Ang Atong Misyonaryo nga Katungdanan

Usa sa kinahanglanon kaayo nga mga kwalipikasyon sa mga elder kinsa moadto sa kalibutan aron magsangyaw mao ang pagkamapainubsanon, pagkamaaghup ug tiunay nga gugma, alang sa kaayohan ug sa kaluwasan sa tawhanong pamilya, ug ang tinguha sa pag-establisar og kalinaw ug pagkamatarung dinhi sa yuta taliwala sa mga katawhan. Dili kita makasangyaw sa ebanghelyo ni Kristo kon wala kini nga diwa sa pagkamapainubsanon, pagkamaaghup, hugot nga pagtuo sa Dios ug pagsalig diha sa iyang mga saad ug pulong ngari kanato. Mahimo kamong makakat-on sa tanang kaalam sa katawhan, apan dili kana mopasarang kaninyo sa pagbuhat niining mga butanga sama sa mahimo sa mapainubsanon, magiyahon nga impluwensya sa Espiritu sa Dios. “Ang pagkagarboso magauna sa pagkalaglag, ug ang mapahitasong espiritu magauna sa pagkahulog.” [Mga Proverbio 16:18.]

Gikinahanglan kini alang sa mga elder kinsa moadto sa kalibutan aron magsangyaw sa pagtuon sa diwa sa ebanghelyo, nga mao ang diwa sa pagkamapainubsanon, ang diwa sa pagkamaaghup ug tinuod nga debosyon sa bisan unsa nga katuyoan nga gitakda nga buhaton sa inyong kamot o inyong hunahuna. Kon kini mao ang pagsangyaw sa ebanghelyo, kinahanglan kitang mohalad sa atong mga kaugalingon ngadto sa mga katungdanan niana nga pangalagad, ug kinahanglan kitang maningkamot sa kinadak-an natong abilidad aron mahimong sarang sa pagpahigayon nianang piho nga trabahoon, ug ang paagi sa pagbuhat niini mao ang pagpakabuhi sa ingon aron nga ang espiritu sa Dios mahimong makig-abin ug maanaa kanato aron sa paggiya kanato sa matag gutlo ug oras sa atong pangalagad, gabii ug adlaw.³

Akong mga kaigsoonan, nahilakip kamo sa buhat sa Dios; nagtrabaho kamo og maayo; nakadawat kamo sa hilabihan gayud sa Diwa sa Ebanghelyo tungod kay nahilakip kamo niini nga eksklusibo. Mga tigpangalagad kamo sa walay katapusang pakigsaad. Kamo nag-ampo; wala kamo makalimot sa inyong mga pag-ampo, sigurado. Ang usa ka Elder dili makalimot sa iyang mga pag-ampo; dili siya makalimot sa Ginoo; siya sigurado gayud nga mahinumdom Kaniya kon anaa siya sa linya sa iyang katungdanan. Kon siya mobutang sa iyang kaugalingon sa usa ka kahimtang diin siya makatuman sa labing maayo, dili siya makalimot sa Ginoo sa buntag, udto ug gabii. Mag-ampo siya ngadto sa Ginoo, ug mopaubos sa iyang kaugalingon sa Iyang atubangan ug moila Kaniya. Kon kamo anaa niini nga linya kamo makatagamtam sa Iyang Espiritu.⁴

Ang usa ka misyonaryo kinahanglan nga anaa sa iyang kaugalingon ang pagpamatuod kabahin sa Espiritu sa Dios—ang pagsaksi sa Espiritu Santo.… Ang mga tawo dili makabig pinaagi sa kalarino o kabatid sa pamulong; sila makumbinsir kon sila matagbaw nga kamo aduna sa kamatuoran ug sa Espiritu sa Dios.⁵

