Ang Atong Buluhaton Mao ang Pagluwas sa mga Kalag

Ang atong pinakaimportante nga buluhaton mao ang paghago alang sa kaluwasan sa mga buhi ug sa mga patay.

Gikan sa Kinabuhi ni Joseph F. Smith

Sa tibuok niyang kinabuhi, si Joseph F. Smith naghago sa pagalagad sa gingharian sa Dios, “kanunay nga matinguhaon alang sa kalamboan sa buluhaton sa Ginoo.”¹ Sa usa ka espesyal nga komperensya dihang gi-sustain siya nga Presidente sa Simbahan, iyang giawhag ang mga Santos: “Atong katungdanan ang paghupot sa buluhaton uban sa pakigbisog, uban sa hingpit nga determinasyon ug katuyoan sa kasingkasing sa pagpadayon niini, uban sa panabang sa Ginoo, ug subay sa inspirasyon sa Balaang Espiritu, sama sa nahimo sa nangagi.”²

Iyang gidasig ang mga Santos sa nagkadaghan nga mga ward ug mga branch sa tibuok kalibutan sa pag-alagad ug sa pagpanalangin sa uban sa tanang paagi kutob sa ilang mahimo. Samtang nangulo siya sa misyon sa England, si William Fowler, miyembro sa Sheffield, mipresentar sa iyang mga nahimo sa pagpadayon sa buluhaton sa gingharian sa Dios. Si brother Fowler, kinsa nagatubang og daghang pagsulay ug mga kalisdanan sa dihang mipasakop siya sa Simbahan, naghimo og usa ka himno isip pagpahayag sa iyang hugot nga pagtuo sa ebanghelyo ug pagpasalamat sa iyang mga nadawat. Si Presidente Joseph F. Smith didto sa miting dihang gikanta kini sa unang higayon. Ang himno nagsugod sa unsay nahimo na karon nga pamilyar sa mga Santos sa Ulahing mga Adlaw sa tibuok kalibutan: “Salamat, O Dios sa Propeta” (Mga Himno ug mga Awit sa mga Bata, nu. 36).

Si Joseph F. Smith nakadayeg sa nasalmot sa matag matinudanon nga Santos ngadto sa buluhaton sa Ginoo ug nagtinguha sa paggahin sa iyang kaugalingong kinabuhi sa pagpangalagad sa tanang katawhan, sa mga buhi ug sa mga patay. Ganahan siya sa trabaho sa templo, diin siya nag-alagad isip tigrekord sa templo; gidumala niya ang buhat sa templo diha sa Balay sa Endowment; ug sa wala madugay nahimong presidente sa Salt Lake Temple. Ang Genealogical Society sa Utah, namugna pagka 1894, ug milambo ubos sa iyang pagdumala. Ang kinabuhi ni Joseph F. Smith usa ka misyon alang sa kaayohan ug kaluwasan sa tanang katawhan, usa ka misyon nga iyang gipahinungod ngadto sa mga Santos: “Wala nay lain ka talagsaon ug ka mahimayaon sa kalibutan kay sa paghago alang sa kaluwasan sa mga buhi ug sa katubsanan sa mga patay.”³

Mga Pagtulun-an ni Joseph F. Smith

Ania kita sa kalibutan aron paghimo sa buluhaton sa Dios.

Siya nga mipadala sa Bugtong Anak dinhi sa kalibutan aron matuman ang misyon nga iyang gihimo, mipadala usab sa tanang mga kalag kutob sa makadungog sa akong tingog, ug sa pagkatinuod sa matag tawo sa kalibutan, aron pagtuman og usa ka misyon, ug kana nga misyon dili matuman pinaagi sa pagpasagad; o pinaagi sa kawalay pagpakabana; o dili kini matuman pinaagi sa pagkawalay alamag. Kinahanglan nga kat-unan nato ang atong katungdanan; kat-unan ang mga kinahanglanon nga gihimo sa Dios ngari kanato, ug sabton ang mga responsibilidad nga iyang gihatag kanato. Kinahanglan natong kat-unan ang obligasyon nga kita ubos sa Dios ug sa usag usa, ug kita ubos usab sa kawsa sa Zion, nga gipahiuli sa yuta sa ulahing mga adlaw.⁴

