Gugma nga Putli diha sa Atong mga Kalag

Ang mahinungdanon nga sugo, ingon sa gitudlo sa atong Ginoo ug Agalon, mao ang paghigugma sa Dios sa tibuok natong kasingkasing, sa tibuok natong salabutan, ug sa tibuok natong kalag; ug ang ikaduha susama ra nga nga mao kini: higugmaa ang imong silingan sama sa imong kaugalingon. “Niining duha ka mga sugo nanukad ang tibuok nga kasugoan ug ang mga propeta.” [Tan-awa sa Mateo 22:37–40.] Busa, atong palamboon ang gugmang putli ug pagpasaylo, gugma ug kalooy, usa ngadto sa usa; ug paghimo kamo og dugang paningkamot alang sa pagtabang niadtong anaa sa kasubo, aron ang tingog sa balo dili mosaka ngadto sa Dios sa pagsumbong batok sa mga tawo tungod sa kakulang sa pagkaon, o sinina, o kapuy-an. Siguroha nga ang ilo dili mahimo nga walay kapuy-an taliwala niini nga mga tawo, ni walay pagkaon o sinina, o higayon nga molambo ang iyang kahibalo. Siguroha nga ang gugmang putli molukop sa tanan ninyo nga mga lihok ug mopuyo diha sa inyong mga kasingkasing, nga magdasig kaninyo sa pag-atiman sa mga kabus ug masakiton, sa paghupay niadtong anaa sa bilanggoan, kon sila nagkinahanglan og paghupay, ug pagtabang niadtong nasakit; kay siya nga mihatag og usa ka baso sa bugnaw nga tubig ngadto sa usa ka propeta makadawat og ganti sa propeta.

Sila nga mibuhat niining mga butanga ngadto sa mga kabus taliwala kanato, kini igasulti ngadto kanila sa umaabut: “kay gigutom ako, ug inyo ako nga gipakaon; giuhaw ako, ug inyo ako nga gipainom. Nadumoloong ako, ug gihangop ninyo ang pagpasaka kanako; hubo ako, ug inyo ako nga gibistihan; nagmasakiton ako, ug inyo ako nga giduaw; nabilanggo ako, ug miadto kamo kanako.” Ug dili na kita moingon nga, “Ginoo, kanus-a ba kami makakita kanimo nga gigutom,” kay ang matag tawo nga adunay salabutan mahimong masayud nga kon siya motabang ngadto sa tinuod nga kabus, kini pagailhon ingon nga gibuhat ngadto Kaniya kinsa ang Amahan sa ilang mga espiritu. [Tan-awa sa Mateo 25:31–45.]³

Ang atong mga anak kinahanglan nga tudloan sa pagtahud dili lamang sa ilang mga amahan ug sa ilang mga inahan, ug sa ilang mga igsoong lalaki ug babaye, apan sila kinahanglan nga tudloan sa pagtahud sa tanang katawhan, ug labi na kinahanglan nga sila pahimangnoan ug tudloan ug padak-on sa pagtahud sa mga tigulang ug sa masakiton, sa makalolooy ug sa kabus, sa nanginahanglan, ug niadtong kinsa wala makadawat sa simpatiya sa katawhan.⁴

Kita sa kanunay maninguha sa paghatag og dyutay ngadto sa kabus, ug dili mobalibad sa usa ka tawo kinsa nangayo og pagkaon. Ako nagtuo nga mao kini ang kinatibuk-an nga panghunahuna ug kinaiya sa mga Santos sa Ulahing mga Adlaw. Sa akong hunahuna ang tanang Mormon maloloy-on og gawi, ug manggihatagon ngadto sa mga kabus ug makalolooy, ug nga walay usa ka Santos sa Ulahing mga Adlaw nga duol kaayo nga makadungog sa akong pagpamulong o bisan asa nga dili mamahin sa anaa kaniya ngadto sa iyang isigka nilalang sa panahon sa panginahanglan….

