Ang Impluwensya sa mga Inahan

Ang mga inahan kinsa adunay ebanghelyo sa ilang mga kasingkasing mogiya sa ilang mga anak diha sa mga dalan sa pagkamatarung ug kamatuoran.

Gikan sa Kinabuhi ni Joseph F. Smith

Si Presidente Joseph F. Smith adunay dako kaayo nga pagtahud alang sa mga inahan. Ang iyang kaugalingong inahan mao ang usa ka ehemplo ngadto kaniya kabahin sa hugot nga pagtuo ug lig-on nga tinguha. Naghulagway sa iyang halangdon nga impluwensya, siya miingon: “Akong mahinumduman ang akong inahan sa mga panahon didto sa Nauvoo [1839–46]. Akong nahinumduman nga nakakita kaniya ug sa iyang makalolooy nga mga anak nga paspas nga gibalhin ngadto sa usa ka lapad nga sakayan dala ang pipila lamang ka mga butang kutob sa iyang madala gikan sa balay atol sa pagsugod og bomba sa siyudad sa Nauvoo pinaagi sa manggugubot nga panon. Akong mahinumduman ang mga kalisdanan sa Simbahan didto ug sa pagpadulong ngadto sa Winter Quarters, didto sa Suba sa Missouri, ug sa unsa nga paagi siya nag-ampo pag-ayo alang sa iyang mga anak ug sa pamilya diha sa iyang makaluya nga biyahe.… Akong mahinumduman ang tanang mga pagsulay nga adunay kalabutan sa among mga paningkamot sa pagbalhin uban sa Kampo sa Israel, pag-anhi niini nga mga walog sa kabukiran nga walay mga pundok sa mga baka nga igo aron sa pagbira sa among mga karwahe; ug kay walay mga kahimanan aron makabaton niadtong gikinahanglan nga mga pundok sa mga baka, iyang gipapas-an ang iyang mga baka ug mga nati, ug mihigot og tingub sa duha ka mga karwahe, ug nagsugod kami sa pag-adto sa Utah niining dili maayo ug makalolooy nga kahimtang, ug ang akong inahan miingon—’Ang Ginoo moabli sa dalan;’ apan kon unsaon Niya sa pag-abli sa dalan walay usa nga nasayud.…

“Wala ba ninyo mahunahunai nga kining mga butanga nakahimo og impresyon diha sa hunahuna? Sa inyong hunahuna makalimot ba ko sa ehemplo sa akong inahan? Dili; ang iyang hugot nga pagtuo ug ehemplo kanunay gayud nga hayag sa akong panumduman. Unsa man ang akong gihunahuna! Matag ginhawa nga akong giginhawa, matag pagbati sa akong kalag modangat ngadto sa Dios diha sa pagpasalamat Kaniya nga ang akong inahan usa ka Santos, nga siya usa ka babaye sa Dios, putli ug matinud-anon, ug nga siya moantus sa kamatayon kay sa mobudhi sa pagsalig nga gisangun ngadto kaniya; nga siya moantus sa kakabus ug kakapoy didto sa kamingawan ug maningkamot sa paghugpong sa iyang pamilya kay sa magpabilin sa Babelon. Mao kana ang espiritu nga mipuno kaniya ug sa iyang mga anak. Dili ba mahimong dili takus ang iyang mga anak sa ingon nga inahan kon wala sila mipatalinghug ug misunod sa iyang ehemplo? Busa ako moingon nga ang Dios mopanalangin sa mga inahan sa Israel.”¹

Mga Pagtulun-an ni Joseph F. Smith

Ang impluwensya sa inahan molungtad gikan sa henerasyon ngadto sa laing henerasyon.

