Sagrado nga mga Templo sa Ginoo

Diha sa sagradong mga templo gipahigayon nato ang mga ordinansa sa kaluwasan alang sa mga buhi ug sa mga patay ug mohimo og mga pakigsaad diin kita magmatinud-anon sa tibuok natong kinabuhi.

Gikan sa Kinabuhi ni Joseph F. Smith

Sa Agosto 1907 nga serbisyo sa pagpahinungod sa Uintah Stake Tabernacle sa Vernal, Utah, si Presidente Joseph F. Smith misulti ngadto sa nagkapundok nga mga Santos nga siya dili matingala nga ang usa ka templo matukod sa umaabut diha sa ilang taliwala.¹ Pagka Nobyembre 1997 ang gibag-o nga tabernakulo gipahinungod isip Vernal Utah Temple, ang ika-51 nga templo sa Simbahan.

Ang kinabuhi ug pangalagad ni Joseph F. Smith nagpunting kaayo sa buhat sa templo. Ang iyang personal nga kasinatian nagsugod sa Nauvoo sa tingtugnaw sa 1845–46 dihang ang iyang inahan ug iyang igsoong babaye, nga si Mercy R. Thompson, “okupado kaayo sa mga nagpadayon nga buluhaton sa templo.” Si Presidente Smith sa wala madugay miingon, “Didto ang mga anak sa akong amahan gisilyo ngadto sa ilang mga ginikanan.”² Didto siya sa dihang gipahimutang ang uluhang bato sa Salt Lake Temple niadtong 1853 ug sa pagpahinungod sa templo niadtong 1893. Sa pagpaabut sa pagpahinungod, miingon siya: “Sulod sa kwarenta ka tuig ang mga paglaum, tinguha, ug mga pagpaabut sa tibuok nga Simbahan gisentro sa paghuman niini nga edipisyo…. Karon nga nahuman na kining talagsaong bilding ug andam nang gamiton alang sa mga balaang katuyoan, kinahanglan pa ba nato ang pag-ingon nga kita nagkaduol na sa panghitabo kansang katumanan makahuluganon kaayo alang kanato isip katawhan?”³ Nag-alagad siya isip presidente sa Salt Lake Temple sugod 1898 hangtud 1911, siyam niana nga katuigan samtang siya pa ang Presidente sa Simbahan.

Si Presidente Smith miapil sa pagpahinungod sa mga Templo sa St. George, Logan, ug sa Manti. Sa pagka 1913 gipahinungod niya ang dapit alang sa ikaunom nga templo sa Simbahan sa Cardston, Alberta, Canada; ug pagka 1915 iyang gipahinungod ang yuta sa iyang gipangga nga yutang natawhan, nga mao ang Hawaii, alang sa pinakaunang templo nga naa sa gawas sa North America. Iyang namatikdan, nga ang Simbahan anaa na sa ganghaan sa pagtukod og templo: “Akong nakita ang nagtubo nga panginahanglan sa dugang pang mga templo … nga ipahinungod ngadto sa Ginoo alang sa pagpahigayon sa mga ordinansa sa balay sa Dios, aron ang katawhan makaangkon sa mga kaayohan sa balay sa Ginoo nga dili na mobiyahe pa og gatusan ka mga milya alang niana nga katuyoan.”⁴

Mga Pagtulun-an ni Joseph F. Smith

Ang mga templo gitukod alang sa pagpahigayon sa sagrado, makaluwas nga mga ordinansa.

Labot kita sa buluhaton sa templo. Nakatukod na kita og upat ka templo niini nga dapit, ug nakatukod na kita og duha ka templo sa silangang nasud sa wala pa kita moanhi dinhi. Panahon sa kinabuhi ni Propeta Joseph Smith usa sa duha ka templo gitukod ug gipahinungod, ug ang pundasyon sa usa gipahimutang na ug ang mga bongbong gitrabaho na dihang siya gimartir. Nahuman kini pinaagi sa mga paningkamot sa katawhan ubos sa malisud nga mga kahimtang, ug sa kakabus, ug gipahinungod ngadto sa Ginoo. Ang mga ordinansa sa balay sa Dios gipangalagad diha sa sulod niini sumala sa gitudlo na sa mga nanagdumala nga mga awtoridad sa Simbahan pinaagi ni Propeta Joseph Smith mismo…. Ang mao gihapon nga ebanghelyo ang nagpatigbabaw karon, ug ang mao gihapong mga ordinansa ang gipangalagad karon, alang sa mga buhi ug sa mga patay, nga gipangalagad sa Propeta mismo, ug gihatag pinaagi kaniya ngadto sa Simbahan.⁵