Ako nakakita og daghang mga tawo nga migawas gikan sa akong pultahan bitbit ang pan ug palaman sa ilang mga kamot (igo-igo ang kalami alang ni bisan kinsa nga hari nga mokaon, kay ang akong pamilya manghimo og lami nga pan ug palaman, ingon ka lami sa akong natilawan dinhi sa yuta) ug kon iniggawas na sa ganghaan ila kining ilabay ngadto sa karsada. Dili pagkaon ang ilang gusto. Ang ilang gusto kwarta. Alang sa unsa? Aron sila tingali makaadto sa sugalanan nga [dapit] o ngadto sa pipila ka dapit nga imnanan. Siyempre sila ang responsable alang niana. Kita makahukom lamang pinaagi sa mga panagway ug pinaagi sa mga pag-aghat sa maayong espiritu sulod kanato; ug mas maayo pa nga mohatag ngadto sa usa ka dosena nga dili angayan kaysa balibaran ang usa ka angayan nga tawo.⁵

Ang gugmang putli, o gugma, mao ang pinakamahinungdanon nga baruganan sa kinabuhi. Kon kita makahatag og tabang ngadto sa dinaugdaog, kon kita makatabang niadtong walay kadasig ug anaa sa kaguol, kon kita makahatag og pagdasig ug paguswag sa kahimtang sa katawhan, kini atong misyon sa pagbuhat niini, kini usa ka mahinungdanon nga bahin sa atong relihiyon ang pagbuhat niini.⁶

Daw sayon ra kaayo alang sa usa ka tawo ang pagsulti nga siya nagtuo sa Dios ug sa maulaong dugo ni Jesukristo, nga siya nagtuo sa paghinulsol sa sala, sa bunyag alang sa kapasayloan sa sala, ug sa pagpandong sa mga kamot alang sa gasa sa Espiritu Santo. Daw sayon alang sa usa ka tawo sa paglambo kutob diha. Apan diha sa paghigugma sa silingan sama sa kaugalingon, dili kaayo kini sayon. Dinhi kita miabut sa lisud katkaton nga bungtod, diin atong masuta nga gikinahanglang gayud pag-ayo nga ang tanang natong gahum aron makaabut sa kinatumyan niini; ug ang pagkatkat sama tingali sa nahitabo kanato sulod sa pipila ka mga tuig sa atong mga kinabuhi, ako mangahas sa pag-ingon nga kita mimata niining buntaga ug nakita ang atong mga kaugalingon nga nagkatkat pa gihapon diha sa tiilan sa bungtod, wala pa gani gayud kita makaaabut sa kinatumyan. Kay sa tinuod pipila lamang sa mga lalaki, o mga babaye, bisan diha sa ang Simbahan ni Jesukristo sa mga Santos sa Ulahing mga Adlaw, ang makahimo sa pagsulti nga matinuoron nga, “Ako nahigugma sa akong silingan sama sa akong paghigugma sa akong kaugalingon.”

Kita sumala sa usa ka lagda wala mahigugma sa atong silingan sama sa atong paghigugma sa atong kaugalingon. [Usa ka tawo] sa makausa miingon, “Sa tanan nga anak sa akong inahan gihigugma nako ang akong kaugalingon labaw sa tanan.” Ingon usab kini diha sa mga anak sa Dios ibabaw niini nga yuta. Bisan og ang atong Amahan adunay daghan kanila, ug kitang tanan usa ka dugo, ug kita mga sakop tingali sa usa ka komunidad, diha sa usa ka relihiyon nga nagtuo sa usa ka Dios ug sa usa ka Ginoo nga si Jesukristo, apan matag usa kanato nahigugma sa iyang kaugalingon labaw sa tanan. Kini nga pagbati makita diha sa atong inadlaw nga kinabuhi, diha sa atong inoras nga pakig-uban sa usag usa. Sa kasagaran kini makita bisan diha tali sa bana ug asawa; sa kasagaran diha tali sa amahan ug mga anak, ug sagad kaayo diha taliwala sa mga anak. Kristiyanismo ba kini? Mao ba kini ang doktrina ni Jesukristo? Dili sumala sa paagi sa akong pagbasa sa mga basahon ug sa pagsabut sa mga baruganan sa kinabuhi ug kaluwasan. Ang mga kasulatan nagsulti kanato nga kinahanglan nga maghigugmaay sa usag usa; nga kita kinahanglan nga motugyan sa atong kaugalingong kahamugaway, atong kaugalingong kaharuhay, atong kaugalingong mga tinguha, o kaugalingong kalipay ngadto sa mga tinguha, kahamugaway ug kalipay sa atong mga silingan;—agig dugang sa atong kaigsoonan ug mga minahal.⁷