Giisip kini nga sukwahi nga magpadala og mga kalalakin-an ngadto sa kalibutan aron mosaad sa uban pinaagi sa pagkamasulundon sa ebanghelyo nianang mismo sila wala makadawat. Ni gihunahuna kini nga angay nga magpadala og mga kalalakin-an aron mareporma sila. Himoa nga sila magreporma una sa balay kon wala sila hingpit nga nagsunod sa mga sugo sa Dios. May kalabutan kini sa Pulong sa Kaalam ingon man usab sa uban pang mga balaod sa langit. Walay pagsupak ang ihatag ngadto sa mga kalalakin-an kinsa gitawag nga sa sayo nga mga katuigan tingali bagis o badlungon, kon sa kaulahiang mga katuigan nagpuyo sila og usa ka diosnong kinabuhi ug nakapakita og mga bunga sa paghinulsol.⁶

Gusto kita og batan-ong mga kalalakin-an … kinsa mipabilin sa ilang mga kaugalingon nga walay buling gikan sa kalibutan, ug makaadto sa mga kanasuran sa yuta ug moingon sa mga katawhan, “Sunda ako, sama nga ako nagsunod kang Kristo.” Dayon ganahan kita nga mahibalo sila kon unsaon sa pagkanta, ug sa pag-ampo. Nagpaabut kita nga sila mahimong matinuoron, hiyasnon, ug matinud-anon sa ilang mga pakigsaad hangtud sa kamatayon, ngadto sa ilang mga kaigsoonan, ngadto sa ilang mga asawa, ngadto sa ilang mga amahan ug mga inahan, ngadto sa ilang mga igsoong lalaki ug igsoong mga babaye, ngadto sa ilang mga kaugalingon ug ngadto sa Dios. Kon kamo makakuha og mga kalalakin-an nga sama niini aron sa pagsangyaw sa ebanghelyo ngadto sa kalibutan, bisan kon sila kamao kaayo o dili kon unsaon sa pagsugod, ang Ginoo mobutang sa iyang Espiritu ngadto sa ilang mga kasingkasing, ug iya silang panalanginan og salabutan ug gahum aron sa pagluwas sa mga kalag sa mga katawhan. Kay ang tinubdan sa ilang kinabuhi anaa kanila. Wala kini nikunhod o nadaut; wala kini gipahilayo gikan kanila.⁷

Wala kinahanglana nga ang atong mga kabatan-onan kinahanglang masayud kabahin sa kadautan nga nanghitabo sa bisan asang dapit. Ang ingon nga kahibalo dili makapabayaw, ug maingon nga sobra na sa usa ka batan-ong lalaki ang makasubay sa unang lakang sa iyang pagkalaglag ngadto sa kakuryuso nga nagdala kaniya ngadto sa kwestyonable nga mga dapit. Himoa nga ang mga batanong kalalakin-an sa Zion, maanaa man sila sa mga misyon o maanaa sa balay, molikay sa tanang mga dapit nga dautan. Wala kinahanglan nga sila kinahanglang masayud kon unsay nahitabo sa ingon nga mga dapit. Walay tawo nga mas maayo o mas lig-on alang sa ingon nga kahibalo. Himoa nga sila makahinumdom nga “ang kahibalo kabahin sa sala manintal ngadto sa pagbuhat niini,” ug dayon likayi kadto nga mga tintasyon nga sa moabut nga panahon mahimong mobutang sa peligro sa ilang hiyas ug sa ilang nahimutangan sa Simbahan ni Kristo.⁸

Ang mga kinaiya sa usa ka maayong misyonaryo mao ang: Usa ka tawo kinsa kahibalong makig-uban sa laing tawo—kansang pagpakighigala permanente ug madasigon—kinsa makapahiuyon sa iyang kaugalingon ngadto sa pagsalig ug pabor sa katawhan kinsa anaa sa kangitngit. Dili kini mahimo kon walay pagpangandam. Kinahanglan nga makaila kamo sa usa ka tawo, makat-on kabahin niya ug makabaton sa iyang pagsalig ug mohimo kaniya nga mobati ug masayud nga ang inyong bugtong tinguha mao ang pagbuhat kaniya og kaayohan ug pagpanalangin kaniya; dayon mahimo ninyo siyang sultihan sa inyong mensahe, ug mohatag kaniya sa maayong mga butang nga anaa kaninyo alang kaniya, sa mabination ug mahigugmaong paagi. Busa, sa pagpili og mga misyonaryo, pilia ang kinsa adunay kahibalo nga makig-uban sa laing tawo, kinsa adunay pagpakighigala ug dili kasilag ngadto sa mga tawo; ug kon kamo wala pay ingon niana sa inyong ward, bansaya ug himoa nga sarang ang pipila ka batan-ong mga lalaki alang niini nga buhat.⁹