Unsa nako ka higugma ug gihambin ang tinuod nga pagkainahan! Walay butang ubos sa celestial nga gingharian ang makalabaw sa akong walay kamatayon nga gugma alang sa malumo, tinuod, halangdon, nga kalag kinsa mihimugso kanako—ang akong kaugalingon, kaugalingon, nga inahan! O siya maayo! Siya tinuod! Siya putli! Siya sa pagkatinuod usa ka Santos! Usa ka harianon nga anak nga babaye sa Dios! Ngadto kaniya utang nako ang ako gayud nga pagkatawo ingon man usab ang akong kalampusan sa kinabuhi, inubanan sa pabor ug kalooy sa Dios!²

Isip usa ka lagda ang mga inahan sa Zion, ang mga inahan sa Israel, mao ang pinakamaayo nga mga babaye nga nagpuyo sa kalibutan, ang pinakamaayo nga makit-an bisan asa.… Ang maayong impluwensya nga magamit sa usa ka maayong inahan ngadto sa iyang mga anak sama sa igpapatubo nga gikuha sa usa ka babaye ug gilubong niya diha sa tulo ka takus nga harina, hangtud mitubo ang tiubok minasa; ug kutob sa maabtan sa iyang impluwensya, dili lamang sa iyang kaugalingong mga anak, apan ngadto sa mga kaubanan sa iyang mga anak, kini mabati, ug maayo ang resulta nga misangpot niini.

Ug, mga kaigsoonang babaye, wala kamo masayud kon asa kutob ang maabtan sa inyong impluwensya. Ang inahan nga malampuson sa pagpadako og maayo nga batang lalaki, o batang babaye, sa pagsunod sa iyang ehemplo ug sa pagsunod sa iyang mga baruganan diha sa kinabuhi, nagtanum sa mga binhi sa hiyas, dungog ug kaligdong ug sa pagkamatarung diha sa ilang mga kasingkasing nga mabati diha sa tanan nilang mga buhat sa kinabuhi; ug bisan asa kana nga batang lalaki o batang babaye moadto, isip usa ka lalaki o babaye, sa bisan unsa nga katilingban sila maanaa, ang maayong mga epekto sa ehemplo niana nga inahan ngadto kanila mabati; ug dili gayud kini mamatay, tungod kay molungtad kini gikan kanila ngadto sa ilang mga anak gikan sa henerasyon ngadto sa laing henerasyon. Ug labi na kaming naglaum alang niini diha sa Ebanghelyo ni Jesukristo.³

Sa akong pagkabata …gitudloan ako nga motuo sa kabalaan sa misyon ni Jesukristo. Gitudloan ako sa akong inahan, nga usa gayud ka Santos—nga si Jesukristo mao ang Anak sa Dios; nga siya sa pagkatinuod walay lain kon dili ang Bugtong Anak sa Dios diha sa unod, ug nga, busa, walay lain kon dili ang Dios ang mahangturong Amahan mao ang iyang Amahan ug ang tigpasiugda sa iyang pagpakatawo sa kalibutan. Gitudloan ako niini gikan sa akong amahan, gikan kang Propeta Joseph Smith, pinaagi sa akong inahan kinsa mihangup sa ebanghelyo tungod kay siya mituo sa pagpamatuod ni Joseph Smith, ug siya mituo sa dungog, kaligdong ug pagkamatinud-anon sa iyang bana; ug sa tibuok panahon sa akong pagkabata ug sa tanan nakong mga katuigan sa kalibutan mihupot ako ngadto niana nga pagtuo; sa pagkatinuod, wala gayud ako makabaton og bisan unsa nga grabe nga pagduhaduha sa akong hunahuna, bisan pa sa pagkabata.⁴

Dakong responsibilidad anaa sa mga inahan sa Israel.

Ang pagka-inahan anaa sa pundasyon sa kalipay diha sa panimalay, ug sa kauswagan sa nasud. Ang Dios mitugyan sa mga kalalakin-an ug mga kababayen-an sa sagrado kaayo nga mga obligasyon nga may kalabutan sa pagka-inahan.⁵

