Un Malchi pa Revelashon Personal

Meskos ku boso, durante añanan mi a wòrdu influenshá hopi pa Elder Dieter F. Uchtdorf. Esei ta splika, al ménos den un parti, tokante kiko mi ta bai papia. ¹ Asina, ku despensa na dje …

Pilotnan di avion bon entrená ta bula den e kapasidat di nan avion i ta sigui instrukshonnan di kontroladónan di tráfiko aéreo tokante uso di pista i ruta di buelo. Simplemente bisá, pilotnan ta operá den un malchi. No ta importá kon briante òf yen di talento nan ta, solamente bulando den e kuadro aki pilotnan por liberá ku seguridat e enorme potensial di un avion pa logra ophetivonan milagroso.

Den manera similar, nos ta risibí revelashon personal den un kuadro. Despues di boutismo, nos ta haña un don mahestuoso i tòg práktiko, e don di e Spiritu Santu.² Ora nos ta hasi esfuerso pa keda riba e kaminda di konvenio,³ “ta e Spirtitu Santu… [ta esun] ku lo mustra [nos] tur kos [ku nos] mester hasi.”⁴ Ora nos ta insigur òf inkomodo, nos por pidi Dios pa yudansa.⁵ E Salbador Su promesa no por ta mas kla: “Pidi, i boso lo risibí; … pasobra ken ku pido ta risibí.”⁶ Ku e yudansa di e Spiritu Santu, nos por transformá nos naturalesa dibino den nos destinashon eterno.⁷

E promesa di revelashon personal pa medio di e Spiritu Santu ta impreshonante meskos ku un avion den buelo. I meskos ku pilotnan di avion, nos tin ku komprondé e malchi den kua e Spiritu Santu ta funshoná pa proveé revelashon personal. Ora nos ta funshoná den e malchi, e Spiritu Santu por duna komprenshon, direkshon, i komodidat asombroso. Pafó di e malchi aki, no ta importá nos inteligensia òf talento, nos por wòrdu engañá i haña doló i daño.

E skrituranan ta forma e promé elemento di e malchi aki pa revelashon personal.⁸ Alimentá riba e palabranan di Cristo, manera hañá den e skrituranan, ta stimulá revelashon personal. Elder Robert D. Hales a bisa: “Ora nos ke papia ku Dios, nos ta hasi orashon. I ora nos ke pa E papia ku nos, nos ta buska den e skrituranan.”⁹

E skrituranan ta siña nos tambe kon pa risibí revelashon personal.¹⁰ I nos ta puntra pa lokual ta korekto i bon¹¹ i no pa lokual ta kontrario na boluntat di Dios.¹² Nos no ta “pidi ku mal intenshon,” ku motibunan inapropiá pa promové nos mes deseonan òf pa realisá nos mes plaser.¹³ Mas ku tur kos, nos tin ku pidi Tata Selestial den e nòmber di JesuCristo,¹⁴ keriendo ku nos lo risibí.¹⁵

Un di dos elemento di e malchi ta ku nos ta risibí revelashon personal solamente pa nos mes i no pa otronan. Ku otro palabranan, nos ta lanta i baha riba e pista asigná na nos. E importansia di pistanan bon definí tabata siñá fo di trempan den e historia di e Restorashon. Hiram Page, un di e Ocho Testigunan di e Buki di Mormon, a pretendé di a risibí revelashonnan pa henter Iglesia. Diferente miembronan tabata engañá i mal influensiá.

Komo kontesta, Señor a revelá ku “ningun lo wòrdu nombrá pa risibí mandamentunan i revelashonnan den e iglesia aki eksepto Su sirbidó José Smith … te ora ku E nombra …un otro na su lugá.”¹⁶ Doktrina, mandamentu, i revelashonnan pa e Iglesia ta privilegio di e profeta bibu, ku ta risibí nan di Señor JesuCristo.¹⁷ Esei ta pista di e profeta.

Añanan pasá, mi a risibí un yamada telefòniko di un persona ku a keda arestá pa drenta un lugá sin derechi. El a bisa mi ku a keda revelá na dje ku skritura adishonal tabata derá bou di e piso abou di un edifisio ku el a purba drenta aden. El a pretendé ku un bia ku e optené e skrituranan adishonal, e tabata sa ku e lo risibí e don di tradukshon, trese dilanti skritura nobo, i influensiá e doktrina i direkshon di e Iglesia. Mi a bisé ku e tabata robes, i el a implorá mi pa hasi orashon tokante esaki. Mi a bisé ku lo mi no hasié. El a bira verbalmente abusivo i a kaba ku e yamada.¹⁸

Mi no ta tin ku hasi orashon tokante e petishon aki pa un motibu profundo: solamente e profeta ta risibí revelashon pa e Iglesia. Lo e ta “kontrario na e sistema di Dios”¹⁹ pa otronan risibí tal revelashon, ku ta pertenesé na e profeta su pista.

Revelashonpersonal hustu ta pertenesé na individuonan. Bo por risibí revelashon, por ehèmpel pa, tokante unda pa biba, kua karera profeshonal pa sigui, òf ken pa kasa kuné.²⁰ Lidernan di iglesia por siña doktrina i kompartí konseho inspirá, pero e responsabilidat pa e desishonnan aki ta keda serka abo. Esei ta bo revelashon pa risibí; esei ta abo su pista.

Un di tres elemento di e malchi ta ku revelashon personal lo ta semper den harmonia ku e mandamentunan di Dios i e konvenionan ku nos a hasi ku n’E. Konsiderá un orashon ku ta bai manera esaki: “Tata Selestial, servisionan di Iglesia ta laf. Mi por adorá Bo riba Sabat den e serunan of na playa? Mi por ta eskusá for di baimentu iglesia i partisipá di Santa Sena pero tin ainda e bendishonnan primintí ora mantené e dia di Sabat sagrado?”²¹ Komo kontesta na tal orashon, nos por anitsipá Dios Su kontesta: “Mi yu, Mi a revelá mi boluntat kaba tokante e dia di Sabat.”

