Pasiuna
Si Presidente Joseph F. Smith miserbisyo sulod sa 52 ka tuig isip usa ka General Authority sa Simbahan—isip sakop sa Korum sa Napulog Duha, isip Magtatambag sa upat ka mga Presidente sa Simbahan, ug sulod sa 17 ka tuig isip Presidente sa Simbahan. Nagtudlo siya sa gipahiuli nga ebanghelyo ni Jesukristo uban sa kalarino, kalumo, ug konbiksyon, miawhag sa mga tawo sa “pagpuyo nga nahisubay sa mga plano sa atong Langitnong Amahan.”1 Ang iyang pangalagad nailhan pinaagi sa iyang gamhanang pagsaksi kang Jesukristo: “Akong nadawat ang pagsaksi sa Espiritu sa akong kaugalingong kasingkasing, ug ako mopamatuod sa atubangan sa Dios, sa mga anghel ug sa mga katawhan … nga ako nasayud nga ang akong Manunubos buhi.”2
Karon ang iyang mga mensahe ug mga sermon nagpadayon sa paghatag og balaanong direksyon sa atong dalan sa mahangturong pag-uswag. Ang atong buhat niini nga kalibutan, miingon si Presidente Smith, “mao ang pagbuhat og kaayohan, ang paghunong sa pagkadautan, ang pagbayaw sa pagkamatarung, kaputli, ug kabalaan diha sa mga kasingkasing sa mga katawhan, ug sa pagestablisar diha sa mga hunahuna sa atong mga anak, labaw sa tanang mga butang, og usa ka gugma alang sa Dios ug sa iyang pulong.”3 Siya namahayag nga “aron mahimong usa ka Santos sa Ulahing mga Adlaw nagkinahanglan og sakripisyo sa kalibutanong mga tumong ug mga gusto; kini nagkinahanglan og pagkamatinud-anon, kalig-on sa pamatasan, gugma sa kamatuoran, kaligdong ngadto sa baruganan, ug madasigon nga tinguha nga makakita sa kadaugan, padayon nga pagmartsa sa kamatuoran.”4
Ang Unang Kapangulohan ug ang Korum sa Napulog Duha ka mga Apostoles mi-establisar sa han-ay sa Mga Pagtulun-an sa mga Presidente sa Simbahan aron sa pagtabang sa mga miyembro sa Simbahan nga madugangan ang ilang panabut sa doktrina sa ebanghelyo ug mas mahiduol ngadto kang Jesukristo pinaagi sa mga pagtulun-an sa mga propeta niini nga dispensasyon. Kini nga libro nagpaila sa mga pagtulun-an ni Presidente Joseph F. Smith, kinsa miingon: “Aron mahimong mga Santos sa Ulahing mga Adlaw, ang mga lalaki ug mga babaye kinahanglang mahimong mga tighunahuna, ug mga tigbuhat; kinahanglan silang mahimong mga lalaki ug mga babaye kinsa mabinantayong maghunahuna kalabut sa mga butang, mga lalaki ug mga babaye kinsa maghunahuna og maayo sa ilang dalan sa kinabuhi ug sa mga baruganan nga gipili nga sundon…. Kon ang mga tawo makasabut sa ebanghelyo ni Jesukristo, makita ninyo sila nga maglakaw nga matarung, sumala sa pulong sa Ginoo, ug sa balaod sa Dios, sa higpit nga paagi sumala nianang unsay makanunayon, makiangayon, matarung, ug sa matag kahimtang madawat ngadto sa Ginoo.”5
Matag kapitulo niini nga libro naglakip og upat ka mga seksyon: (1) usa ka pamahayag nga daklit nga nagtingub sa gitumong sa kapitulo; (2) “Gikan sa Kinabuhi ni Joseph F. Smith,” nga nagpakita sa mga pagtulun-an sa kapitulo pinaagi sa ehemplo gikan sa kinabuhi ni Presidente Smith o sa iyang kaalam;(3) “Mga Pagtulun-an ni Joseph F. Smith,” nga nagtudlo sa importante nga mga doktrina gikan sa daghan niyang mga mensahe ug mga sermon; ug (4) “Mga Sugyot alang sa Pagtuon,” nga nagawhag og personal nga pagribyu ug pagpangutana, dugang nga panaghisgutan, ug paggamit sa atong mga kinabuhi karon pinaagi sa mga pangutana.