Nanghinaut kami nga makakita nga unya adunay mga templo nga pagatukuron sa nagkalainlaing dapit diin kini gikinahanglan alang sa kasayon sa mga katawhan; kay among nakita nga ang pinakadakong responsibilidad nga gisangon sa mga katawhan karon mao nga ang ilang mga kasingkasing mobati ngadto sa ilang mga amahan, ug nga sila mobuhat sa buluhaton nga gikinahanglang mahimo aron tukma silang mabugkos sa higot sa Bag-o ug Walay Katapusang Pakigsaad gikan sa usa ka henerasyon ngadto sa sunod nga henerasyon.⁶

Ang mga templo dili bukas alang sa publiko. Alang kini sa pagpahigayon sa sagradong mga ordinansa, nga ang katuyoan mao ang kaluwasan sa mga buhi ug sa mga patay. Ang nag-unang mga seremonya mao ang mga bunyag, endowment, kaminyoon, pagbugkos…. Kadaghanan niini nga buhat, alang sa mga patay, usa ka balaan nga matang. Tungod sa mga Santos sa Ulahing mga Adlaw anaa ang paglaum sa kaluwasan alang niadtong mitaliwan na niining kinabuhia nga wala makasunod sa ebanghelyo, kon sila mopakita sa ilang pagkamasulundon sa mga gimando didto sa lain nga kalibutan, sa dapit sa mitaliwan na nga mga espiritu. Ang ebanghelyo isangyaw ngadto kanila pinaagi sa mga sulugoon sa Ginoo kinsa nakasulod na sa paraiso, ug sila kinsa mopakita sa ilang pagtuo ug maghinulsol sila mabunyagan dinhi, makadawat sa samang paagi sa ubang pagpangalagad, ngadto sa katapusan aron sila mabayaw ug mahimaya.⁷

Walay makasulod sa Gingharian sa Dios apan pinaagi kang Jesukristo ug sa mga pamaagi nga gihatag ni Jesukristo sa mga anak sa tawo…. Walay bisan usa ka kalag nga nakapuyo ug namatay dinhi ibabaw sa yuta ang makalusot sa kahigayunan nga makabati sa ebanghelyo. Kon ila kining dawaton ug pagasundon, ang mga ordinansa sa ebanghelyo ni Jesukristo ipahigayon alang kanila, pinaagi sa ilang mga kaliwat, o sa ilang mga kabanay sa ubang mga henerasyon human kanila, aron ang matag balaod ug ang matag kinahanglanon sa ebanghelyo ni Jesukristo mabuhat, ug ang mga saad ug mga kinahanglanon matuman alang sa kaluwasan sa mga buhi ug ingon man alang sa kaluwasan sa mga patay.⁸

Busa, ang mga babaye o mga lalaki, tali sa mga Santos sa Ulahing mga Adlaw, nga dili makakita sa panginahanglan sa mga ordinansa sa Balay sa Dios, kinsa dili mosanong sa mga kinahanglanon sa ebanghelyo sa tanan niining mga seremonya ug mga ordinansa, dili makaangkon sa tukmang panabut sa dakong buluhaton nga gisangon aron ipahigayon sa mga Santos sa Ulahing mga Adlaw niini nga kapanahonan, ingon man dili siya makatagamtam sa panalangin nga moabut tungod sa buhat sa pagkamasulundon sa balaod nga mas taas kay sa balaod sa tawo.⁹

Ayaw itugot nga dili mahatagan og igong bili ang mga ordinansa sa balay sa Dios.¹⁰

Wala kita mabuhi alang lamang niining mubo ug miserableng kinabuhi dinhi sa yuta, apan alang sa kinabuhi nga walay katapusan; ug tinguha nato nga matagamtam ang matag panalangin sa dili maihap nga katuigan hangtud sa kahangturan, gawas lamang kon ato kining madawat pinaagi sa gahum sa pagbugkos nga gihatag ngadto ni Apostol Pedro pinaagi sa Anak sa Dios, kini dili nato maangkon. Gawas lamang kon ato kining maangkon pinaagi niana nga baruganan, sa kinabuhing moabut wala kitay amahan, inahan, mga igsoon, asawa, mga anak, o kahigalaan, o katigayunan o dungog, alang sa tanang yutan-on nga “kasabutan, pakigsaad, mga kauyonan, mga katungdanan, mga panumpa, mga binuhatan, mga kabanay, ug mga pagkakauban,” [tan-awa sa D&P 132:7] kining tanan mahanaw diha sa lubnganan, gawas niadtong gibugkos ug giaprubahan sa gahum sa Dios.¹¹

Mosulod kita sa templo uban ang matinud-anong determinasyon nga mobuhat sa kabubut-on sa Dios.