Atong hinumduman nga ania kita sa buluhaton sa Dios—ug kon moingon ko og buluhaton sa Dios, buot nakong ipasabut nga kita ania sa buluhaton nga gipadagan sa Labawng Makagagahum dinhi sa kalibutan alang sa atong tagsa-tagsa nga kaluwasan. Ang matag usa kinahanglang maghago alang sa iyang kaugalingong kaayohan ug kutob sa mahimo alang sa kaayohan sa uban. Walay ingon nga butang sa siyensya sa kinabuhi nga ang usa ka tawo naghago alang sa iyang kaugalingon lamang. Wala kita himoa nga mag-inusara sa karon o sa kahangturan. Ang matag indibidwal usa ka yunit diha sa panimalay sa pagtuo, ug ang matag yunit kinahanglan nga mobati sa gidaghanon sa iyang responsibilidad nga magbalhin-balhin ngadto sa tanan. Ang matag-usa kinahanglang magkugi sa pagbuhat sa iyang katungdanan. Pinaagi sa paghimo niini, ug sa paghimo sa iyang kaugalingon nga putli ug walay buling sa kalibutan, siya moabag sa uban nga himoong putli kanunay ang ilang kaugalingon ug walay buling.⁵

[Ang ebanghelyo ni Kristo] usa ka buhi, inadlaw nga relihiyon, usa ka inoras nga relihiyon. Nagsugo kini kanato sa pagbuhat og matarung karon, karong orasa, karong semanaha, karong bulana ug karong tuiga; ug padayon sa katuigan, sa pagsunod sa atong relihiyon—nga mao ang rehihiyon ni Jesukristo—sa pagkamatarung, sa kamatuoran, sa kalooy, sa gugma, pagpasaylo, kamabination, paghiusa ug kalinaw sa yuta ug sa maayong kabubut-on sa tawo ug sa tibuok kalibutan. Mao kini ang atong misyon.⁶

Aduna kitay mahimayaon nga padulngan sa unahan; kita labut niining mahimayaon nga buhat. Igo nga bayad ang tibuok natong atensyon, igong bayad ang atong kinabuhi ug tanang gihatag sa Ginoo kanato, ug dayon pilo-piloon sa kapin pa sa liboan ka mga higayon. Sa pagkatinuod, walay ikatandi, kini ang tanantanan gayud, dili matandi. Tanan gayud nga anaa niini ug tanan sukad ug sa umaabut. Ang ebanghelyo mao ang kaluwasan, ug kon wala kini walay pulos ang pagkaaduna niini.⁷

Ang matag usa kanato responsable sa paghimo kutob sa mahimo sa pag-angkon og kaluwasan.

Lihukon nato ang atong kaluwasan diha sa kahadlok ug pagpangurog atubangan sa atong Amahan, ug magmatinud-anon hangtud sa katapusan. Hinumdumi nga apil ka niini nga buluhaton niining panahona ug sa kahangturan. Walay pagsibug niini, walay pagpalayo niini, gawas kon makasala, ug diha moabut ang silot sa kalapasan. Apan kon naglaum ka nga mahimaya; kon naglaum ka sa mga amahan ug mga inahan, mga igsoon, kaliwatan ug kahigalaan, kon naglaum ka og himaya, salabutan ug walay katapusang kinabuhi, kinahanglang makuha nimo kini pinaagi sa buluhaton sa Dios; kay dili nimo kini makuha bisan asa nga dapit sa gawas. Busa, tuguti nga ang matag simpatiya ug interes mahimong sentro niini nga katuyoan. Tuguti nga ang tanan nimong paghigugma magamit niini nga katuyoan, ug niini lamang. Palabya ang kalibutanong mga butang.⁸