Ora nos pidi pa revelashon tokante algu di ku Dios a duna direkshon kla kaba, nos ta habri nos mes pa mal interpretá nos sentimentunan i skucha lokual nos ke skucha. Un biaha un hòmber a konta mi tokante su lucha pa stabilisá su famia su situashon finansiero. E tabatin e idea pa malversá fondo komo un solushon, hasi orashon tokante esaki, i sinti ku el a haña revelashon afirmativo pa hasi asina. Mi tabata sa ku ta engaño pasó el a buska revelashon kontrario na un mandamentu di Dios. E Profeta José Smith a atvertí, “Nada no ta un herida mas grandi na e yunan di hende di ta bou di influensia di un spiritu falsu, ora nan pensa ku nan tin e Spiritu di Dios.”²²

Algun por indiká ku Nefi a violá un mandamentu ora el a mata Laban. Sinembargo, e eksepshon aki no ta anulá e regla—e regla ku revelashon personal lo ta den harmonia ku Dios Su mandamentunan. Ningun splikashon simpel di e episodio aki ta kompletamente satisfaktorio, pero laga mi resaltá algun aspekto. E episodio no a kuminsá ku Nefi puntrando ku e por a mata Laban. No tabata algu ku e kier a hasi. Mata Laban no tabata pa Nefi su benefisio pero pa proveé skrituranan na un futuro nashon i un pueblo di konvenio. I Nefi tabata sigur ku e tabata revelashon—de fakto, den e kaso aki, e tabata un mandamentu di Dios.²³

E di kuater elemento den e malchi ta pa rekonosé kiko Dios a revelá kaba na bo personalmente, miéntras bo ta keda habrí pa mas revelashon di DjE. Si Dios a kontestá un pregunta i e sirkumstansianan no a kambia, di kon nos lo spera e kontesta di ta diferente? José Smith a trompeká den e esenario problematiko aki na 1828. E promé porshon di e Buki di Mormon tabata tradusí ora Martin Harris, un benefaktor i eskritor inisial, a pidi José pèrmit pa tuma e páginanan tradusí i mustra nan na su kasá. Insigur di kiko pa hasi, José a hasi orashon pa haña guia. Señor a bisé no laga Martin bai ku e páginanan.

Martin a pidi José pa puntra Dios atrobe. José a hasi asina, i e kontesta tabata, ningun sorpresa, meskos. Pero Martin a roga José pa puntra un di tres biaha, i José a hasi asina. E biaha aki Dios no a bisa no. Na lugá di esaki, ta manera ku Dios a bisa, “José, bo sa kon Mi ta sinti tokante esaki, pero bo tin bo albedrio pa skohe.” Sinti su mes aliviá ku e limitashon a kita, José a disidí pa pèrmití Martin pa tuma 116 página di manuskrito i mustra nan na algun miembronan di su famia. E páginanan tradusí a pèrdè i no a rekuperá nan nunka mas. Señor a skual José severamente.²⁴

José a siña, manera e profeta Jakob den e Buki di Mormon a siña ku nos no mester buska pa konsehá Señor, pero pa tuma konseho for di Su man. Pasó e ta konsehá den sabiduria.²⁵ Jakob a atvertí ku kosnan desafortuná ta sosedé ora nos pidi pa kosnan ku nos no mester pidi. El a predesí ku e hendenan na Yerusalèm lo buska “pa kosnan ku nan no por [komrpondé],” i wak “mas ayá die marka,” i kompletamente ta ignorá e Salbador di mundu.²⁶ Nan a trompeká pasó nan a pidi pa kosnan ku nan lo no a komprondé i lo no por komprondé.

Si nos a risibí revelashon personal pa nos situashon, i e sirkunstansianan no a kambia, ya Dios a kontestá nos pregunta kaba.²⁷ Poe ehèmpel tin biaha nos ta puntra kada biaha atrobe pacpor sigurá nos ku nos a wòrdu pordoná. Si nos a arpentí, keda yená ku goso i pas ku nos konseshi, i risibí un remishon di nos pikánan, nos no mester puntra atrobe pero por konfia e kontesta ku Dios ya a duna kaba.²⁸

Asta ora nos ta konfia Dios Su kontestan anterior, [tòg] nos tin di ta habrí pa mas revelashon personal di. Despues di tur kos, poko di e destinashon di bida ta wòrdu lográ via di un buelo direkto. Nos mester rekonosé ku revelashon personal por ta risibí “liña riba liña i presepto riba presepto,”²⁹ e direkshon revelá por ta i ku frekuensia ta oumenta. ³⁰

E elementonan di e malchi pa revelashon personal ta kubri i reforsá mutuamente. Pero den e malchi ei, e Spiritu Santu por i lo revelá tur kos ku nos mester pa elevá nos i mantené e momentum riba e kaminda di konvenio Kermen nos por wòrdu bendishoná pa e poder di JesuCristo pa bira loke Tata Selestial ke pa nos bira. Mi ta invitá boso di tin konfiansa pa reklamá revelashon personal pa bo mes, komprondiendo lokual Dios a revelá, konsistente ku e skrituranan i mandamentunan ku El a duna pa medio di Su profetanan yamá i den bo mes área i agensia. Mi sa ku e Spiritu Santu por i lo mustra bo tur kosnan ku bo mester hasi.³¹ Den e nòmber di JesuCristo, amèn.