Pagtubos sa Atong mga Patay pinaagi sa Pagserbisyo sa Templo

[Ang Manluluwas] wala lamang gipadala aron pagsangyaw sa ebanghelyo niadtong nagpuyo sa pagkamortal, kondili gi-ordinahan na siyang daan ug gidihogan sa Dios aron pagbukas sa mga ganghaan sa balay nga bilanggoan niadtong naulipon ug sa pagpahayag sa iyang ebanghelyo ngadto kanila.²

Niadtong ikatulo sa Oktubre, sa tuig napulog siyam ka gatus ug napulog walo, ako naglingkod sa akong lawak namalandong sa mga kasulatan;

Ug namalandong sa matubsanon nga sakripisyo sa pag-ula nga gihimo sa Anak sa Dios, alang sa katubsanan sa kalibutan;

Ug ang dako ug katingalahan nga gugma gihimo nga gipakita sa Amahan ug sa Anak pinaagi sa pag-anhi sa Manunubos nganhi sa kalibutan;

Nga pinaagi sa iyang pag-ula, ug pinaagi sa pagkamasulundon ngadto sa mga baruganan sa ebanghelyo, ang mga katawhan unta maluwas….

Samtang ako namalandong niini nga mga butang nga nahisulat [Tan-awa sa 1 Pedro 3:18–20; 1 Pedro 4:6], ang mga mata sa akong salabutan nabuksan ug ang Espiritu sa Ginoo nagpabilin ngari kanako, ug ako nakakita sa mga panon sa mga patay, dili bantugan ug bantugan.

Ug dihay gipundok sa usa ka dapit usa ka dili maihap nga mga pundok sa mga espiritu sa mga makiangayon, kinsa nagmatinudanon sa ilang pagpamatuod ni Jesus samtang sila nagpuyo sa pagka-mortal….

Samtang kining dako kaayo nga pundok naghulat ug nagsultihanay, naglipay diha sa takna sa ilang kaluwasan gikan sa mga gapos sa kamatayon, ang Anak sa Dios, mipakita, nagpahayag sa kalingkawasan sa mga binilanggo kinsa nagmatinud-anon;

Ug didto siya misangyaw ngadto kanila sa walay katapusan nga ebanghelyo, ang doktrina sa pagkabanhaw ug katubsanan sa mga katawhan gikan sa pagkapukan, ug gikan sa kaugalingon nga mga sala ubos sa gikinahanglan nga paghinulsol….

Ug samtang ako nahibulong, ang akong mga mata nabuksan ug ang akong salabutan nahait, ug ako nakasabut nga ang Ginoo wala moadto sa iyang kaugalingon taliwala sa mga dautan ug mga masinupakon kinsa misalikway sa kamatuoran, aron pagtudlo kanila;

Apan tan-awa, taliwala diha sa mga matarung siya mihan-ay sa iyang pundok ug mitudlo og mga sinugo, sinul-uban uban sa gahum ug pagtugot ug gitugyan kanila ang paglakaw ngadto ug pagdala sa kahayag sa ebanghelyo ngadto kanila nga anaa diha sa kangitngit, bisan ngadto sa tanan nga mga espiritu sa mga tawo; ug sa ingon ang ebanghelyo nasangyaw ngadto sa mga patay.

Ug ang pinili nga mga sinugo miadto ngadto sa pagpahayag sa adlaw nga ikahimuot sa Ginoo ug gipadayag ang kalingkawasan sa mga binilanggo kinsa ginapos, gani ngadto sa tanan kinsa maghinulsol sa ilang mga sala ug modawat sa ebanghelyo.

Sa ingon ang ebanghelyo gisangyaw ngadto sa mga nangamatay diha sa ilang mga sala, walay kahibalo sa kamatuoran, o uban sa kalapasan, kinsa nagsalikway sa mga propeta.³

Si Jesus wala makahuman sa iyang tahas sa diha nga ang iyang lawas gipatay, ni nahuman niya kini human sa iyang pagkabanhaw gikan sa mga patay; bisan tuod kon natuman niya ang katuyoan alang sa una niyang pag-anhi sa yuta, wala niya mahuman ang tanan niyang tahas. Ug kanus-a niya mahuman? Dili hangtud matubos ug maluwas niya ang matag anak nga lalaki ug anak nga babaye sa atong amahan nga si Adan nga nangatawo o matawo dinhi niini nga yuta hangtud sa katapusan sa panahon, gawas sa mga anak sa kapildihan. Mao kana ang iyang misyon.⁴