Ang ebanghelyo ni Jesukristo mao ang gahum sa Dios ngadto sa kaluwasan, ug kinahanglanon gayud sa matag lalaki ug babaye sa Simbahan ni Kristo nga molihok sa pagkamatarung, sa pagsunod sa mga balaod sa Dios, ug sa pagtuman sa mga kasugoan nga gihatag, aron maangkon nila sa ilang kaugalingon ang gahum sa Dios ngadto sa kaluwasan niining kinabuhia.⁹

Kita nagtuo nga kinahanglan ang mga tawo niini nga panahon mosunod ug mobuhat ug moduol sa Dios nga Amahan ug sa Anak, ug kinahanglan silang makaila kanila, nga ang pagkaila kanila mao ang kinabuhi nga dayon. Kita nagtuo nga aron makaila kanila ug maduol kanila gikinahanglan nga niini nga panahon magpuyo kita sama sa pagpuyo sa mga Santos sa karaang mga panahon, aron atong matagamtam ang samang mga panalangin nga ilang natagamtam, ug Iyang matudloan sa matag-adlaw, pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto, hangtud atong makab-ot ang kahibalo sa Amahan ug makaila Kaniya sa atong mga kaugalingon. Imposible kanako nga makahibalo alang kanimo, o ni bisan kinsa nga makahibalo alang kanako. Ang Espiritu sa Dios dili mopadayag nganha kanimo sa Ebanghelyo, o mopamatuod kanimo sa Amahan, alang kanako. Dili ako makaluwas kanimo, ikaw dili makaluwas kanako. Walay tawo ang mahimong manluluwas sa ingon niini nga paagi ngadto sa laing tawo. Hinoon ang tawo nga adunay pagpamatuod sa Espiritu diha sa iyang kasingkasing ug kinsa adunay kahibalo sa nag-unang mga baruganan sa Ebanghelyo mahimong mopahayag niini ngadto sa uban, ug pinaagi sa paghatag niini ngadto sa uban makakumbinsir kanila sa kamatuoran ug magiyahan sa pag-angkon niini sa iyang kaugalingon. Apan ang iyang kamasulundon sa Ebanghelyo ug ang iyang maayong mga binuhatan sa kamatarung ang makaluwas kaniya, ug dili ang binuhatan sa tawo nga mipamatuod ngadto kaniya. Sa ingon lamang niini nga pamaagi ang tawo maluwas.¹⁰

Dili lamang ikaw kutob sa pagtuo, apan kinahanglan ka nga motuman ug mobuhat sa mga butang nga gimando [sa Dios]. Dili kay igo lamang nimo kana nga buhaton, apan kinahanglang ibutang nimo ang imong kasingkasing, imong pagbati ug tibuok nimong kalag uban ang matinguhaon nga hunahuna sa Dios. Kinahanglang itugyan nimo ang imong kabubut-on ngadto sa kabubut- on sa Amahan, ug kinahanglan ka nga mobuhat sa tanang butang nga iyang gipahimo kanimo, kon gusto kang maluwas ug mahimaya sa Iyang presensya.¹¹

Kinahanglan kita nga maghago sa pagluwas sa atong kaugalingon.

O! Dios ayaw itugot nga mawala ang akong kaugalingon. Dili ako makatugot nga mawala ang anaa kanako, nga gihatag kanako sa Dios ug kadtong kinsa ako ang responsable atubangan sa Ginoo, ug ang mga nagsalig kanako alang sa giya, sa panudlo, alang sa tukmang impluwensya. Amahan, ayaw itugot nga mawala ang akong interes sa kaugalingon, sa paningkamot nga makaluwas sa uban. Ang gugmang putli magsugod sa panimalay. Ang kinabuhing walay katapusan magsugod gayud sa panimalay. Kalain kaha sa akong bation nga makakita, nga sa umaabut tungod kay nataligam-an nako ang akong panimalay, samtang naningkamot sa pagluwas sa uban, nawala na hinoon kanako ang akong kaugalingon. Dili ko gusto niana. Ang Ginoo mitabang kanako aron luwason nako ang akong kaugalingon, maingon nga ang usa makatabang sa lain. Akong nakita nga dili ako makaluwas ni bisan kinsa, apan makatudlo ako kanila unsaon nga mahimong luwas. Makapakita ako og ehemplo sa akong mga anak unsaon nga sila mahimong luwas, ug kana ang una nakong katungdanan. Dako ko kanang utang kanila kay sa uban pa sa kalibutan. Dayon, kon matuman ko na kana nga buluhaton sa kaugalingon nakong pamilya, itugot nga akong mapalugway ang akong gahum alang sa kaayohan sa uban kutob sa akong mahimo.¹²