Ang atong mga elder gitudloan dinhi, ug sila gitudloan gikan sa pagkabata hangtud sa pagdako, nga sila dili moadto ug makiglantugi sa relihiyusong mga organisasyon sa kalibutan kon sila pagatawagon sa pag-adto aron sa pagsangyaw sa ebanghelyo ni Jesukristo, apan moadto ug mopamatuod kanila sa mensahe nga gihatag ngari kanato pinaagi sa pagka-instrumento ni Propeta Joseph, niini nga ulahing dispensasyon, diin ang mga katawhan mahimong makakat-on sa kamatuoran, kon sila buot.

Sila gipadala aron motanyag sa sanga sa oliba sa kalinaw ngadto sa kalibutan, sa pagtanyag sa kahibalo nga ang Dios namulong gikan sa kalangitan sa makausa pa sa iyang mga anak dinhi sa yuta; nga ang Dios sa iyang kalooy mipahiuli pag-usab nganhi sa kalibutan sa kahingpitan sa ebanghelyo sa iyang Bugtong Anak, diha sa unod, nga ang Dios mipadayag ug mipahiuli sa katawhan sa balaang gahum ug awtoridad gikan niya mismo, diin sila makahimo ug awtorisado nga mopahigayon sa mga ordinansa sa ebanghelyo ni Jesukristo nga gikinahanglan alang sa ilang kaluwasan; ug ang ilang pagpahigayon niini nga mga ordinansa gikinahanglan nga madawat gayud ngadto sa Dios kinsa mihatag kanila sa awtoridad sa pagpahigayon niini diha sa iyang pangalan.

Ang atong mga elder gipadala aron sa pagsangyaw sa paghinulsol sa sala, sa pagsangyaw sa pagkamatarung, sa pagsangyaw ngadto sa kalibutan sa ebanghelyo sa kinabuhi, sa pakigdait, ug sa pakighigala diha sa mga katawhan, sa pagtudlo sa mga kalalakin- an ug mga kababayen-an sa pagbuhat nianang matarung sa atubangan sa Dios ug diha sa presensya sa tanang mga katawhan, sa pagtudlo kanila sa kamatuoran nga ang Dios mi-organisar sa iyang Simbahan, usa ka Simbahan diin siya, mismo, mao ang tigpasiugda ug nagtukod.¹⁰

Ang pangutana nga kanunay nga mosantup sa mga hunahuna sa mga batan-ong mga kalalakin-an kinsa anaa sa misyon, “Unsa man ang akong isulti?” Ug lain ang daling mosunod niini, “Unsaon man nako sa pagsulti niini?” … Samtang walay piho nga lagda nga mahimong ihatag, ang kasinatian nagtudlo nga ang pinakasimple nga paagi mao ang pinakamaayo. Kay nakakat-on man sa mga baruganan sa ebanghelyo, pinaagi sa mainampoong espiritu ug pinaagi sa pagtuon og maayo, kini kinahanglang ipresentar ngadto sa mga tawo diha sa pagpaubos, sa pinakasimple nga mga matang sa pinulongan, nga walay pamasin o panghambug ug diha sa diwa sa misyon ni Kristo. Dili kini mahimo kon ang usa ka batan-ong misyonaryo mousik sa iyang paningkamot sa hinambug nga pagsulay nga mahimong usa ka sabaan nga mamumulong. Mao kini ang punto nga gilauman nakong isilsil diha sa mga elder, ug sa pagtambag nga ang tanang paningkamot sa larinong pagpamulong kinhanglang diha lamang sa tukma nga mga panahon ug mga dapit. Ang misyon dili mao ang dapit alang sa maong paningkamot. Ang ebanghelyo dili malampusong matudlo pinaagi sa hinambug nga pagpadayag sa mga pulong ug argumento, apan mapadayag pinaagi sa ligdong ug sa maalam nga mga pamahayag sa simple nga kamatuoran niini, gilitok sa paagi nga motandog sa kasingkasing ug modani, usab, ngadto sa pangatarungan ug maayo nga panabut.

