Paglig-on sa mga Pamilya pinaagi sa mga Family Home Evening

Ang mga family home evening naglig-on sa gugma sulod sa pamilya ug sa hugot nga pagtuo diha sa kasingkasing sa matag miyembro sa pamilya.

Gikan sa Kinabuhi ni Joseph F. Smith

Alang kang Presidente Joseph F. Smith, ang iyang pamilya bililhon, sa pagkatinuod walay katugbang nga bili. Kanunay siya nga nagsulti ug gamhanan nga mosulti sa “balaanong gi-orden nga panimalay” ug miingon nga “ang pinakatukuran sa gingharian sa Dios, sa pagkamatarung, sa kauswagan, sa kalamboan” gitukod diha sa panimalay.¹

Niadtong 1915 si Presidente Smith ug ang iyang mga Magtatambag mipsiugda og senemana nga programa sa home evening ngadto sa Simbahan, nag-awhag sa mga ginikanan sa paggamit sa panahon sa pagtudlo sa ilang mga anak sa pulong sa Dios. Sa kaulahian, sa diha nga gihulagway ang programa sa home evening, si Presidente Smith miawhag sa mga pamilya sa “paggahin og usa ka oras o labaw pa nga magpundok sa usa ka mahalaron nga paagi— sa pagkanta og mga himno, mga awit, pag-ampo, pagbasa sa mga Kasulatan ug ubang maayong mga libro, instrumental nga musika, mga hilisgutan sa pamilya, ug piho nga mga panudlo sa mga baruganan sa Ebanghelyo, ug sa pamatasan nga problema sa kinabuhi, ingon man usab sa mga katungdanan ug mga obligasyon sa mga anak ngadto sa mga ginikanan, sa panimalay, sa Simbahan, sa katilingban ug sa nasud.”²

Kini nga programa sa home evening mirepresentar sa mainiton nga pagtuo ni Presidente Smith nga ang usa ka “mahinung danon ug importante nga katungdanan nga gitugyan diha niini nga mga tawo mao ang pagtudlo sa ilang mga anak, sukad sa ilang pagkatawo hangtud nga mahimo na sila nga hingkod nga mga lalaki ug mga babaye, matag baruganan sa ebanghelyo, ug paningkamot, hangtud nga anaa pa kini diha sa gahum sa mga ginikanan, sa pagsilsil sulod sa ilang mga kasingkasing ang gugma alang sa Dios, sa kamatuoran, hiyas, kamatinuoron, dungog ug kaligdong ngadto sa tanang butang nga maayo.”³

Niadtong 1917 si Presidente Smith misulti ngadto sa mga Santos nga ang mga home evening “gihimo sa daghang mga pamilya, ug hilabihan ka makapadani ug mapuslanon nga mga gabii [ang] gigahin.”4 Karon, ang Simbahan nagpadayon sa pagpasabut og maayo sa daghang mahinungdanon nga mga latid sa orihinal nga programa nga gipasiugdahan ni Presidente Smith.⁴

Mga Pagtulun-an ni Joseph F. Smith

Tudloi ang inyong pamilya sa paghigugma sa Dios ug sa mga baruganan sa ebanghelyo.

Ang pinakatukuran sa gingharian sa Dios, sa pagkamatarung, sa kauswagan, sa pagpalambo, sa kinabuhing dayon ug mahangturon nga pag-uswag diha sa gingharian sa Dios, gipahimutang sa balaanong giorden nga panimalay.⁵

Ang kasagarang “Mormon” nga panimalay mao ang templo sa pamilya, diin ang mga miyembro sa panimalay magpundok mabuntag ug magabii, alang sa pag-ampo ug pagdayeg sa Dios, nga gihalad diha sa pangalan ni Jesukristo…. Dinhi gitudlo ug malumo nga gipasunod, ang moral nga mga lagda ug relihiyoso nga mga kamatuoran, diin, kon hiusahon,makahimo niana nga pagkamatarung nga mobayaw sa usa ka nasud, mosumpo niana nga kasal-anan nga maoy usa ka pagbadlong sa bisan kinsa nga katawhan.⁶

Tudloi ang inyong mga anak sa gugma sa Dios. Tudloi sila sa paghigugma sa mga baruganan sa Ebanghelyo ni Jesukristo. Tudloi sila sa paghigugma sa ilang isigkatawo, ug ilabina sa paghigugma sa ilang isigka miyembro sa Simbahan, nga matinuoron unta sila sa ilang pagpakigdait uban sa katawhan sa Dios. Tudloi sila sa pagtahud sa priesthood, sa pagtahud sa awtoridad nga gihatag sa Dios diha sa Iyang Simbahan alang sa tukma nga panggobyerno sa Iyang Simbahan. Ang balay sa Dios mao ang balay sa kahusay, ug dili usa ka balay sa kagubot…. Walay balay nga mahimong balay sa kahusay kon dili kini tukma nga nahan-ay ingon nga nahan-ay ang Simbahan ni Jesukristo sa mga Santos sa Ulahing mga adlaw.⁷