Ang atong misyon dinhi sa kalibutan mao ang pagbuhat og kaayohan, sa pagbutang sa pagkadautan ubos sa atong mga tiilan, sa pagbayaw sa pagkamatarung, kaputli, ug kabalaan diha sa mga kasingkasing sa mga katawhan, ug sa pag-establisar diha sa mga hunahuna sa atong mga anak, labaw sa tanang mga butang, og usa ka gugma alang sa Dios ug sa iyang pulong, nga unta maanaa kanila isip tuburan sa kahayag, kusog, pagtuo ug gahum, nga mogiya kanila gikan sa pagkabata hangtud sa pagkatigulang, ug paghimo kanila nga lig-ong magtutuo sa pulong sa Ginoo, sa napahiuli nga ebanghelyo sa Priesthood, ug sa katukuran sa Zion, nga dili na gayud mawala pa o ihatag ngadto sa uban. Kon duna may lain pang butang nga labaw pa nakong gitinguha niining kalibutana, kini mao nga ang akong mga anak unta malig-on pinaagi niini nga kahibalo ug hugot nga pagtuo, aron pinaagi niini dili na sila mapukling.¹³

Ang usa ka kalag nga maluwas dinhi sa kalibutan sama ra ka bililhon sa panan-aw sa Dios sa usa ka kalag nga naluwas diha sa panimalay. Apan kinahanglan kitang mobuhat sa matarung diha sa panimalay, sa kaugalingon natong mga pultahan; dili kini igo alang kanato sa dili pagtagad sa mga buluhaton nga angay himoon sa kaugalingon natong mga pamilya, ug unya mogawas kita sa kalibutan aron pagbuhat sa mga buluhaton nga wala na kinahanglana. Buhaton nato ang atong mga katungdanan bisan asa.¹⁴

Kinahanglan kitang maghago alang sa kaluwasan sa mga buhi ug sa mga patay.

Atong paluyohan si Kristo, ang iyang katawhan, ug ang iyang katuyoan sa pagkamatarung ug katubsanan; atong paluyohan ang matag usa sa katarung, ug mabination natong pahimangnoan ang uban sa sayop nga mga binuhatan, nga kita unta mahimong mga higala ug manluluwas sa Bukid sa Zion, sa usag usa, ug unta kita makatabang sa mga huyang ug molig-on kanila, modasig sa mga maduhaduhaon ug hatagan sa kahayag ang husto nila nga panabut kutob sa mahimo, nga kita unta mahimong instrumento sa mga kamot sa Dios nga mahimong manluluwas sa katawhan. Wala magpasabut nga aduna kitay gahum sa pagluwas sa mga katawhan. Wala gayud; apan aduna kitay gahum sa pagpakita kanila kon unsaon nila sa pag-angkon og kaluwasan pinaagi sa pagkamasulundon sa mga balaod sa Dios. Atong ikapakita kanila kon unsay buhaton aron maluwas, kay kita adunay katungod sa paghimo niini, aduna kitay kahibalo ug panabot kon unsaon kini sa paghimo, ug atong kahigayunan ang pagtudlo niini … pinaagi sa ehemplo ingon man pinaagi sa pagtulun-an nganha sa atong mga kaubanan bisan asa man kitang dapit sa kalibutan.¹⁵