May usa ka tawo … miadto dala ang rekomendasyon gikan sa Bishop … ug nagtinguha sa kahigayunan nga mabunyagan alang sa pipila ka mga patay, ug sa dihang siya miadto sa tukmang rekomendasyon, nadawat niya ang kahigayunan. Siya gibunyagan alang sa iyang mga nangamatay. Dayon gitugutan siyang magpadayon ug ipahigayon ang ubang mga ordinansa alang kanila. Sa pagkahuman sa buluhaton gipahibalo niya ang iyang determinasyon nga moundang na sa Simbahan. Karon, mas modayeg pa ako niadtong makalolooy nga tawo, tungod kay determinado siya sa paghimo sa tanan alang sa iyang tanang mga patay nga kahigalaan sa wala pa niya mahikawi ang iyang kaugalingon sa kahigayunan nga mahimo kini. Ang uban tingali moingon, “Kadto ba nga paghago dawaton sa Ginoo?” Ah, tingali dawaton kadto, kon hunahunaon nato ang mga patay, ang rekord natala ug ang seremonyas napahigayon sumala sa balaod nga gitudlo sa Dios. Ang tanan gihimo sa tukmang pamaagi, ug ubos sa direksyon sa tukma nga katungod, busa nganong dili man kadto dawaton kon hunahunaon nato ang mga patay? Apan unsa man ang kaayohan nga madawat niadto nga tawo tungod sa iyang nabuhat? Dili kaayo daghan. “Kay unsa may kapuslanan alang sa usa ka tawo ang pagpakaangkon niya sa tibuok kalibutan nga pagapildihan sa iyang kinabuhi?” [Marcos 8:36.]

Ang madawat niadto nga tawo nga nagtinguhang makaangkon sa mga kahigayunan sa balay sa Ginoo ubos sa panglingla, mao kini: Ang mga tawo kinsa mosulay sa paglingla sa Dios pinaagi sa pagpakaaron-ingnon, aron ilang makawat ang mga kahigayunan ug mga panalangin gikan sa balay sa Dios, dili makadawat sa kaayohan sa ngadto-ngadto. Kon tinguha natong makadawat og mga panalangin ug mga ordinansa sa balay sa Dios, dawaton nato kini uban ang matinuorong kasingkasing, ug mosulod kita niana nga balay uban sa matinud-anon ug matinuorong determinasyon sa pagbuhat sa kabubut-on sa Dios uban niining tanan nga butang, dili sa temporaryo lamang, apan sa pagbuhat sigun sa Iyang gimando sa tibuok natong kinabuhi. Gawas lamang kon kita magpadayon sa pagtagamtam sa tukmang espiritu, kini nga mga panalangin magpabilin uban kanato, ug kita maila sa Dios isip Iyang mga anak; ug ang Iyang espiritu mopalayo lamang kanato kon kita mosimang gikan sa hustong dalan ug mapakyas sa paghimo sa atong katungdanan.…

Kon sa akong kasingkasing gibati nakong nakahimo og sayop sa usa sa akong mga igsoon; o nakasupak sa mga balaod sa Dios; o wala motahud kang bisan kinsa nga miyembro sa Simbahan o ni bisan kinsang tawo nga nangulo kanako dinhi sa Simbahan sa Dios, kinahanglan kong mobati nga katungdanan nako ang pagadto ug sa paghusay sa tanan sa dili pa ako mosulod niana nga balay…. Kon nakabuhat man ako og sayop diha kaninyo; kon ako nakakawat man diha kaninyo sa bisan unsang katungod; kon ako wala magmatinuoron sa akong mga saad diha kaninyo; o kon ako nakabuhat og mga butang nga sa tan-aw mipakubus kanako sa panan-aw sa Dios o sa akong mga kaigsoonan, kinahanglan ako nga moadto ug maningkamot sa pagpahiuli niini sa dili pa ako mosulay og sulod sa balay sa Dios. Gani dili ako gusto nga mobuhat aron lamang sa tuyo nga makasulod niana nga balay. Kinahanglan nga tinguha nako ang pagbuhat niini tungod kay akong katungdanan ang paghimo niini; ug aron mahimo akong angayan sa pagsulod didto, ug mobarug sa tanang higayon didto sa sagradong mga dapit sa atubangan sa Ginoo, gikinahanglang husayon nako ang tanang butang ngadto sa tanang igsoon nga akong nabuhatan og sayop.