Naghunahuna ako nga ang pinakamaayo nga mga inahan sa kalibutan kinahanglan nga makita, ug kanunay nga makita, diha sa mga Santos sa Ulahing mga Adlaw. Ako nagtuo nga ang pinakamaayo nga mga asawa sa tibuok kalibutan makita diha sa mga Santos sa Ulahing mga Adlaw. Ako walay nahibaloan nga laing mga kababayen-an sa kalibutan nga adunay sama nga pagsabut kabahin sa pagka-asawa ug pagka-inahan nga naangkon sa mga Santos sa Ulahing mga Adlaw. Ang atong mga panag-uban wala lamang eksklusibo nga gituyo alang niini nga kinabuhi.… Mabuhi kita karon ug sa kahangturan. Nagmugna kita og mga panag-uban ug mga relasyon karon ug sa kahangturan. Ang atong mga pagbati ug atong mga tinguha makita nga haum ug giandam nga molungtad dili lamang sa tibuok temporal o mortal nga kinabuhi, apan sa tibuok kahangturan.⁶

Kita mouswag ug mopalambo sa Zion dinhi sa yuta; kay mao kini ang atong misyon, ug ang buhat sa inyong mga inahan ug mga anak nga babaye sa Zion—ang mga inahan karon, ug sa kaulahian ang mga anak nga babaye, kinsa, mao usab, ang mahimong mga inahan sa Israel. Dakong responsibilidad ang anaa kaninyo. Diha kaninyo nagdepende ang pagbansay ug ang direksyon sa mga hunahuna ug sa inspirasyon sa mga kasingkasing sa inyong mga anak, kay sila mapanalanginan sa espiritu sa ilang mga inahan, ug ang impluwensya sa inahan sa mga anak mao ang labing molungtad nga impresyon nga mahimo. Walay butang nga makadaut sama sa impluwensya sa inahan; kana kon siya maayo ug adunay espiritu sa Ebanghelyo diha sa iyang kasingkasing, ug iyang napadako ang iyang mga anak diha sa dalan nga kinahanglan nilang adtoan.⁷

Ang atong mga inahan, ug ang mga inahan sa atong mga anak, kansang mga kasingkasing napuno sa tinguha alang sa kaayohan sa ilang mga anak, nga natugyan ngadto kanila ang gasa sa Balaang Espiritu, pinaagi sa pagpandong sa mga kamot, makaadto sa ilang tago nga mga lawak ug moyukbo sa atubangan sa Dios ug makigsulti Kaniya ingon nga walay laing mga inahan sa yuta ang makahimo, kon sila motuman lamang sa mga baruganan nga ilang gihangup ug magpuyo nga takus sa mga pribilehiyo. Pinaagi sa impluwensya nga sa ingon ilang mabatunan diha sa mga kasingkasing sa ilang mga anak sila mogiya kanila diha sa dalan sa pagkamatarung ug kamatuoran, ug momatuto kanila diha sa pag-amuma ug pagpahimatngon sa Ginoo, diha sa paghigugma sa kamatuoran, diha sa pagkamasulundon sa Iyang mga sugo, sa ingon nga paagi ingon nga ang uban dili makahimo kinsa wala niini nga mga pribilehiyo, mga panalangin ug mga pagtuga, nga hilabihan ka gawasnon nga gitugyan diha sa mga inahan sa Israel.⁸

Walay mahimong tinud-anay nga kalipay nga bulag ug layo gikan sa panimalay, ug ang matag paningkamot nga gihimo aron sa pagbalaan ug pagpreserbar sa impluwensya niini makabayaw niadtong kinsa naghago ug nagsakripisyo alang sa pagtukod niini. Ang kalalakin-an ug kababayen-an sagad magtinguha sa paghulip og laing kinabuhi alang niana nga panimalay; ilang patuhoon ang ilang kaugalingon nga ang panimalay nagpasabut og pagdili; nga ang kinatas-ang kagawasan mao ang hingpit nga kahigayunan nga makalihok sa kaugalingong kabubut-on. Walay kalipay kon walay pagserbisyo, ug walay serbisyo nga labing mahinungdanon kaysa nianang unsay makausab sa panimalay ngadto sa usa ka balaanong institusyon, ug mag-awhag ug magpreserbar sa kinabuhi sa pamilya.