Ang atong misyon mao ang pagluwas sa katawhan. Atong gihagoan … ang pagdala sa katawhan ngadto sa kahibalo sa ebanghelyo ni Jesukristo, pagdala kanila ngadto sa paghinulsol, sa pagkamasulundon sa gimando diha sa balaod sa Dios. Naningkamot kita sa pagluwas sa mga katawhan gikan sa kasaypanan, sa pag-awhag kanila nga mopalayo sa dautan ug kat-unan ang paghimo og maayo.¹⁶

Atong misyon ang pagluwas, nga malikay sa dautan, paghimaya sa katawhan, sa pagdala sa kahayag ug kamatuoran dinhi sa kalibutan, nga magpatigbabaw diha sa mga katawhan ang pagpuyo nga matarung atubangan sa Dios, ug motahud kaniya diha sa ilang mga kinabuhi.¹⁷

Ang pagsulay [test] … sa katalagsaon sa atong kalag mao ang … panginahanglan sa atong abilidad sa paghupay ug pagdasig, sa atong abilidad sa pagtabang sa uban, kay sa atong abilidad sa pagtabang sa atong kaugalingon ug pasagdan ang uban nga magkalisud sa ilang kinabuhi.¹⁸

Kinahanglan nga kanunay kitang may tumong sa pagtabang [sa uban] ngadto sa kadaugan—dili sa paglupig kanila! Atong tumong ang kinabuhing dayon—atong tuyo ang pagbayaw sa isigkatawo— dili ang pagnudnod kanila.¹⁹

Atong buluhaton ang pagluwas sa kalibutan, sa pagluwas sa katawhan; paghimo kanilang mahiuyon sa mga balaod sa Dios ug sa mga baruganan sa pagkamatarung ug sa hustisya ug sa kamatuoran, nga sila unta maluwas sa gingharian sa Dios, ug mahimo, sa kadugayan, pinaagi sa kamasulundon sa mga ordinansa sa ebanghelyo, nga mga manununod sa Dios ug isig ka manununod ni Jesukristo. Kana mao ang atong misyon.²⁰

Dili nato mahuman ang atong buluhaton hangtud maluwas nato ang atong kaugalingon, ug dayon hangtud atong maluwas ang tanan nga nagkinahanglan kanato; kay kita mamahimo nga mga manluluwas sa Bukid sa Zion, sama kang Kristo. Gitawag kita alang niini nga misyon. Ang mga patay dili mahingpit kon wala kita, ni kita kon wala sila. Ania kanato ang usa ka misyon nga angay ipahigayon alang kanila ug sa ilang ngalan; may tino kita nga buluhaton nga angay buhaton aron sa paghimong gawasnon kanila nga, tungod sa ilang pagkawalay alamag ug sa mga kahimtang nga dili pabor kanila samtang nagpuyo sila dinhi, sila dili andam alang sa kinabuhing dayon; kita ang moabli sa pultahan alang kanila, pinaagi sa pagpahigayon sa mga ordinansa nga dili na nila mahimo sa kaugalingon, ug butang nga mga mahinungdanon aron sila makagawas gikan sa “bilanggoan sa espiritu” aron sila moadto ug mopuyo sumala sa Dios diha sa espiritu, ug mahukman diha sa lawas ingon sa mga tawo diha sa unod.²¹

Ang buluhaton alang sa atong mga patay, nga gisangon ni Propeta Joseph diri kanato nga may labaw pa sa usa ka ordinaryo nga sugo, nga nagsugo kanato nga kinahanglan kitang mangita sa atong katigulangan ug sa atong mga kaliwatan kinsa nangamatay nga walay kahibalo sa ebanghelyo, kinahanglang dili mataligam-an. Kinahanglang makasalmot kita nianang sagrado ug gamhanang mga ordinansa sa ebanghelyo nga gipadayag nga mahinungdanon alang sa kalipay, kaluwasan ug katubsanan alang niadtong nakapuyo na dinhi sa kalibutan nga wala makakat-on sa ebanghelyo ug nangamatay nga walay kahibalo niini, ug karon naghulat kanato, nga ilang mga anak, kinsa nakapuyo niining panahon diin ang ordinansa mahimong ipahigayon, sa pagbuhat sa buluhaton nga ilang gikinahanglan aron makagawas gikan sa gibilanggoan kanila. Pinaagi sa atong mga paningkamot alang kanila ang kadena nga migapos kanila matangtang, ug ang kangitngit nga naglibut kanila mahanaw, kana nga kahayag modan- ag kanila ug ilang madungog didto sa kalibutan sa espiritu nga ang buluhaton nabuhat na alang kanila pinaagi sa ilang mga anak dinhi, ug maglipay uban kaninyo tungod sa inyong pagpahigayon niining mga katungdanan.²²