Unsaon man nato sa paghigugma sa atong silingan sama sa atong paghigugma sa atong kaugalingon. Kini pinakayano nga butang sa kalibutan; apan daghan kaayong mga tawo nga hakog ug naghunahuna lamang sa ilang kaugalingon ug wala maanad nga maanaa nianang klaseha sa paghigugma ug pagpakabana nga pagbati nga motabang ug motinguha sa benepisyo ug kaayohan sa ilang mga silingan; ug sila mipahiktin sa ilang kaugalingon paubos ngadto sa ilang kaugalingong taras ug pihong kaayohan ug panalangin ug kabulahanan, ug mobati sa pagingon: “Aw, bahala na ang akong silingan sa pag-atiman sa iyang kaugalingon.” Dili kana mao ang diwa nga kinahanglang motimaan sa usa ka Santos sa Ulahing mga Adlaw.⁸

Kon sa atong hunahuna kita nakakita og mga kapakyasan, mga kahuyang o mga kasaypanan, tinuod man kini o hunahuna lang, diha sa atong mga kaigsoonan, imbis nga atong isangyaw ngadto sa kadaghanan ug isulti kini ngadto sa mga higala ug mga silingan, bisan asa nato sila makit-an, kon kita mogamit og igo nga gugmang putli, ug pakighigala, … kita moadto ngadto sa atong mga higala kinsa wala makapahimuot kanato, o atong gituohan nga nagbuhat og mga kasaypanan, ug sultihan sila kon unsa ang atong gibati ug unsa ang atong gihunahuna, ug buhaton kini diha sa diwa sa pagtabang kaniya aron sa pagbuntog sa iyang mga kahuyang, ug sa ingon kita makabuhat og maayo kaayo sa atong kaugalingon, ingon man usab ngadto kanila. Kita dili moadto kanila diha sa diwa sa paghukom nga sad-an ug pagsaway, ug mopasakit sa ilang mga pagbati ug mopuno sa ilang mga kasingkasing og pagdumot.⁹

Ako motambag nga kita magkat-on sa paghigugma sa usag usa, ug dayon ang panaghigala mahimong tinuod ug maanindot. Gikaingon kini sa usa ka tawo, nga “kita mahimong mohatag nga walay paghigugma, apan dili kita mahimong maghigugma nga walay paghatag.” Mao nga kita gusto nga maghigugmaay sa usag usa, ug ingon sa gisulti sa Ginoo ngadto ni Pedro, kita kinahanglan nga mopakaon sa iyang mga karnero [tan-awa sa Juan 21:15–17], mopalig-on sa usag usa. Kita kinahanglan nga mosuporta ug mopaluyo sa usag usa, dili moguba, ni mobira paubos, dili mopuyo diha sa mga kahuyang sa atong mga silingan o atong mga igsoon, o diha sa mga depekto nga atong makita sa katawhan, apan hinoon kon kita makakita og usa ka hiyas ato kining padak-on, ug, kon mahimo, dasigon aron mopalambo og hiyas aron kini mahimong importanteng impluwensya nga mohatag og kahayag ug kinabuhi, kalagsik ug kadasig ngadto sa tanan kinsa makakita niini, ug labi na ngadto niadtong kinsa anaa sa sayop ug kangitngit, nga sila mahimong madala ngadto sa kahayag.¹⁰