… Ang pinakalig-on nga mga pagbati kabahin sa pagkabata mao kadtong adunay kalabutan sa panimalay, ug ang labing gihambin nga mga handumanan sa tigulang nga pangidaron mao kadtong makapahinumdom sa mga panag-uban sa pagkabatanon ug sa malipayon niining mga palibut.⁹

Diha sa panimalay ang inahan mao ang nag-unang tigdisiplina sa sayo nga kinabuhi sa bata, ug ang iyang impluwensya ug disiplina motino sa hilabihan sa abilidad sa iyang mga anak sa pag-asumir diha sa pagkahingkod nga lalaki ug pagkahingkod nga babaye sa mas dako nga mga panggobyerno sa simbahan ug sa estado.¹⁰

Ako sa hilabihan kinasingkasing nga naglaum nga ang mga inahan sa Israel manalipod sa tinud-anay ug mabinantayon gayud sa mga kinabuhi sa ilang mga anak nga babaye ug sa ilang mga anak nga lalaki. Ako mohimo kon anaa kini sa akong gahum sa pagbuhat niini nga posible alang sa tanang mga inahan nga makabaton sa hingpit nga kalipay ug sa dili mapamulong nga katagbawan sa pagpadako sa ilang mga anak nga lalaki ug sa ilang mga anak nga babaye nga dili masawayan sa mga tawo ug dili mabuntog sa sala.¹¹

Ang gugma sa usa ka tinuod nga inahan mas hapit mahisama sa gugma sa Dios.

Walay gugma sa tibuok kalibutan ang makatugbang sa gugma sa usa ka tinuod nga inahan.… Usahay akong gibati, sa unsa nga paagi gani nga ang Amahan nahigugma sa iyang mga anak labaw pa sa paghigugma sa akong inahan sa iyang mga anak? Kinabuhi kadto ngari kanako; kalig-on kadto; pag-awhag kadto; gugma kadto nga nagbunga og gugma o pagkagusto sa akong kaugalingon. Ako nasayud nga siya nahigugma kanako sa tibuok niyang kasingkasing. Siya nahigugma sa iyang mga anak sa tibuok niyang kalag. Siya maghago ug magtrabaho ug magsakripisyo sa iyang kaugalingon sa adlaw ug gabii, alang sa temporal nga mga kahupayan ug mga panalangin nga diyutay ra niya nga mahatag, pinaagi sa mga resulta sa iyang kaugalingong mga paningkamot, ngadto sa iyang mga anak. Walay pagsakripisyo sa kaugalingon—sa iyang kaugalingong oras, sa iyang kahamugaway o kalingawan, o mga oportunidad alang sa pagpahulay—nga gihunahuna sa makadiyot, kon itandi sa iyang katungdanan ug sa iyang gugma ngadto sa iyang mga anak.

Sa dihang kinse anyos pa ang akong pangidaron, ug gitawag sa pag-adto sa langyaw nga nasud aron sa pagsangyaw sa ebanghelyo—o sa pagkat-on kon unsaon, ug sa pagkat-on niini sa akong kaugalingon—ang pinakalig-on nga suporta nga tinukod diha sa akong kinabuhi, ug mitabang sa pagkupot sa akong ambisyon ug sa akong tinguha nga makanunayon, nga nagpabilin kanako nga kalma ug walay pagpalingpaling ug nagpabilin kanako nga matarung, mao kanang gugma nga akong nahibaloan nga siya anaa alang kanako kinsa mihimugso kanako nganhi sa kalibutan.

Ang usa lamang ka gamay nga bata, nga dili gayud hingkod sa paghukom, nga walay bintaha sa edukasyon, gilabay diha taliwala sa pinakadako nga mga pagpangdani ug mga pagtintal nga kadto posible alang sa bisan kinsa nga batang lalaki o bisan kinsa nga tawo nga mosagubang—ug sa gihapon, sa higayon nga kini nga mga pagtintal nahimong pinakamadanihon ug hilabihan nga makatintal ngari kanako, ang unang hunahuna nga moabut sa akong kalag mao kini: Hinumdumi ang gugma sa imong inahan. Hinumdumi kon giunsa niya pagpaningkamot alang sa imong kaayohan. Hinumdumi kon unsa siya ka andam sa pagsakripisyo sa iyang kinabuhi alang sa imong kaayohan. Hinumdumi kon unsay iyang gitudlo kanimo sa imong pagkabata.… Kini nga pagbati ngadto sa akong inahan nahimong usa ka panalipod, usa ka babag tali kanako ug sa tintasyon, mao nga ako makalikay gikan sa tintasyon ug sala pinaagi sa tabang sa Ginoo ug sa gugma nga anaa sa akong kalag, ngadto kaniya kinsa ako nasayud nga nahigugma kanako labaw pa kay ni bisan kinsa pa sa tibuok kalibutan, ug labaw pa kay ni bisan kinsa nga laing buhi nga nilalang nga maghigugma kanako.