Dili kita makahuman sa atong tahas hangtud nga maluwas nato ang atong kaugalingon ug dayon dili hangtud nga maluwas nato ang tanan nga nagsalig kanato; tungod kay kita mahimong mga manluluwas sa Bukid sa Zion, ingon man usab kang Kristo. Gitawag kita niini nga misyon. Dili maperpekto ang mga patay kon wala kita, ni kita kon wala sila [tan-awa sa D&P 128:18]. Aduna kitay misyon nga pagahimoon alang ug sa ilang katungod; aduna kitay piho nga buluhaton aron pagpalingkawas niadtong kinsa, tungod sa ilang pagkaignorante ug sa dili maayo nga mga kahimtang diin sila gipahimutang samtang dinhi pa, wala maandam alang sa kinabuhing dayon; kinahanglan nga buksan nato ang ganghaan alang kanila, pinaagi sa pagpahigayon sa mga ordinansa nga dili nila mapahigayon alang sa ilang kaugalingon, ug nga gikinahanglan alang sa pagpagawas kanila sa “bilanggoan nga balay,” sa paggawas ug mabuhi sumala sa Dios diha sa espiritu, ug mahukman ingon sa mga tawo diha sa unod [tan-awa sa D&P 138:33–34].

Si Propeta Joseph Smith miingon nga kini mao ang usa sa pinakaimportante nga mga katungdanan nga natugyan diha sa mga Santos sa Ulahing mga Adlaw. Ug ngano? Tungod kay kini mao ang dispensasyon sa kahingpitan sa mga panahon, nga mopasiuna sa kaliboan ka tuig nga pagmando ug diin ang tanang mga butang nga gisulti pinaagi sa mga ba-ba sa balaang mga propeta, sukad pa sa pagsugod sa kalibutan, kinahanglan gayud nga matuman, ug ang tanang mga butang maghiusa, ang anaa sa langit ug dinhi sa yuta. Anaa kanato kana nga trabaho aron buhaton; o, sa labing minus ang tanan nga atong mahimo niini, mobilin sa nahibilin ngadto sa atong mga anak, kang kinsang mga kasingkasing kinahanglan isilsil nato ang kamahinungdanon niini nga trabaho, magmatuto kanila sa paghigugma sa kamatuoran ug sa kahibalo niini nga mga baruganan, aron kon wala na kita, nga nakahimo sa tanan natong mahimo, dayon mobanus sila sa paghago ug padayunon kini hangtud sa pagkahuman niini.⁵

Ang sama nga mga baruganan nga magamit sa mga buhi magamit usab sa mga patay…. Ug mao nga gibunyagan kita alang niadtong kinsa nangamatay. Ang mga buhi dili mahimong hingpit kon wala ang mga patay, ni ang mga patay mahimong hingpit kon wala ang mga buhi. Kinahanglan nga adunay sumpay sa pagkahiusa ug usa ka panaghiusa sa mga ginikanan ug mga anak ug mga anak sa mga ginikanan hangtud nga ang tibuok kadena sa pamilya sa Dios masumpay sa pagkahiusa ngadto sa usa ka kadena, ug silang tanan mahimong pamilya sa Dios ug sa Iyang Kristo.⁶

Kini nga ebanghelyo nga gipadayag ngadto ni Propeta Joseph Smith gisangyaw na didto sa mga espiritu sa bilanggoan, niadtong kinsa milabay na niining kinabuhia ngadto sa kalibutan sa mga espiritu nga walay kahibalo sa ebanghelyo. Si Joseph Smith nagsangyaw niana nga ebanghelyo ngadto kanila. Ingon man si Hyrum Smith. Si Brigham Young usab, ug ingon man usab ang matinudanong mga apostoles nga nakapuyo niini nga dispensasyon ubos sa pagdumala ni Propeta Joseph [tan-awa sa D&P 138:36–37, 51–54]. Atoa sila didto, nga gidala nila gikan dinhi ang balaan nga Priesthood nga ilang nadawat ubos sa pagtugot, ug diin gitugyan diha kanila sa unod; nagsangyaw sila sa ebanghelyo sa mga espiritu sa bilanggoan; kay si Kristo, sa diha nga naghigda pa ang iyang lawas sa lubnganan, miadto aron sa pagpahayag og kaluwasan ngadto sa mga binilanggo ug gibuksan ang mga ganghaan sa bilanggoan ngadto kanila kinsa ginapos [tan-awa sa D&P 138:27–30]. Dili lamang kini sila ang nalambigit niana nga buluhaton kondili gatusan ug kaliboan pa nga uban; ang mga elder nga namatay diha sa nataran sa misyon nga wala makahuman sa ilang mga misyon, apan gipadayon nila kini didto sa kalibutan sa mga espiritu [tan-awa sa D&P 138:57]. Malagmit nakita kini sa Ginoo nga kinahanglanon o angayan sa pagtawag kanila sa kalibutan sa espiritu sama sa iyang gihimo. Dili na ako mangutana niana nga panghunahuna sa bisan unsa nga matang ni mosupak niini. Pasagdan ko na lang kini diha sa kamot sa Dios, tungod kay nagtuo ako nga kining tanang mga butang mahimo nga supakon alang sa kaayohan, kay ang Ginoo dili motugot sa bisan unsa nga modangat sa iyang katawhan dinhi sa kalibutan nga dili niya supakon sa kaulahian alang sa ilang mas labaw pa ka mahinungdanon nga kaayohan.⁷