Kinahanglang ipakita nako ang pagtahud ngadto niadtong kinsa angay sa pagtahud. Kinahanglan nga motahud ako sa Dios nga akong Langitnong Amahan, karon, ug sugod karon, sa umaabut, ug sa kahangturan. Mao kana ang baruganan nga kinahanglan nakong buhaton nga husto, pagabayaran ug pagahusayon. Nakadungog ako og mga kaigsoonan nga apil sa panagpundok sa pamilya, ingon man usab sila binugkos na sa bag-o ug walay katapusang pakigsaad, nga naghambin og lahi nga pagbati sa usag usa, nga may pagbating kapungot diha sa ilang mga kasingkasing, usa batok sa usa, ug walay usa nga magpaubos sa kaugalingon sa pagduol aron sa pag-angkon sa ilang mga sayop, o maningkamot nga magkasabut, ang matag usa nagpadako sa kahuyang sa iyang silingan, ug sa samang higayon wala maghunahuna sa kaugalingon niyang mga sayop ug mga kahuyang. Gani … kon sila hikawan sa kahigayunan nga makasulod sa balay sa Dios, bation nila nga dakong sayop ang gibuhat ngadto kanila.

Apan mangutana ako kaninyo, ang ingon nga mga tawo angayan bang mosulod didto? Ang usa ka tawo ba nga naghambin og kapungot diha sa iyang kasingkasing batok sa iyang silingan ug dili makapasaylo kaniya o maningkamot nga magkauli, angayan bang mosulod sa balay sa Dios? Ug gani dili nimo siya ikalimod. Adunay mga gatusan nga mosulod sa ingon niini nga kahimtang, bisan pa man sa atong mahimo o ikasulti. Malauman ba nimo nga ang Dios makig-uban kanila, ug nga ang Iyang himaya modan-ag kanila? Ayaw linglaha ang inyong kaugalingon. Kon kita angayan, ang Dios mopakita sa Iyang kaugalingon ngari kanato. Kon kita andam, makita nato Siya nga mao Siya, ug kita makaila Kaniya. Ug kita mailhan nga mao usab kita. Apan mahitabo kini kon kita angayan, ug dili kini mahitabo hangtud nga kita dili angayan.¹²

Pagmatinud-anon sa mga pakigsaad nga inyong gihimo diha sa balay sa Ginoo.

Mahitungod sa atong rehihiyon, o sa atong mahangturong mga pakigsaad, wala kitay kompromiso nga pagahimoon, ni mga baruganan nga ibugti; naggikan kini sa Dios ug gipundar diha sa usa ka bato sa mahangturong kapanahonan; kini mabuhi ug magpadayon kon ang mga gingharian, mga gahum, ug kanasuran magun-ob ug mangadunot; ug uban sa tabang sa Labawng Makagagahum mapanalipdan nato diha sa ka sagrado ang atong mga pakigsaad ug mapadayon ang atong interes ug mahimong matinud-anon sa atong Dios, samtang ang panahon magpadayon o ang kahangturan molahutay.¹³

Karon, ang Ginoo manalangin kaninyo, ug sa pangalan sa Ginoo panalanginan ko kamo—kini nga kongregasyon, nga mga tawo sa pakigsaad sa Ginoo, sama ka tinuod sa karaang Israel mao ang mga tawo sa Dios sa pakigsaad, kay kamo misulod sa sagradong pakigsaad sa Ebanghelyo ni Jesukristo, nga kamo mosunod sa mga kasugoan sa Dios, nga kamo molikay sa panulay ug sa kadautan. Nasayud kamo kon unsa ang inyong nahimo; nasayud kamo sa kinaiyahan sa mga pakigsaad nga inyong gisudlan sa atubangan sa Dios ug sa mga saksi ug sa atubangan sa mga anghel sa langit; ug, busa, kamo misulod ngadto sa usa ka bugkos sa bag-o ug walay katapusang pakigsaad ug sa pagkatinuod mga tawo sa pakigsaad sa Dios sa ulahing mga adlaw.¹⁴