… Ang tinuod nga inahan, ang inahan kinsa adunay kahadlok sa Dios ug sa gugma sa kamatuoran diha sa iyang kalag, dili gayud motago gikan sa kakuyaw o dautan ug mobiya sa iyang anak aron mapabantang niini. Apan ingon ka natural sama sa aligato nga sa itaas mopaingon, sama ka natural sa paghuyop sa gininhawa sa kinabuhi, kon adunay kakuyaw nga padulong sa iyang anak, mopataliwala siya tali sa bata ug niana nga kakuyaw; manalipod siya sa iyang anak sa hilabihan gayud. Ang iyang kinabuhi mahimong wala kon timbangon sa timbangan, kon itandi sa kinabuhi sa iyang anak. Mao kana ang gugma sa tinuod nga pagkainahan alang sa mga anak.…

Nakakat-on ako sa pagbutang og taas nga pagtamud ngadto sa gugma sa inahan. Kanunay ako nga moingon, ug mobalik niini, nga ang gugma sa usa ka tinuod nga inahan mas hapit na mahisama sa gugma sa Dios kay sa bisan unsa nga laing matang sa gugma.¹²

Tingali ang labing hingpit nga panabut diha sa buhat sa pagayo mao ang inahan kansang malumo ug mabination nga gugma mobarug sa kaugalingon niini sa pagkuha sa kahapdos sa usa ka angay ug dili angay nga silot. Giunsa sa iyang gugma pag-ayo ang matag samad! Pagkadali sa iyang parayeg sa pagpawala sa sakit ug paghupay! Ang ehemplo sa iyang kinabuhi mao ang kaalam nga gitudlo sa gugma.¹³

Walay butang tali kanako ug sa kalangitan nga makabayad alang sa pagbuhat og butang nga makapaguol o makapasakit sa akong inahan. Ngano man? Tungod kay siya nahigugma kanako, balik-balik siyang magpakamatay alang kanako, kon ang ingon posible, aron lamang sa pagluwas kanako. Nganong himoon man nako nga maguol, nganong himoon man nako siya nga mahigawad? Nganong mopili man ako og dalan nga sukwahi sa iyang kaugalingong kinabuhi ug sa mga pagtulun-an sa iyang kinabuhi ngari kanako, kay iya akong gitudloan og dungog, ug hiyas, ug kamatuoran, ug kaligdong ngadto sa gingharian sa Dios, ug siya mitudlo kanako dili lamang pinaagi sa baruganan apan pinaagi sa ehemplo.¹⁴

Dili nako mapahayag ang hingpit nga kalipay nga akong gibati sa paghunahuna kabahin sa paghimamat sa akong amahan, ug sa akong bililhong inahan, kinsa mihimugso kanako taliwala sa pagpanggukod ug kakabus, kinsa mikarga kanako sa iyang mga bukton ug mapailubon, mainantuson, malumo ug matinuoron atol sa tanan nakong makalolooy nga mga gutlo sa kalibutan. Ang paghunahuna sa paghimamat kaniya, kinsa man ang makapahayag sa hingpit nga kalipay?¹⁵

Ang Dios mopanalangin sa mga inahan sa Zion.

