Ɔfã 77
Nyikyerɛ a wɔdze maa Joseph Smith Nkɔnhyɛnyi no, wɔ Hiram, Ohio, bɛyɛ Ebɔw, 1832. Joseph Smith n’abakɔsɛm no kã dɛ, “Ber a merekyerɛ Kyerɛwsɛm no ase no, na menyaa Ɔhotseweenyi John ne Nyikyerɛ no ne nkyerɛkyerɛmu a odzi do yi.”
1–4, Mbowa wɔ esunsum na wɔbɛtsena ase onnyiewiei enyigye mu; 5–7, Asaase yi bɛtsena hɔ mfe tsiabaa, mpemesuon; 8–10, Abɔfo ahorow san dze asɛmpa no ba asaase do na wɔsom; 11, Nyimpa mpem ɔha eduanan-anan hɔn nsɔwano; 12–14, Christ bɛba mfe mpemesuon n’ahyɛse no mu; 15, Nkɔnhyɛfo beenu na wobeyi hɔn ama Jewfo hɔn man no.
1 Asɛmbisa. Ebɛnadze nye ahwehwɛ po no a John kãa ho asɛm wɔ Nyikyerɛ, Tsir 4, nkyekyɛmu 6 no?Mbuae. Ɔno nye asaase no a wɔatsew ho, wɔayɛ bɛkyebo, na ɔwɔ onnyiewiei gyinabew mu.
2 Asɛmbisa. Mbowa anan no a wɔakã ho asɛm wɔ dɛm nkyekyɛmu kor noara mu no yɛtse ase dɛn?Mbuae. Ɔyɛ mfatoho bi a John dze rekyerɛkyerɛ mbrɛ sor tse mu, Nyame ne paradise, nyimpa n’enyigye nye mbowa, nye ndzɛmba a wɔwea, nye wimu ntumbowa; dza ɔyɛ sunsum mu abɔdze no tse dɛ honam mu dze, na dza ɔyɛ honam mu dze no tse dɛ sunsum mu dze: nyimpa no sunsum a ɔtse dɛ nankasa no nyimpadua, dɛmara na abowa no sunsum na adze biara a Nyankopɔn abɔ no so tse.
3 Asɛmbisa. Ana mbowa anan no gyina hɔ ma mbowa ankorankor, anaadɛ wogyina hɔ ma ekuwekuw anaa nhyehyɛɛ bi?Mbuae. Dza woyii kyerɛɛ John no gyina hɔ ma mbowa ankorankor anan, na ogyina hɔ ma nyimpa ekuw horow no mu biara dɛwdzi a wobenya wɔ hɔn onnyiewiei enyigye, dɛ mbrɛ abɔdze ahyehyɛ ato hɔ no.
4 Asɛmbisa. Enyiwa na ntsaban no a mbowa no wɔwɔ no, yɛtse ase dɛn?Mbuae. Hɔn enyiwa no gyina hɔ ma kan na nyimdzee, ɔkyerɛ dɛ nyimdzee ahyɛ hɔn mã; na hɔn ntsaban no so gyina hɔ ma tum a wɔdze bɛkã hɔn ho, wɔdze bedzi dwuma na ne nkekaho.
5 Asɛmbisa. Elderfo eduonu anan no a John kãa ho asɛm no, yɛtse ase dɛn?Mbuae. Ɔwɔ dɛ yɛtse ase dɛ dɛm elderfo no a John hun hɔn no, yɛ elderfo a wodzii nokwar wɔ hɔn somdwumadzi mu a woewuwu; nna wɔyɛ nsɔr esuon no mu mba, na afei wɔwɔ Nyame ne paradise hɔ.
6 Asɛmbisa. Yɛtse nwoma no a John hunii no a wɔdze nsɔwano esuon asɔw n’ekyir no ase dɛn?Mbuae. Ɔwɔ dɛ yɛtse ase dɛ Nyame ne pɛ, n’esumasɛm na no ndwuma a wɔada no edzi no na ɔwɔ mu; dza ɔyɛ esumadze a wɔahyehyɛ a ɔfa asaase yi ho wɔ ne mfe mpem esuon a ɔwɔ mu anaadɛ ne mber tsiabaa a ɔwɔ mu no.
7 Asɛmbisa. Nsɔwano esuon a wɔdze sɔɔw ano no, yɛtse ase dɛn?Mbuae. Ɔwɔ dɛ yɛtse ase dɛ nsɔwano a odzi kan no, mfe apem a odzi kan no mu ndzɛmba na ɔwɔ mu, na dza otsĩa ebien no so mfe apem dze na ɔwɔ mu, na ɔtse dɛmara kesi esuon no.
8 Asɛmbisa. Abɔfo anan no a wɔakã hɔn ho nsɛm wɔ Nyikyerɛ Tsir 7, nkyekyɛmu 1 no, yɛtse ase dɛn?Mbuae. Ɔwɔ dɛ yɛtse ase dɛ wɔyɛ abɔfo anan a Nyankopɔn somaa hɔn, a ɔama hɔn tum wɔ asaase ne mfɛndzanan nyina do dɛ wɔngye nkwa na wɔnsɛɛ adze; woyinom nye hɔn a wɔwɔ asɛmpa a ɔwɔ hɔ daapem no a wɔdze bɛma aman, ebusuakuw, kasa horow, na nyimpa nyina no, na wɔwɔ tum dɛ wɔtow ɔsorsor mu, na wɔsɔw ano dze ma nkwa, anaadɛ wɔtow gu sum kebii bea mu no.