Adunay gamay ra kaayong relihiyosong debosyon, gugma ug kahadlok sa Dios, diha sa panimalay; hilabihan ka kalibutanon, pagkahakog, pagkawalay pagpakabana ug kulang sa pagtinahuray diha sa pamilya, o kadaghanan wala gayud kini mahitabo sa gawas. Kon mao, ang panimalay mao ang nagkinahanglan og kausaban…. Tugoti nga ang gugma, ug kalinaw, ug ang Espiritu sa Ginoo, kalooy, gugma nga putli, sakripisyo alang sa uban, mopuno sa inyong mga pamilya. Wagtanga ang sakit nga mga pulong, mga pagkasina, mga kayugot, pagsulti og dautan, malaw-ay nga mga sinultihan ug pasumbingay, panamastamas, ug himoa nga ang Espiritu sa Dios manag- iya sa inyong mga kasingkasing. Tudloi ang inyong mga anak niining mga butanga, sa espiritu ug gahum, gipaluyohan ug giligon pinaagi sa personal nga pagbuhat. Ipakita kanila nga kamo matinguhaon, ug buhata ang unsay inyong gisangyaw. Ayaw patudloi ang inyong mga anak sa mga espisyalista niining mga butanga, kondili tudloi sila pinaagi sa inyong kaugalingong lagda ug ehemplo, pinaagi sa inyong kaugalingong panimalay. Himoa nga espisyalista ang inyong kaugalingon diha sa kamatuoran. Himoa ang atong mga miting, mga eskwelahan ug mga organisasyon, nga mahimong mga abag sa atong mga pagtudlo ug pagbansay diha sa panimalay, imbis nga mao lamang ang atong bugtong o nag-unang mga magtutudlo, mahimo nga mga suplemento sa atong mga pagtudlo ug pagbansay diha sa panimalay.⁸

Sa mga home evening, tudloi ang inyong pamilya sa paglakaw nga matarung sa atubangan sa Ginoo.

Among tambagan ang mga Santos sa Ulahing mga Adlaw nga magbinantayong mosunod sa sugo sa Ginoo nga gihatag diha sa ika-68 nga seksyon sa Doktrina ug mga Pakigsaad (25-28):

“Ug usab, tungod kay ang mga ginikanan adunay mga anak sa Zion, o diha sa bisan diin sa iyang mga stake nga natukod, nga wala magtudlo kanila sa pagsabut sa doktrina sa paghinulsol, hugot nga pagtuo diha ni Kristo ang Anak sa buhi nga Dios, ug sa Bunyag ug sa gasa sa Espiritu Santo pinaagi sa pagpandong sa mga kamot, kon walo na ka tuig ang panuigon, ang sala anaa sa mga ulo sa mga ginikanan;

“Kay kini mao ang balaod ngadto sa mga lumulupyo sa Zion, o diha sa bisan diin sa iyang mga stake nga natukod;

“Ug ang ilang mga anak pagabunyagan alang sa kapasayloan sa ilang mga sala kon moabut sa walo ka tuig ang panuigon, ug makadawat sa pagpandong sa mga kamot.

“Ug sila usab motudlo sa ilang mga anak sa pag-ampo, ug sa paglakaw nga matarung sa atubangan sa Ginoo.”

Ang mga anak sa Zion kinahanglan usab nga labaw pa ka hingpit nga magsunod sa sugo sa Ginoo nga gihatag sa karaang Israel, ug gibalikbalik ngadto sa mga Santos sa Ulahing mga Adlaw: “Tahuron mo ang imong amahan ug ang imong inahan: Aron magahataas ang imong mga adlaw sa yuta nga ginahatag kanimo sa Ginoo nga imong Dios.” [Exodo 20:12.]

Kini nga mga pinadayag hugtanon nga gipasunod sa mga Santos sa Ulahing mga Adlaw, ug gikinahanglan kini sa mga amahan ug mga inahan niini nga Simbahan nga kining mga sugo kinahanglan itudlo ug sundon sa ilang mga panimalay.