Kanunay ako nga nagtuo, ug sa gihapon nagtuo sa tibuok kong kalag, nga ang ingon nga mga tawo sama ni Pedro ug Santiago ug ang napulog duha ka mga disipulo nga gipili sa Manluluwas sa iyang kapanahonan, nagbuhat sa gatusan ka mga tuig na ang milabay sukad sa ilang pagkamartir tungod sa pagpamatuod kang Jesukristo, sa pagpahayag og kagawasan sa mga binilanggo sa kalibutan sa espiritu ug sa pagbukas sa ilang ganghaan sa mga bilanggoan [tan-awa sa D&P 138:38-50]. Wala ako nagtuo nga mahimo sila nga gamiton sa bisan unsa nga mas mahinungdanon nga trabaho. Ang ilang linain nga balaang tawag ug pagdihog sa Ginoo sa iyang kaugalingon mismo mao ang pagluwas sa kalibutan, sa pagpahayag og kagawasan sa mga binilanggo, ug sa pagbukas sa mga ganghaan sa bilanggoan niadtong kinsa gigapos sa mga kadena sa kangitngit, pagkamatuotuohon ug pagkaignorante….

… Ang mga butang nga atong nasinati dinhi mao ang matang sa mga butang sa Dios ug sa kinabuhi human dinhi. Adunay dakong pagkapareho tali sa mga katuyoan sa Dios sama sa gipakita dinhi ug sa iyang mga katuyoan ingon nga gibuhat diha sa iyang atubangan ug sa gingharian. Kadtong kinsa gitugotan sa pagsangyaw sa ebanghelyo dinhi ug gitudlo dinhi sa paghimo sa trabaho dili mahunong human sila mamatay, apan mopadayon sa paggamit sa mga katungod nga ilang naangkon dinhi ubos sa Priesthood sa Anak sa Dios aron sa pagpangalagad alang sa kaluwasan niadtong kinsa namatay nga walay kahibalo sa kamatuoran.⁸

Tudloi ang inyong mga anak ug himoa nga matudloan ang inyong kaugalingon sa kamatuoran nga gikinahanglan kini alang kaninyo nga mahimong mga manluluwas sa Bukid sa Zion alang niadtong nangamatay nga walay kahibalo sa ebanghelyo, ug nga ang mga templo sa Dios niining mga walog, ug nga gimatuto sa ubang kayutaan, natukod ug gituyo sa pagplano alang sa pagpahigayon niining sagrado nga mga ordinansa nga gikinahanglan alang niadtong kinsa namatay nga wala niini. Ayaw kalimot niining mga butanga. Ibutang kini sa inyong hunahuna tungod kay mahinungdanon kini alang kanato.⁹

Kining mahinungdanon nga trabaho alang sa katubsanan sa atong mga patay, ang pagpahiusa sa mga buhi ug sa mga patay, ang gahum sa pag-seal … ug ang tanan nga mga ordinansa nga napadayag nga ipahigayon didto sa sagrado nga mga edepisyo nga gitawag og mga templo, diin ubos kita sa sugo gikan sa Dios nga kanunayng magatukod nganha sa Iyang balaan nga pangalan, … kining mga butanga gipadayag kanato niini nga dispensasyon sa labaw pa ka hingpit ug sa labaw pa ka yano sukad pa kaysa nanglabay diha sa kasaysayan sa kalibutan kutob sa atong nahibaloan.¹⁰