Ang akong relihiyon nagtudlo kanako sa paghigugma sa tanang mga tawo. Bisan pa og dako ang akong pagtamay sa ilang mga buhat, o kayugot sa ilang mga kadautan ug sa kangitngit sa ilang hunahuna, apan sila gihimo diha sa hitsura ug panagway sa akong Amahan ug Dios—sila akong mga igsoon. Gikinahanglan nga ako mohigugma sa akong silingan sama sa akong kaugalingon. Ako mahimong wala pa moabut nianang taas nga sumbanan sa kahingpitan; mahimong nagpabilin pa gihapon diha kanako ang kahakog nga mopalabi sa akong kaugalingon labaw sa akong silingan; apan ako nagtinguha sa pagbuhat og matarung ngadto sa akong isigkatawo, tungod kay ang Ebanghelyo nagkinahanglan niini.¹¹

Ang Dios mihimo og linain nga paningkamot niini nga dispensayon aron sa pagpadayag kanato sa kahingpitan sa Ebanghelyo, nga … nagtudlo sa mga tawo niini nga baruganan sa pagsakripisyo sa kaugalingon alang sa kaayohan sa uban, ug nga nagtudlo kanato nga kita mihimo og kaayohan sa atong kaugalingon kon kita mihimo og kaayohan ngadto sa ubang mga tawo…. Daghan kaayo sa kalibutan ang nagapos og maayo sa ilang mga kaugalingon ug dili kaayo manggihatagon sa ilang mga kalag nga dili gani sila andam sa pagpaningkamot alang sa uban apan sa ilang kaugalingon lamang…. Ang katungdanan sa katawhan, ingon sa akong pagsabut niini, ubos sa balaang Ebanghelyo nga atong nadawat, mao ang pagpanalipod sa kainosente, sa hiyas, sa dungog ug sa katungod sa tanang mga lalaki ug mga babaye ingon ka mabinantayon sama sa atong pagpanalipod sa atong kaugalingon.¹²

Ang Dios mihimo og kasangkapan diha sa Iyang Simbahan, diha sa kompleto nga pag-organisar niini, aron ang matag matinud-anon nga kalag niini mabantayan ug maamumahan ug maatiman sa oras sa panginahanglan.¹³

Ang Dios misugo niini nga mga tawo sa paghinumdom sa mga kabus, ug sa paghatag og mga pamaagi alang sa ilang suporta…. Kita wala nagtuo nga ang gugmang putli usa ka negosyo; apan hinoon kita nagsalig sa tabang gikan sa usag usa. Samtang ang mensahe sa ebanghelyo nagkinahanglan og hugot nga pagtuo ug paghinulsol, kini nagkinahanglan usab nga ang temporal nga panginahanglan matubag. Mao nga ang Ginoo mipadayag og mga plano alang sa temporal nga kaluwasan sa mga tawo.