… Ang espiritu kinahanglang anaa sa misyonaryo, kon kinahanglan siyang molampus sa pagpukaw og tubag niini diha sa iyang mga tigpaminaw; ug tinuod kini bisan kon ang mga pulong gilitok diha sa panag-istoryahanay, nag-atubangay, o diha sa pampublikong mga pundok. Ang espiritu dili mopabati sa kaugalingon niini sa tawo kinsa miggahin sa iyang panahon sa pagpadangat sa unsay iyang angayang isulti sa hinambug nga mga pulong o sa pagpakita og kalarino sa pagpamulong. Naglaum siya sa pagpahimuot sa artipisyal nga paagi, ug dili sa epektibong paagi pinaagi sa kasingkasing.¹¹

Walay tawo ang makahimo sa pagsangyaw sa Ebanghelyo ni Jesukristo sa iyang kaugalingon; kay walay tawo nga makasabut sa mga hunahuna sa Dios gawas sa Espiritu sa Dios nga anaa kaniya [tan-awa sa 1 Mga Taga-Corinto 2:11]. Kay ang bisan kinsa nga tawo nga mosulay sa pagsangyaw sa pulong sa Ginoo pinaagi sa iyang kaugalingong kaalam ug kahibalo, nga walay inspirasyon, yano nga usa ka pagbugalbugal. Walay tawo nga makasangyaw kabahin sa Dios ug sa pagkadiosnon ug sa kamatuoran ingon nga kini anaa kang Kristo Jesus gawas nga siya gidasig sa Balaang Espiritu. Ang mga disipulo sa karaang panahon nakiglakaw ug nakig-istorya sa Manluluwas atol sa Iyang misyon diha sa mga katawhan, ug sa gihapon … gimandoan sila sa pagpabilin sa Jerusalem ug sa dili paggawas aron sa pagsangyaw hangtud nga sila tugahan og gahum gikan sa kahitas-an; sa ato pa, hangtud nga ang Balaang Espiritu mabu-bu ngadto kanila diin ang ilang mga hunahuna malagsik, ang ilang mga panabut mapalambo, ang pagpamatuod kang Jesukristo matanum sa ilang mga kasingkasing, nga sila unta modala niana nga pagpamatuod ngadto niadtong kinsa kinahanglan sila nga moadto.¹²

Ang indibidwal nga elder mosalig og dako gayud ngadto sa paggiya sa espiritu sa iyang calling, diin siya kinahanglan nga mapatuhup. Kon siya mapakyas sa pag-amuma niana nga espiritu, nga mao ang diwa sa kusog ug paggamit, sa dili madugay siya mahimong mawad-an og kalagsik, tapulan ug dili malipayon. Ang matag misyonaryo kinahanglan nga maningkamot sa paggahin og bahin sa matag adlaw sa pagtuon ug mainampoong paghunahuna kabahin sa mga baruganan sa ebanghelyo ug sa teyolohiya sa Simbahan. Kinahanglan siyang magbasa ug mamalandong ug mag-ampo. Tinuod, supak kita sa pagpangandam og gitakda nga mga wali nga ihatag uban sa paghunahuna sa epekto sa larino nga pagpamulong ug pagpakita og kahanas sa paggamit sa mga pulong; apan kon ang usa ka elder mobarug aron mamulong sa usa ka kongregasyon sa sulod sa nasud o sa gawas, kinahanglan siyang andam gayud alang sa iyang wali. Ang iyang hunahuna kinahanglang adunay igong pundo sa mga hunahuna nga angayang isulti, angayang paminawon, angayang hinumduman; dayon ang espiritu sa pagdasig modala sa mga kamatuoran diin mao ang gikinahanglan sa iyang mga tigpaminaw, ug mohatag og gahum sa iyang mga pulong.¹³