Unsaon Paggamit Niining Libroha
Alang sa personal nga pagtuon. Kini nga libro gituyo aron sa pagpalambo sa panabut sa matag miyembro kabahin sa mga baruganan sa ebanghelyo nga gamhanang gitudlo ni Presidente Joseph F. Smith. Pinaagi sa mainampoong pagbasa ug mahunahunaong pagtuon, ang matag miyembro mahimong makadawat og personal nga pagsaksi kabahin niini nga mga kamatuoran. Kini nga volume modugang usab sa librarya sa ebanghelyo sa matag miyembro ug magsilbi isip usa ka importante nga tinubdan alang sa panudlo sa pamilya ug alang sa pagtuon diha sa panimalay.
Alang sa panaghisgutan sa mga miting sa Dominggo. Kini nga libro mao ang teksto alang sa mga miting sa Dominggo sa korum sa Melchizedek Priesthood ug sa Relief Society. Ang mga magtutudlo kinahanglang magpokus sa sulod sa teksto ug sa may kalabutan nga mga kasulatan, magkuha og mga pangutana diha sa katapusan sa kapitulo aron sa pag-awhag og panaghisgutan sa klase. Ang pagribyu sa mga pangutana sa dili pa magtuon sa mga pulong ni Presidente Smith mahimong makahatag og dugang nga panabut sa iyang mga pagtulun-an.
Ang mga miting sa Dominggo kinahanglang magpokus sa mga baruganan sa ebanghelyo, personal nga mga ehemplo nga nagtudlo niini nga mga baruganan, ug mga pagpamatuod sa kamatuoran. Kon ang mga magtutudlo mapainubsanong magtinguha sa Espiritu sa pagpangandam ug paggiya sa leksyon, ang tanan kinsa moapil mahimomg malig-on diha sa ilang kahibalo sa kamatuoran. Ang mga magtutudlo kinahanglang mopahinumdom sa mga sakop sa klase sa pagdala sa ilang mga libro ngadto sa ilang mga miting ug kinahanglang motahud sa pagpangandam sa mga sakop pinaagi sa pagtudlo gikan sa mga pulong ni Presidente Joseph F. Smith. Kay nakabasa nang daan sa kapitulo sa sayo, ang mga sakop sa klase mahimong andam sa pagtudlo ug paghatag og kaayohan sa usag usa.
Wala kini kinahanglana o girekomendar nga ang mga miyembro mopalit og dugang nga mga teksto sa mga komentaryo o pakisayran aron pagsuporta sa materyal diha sa teksto. Ang mga miyembro giawhag sa paggamit sa ilang mga kasulatan nga gisugyot alang sa dugang nga pagtuon sa doktrina.
Kay kini nga teksto gitumong alang sa personal nga pagtuon ug pakisayran sa ebanghelyo, daghang mga kapitulo tag-as ra kaayo aron hingpit nga mahisgutan sa klase. Busa, ang pagtuon diha sa panimalay nahimong mahinungdanon aron madawat sa hingpit ang mga pagtulun-an ni Presidente Smith.
Sa inyong pagtuon, unta makaila kamo niining mapainubsanon, matinud-anon, ug walay kahadlok nga propeta sa Dios, si Presidente Joseph F. Smith. Unta inyong dawaton ang iyang tambag “sa pagpili sa matarung tungod kay kini matarung, ug tungod kay ang inyong kasingkasing nahigugma sa matarung, ug tungod kay kini nga pagpili labaw sa bisan unsa pa.”6 Unta moapil kamo kang Presidente Smith samtang siya nagpamatuod sa gahum sa ebanghelyo ni Jesukristo: “Ang atong hugot nga pagtuo sa mga doktrina nga gipahiuli … nagpamatuod ug naglig-on kanato ug nag-establisar sa dili ikapangutana o dili kaduhaduhaan nga atong hugot nga pagtuo ug gituohan sa balaan nga misyon sa Anak sa Dios.”7