Walay panahon sukad, wala nay lain pang panahon nga moabut alang sa mga naghupot sa Priesthood sa Simbahan ni Jesukristo sa mga Santos sa Ulahing mga Adlaw, diin ang mga tawo makaingon sa ilang kaugalingon nga igo na ang ilang nahimo. Hangtud asa kutob ang kinabuhi, ug hangtud nga anaa pa kanato ang kasarang sa paghimo og maayo, sa paghago alang sa katukuran sa Zion, ug alang sa kaayohan sa tawhanong pamilya, kinahanglan kita, uban sa tinguha, walay langan nga mobuhat sa mga kinahanglanon alang sa atong katungdanan, gamay man o dako.²³

Mga Sugyot alang sa Pagtuon

Nganong importante man nga masayud nga ang matag tawo gipadala sa kalibutan “aron makatuman og usa ka misyon”? Nganong imposible man kanato nga makatuman sa atong misyon pinaagi sa “paghago alang lamang” sa atong kaugalingon?
Unsaon man nato sa paghimo sa buluhaton sa Dios nga maato usab nga buluhaton? Ngano nga ang buluhaton sa Ginoo nagkantidad man sa “tibuok natong atensyon”? Sa unsang paagi nga ang atong pagpili makita sa atong pagpasalig sa buluhaton sa Ginoo?
Unsay angay natong buhaton nga molabaw pa kay sa pagtuo ug sa pagsunod aron “maluwas ug mahimaya sa presensya sa [Dios]”? Unsay gipasabut alang kaninyo sa paghatag sa “imong kasingkasing, imong pagbati ug tibuok nimong kalag uban ang matinguhaong hunahuna sa Dios”? Human sa tanan natong paningkamot, unsaon man nato sa pagkadawat og kaluwasan? (Tan-awa usab sa 2 Nephi 25:23.)
Unsang mga butanga ang kinahanglan natong pangitaon aron isilsil diha sa hunahuna sa mga sakop sa atong pamilya “labaw pa kay sa ubang butang”?
Sa unsang paagi nato mapaningkamutan ang pagluwas sa atong kaugalingon ug sa gihapon makatuman sa uban pa natong mga responsibilidad sa pagserbisyo sa uban? Sa unsang paagi nga ang atong pagserbisyo sa uban diha sa Simbahan ug bisan asa mahimo nga panalangin sa atong pamilya?
Unsay atong buhaton “aron makabayaw sa isigkatawo”? Unsay atong mahimo sa pagtabang sa uban nga magmatinud-anon sa mga balaod sa Dios?
Unsay atong mahimo aron matangtang ang “mga kadena nga migapos” sa mga nangamatay nga wala mahibalo sa ebanghelyo? Unsay inyong bation kon masayud nga ang mga tawo nga inyong gitabangan “nagmaya uban kaninyo tungod sa inyong pagpahigayon niining mga katungdanan”?
Ngano nga ang “pagsulay [test] … sa katalagsaon sa atong kalag” anaa diha sa “atong abilidad sa pagtabang sa uban”? Sa inyong hunahuna nganong ingon man kaha niini? Giunsa ug kanus-a kamo nakahimo og mga sakripisyo alang sa kaayohan sa uban? Unsay inyong gibati sa paghimo niini?