Tungod niini among tambagan ug awhagon ang pagsugod og usa ka “Home Evening” sa tibuok Simbahan diin sa maong higayon ang mga amahan ug mga inahan mahimo nga pundukon ang ilang batang mga lalaki ug mga babaye palibut kanila diha sa panimalay ug tudloan sila sa pulong sa Ginoo. Sa ingon mahimong makat-on sila og labaw pa ka hingpit sa mga gikinahanglan ug mga panginahanglanon sa ilang mga pamilya; sa sama nga higayon magsinati sa ilang kaugalingon ug sa ilang mga anak sa labaw pa ka hingpit uban sa mga baruganan sa ebanghelyo ni Jesukristo. Kini nga “Home Evening” kinahanglan nga ihalad sa pag-ampo, pagkanta og mga himno, mga awit, instrumental nga musika, pagbasa sa kasulatan, mga hilisgutan sa pamilya ug piho nga panudlo sa mga baruganan sa ebanghelyo, ug sa pamatasan nga problema sa kinabuhi, ingon man usab sa mga katungdanan ug mga obligasyon sa mga anak ngadto sa mga ginikanan, sa panimalay, sa Simbahan, sa katilingban ug sa nasud. Alang sa mas gagmay nga mga bata angay nga pag-recite, mga awit, mga istorya ug mga dula mahimo nga ipasiugda. Naandan nga pabugnaw [refreshment] sa ingon ka daghan diha sa panimalay mahimo nga idalit.

Ang pagkapormal ug pagpangisog likayan gayud, ug ang tanan sa pamilya moapil sa mga tulumanon.

Kini nga mga panagpundok makahatag og mga kahigayunan alang sa tinagsa nga pagsalig tali sa mga ginikanan ug mga anak, tali sa igsoong mga lalaki ug mga babaye ingon man sa paghatag og kahigayunan alang sa mga pulong sa pagpasidaan, pagtambag ug pahimangno sa mga ginikanan ngadto sa ilang bata nga mga lalaki ug mga babaye. Makahatag kini og kahigayunan alang sa batang mga lalaki ug mga babaye sa pagtahud sa amahan ug inahan, ug sa pagpakita sa ilang pagpasalamat sa mga panalangin sa panimalay aron ang saad sa Ginoo kanila mahimong matinuod ug ang ilang mga kinabuhi mapalungtad ug malipayon….

Kami … naghangyo nga ang tanan nga mga opisyal sa mga organisasyon sa auxiliary sa tibuok Simbahan mosuporta sa kalihokan ug modasig sa batan-ong katawhan sa pagpabilin diha sa panimalay nianang gabhiona ug ihatag ang ilang mga paninguha aron mahimo kini nga makatudlo, mabungahon ug makapaikag.

Kon ang mga Santos mosunod niini nga tambag, isaad namo nga dakong panalangin ang moresulta. Paghigugmaay diha sa panimalay ug pagkamasulundon ngadto sa mga ginikanan modugang. Hugot nga pagtuo mahimo nga mapalambo sa mga kasingkasing sa kabatan-onan sa Israel, ug makabaton sila og gahum sa pagpakigbatok sa dautan nga mga impluwensya ug mga tintasyon nga nagsamok kanila.⁹

Sa tibuok Simbahan ang espiritu sa panaghiusa, debosyon, ug hugot nga pagtuo ang mopasulabi…. Ang pagpasiugda sa kalihokan sa home evening nahimong tabang niini nga direksyon. Ang usa ka gabii sa matag semana … alang sa paglingawlingaw sa pamilya diha sa panimalay, pagpalambo ug pagkalingaw, gidumala sa kahusay ug ubos sa relihiyoso nga espiritu, nagpakita nga malampuson sa gitinguha nga katuyoan, ug mahimo nga sa kinasingkasing irekomendar bisan asa.¹⁰

Kinahanglan nga matinud-anon natong buhaton ang atong mga katungdanan isip mga ginikanan sa Zion.

Atong mabasa diha sa Basahon sa Doktrina ug mga Pakigsaad nga gikinahanglan sa mga ginikanan ang pagtudlo sa ilang mga anak “sa pagsabut sa doktrina sa paghinulsol, hugot nga pagtuo diha ni Kristo ang Anak sa buhi nga Dios, ug sa bunyag ug sa gasa sa Espiritu Santo pinaagi sa pagpandong sa mga kamot, kon walo na ka tuig ang panuigon.” “Ug sila usab motudlo sa ilang mga anak sa pag-ampo, ug sa paglakaw nga matarung sa atubangan sa Ginoo.” Ug kon ang mga ginikanan mapakyas sa pagbuhat niini, ug ang mga anak mahisalaag ug mobiya sa kamatuoran, dayon ang Ginoo moingon nga ang sala anaa diha sa mga ulo sa mga ginikanan [D&P 68:25, 28]….