Alang sa kaayohan sa mga kabus kita adunay puasa nga gitukod, usa ka nag-unang katuyoan niini uban sa ubang mga butang mao ang paghatag sa mga kabus og pagkaon ug uban nga panginahanglan hangtud nga sila makahimo sa pagtabang sa ilang kaugalingon. Kay klaro nga ang mga plano nga naghunahuna lamang sa paghupay sa karon nga kalisud dili hingpit. Ang Simbahan sa kanunay nagtinguha sa pagbutang sa mga miyembro niini diha sa paagi sa pagtabang sa ilang kaugalingon, kaysa pagsunod sa paagi sa daghan kaayo nga mga charitable nga institusyon sa paghatag alang lamang sa gikinahanglan karon. Kon ang tabang kuhaon o mahurot na, mas daghan ang kinahanglan nga ihatag gikan sa samang tinubdan, sa ingon niini nakahimo nga makililimos sa mga kabus ug nagtudlo kanila sa sayop nga baruganan sa pagsalig sa tabang sa uban, imbis nga magsalig diha sa ilang kaugalingong paningkamot…. Busa, ang atong ideya sa gugmang putli, mao ang paghupay sa panginahanglan karon ug dayon sa pagpakita sa mga kabus sa pagpangita og paagi aron sa pagtabang sa ilang kaugalingon aron agig bawos sila mahimong motabang sa uban. Ang mga pundo gisalig ngadto sa maalamon nga mga tawo alang sa pag-apud-apod, kasagaran ngadto sa mga bishop sa Simbahan, kansang katungdanan mao ang pag-atiman sa mga kabus.

Kita misumiter sa makiangayon nga adlaw sa puasa nga plano sa Ginoo ngadto sa mga simbahan sa kalibutan isip usa ka maalamon ug han-ay nga paagi sa pagtabang sa mga kabus…. Kini usa lang ka yano nga butang alang sa mga tawo sa pagtuman niini nga kinahanglan sa dili pagkaon ug pag-inom sa usa ka adlaw matag bulan, ug sa paghalad kon unsa unta ang magasto nianang adlawa ngadto sa mga kabus, ug ingon pa ka daghan kutob sa ilang gusto. Ang Ginoo ang mitukod niini nga balaod; kini yano ug hingpit, gibase diha sa rason ug salabutan, ug dili lamang mopakita og usa ka solusyon sa pangutana sa paghatag alang sa mga kabus, apan kini mosangpot og maayo ngadto niadtong kinsa nagsunod sa balaod. Kini … mobutang sa lawas diha sa pagmando sa espiritu, ug sa ingon mopalambo sa panag-abin sa Espiritu Santo, ug sa pagsiguro og espirituhanong kalig-on ug gahum nga gikinahanglan kaayo sa mga tawo sa nasud. Samtang ang pagpuasa kinahanglan nga kanunay nga ubanan sa pagampo, kini nga balaod modala sa mga tawo paduol ngadto sa Dios, sa pagpaliko sa ilang mga hunahuna bisan lamang kausa sa usa ka bulan, gikan sa salimuang nga pagdalidali sa kalibutanong mga kalihokan ug mopahimo kanila nga pagadad-on ngadto sa daling pakig-uban sa praktikal, putli ug wala mabulingi nga relihiyon—sa pagduaw sa mga ilo ug mga babayeng balo, ug sa pagamping sa kaugalingon nga dili mahugawan sa kalibutan [tan-awa sa Santiago 1:27].¹⁴

Kini makita nga ang madawat nga puasa mao kana nga inubanan sa tinuod nga espiritu sa gugma alang sa Dios ug sa tawo; ug nga ang katuyoan sa pagpuasa mao ang pagbaton og hingpit nga kaputli sa kasingkasing ug ang ka yano sa tinguha—ang pagpuasa ngadto sa Dios diha sa hingpit ug halawom nga kahulugan— kay ang ingon niana nga puasa mahimong usa ka tambal sa matag praktikal ug salabutanong sayop; ang papakaaron-ingnon mawala, ang gugma alang sa atong isigkaingon ang mopuli, ug kita malipayon nga motabang sa mga kabus ug nanginahanglan.¹⁵

Kita moawhag, kita mohangyo sa atong mga kaigsoonan diha sa ebanghelyo ni Jesukristo, dili lamang sa pagtahud sa ilang kaugalingon pinaagi sa saktong dalan sa pagpuyo, apan usab sa pagtahud ug paghigugma ug magmanggiloy-on ngadto sa inyong mga silingan, matag usa kaninyo.¹⁶