Matinguhaon kini nga girekomendar nga ang mga elder nga anaa sa mga misyon sa gawas sa nasud, ingon man usab ang kinatibuk-ang mga Santos sa Ulahing mga Adlaw, molikay og mabingkilon nga argumento ug debate kalabut sa mga hilisgutang doktrinal. Ang kamatuoran sa ebanghelyo wala magdepende sa pagpakita niini diha sa mainitong panaghisgutan; ang mensahe sa kamatuoran labing epektibo nga mahatag kon ipadayag sa mga pulong nga yano ug may pagbati.

… Ang usa ka pagpamatuod sa kamatuoran mas labaw pa kaysa pagsanung lamang sa hunahuna, usa kini ka konbiksyon sa kasingkasing, usa ka kahibalo nga mopuno sa tibuok kalag sa nakadawat niini.

Ang mga misyonaryo gipadala aron sa pagsangyaw ug pagtudlo sa unang mga baruganan sa ebanghelyo, kang Kristo lamang ug kaniya ingon nga linansang sa krus, ug sa tinuod wala nay lain pa sa paagi sa teyolohikanhong doktrina. Wala sila sugoa sa pagpasabut og maayo sa ilang kaugalingon nga hunahuna kabahin sa lisud sabton nga mga pangutana sa teyolohiya, ni sa pagpalibug sa ilang mga tigpaminaw uban sa pagpakita sa talagsaong kahibalo. Mga magtutudlo sila ug kinahanglan gayud nga sila mahimo nga ingon, kon sila makakab-ot sa bisan unsa nga ang-ang sa mga responsibilidad sa ilang taas nga calling; apan kinahanglan silang motudlo kutob sa ilang mahimo sunod sa paagi sa Manluluwas—magtinguha sa pagpangulo pinaagi sa gugma alang sa ilang mga isigka ingon, pinaagi sa yano nga pagpasabut ug pagdani; dili sa pagsulay sa pagkumbinsir pinaagi sa pagpugos.

Mga kaigsoonan, pasagdi kini nga mga tema sa walay kwenta nga panaghisgutan; magpabiling duol ngadto sa mga pagtulun-an sa gipadayag nga pulong, ingon nga gihimong yano diha sa sumbanang mga basahon sa Simbahan ug pinaagi sa mga pamulong sa buhi nga mga propeta; ug ayaw tugoti ang kalainan sa mga hunahuna kabahin sa lisud sabton nga mga butang kalabut sa doktrina nga maoy mokuha sa inyong pagtagad, basin hinoon kamo mahilayo sa usag usa ug mahibulag gikan sa Espiritu sa Ginoo.¹⁴

Makalolooy kini nga human nga daghan kaayo sa atong mga batan-ong lalaki kinsa migawas sa nasud ug nakahimo og maayo nga mga misyon nakapauli na, daw sila nakalimtan o napasagdan sa nagdumala nga mga awtoridad sa Simbahan ug natugutan nga nadala na usab ngadto sa pagkayam-angan ug pagkawalay pagpakabana, ug sa katapusan, tingali, naglatagaw palayo sa ilang mga katungdanan sa Simbahan. Kinahanglan silang magtrabaho sa ilang katungdanan, kinahanglan silang aktibo diha sa buhat sa pangalagad, sa pipila ka paagi, nga sila unta mas makapabilin sa diwa sa ebanghelyo diha sa ilang mga hunahuna ug diha sa ilang mga kasingkasing ug mahimong mapuslanon sa nasud ug ingon man usab sa gawas.