Kinahanglan nga buhaton nato ang kinahanglan natong buhaton, ug sigurohon nga matinud-anon natong buhaton ang atong mga katungdanan isip mga ginikanan sa Zion. Ang mga asawa kinahanglan nga makighiusa sa ilang mga bana, ug ang mga bana sa ilang mga asawa, sa paggamit sa ilang impluwensya sa ilang mga anak kabahin niini nga tumong…. Ang akong mga anak kinahanglan nga dili ug dili gayud makabiya nga dunay akoang pagtugot. Kon himoon nila ang pagbiya, kinahanglan gayud nga mag-agi sa akong pagsupak, ug sukwahi sa akong ehemplo. Mangamuyo ako sa akong mga anak; manlimbasog ako uban sa tanang gahum nga akong gihuptan nga mahimo silang ingon ka matinuoron ug matinud-anon niini nga Ebanghelyo sama kaposible kini alang kanako; kay kon wala silang tanan sa gingharian sa Dios akong bation nga ang akong panimalay dili hingpit….

Gusto nako nga ang akong mga anak, ug ang tanang mga anak sa Zion, masayud nga walay butang niini nga kalibutan nga hilabihan ka bililhon ngadto kanila maingon sa kahibalo sa Ebanghelyo ingon nga gipahiuli kini dinhi sa yuta niining ulahing mga adlaw pinaagi ni Propeta Joseph Smith. Walay butang nga makapuli sa pagkawala niini. Walay butang dinhi sa yuta nga makatandi uban sa ka halangdon sa kahibalo kabahin ni Jesukristo. Busa, himoa nga ang tanang mga ginikanan sa Zion mag-atiman sa ilang mga anak, ug tudloan sila sa mga baruganan sa Ebanghelyo, ug maningkamot kutob sa mahimo nga buhaton nila ang ilang katungdanan—dili sa walay paghunahuna, tungod lamang kay giawhag sila sa pagbuhat niini, apan panlimbasog sa pagsilsil sa mga kasingkasing sa mga anak sa espiritu sa kamatuoran ug sa malungtaron nga gugma alang sa Ebanghelyo, nga dili lamang sila mobuhat sa ilang katungdanan tungod kay makapahimuot kini sa ilang mga ginikanan kondili makapahimuot usab sa ilang kaugalingon.¹¹

Minahal kong mga kaigsoonan, amumaha ang inyong mga anak; itudlo kanila diha sa ilang pagkabata ang mga baruganan sa kamatuoran; tudloi sila nga magpuyo og putli nga mga kinabuhi, sa pagbaton og hugot nga pagtuo sa Dios, ug sa pagtawag sa Ginoo pinaagi sa hugot nga pagtuo nga sila unta mahimong makabaton og hingpit nga pakigdait uban sa Ginoo ug mamahimong mga manununod sa kaluwasan sa Iyang gingharian.¹²

Mga Sugyot alang sa Pagtuon

Sa unsang mga paagi nga ang “mismong tukuran sa gingharian sa Dios” gitukod diha sa panimalay? Unsay mahinungdanon nga mga baruganan ang kinahanglan nga itudlo diha sa panimalay nga makaserbisyo aron sa paglig-on sa atong katilingban?
Unsaon nato sa pagtudlo ang atong mga anak nga mahigugma sa Dios ug mahigugma sa ubang mga tawo? Unsaon nato pagtudlo kanila nga motahud sa priesthood?
Unsa nga tambag ang gihatag ni Presidente Smith alang sa pagdugang sa relihiyoso nga debosyon ug pagkunhod sa pagkakalibutanon diha sa atong mga panimalay? Giunsa ninyo pagpanlimbasog sa paghimo sa kalibutanon nga mga panghunahuna nga ikaduha diha sa inyong panimalay?
Sa unsang paagi ang mga family home evening makatabang sa mga ginikanan nga matuman ang mga sugo nga gihatag sa Ginoo diha sa Doktrina ug mga Pakigsaad 68:25–28? Sa unsang paagi ang mga family home evening makatabang sa mga anak nga makatuman sa sugo nga gihatag sa Exodo 20:12?
Unsa nga mga buhat ang nakatabang kaninyo sa paghimo og labaw pa ka epektibo nga mga family home evening? Unsay mga lagda ang gihatag ni Presidente Smith alang sa mga family home evening?
Unsa nga mga panalangin ang moabut niadtong nagpahigayon og mga family home evening? Unsay mahimong mga sangputanan sa dili paghimo niini?
Ngano nga kinahanglang dili gayud kita mohunong sa atong mga responsibilidad isip mga ginikanan sa pagdala sa atong mga pamilya ngadto sa kamatuoran? (Tan-awa usab sa 3 Juan 1:4; Mosiah 27:14.)
Nganong kinahanglan nga ang mga bana ug mga asawa “maghiusa … sa paggamit sa ilang impluwensya sa ilang mga anak”? Sa unsang paagi nga ang mga bana ug mga asawa makaugmad niini nga panaghiusa?