9 Asɛmbisa. Bɔfo no a ofi boka rofow wɔ Nyikyerɛ Tsir 7, nkyekyɛmu 2 no, yɛtse ase dɛn?Mbuae. Ɔwɔ dɛ yɛtse ase dɛ, bɔfo no a ofi boka rofow no nye nyia wɔdze Nyame tseasefo no nsɔwano ama no dɛ ɔmfa nhwɛ Israel ebusuakuw duebien do no; dɛm ntsi, ɔtsẽa mu frɛ abɔfo anan no a wɔwɔ asɛmpa a ɔwɔ hɔ daapem no, se dɛ: Mma hom nnhaw asaase, anaa po, anaa ndua, ma onkodu dɛ yɛbɔsɔw hɛn Nyankopɔn no nkowaa ano wɔ hɔn momapɔw do. Na sɛ hom pɛ dɛ hom gye to mu a, iyi nye Elias no a ɔbɛba abɔboaboa Israel ebusuakuw no ano na ɔasan dze ndzɛmba nyinara aba no.
10 Asɛmbisa. Ebɛn aber na ndzɛmba a wɔakã ho nsɛm wɔ dɛm Tsir yi mu no bɛyɛ hɔ?Mbuae. Ɔbɛyɛ hɔ wɔ mfe mpem a otsia esia no mu, anaadɛ ber a wɔbɛtsew nsɔwano no a otsĩa esia no ano no.
11 Asɛmbisa. Wɔsɔɔw mpem ɔha eduanan anan hɔn ano wɔ Israel ebusuakuw nyina mu—ebusuakuw biara mu mpem duebien no, yɛtse ase dɛn?Mbuae. Ɔwɔ dɛ yɛtse ase dɛ, hɔn a wɔasɔw hɔn ano no yɛ asɔfompanyin a wɔhyɛɛ hɔn asɔfo wɔ Nyankopɔn ne nhyehyɛɛ krɔnkrɔn mu dɛ wɔnkã asɛmpa a ɔwɔ hɔ daapem no; na hɔn nye nkorɔfo a woyii hɔn fii aman, ebusuakuw, kasa horow na nyimpa nyina mu, na abɔfo no a wɔmaa hɔn tum dɛ wɔnhwɛ asaase do aman do no hyɛɛ hɔn asɔfo dɛ wɔntwe hɔn a wɔpɛ no mbra Abakamba n’asɔr no mu.
12 Asɛmbisa. Totorobɛnto a wɔhɛnee a wɔabɔ dzin wɔ Nyikyerɛ Tsir 8 no, yɛtse ase dɛn?Mbuae. Ɔwɔ dɛ yɛtse ase dɛ, dɛ mbrɛ Nyankopɔn dze nda esia bɔɔ wiadze, na owiee n’edwuma yɛ wɔ da a otsĩa esuon no, na ɔtseew ho, na ɔdze asaase do huntuma yɛɛ nyimpa no, dɛmara so na mfe mpemesuon n’ahyɛse no Ewuradze Nyankopɔn bɛtsew asaase ho, na oewie nyimpa no nkwagye, na oebu ndzɛmba nyina atsɛn, na abɔpon ndzɛmba nyina, gyedɛ dza ɔammfa annhyɛ no tum ase no nko, ber a ɔbɔsɔw ndzɛmba nyina ano dze ama ndzɛmba nyina n’ewiei; na abɔfo beesuon no hɔn totorobɛnto a wɔhɛnee no yɛ n’edwuma ne nsiesiei a ɔdze reba ewiei wɔ mfe mpem-esuon n’ahyɛse—dza wɔdze risiesie kwan ato hɔ ansaana ne mbae no aso.
13 Asɛmbisa. Dabɛn na wobowie ndzɛmba a wɔakyerɛw no wɔ Nyikyerɛ Tsir 9 no yɛ?Mbuae. Sɛ wɔtsew nsɔwano a otsĩa esuon no n’ano wie a, nna wobowie yɛ ansaana Christ ne mbae no aso.
14 Asɛmbisa. Nwoma kakraba no a John dzii no a wɔakyerɛw no wɔ Nyikyerɛ Tsir 10 no, yɛtse ase dɛn?Mbuae. Ɔwɔ dɛ yɛtse ase dɛ nna ɔyɛ dwumadzi nna ayɛdze ma no dɛ ɔboaboa Israel ebusuakuw ano; hwɛ, iyi nye Elias, nyia wɔakyerɛw no ho asɛm dɛ ɔwɔ dɛ ɔba na ɔdze ndzɛmba nyinara san ba no.
15 Asɛmbisa. Adasegyefo beenu no a ɔwɔ Nyikyerɛ Tsir 11 no, n’ase kyerɛ dɛn?Mbuae. Hɔn nye nkɔnhyɛfo beenu no a wobeyi hɔn ama Jewfo hɔn man no wɔ nda a odzi ekyir no mu, wɔ nsanananmu ber no mu, na wɔahyɛ nkɔm akyerɛ Jewfo no wɔ ber a wɔaboa hɔn ano ewie, na wɔaakyekyer Jerusalem kuropɔn no wɔ hɔn egyanom asaase do.