sa pagtukod og ingon niini nga organisasyon dinhi sa Simbahan.¹⁰

Kinsay makasulti sa kadako sa kaayo nga mahimong mabuhat diha taliwala sa mga Santos pinaagi sa usa ka maayong pagkaorganisar ug maayong pagkadisiplina nga Relief Society, dili lamang sa temporal nga kahulugan, apan usab sa espirituhanong panglantaw. Ang buhat maloloy-on ug tingali wala nay gamhanan o makusog nga impluwensya kaysa maayong pagkadumala nga gugmang putli, sa pag-angkon sa pagsalig ug paghigugma sa atong isigka mga nilalang. Ug kay naangkon na ang ilang pagsalig pinaagi sa simpleng mga buhat sa kalooy ang pultahan abli na aron sa pag-angkon ug sa pagdala sa ilang mga kalag ngadto sa mas taas nga ang-ang sa pagtuo ug espirituhanong kamaayo; ug, hinumdumi, ang espirituhanong bahin mao ang mas labing bililhon kaysa temporal lamang….

Sa katapusan mas maayo pa nga gutomon o bisan mamatay tungod sa panginahanglan sa temporal nga pagkaon kaysa matimawa ug malaglag tungod sa kakulang sa panabut ug espirituhanong kasayuran nga mga mahinungdanon sa pag-angkon sa gasa sa kinabuhing dayon nga mao ang labing mahinungdanon nga gasa sa Dios. Ang pagbaton og kasayuran sa mga baruganan sa mahangturon nga kamatuoran alang kanako mas labaw pa sa pagkaon o sinina. Apan kita nagkinahanglan sa temporal ug sa espirituhanong pagkaon ug ang Dios mi-orden sa ingon nga kining duha dali ra makab-ot sa tanang katawhan, kon sila mosunod sa Iyang mga balaod ug magpuyo nga makanunayon niana.

Pribilehiyo kini alang sa nagtrabaho diha sa Relief Society sa pagdala sa gagmay nga mga bata gikan sa ilang pagkamasuso ug sa pagtabang sa pagtudlo kanila sa pagkamatinuoron ug pagkamahiyason, sa pagtuo sa Dios ang Amahan sa Kahangturan, ug diha sa balaan nga misyon sa Iyang Anak; ug sa pagtudlo sa mga inahan ug sa pagtudlo kanila sa pagpadako sa ilang gagmay nga bata diha niini nga paagi. Kini usa ka mahinugdanon nga katungdanan, mas labaw pa, kon mahimo, kaysa paghatag lamang og temporal nga mga panginahanglan nga ilang pangayoon diha kaninyo, akong mga sister. Sa tinuod walay utlanan ngadto sa inyong mga pribilehiyo o katungod sa pagbuhat og maayo diha sa matag paagi ug bisan asa nga mahimo sa inyong gahum.¹¹

Ang mga buhat sa Relief Society sa kinadak-an may kalabutan sa materyal nga mga butang sa kinabuhi, sa temporal nga mga panginahanglan sa katawhan sa Simbahan, ug gani ang impluwensya sa ilang mga paningkamot mahimong moabut lapas pa sa mortalidad, sa ilang paglakip sa espirituhanong pagtubo ingon man usab sa temporal nga panginahanglan…. Kabahin kini sa inyong katungdanan ang pag-atiman sa mga walay amahan ug sa dili makahimo, dili lamang ngadto sa ilang temporal nga mga panginahanglan, apan lahus nga may kalabutan sa ilang mental ug espirituhanong paglambo. Sa tinuod kinahanglan nga kamo mahimo nga mga inahan ngadto sa walay mga inahan ug mga tigtabang ngadto sa dili makahimo. Sa tanan niini nga maayong mga buhat ang Simbahan magpaluyo kaninyo aron sa pagtabang kaninyo.¹²

Ang mas mahinungdanon nga mga butang mao ang espirituhanong mga butang, kadtong mga butang nga mopalig-on sa hugot nga pagtuo sa mga lalaki ug mga babaye, kadtong mga butang nga naghatag og kahayag ug salabutan ug gahum sa pagbuntog sa dautan ug mga pagtintal sa dautan, gahum sa pag-ila sa mga pagpanglingla sa mga tawo ug sa batid sa pagmugna og kasaypanan diin sila naghulat aron sa pagpanglingla. Kana nga salabutan, kana nga espirituhanong kasayuran, espirituhanong salabutan nga makapahimo kaninyo sa pag-ila tali sa kamatuoran o sa sayop, ug tali sa kahayag ug kangitngit ug sa maayo ug dautan, kini ang mahinungdanon nga butang nga atong tinguhaon ug batonan.¹³