Naglaum kita nga moabut ang adlaw nga aduna kitay mga templo nga natukod sa nagkalainlaing bahin sa yuta diin gikinahanglan kini alang sa kasayon sa katawhan; tungod kay naamgohan nato nga usa sa pinakamahinungdanon nga mga responsibilidad nga anaa sa katawhan sa Dios karon mao nga pabalikon ang ilang mga kasingkasing ngadto sa ilang amahan [tanawa sa Malaquias 4:5–6; D&P 2], ug nga sila mobuhat sa trabaho nga kinahanglang pagabuhaton alang kanila nga unta takus sila nga maghiusa diha sa panagbugkos sa Bag-o ug Walay Katapusan nga Pakigsaad gikan sa usa ka henerasyon ngadto sa laing henerasyon. Kay ang Ginoo miingon, pinaagi sa Propeta, nga mao kini ang usa sa pinakamahinungdanon nga mga responsibilidad nga gitugyan kanato niining ulahing mga adlaw.¹¹

Agig kalabutan sa pagpalingkawas sa mga espiritu gikan sa ilang bilanggoan nga balay, sa pagkatinuod, nagtuo kami nga kana mahimo lamang human ang ebanghelyo masangyaw ngadto kanila diha sa espiritu, ug nadawat na nila ang ebanghelyo, ug ang buluhaton nga gikinahanglan sa ilang katubsanan nahimo na sa mga buhi alang kanila. Nga kini nga trabaho unta madali aron ang tanan kinsa mituo didto sa kalibutan sa espiritu, mahimo nga makadawat sa kaayohan sa paglingkawas, gipadayag kini nga ang mahinungdanon nga trabaho sa Kaliboan mao ang trabaho sa mga templo alang sa katubsanan sa mga patay; ug dayon gilauman namo nga makapahimulos sa mga kaayohan sa pagpadayag … pinaagi sa ingon nga mga tinubdan maingon nga mahimong ipadayag sa Ginoo nga may kalabutan niadto kansang trabaho pagabuhaton…. Makatarunganon kini nga samtang ang ebanghelyo mahimo nga isangyaw ngadto sa tanan, sa maayo ug sa dautan, o hinoon ba niadtong kinsa naghinulsol ug niadtong kinsa dili maghinulsol didto sa kalibutan sa espiritu, pareho ra kini dinhi, ang katubsanan moabut lamang niadtong kinsa maghinulsol ug mosunod.¹²

Mahinungdanon nga kalihokan napakita … kabahin sa mga santos sa ilang trabaho sa templo. Ang pagtrabaho sa espiritu alang sa katubsanan sa mga patay gisangon diha kanila, ug usa ka nagkadugang nga kaikag ang napakita niini nga trabaho sa balaan nga gugma. Kini nga trabaho, ang Propeta nga si Joseph nagsulti kanato, “mahinungdanon sa atong kaluwasan, sama sa gisulti ni Pablo mahitungod sa atong amahan, ‘nga sila kon wala kita dili mahingpit, ni kita kon wala ang atong mga patay mahimong hingpit.’ ” [D&P 128:15.] Ang sugo sa Dios alang sa mga santos mao ang paghago uban sa ilang kusog alang sa katubsanan sa ilang mga patay….

… Ang Espiritu nga nag-aghat sa mga santos sa pagtrabaho alang sa katubsanan sa mga patay mao ang pagtuman diha sa mga kasingkasing sa anak sa mga saad nga gihimo ngadto sa mga amahan. Kining mao gihapon nga espiritu daw naglihok diha sa mga kasingkasing sa dungganan nga mga tawo sa yuta kinsa migahin sa ilang panahon ug mga kapanguhaan sa pagkolekta ug paghan-ay sa mga talaan sa kasaysayan sa kagikan…. Kinahanglan ang mga santos mopahimulos sa matag kahigayunan sa pagbaton sa mga talaan nga ingon ka daghan sa ilang mga katigulangan kutob sa mahimo, aron ang ilang katubsanan pinaagi sa mga ordinansa sa Balay sa Dios unta mabatonan. Gidayeg namo ang mga santos tungod sa ilang kakugi niining pinakaimportante ug gikinahanglan nga trabaho.¹³

Among dad-on ngadto sa kalibutan ang sanga sa oliba sa kalinaw. Among ipasundayag ngadto sa kalibutan ang balaod sa Dios, ang pulong sa Ginoo, ang kamatuoran, ingon nga gipadayag kini sa ulahing mga adlaw alang sa katubsanan sa mga patay ug sa kaluwasan sa mga buhi.¹⁴