Ang Dios mopanalangin sa mga inahan sa Zion, ug sa mga anak nga lalaki ug mga anak nga babaye sa Israel, ug mopahilayo sa atong mga anak gikan sa mga paagi sa kalibutan, gikan sa paglapas ug gikan sa tintasyon nga mopahisalaag kanila. Unta ang gahum sa Dios maanaa sa tanang kabanayan nga adunay hugot nga pagtuo.¹⁶

Nagtan-aw ako niining mga inahan sa Israel, kinsa natugahan sa gasa sa Espiritu Santo, kinsa natawo pag-usab, … ang mga anak nga babaye sa Israel natawo sa tubig ug sa Espiritu, ug sila natugahan sa gasa sa Espiritu Santo, pinaagi sa pagpandong sa mga kamot niadtong kinsa adunay awtoridad sa pagpadangat niana nga gahum ug niana nga gasa ngadto sa mga anak nga babaye sa Zion, ingon man usab ngadto sa mga anak nga lalaki sa Zion. Ako nagtuo nga ang matag inahan adunay katungod nga …masayud kon unsay angayang buhaton diha sa iyang pamilya ug diha sa dapit sa iyang impluwensya, sa iyang mga anak, diha sa paggiya kanila ug sa pagdumala; ug nga ang inahan ug ang matag inahan nga nakabaton niana nga espiritu adunay gasa sa pagpadayag, ang gasa sa inspirasyon ug ang gasa sa kahibalo, nga mao ang espiritu sa pagpanagna, ang espiritu sa pagkahibalo unsay buhaton, usa ka gasa sa Dios ngadto kanila, sa pagdumala sa ilang mga kabanayan ug sa paggiya sa ilang mga anak diha sa dalan sa pagkamatarung ug kamatuoran.¹⁷

Akong gibati sa akong kasingkasing sa pagpanalangin kaninyo, mga inahan ug mga igsoong babaye, sa tibuok nakong kasingkasing ug sa tanang gahum ug katungod nga akong naangkon diha sa priesthood nga sunod sa kapunongan sa Anak sa Dios.… Ako adunay katungod ug awtoridad diha sa priesthood sa pagpanalangin sa Israel, ug sa pagpanalangin ilabi na niadtong kinsa matinud-anon; ug akong gibati sa akong kasingkasing sa pag-ingon nga ako mopanalangin kaninyo.¹⁸

Mga Sugyot alang sa Pagtuon

Unsa man ang nakapadayeg kaninyo kabahin sa paghulagway ni Presidente Smith sa iyang inahan? Unsa nga mga kinaiya sa pagkamatarung ang inyong nakita nga gipakita isip panigingnan sa mga inahan nga inyong nailhan?
Nganong ang pagkainahan anaa “sa pundasyon sa kalipay diha sa panimalay, ug sa kauswagan sa nasud”? Unsa man ang “sagrado nga mga obligasyon” sa mga kalalakin-an ug mga kababayen-an “nga may kalabutan sa pagka-inahan”?
Sa unsang paagi nga ang atong panabut kabahin sa mahangturong mga pamilya makaimpluwensya sa atong mga aksyon ug mga kinaiya ngadto sa mga inahan ug pagka-inahan?
Sa unsang paagi nga ang usa ka inahan makaimpluwensya sa mga hunahuna ug mga kasingkasing sa iyang mga anak alang sa pagkamatarung? Sa unsang paagi nga kamo napanalanginan pinaagi sa impluwensya sa usa ka inahan sa Zion?
Unsa nga mga hagit ang giatubang sa mga ginikanan karon sa pagpadako sa mga anak “diha sa gugma sa kamatuoran, diha sa pagkamasulundon sa mga sugo [sa Dios]”? Unsaon man sa mga ginikanan pagsagubang niini nga mga hagit?
Unsa nga espirituhanong mga panalangin ang giingon ni Presidente Smith nga katungod sa mga inahan kinsa nakadawat sa gasa sa Espiritu Santo? Unsaon man sa paggamit sa mga inahan kini nga mga gasa aron sa pagtabang sa ilang mga anak nga maglakaw diha sa mga dalan sa pagkamatarung?
Sa unsang paagi nga ang gugma ug mga pagtulun-an sa usa ka inahan mahimong “usa ka panalipod, usa ka babag tali [kanato] ug sa tintasyon”?