Dili ikapangutana ang kamatuoran nga ang misyonaryo nga pagserbisyo gikinahanglan ug ingon ka mahinungdanon sa Zion, o dinhi sulod sa nasud, ingon man sa gawas.… Nakakita kita og daghan kaayo nga mga batan-ong lalaki nga nasugamak ngadto sa pagkayam-angan, kondili man sa dautan, nga mga pamaagi ug mga naandang buhaton. Ang matag misyonaryo nga batan-ong lalaki kinsa mobalik gikan sa iyang misyon nga puno sa hugot nga pagtuo ug maayong tinguha kinahanglang dad-on niya nganha sa iyang kaugalingon nga mahimong usa ka tigluwas kutob sa mahimo sa iyang batan-on ug dili kaayo eksperyensyado nga mga kaubanan diha sa ilaha. Kon ang usa ka mipauli na nga misyonaryo makakita og usa ka batan-ong lalaki nga malambigit sa dili maayo nga mga pamaagi ug naanad na sa dili maayong mga naandang buhaton, kinahanglan siyang mobati nga iya kining katungdanan ang paggiya kaniya, kauban ang nagdumalang mga awtoridad sa stake o sa ward diin siya nagpuyo, ug mogamit sa tanang gahum ug impluwensya kutob sa iyang mahimo alang sa kaluwasan nianang nasayop nga batanong lalaki kinsa wala sa kasinatian nga nabatunan sa atong mga elder didto sa gawas sa nasud, ug sa ingon nahimong hinungdan sa pagluwas og daghan ug sa pag-establisar kanila nga mas lig-on diha sa kamatuoran.¹⁵

Ang pagtrabaho sa usa ka tawo sa natad sa misyon mopalambo sa iyang panglantaw, mopalagsik sa iyang mga kusog, mopadako sa iyang kapasidad alang sa maayo nga buhat sa bisan unsa nga direksyon ug mohimo kaniya sa matag paagi nga mas lig-on ug mas mapuslanon nga lumulupyo, ingon man usab usa ka mas mapahinunguron nga miyembro sa Simbahan. Samtang ang usa ka misyonaryo sa pagkatinuod nahilakip sa buhat diha sa misyon kinahanglan siya nga sa kinatibuk-an usa ka misyonaryo, moggahin sa pinakamaayo niyang mga kusog ngadto sa espesyal nga mga katungdanan nga gisangun kaniya. Kon siya mobalik sa iyang gigikanan nga komunidad siya usa gihapon ka misyonaryo sa kinatibuk-an nga kahulugan; apan kinahanglan niyang hinumduman nga iya na usab nga giangkon ang iyang dapit diha sa mga nagtrabaho, aron sa pagkaon sa iyang pan pinaagi sa singot sa iyang nawong.… Ang mipauli na nga mga misyonaryo kinahanglan nga anaa diin ang maisugon nga mga kasingkasing, lig-on nga mga hunahuna ug andam nga mga kamot gikinahanglan. Ang kinaiya sa ebanghelyo dili kanang negatibo nga pagkamaayo—ang pagkawala lamang sa unsay dili maayo; gibarugan usab niini ang agresibo nga kusog nga maayong pagkagiya, alang sa positibo nga pagkamaayo—sa ato pa, alang sa pagtrabaho.¹⁶

Isip mga tigdala ug mga tigtanum sa bililhong binhi sa kinabuhing dayon, himoon nato ang atong mga kinabuhi nga motukma sa atong mga gipang-angkon, ang atong mga pulong mahisubay sa kamatuoran nga atong gidala, ug ang atong mga lihok mahiuyon sa gipadayag nga kabubut-on sa Dios; kay [gawas kon] kini nga mga bunga mosunod sa atong mga pag-angkon sa hugot nga pagtuo, kita, isip mga Elder o mga Santos, mga babag lamang sa pag-uswag sa buhat, mga balda sa agianan sa praktikal og hunahuna nga tig-obserbar, ug dili lamang nga dili makatabang sa mga gilauman nga kaluwasan sa uban, apan mobutang sa pilegro sa atong kaugalingon.¹⁷