Sama sa pagtabang sa Ginoo kanako sa nangagi sa pagkahimong matinud-anon sa akong mga pakigsaad, nga akong gihimo uban Kaniya ug kaninyo…. mao usab nga pinaagi sa Iyang tabang ug sa Iyang panalangin tinguha nako nga magmatinud-anon sa tanang umaabut sa akong kinabuhi, bisan kon ang pagtugot sa pagpakabuhi mubo man o taas; dili ko kini igsapayan. Samtang ako buhi pa, manghinaut ako nga mahimong usa ka matinudanon nga tawo, usa ka tawo nga makaatubang sa tanang katawhan ug, sa katapusan, makabarug atubangan sa Dios, nga Maghuhukom sa mga buhi ug sa mga patay, ug dili mahadlok sa akong mga nabuhat dinhi sa kalibutan.

… Ako mag-ampo nga kamo magmatinud-anon sa inyong mga pakigsaad; pagmatinud-anon sa inyong mga pakigsaad diha sa mga tubig sa pagbunyag, sa mga pakigsaad nga inyong gihimo sa balay sa Ginoo, ug matinuoron sa tanang matarung nga obligasyon nga naglibut kaninyo. Aron mahimong mga Santos sa Ulahing mga Adlaw, ang mga kalalakin-an ug mga kababayen-an kinahanglang mga mahunahunaon, ug mga kugihan; kinahanglan sila nga mahimong mga katawhan kinsa kahibalong motimbang-timbang sa mga butang diha sa ilang mga hunahuna, mga katawhan kinsa mainampingong mohunahuna sa ilang padulngan sa kinabuhi ug sa mga baruganan nga ilang gisunod. Ang mga tawo dili mahimong matinud-anong mga Santos sa Ulahing mga Adlaw gawas kon sila magtuon ug makasabut, sa labing kubos, sa mga baruganan sa ebanghelyo nga ilang nadawat…. Kon ang mga tawo makasabut sa ebanghelyo ni Jesukristo, makita ninyo silang maglakaw subay sa katarung, sumala sa pulong sa Ginoo, ug sa balaod sa Dios, nga pinasubay gayud uban sa kahigpit, sa katarungan, katarung, ug sa tanang buhat nga madawat sa Ginoo, kinsa modawat lamang sa unsay matarung ug makapahimuot sa Iyang panan-aw; kay ang matarung lamang ang makapahimuot Kaniya.¹⁵

Mga Sugyot alang sa Pagtuon

Nganong magtukod man kita og mga templo? Unsang mga panalangin ang atong madawat kon motambong kita sa templo ug maghupot sa mga pakigsaad nga gihimo didto? (Tan-awa usab sa D&P 109:10–23.) Unsa ang inyong bation kon motambong kamo sa templo?
Sa unsang paagi nga ang katawhan usahay “dili mohatag og igong bili sa mga ordinansa sa balay sa Dios”?
Unsay buot ipasabut niini alang kaninyo sa “pagtagamtam sa matag panalangin niining dili maihap nga katuigan hangtud sa kahangturan”? Sa unsang paagi nga ang templo makatabang sa pagpahinabo niini? Sa unsang paagi nga ang pagtambong sa templo makatabang kanato nga masilsil sa hunahuna ang “kasagrado sa kahangturan”? (D&P 43:34).
Unsay buot ipasabut sa pagkahimong angayan nga mosulod sa balay sa Dios? Unsa ang atong mahimo aron mas maandam ang atong kaugalingon sa pagtambong sa templo? Nganong dili man kita mahimong “mangawat sa mga kahigayunan ug sa mga panalangin sa balay sa Dios”?
Sa inyong hunahuna unsa ang gikinahanglan gikan kaninyo aron mahimong matinuoron sa mga pakigsaad nga inyong gihimo didto sa templo?
Unsa ang atong mahimo aron makab-ot ang hagit ni Presidente Smith nga mahimong “mga mahunahunaon, ug mga kugihan”?
Unsaon man nato sa pagpakitag pagtahud sa balay sa Dios? Unsaon man sa mga ginikanan sa pagtabang sa ilang mga anak nga makakat-on sa pagtahud sa mga templo?