Hunahunaa si Tiya Em [Emmeline B. Wells, ang kinatibuk-an nga presidente sa Relief Society] … miadto sa Simbahan dihang siya usa pa ka batang babaye, miagi sa mga pagsulay ug mga kalisdanan ug mga kahigawad ug tanang mga hinungdan sa kabalaka ug kahingawa nga panghitabo sa bag-ong kinabuhi nga Santos sa Ulahing mga Adlaw, ang ilang pagpanaw gikan sa Missouri ug gikan sa Nauvoo ngadto sa mga Kapatagan sa mga kabukiran, ngadto sa mga disyerto nga walay kabutangan sa ilang mga tiil ug walay higdaanan nga kahigdaan. Nawad-an ba siya og kadasig? Nawad-an ba og kadasig ang akong inahan? Si Tiya Vilate Kimball nawad-an ba og kadasig? Wala; ilang giisip kining tanan nga mga butang nga walay pulos ikumpara sa kahayag nga ilang gihambin diha sa ilang mga kalag alang sa Dios ug sa Iyang kamatuoran. Makahimo ba kamo sa pagpatalikud niini nga mga babaye gikan sa ilang mga konbiksyon diha sa ang Simbahan ni Jesukristo sa mga Santos sa Ulahing mga Adlaw? Makahimo ba kamo sa pagpangitngit sa ilang mga hunahuna mahitungod sa misyon ni Propeta Joseph Smith? Makahimo ba kamo sa pagpahisalaag kanila kalabut sa balaang misyon ni Jesukristo, ang Anak sa Dios? Dili, dili gayud kamo makahimo niini. Ngano? Tungod kay sila nasayud niini. Ang Dios mipadayag niini ngadto kanila, ug sila nakasabut niini, ug walay gahum sa yuta ang makahimo sa pagpatalikod kanila sa unsay ilang nasayran nga kamatuoran. Ang kamatayon baliwala alang kanila. Ang kalisdanan baliwala lang. Ang katugnaw o ulan, o kainit, baliwala lang alang kanila. Ang ila lamang gibati ug gitinguha mao ang kadaugan sa gingharian sa Dios ug ang kamatuoran nga gihatag sa Ginoo ngadto kanila.

Akong kalag, asa na man kini nga mga babaye karon? Aduna kita sa pipila kanila dinhi, salamat sa Dios, kadaghanan kanila. Apan aduna usab kita dinhi kinsa dili mga tinuod…. Tan-awa og maayo ang ilang mga kinabuhi, ang ilang mga kasingkasing ug ang ilang mga naandan ug mga gibuhat diha sa ilang mga panimalay, ug dili sila mao ang atong gipangita, dili sila mao ang unsay nahimo sa ebanghelyo sa mga babaye o mga lalaki kinsa midawat sa ebanghelyo ug mipuyo niini, tungod kay sila mismo wala masayud sa ebanghelyo, ni sila mibuhat niini. Apan sa dagway magtuo ka nga ang tanang butang mituhup diha kanila, ug nga sila nakaangkon sa tanang kahayag ug sa tanang hugot nga pagtuo ug tanang kaalam ug tanang kasayuran; apan kini wala diha,—kini wala diha. Kon ang mga babaye ingon man usab ang mga lalaki mohunong sa pagtawag sa Dios diha sa pag-ampo, adunay pipila ka butang nga kulang…. Wala kanila ang kalig-on, wala kanila ang hugot nga pagtuo, wala kanila ang gugma diha sa ilang mga kalag nga kinahanglan nila nga maangkon.¹⁴

Ang pulong ug ang balaod sa Dios ingon ka mahinungdanon alang sa mga babaye kinsa moabut sa maalamong mga paghukom sama nga kini mahinungdanon alang sa mga lalaki; ug ang mga babaye kinahanglan nga magtuon ug mokonsiderar sa mga problema sa mahinungdanong buhat niining ulahing mga adlaw gikan sa panglantaw sa mga pagpadayag sa Dios, ug ingon nga sila giaghat sa pagbuhat pinaagi sa iyang Espiritu, nga kini ilang katungod sa pagdawat uban sa pamaagi sa tinud-anay ug kinasingkasing nga pag-ampo.¹⁵

Kita mobuhat alang sa temporal ug alang sa espirituhanong kaayohan sa Simbahan, ug kita mobuhat pa nga mas makugihon alang sa espirituhanong pagbayaw ug espirituhanong panabang, ug sa espirituhanong kinabuhi ug kaluwasan sa Simbahan.¹⁶

Ang atong mga sister nga nahilambigit sa buhat sa Relief Society … aduna sa atong pagtahud, atong hingpit nga pagsalig; ang mga panalangin sa Ginoo maana kanila. Siya mibuhat sa ingon sa miagi ug Siya mopadayon sa pagpanalangin kanila kon sila mopadayon sa pagpaluyo sa Priesthood sa Dios nga gibutang diha sa yuta aron sa paggiya sa Simbahan ug sa pagtambag diha sa mga kalihokan sa gingharian sa Dios.¹⁷

Gusto ko nga moingon … ngadto sa Relief Society … ug sa tanan pa nga mga organisasyon sa Simbahan, nga walay usa kanila ang wala magsalig sa Priesthood sa Anak sa Dios, walay usa kanila nga dawaton sa Ginoo kon sila mobiya gikan sa tingog ug gikan sa pagtambag niadtong kinsa naghupot sa Priesthood ug nagdumala ibabaw kanila. Sila anaa ubos sa mga gahum ug awtoridad sa Simbahan, ug sila nagsalig niini; ni sila makahimo sa paggamit sa bisan unsa nga mga katungod diha sa ilang mga organisasyon nga wala magsalig sa Priesthood ug sa Simbahan.¹⁸

Gikan sa kinahiladman sa akong kalag, ako adunay usa lamang ka tinguha ngadto sa tanan niining buotan nga mga babaye, kinsa nahilambigit niining halangdon nga katuyoan, ug kana mao, ang Dios mopanalangin kanila, manalipod sa ilang mga kinabuhi, motabang kanila nga magmalig-on ug magmatinuoron diha sa ilang integridad alang sa katuyoan sa Zion; ug motabang kanila nga mabati diha sa ilang mga kalag nga walay usa ka butang nga kinahanglang ibutang og una diha sa ang Simbahan ni Jesukristo sa mga Santos sa Ulahing mga Adlaw, ug walay laing butang nga mas labaw pa kaysa Simbahan ubos sa celestial nga gingharian. Ang Simbahan nag-angkon sa gahum sa Dios, kamatarung, kamatuoran ug balaan nga katungod, aron sa pagbuhat sa iyang kabubut-on dinhi ibabaw sa yuta.¹⁹