Sa akong hunahuna kita kinahanglan nga mopuyo sa atong relihiyon. Kita kinahanglan nga mosunod sa mga sugo sa Dios. Kita kinahanglan nga mobaton ug motagamtam sa espiritu sa ebanghelyo diha sa atong mga kasingkasing ug mamunga sa mga bunga sa espiritu diha sa atong mga kinabuhi; hugot nga pagtuo, paglaum ug gugma nga putli, gugma, pagpaubos ug pagpasaylo diha sa atong mga kalag alang sa usag usa, ug sa paglikay, kutob sa mahimo, sa espiritu sa pagpasangil, sa panagbingkil, nga modala ngadto sa panagsumpaki, ngadto sa kalibog ug pagkabahinbahin diha sa mga tawo, ug ang espiritu sa kasilag. O, wagtanga ang kasilag gikan kaninyo. Ang kasilag nga gihambin diha sa atong kasingkasing, o pagkasina o pagpangigi, mopasakit niadtong kinsa mitugot niini nga magpabilin diha sa ilang mga kalag ug ang kaligutgut diha sa ilang mga hunahuna mas labaw pa sa liboan ka pilo kaysa pagpasakit niini ngadto sa uban. Mao nga kinahanglan nga atong wagtangon kadtong mga butanga gikan sa atong mga kasingkasing, ug gikan sa atong mga hunahuna. Kinahanglan nga kita magpuyo og matarung nga mga kinabuhi, himoa nga ang bana mohigugma sa iyang asawa ug magmatinuoron ug magbinuotan ngadto kaniya, ug ang asawa magmatinuoron ug magbinuotan ngadto sa iyang bana, ug sila magmatinuoron ug mahigugmaon ug manggihatagon alang sa kaayohan sa ilang mga anak; himoa nga sila magkahiusa isip usa ka yunit sa pamilya diha sa Simbahan ug samtang kana nga kahimtang moabut sa gawas sa nasud ngadto sa mga utlanan sa Zion, kita makabaton sa milenyal nga paghari taliwala kanato, ug adunay kalinaw sa yuta ug panagdait sa mga tawo bisan asa.¹⁷

Ang Ebanghelyo giisip sa pagtangtang gikan kanato sa tanan nga wala mahiuyon sa Dios ug sa plano sa kaluwasan nga iyang gipadayag ngadto sa mga tawo. Kini gihimo aron sa pagpasarang kanato nga mopuyo aron kita mahimong makatagamtam sa hingpit nga kahayag sa kamatuoran, ug makasabut sa mga katuyoan sa Dios, ug mahimong mopuyo nga ingon ka duol Kaniya nga kita anaa sa kauyonan sa Iyang mga tinguha sa kanunay. Ang mga baruganan sa Ebanghelyo giisip sa paghimo kanato nga dili hakog, sa pagpahimo natong matugtanon, sa pagpalambo sa atong mga tinguha sa pagbuhat og maayo, sa pagkuha sa kasilag, kapungot, kasina ug kasuko gikan sa atong mga kasingkasing, ug mohimo kanato nga malinawon, masinugtanon, matudloan, ug andam sa pagsakripisyo sa atong kaugalingong mga tinguha, ug bisan sa atong kaugalingong mga kaikag, alang sa kaayohan sa atong isigka mga nilalang, ug alang sa kalamboan sa Gingharian sa Dios. Ang usa ka tawo kinsa dili makahimo sa pagsakripisyo sa iyang kaugalingong mga tinguha, kinsa dili makahimo sa pag-ingon diha sa iyang kasingkasing nga, “Amahan, ang Imong pagbuot mao ang matuman, dili ang akoa,” dili usa ka tinuoray ug sa hingpit nakabig nga anak sa Dios; siya sa gihapon, sa laing bahin, anaa sa sayop nga pagsabut ug anaa sa landong sa kangitngit nga nagtabon libut sa kalibutan, nga nagsalipod sa Dios gikan sa presensya sa katawhan.¹⁸