Felis i Pa Semper

Amigunan, rumannan stimá, boso ta kòrda boso ker a kere, òf ke kere, den felis pa semper?

I e ora ei bida ta dal aden. Nos ta “krese.” Relashonnan ta bira kompliká. E mundu aki ta un boroto, yen hende, agresivo, ku pretenshon i aktitutnan. Sinembargo den nos “nukleo mas profundo di nos kurason,”¹ nos ta kere, òf ke kere, na un lugá, di un manera òf otro, felis i pa semper ta real i posibel.

“Felis i pa semper” no ta kosnan imaginario di kuentanan di ada. Bèrdat, goso duradero i eterno ku esnan ku nos stima ta e esensia mes di Dios Su plan di felisidat. Su kaminda ku amor prepará por hasi nos hornada eterno felis i pa semper.

Nos tin hopi pa selebrá i di kual ta gradisido. Sinembargo, ningun hende no ta perfekto, ni tampoko ningun famia. Nos relashonnan ta inkluí amor, e sosiabilidat, i e personalidat pero hopi biaha tambe frikshon, i tin biaha doló profundo.

“Pasobra manera den Adan tur hende ta muri, asina tambe den Cristo tur hende lo biba.”² Bibu den JesuCristo ta inkluí inmortalidat—Su regalo di resurekshon físiko. Segun nos ta biba den fe i obediensia, bibu den Cristo tambe por inkluí bida eterno ku abundansia di goso ku Dios i esnan ku nos stima.

Di un manera remarkabel, Señor Su profeta ta hiba nos mas serka di nos Salbador, inkluyendo dor di ordenansanan i kombenionan di e sagrado tèmpel yegando mas serka di nos den mas lugá. Nos tin un oportunidat profundo i don pa diskubrí entendimentu spiritual nobo, amor, arepentimentu, i pordoná otro, i nos famianan, den tempu i eternidat.

Ku pèrmit, mi ta kompartí dos eksperensia sagrado, dirigí spiritualmente inusual kontá dor di amigunan tokante JesuCristo uniendo famianan dor di sana asta konflikto ku ta afekta hopi generashonnan.³ “Infinito i eterno,”⁴ “mas fuerte ku e lasonan di morto.”⁵ JesuCristo Su Ekspiashon por yuda nos trese pas den nos pasado i speransa pa nos futuro.

Ora nan a uni na E Iglesia di JesuCristo di e Santunan di e Delaster Dianan, mi amiga i su kasá ku alegria a haña sa ku relashon familiar no mester ta “te ora morto separá bo.” Den kas di Señor, famianan por ta uní eternamente (seyá).

Pero mi amiga no ker a wòrdu seyá na su tata. “E no tabata un kasá amabel pa mi mama. E no tabata un tatá amabel pa su yunan, ” el a bisa. “Mi tata lo tin ku warda. Mi no tin niun deseo pa hasi e obra den tèmpel p’e i ta seyá na dje pa eternidat.”

Pa un aña, el a yuna, resa, papia hopi ku Señor tokante su tata. Finalmente, e tabata kla. E obra di tèmpel pa su tata a keda kompletá. Despues, el a bisa, “ora mi tabata drumí mi tata a aparesé na mi den un soño bistí kompletamente na blanku. El a kambia. E la bisa, ‘Wak mi. Mi ta limpi. Danki pa hasi e obra pa mi den e tèmpel.’” Su tata a añadí, “Lanta i bai bèk na e tèmpel, bo ruman hòmber ta wardando pa wòrdu batisá.”

Mi amigu a bisa, “Mi antepasadonan i esnan ku a fayesé ta warda ansiosamente pa nan obra wòrdu hasí.

“Pa loke ta ami,” el a bisa, “e tèmpel ta un lugá pa sanashon, enseñansa i pa rekonosé e Ekspiashon di JesuCristo.”

Di dos eksperensia. Un otro amigu a buska diligentemente su historia familiar. E ker a identifiká su bisawelo.

Un mainta tempran, mi amigu a bisa ku el a sinti e presensia spiritual di un hòmber den su kamber. E hòmber ta ke pa hañ’é i pa sa di dje den su famia. E tabatin remordementu pa un fayo di kual awor el a arepentí. E hòmber a yuda mi amigu realisá ku mi amigu no tin konekshon di DNA ku e persona ku mi amigu a kere tabata su bisawelo. “Ku otro palabra,” mi amigu a bisa, “mi a diskubrí mi bisawelo i a haña sa ku e no ta e persona ku nos registronan familiar ta bisa ku tabata nos bisawelo.”

Su relashonnan familiar a klarifiká, mi amigu a bisa, “mi ta sinti mi liber, na pas. E ta hasi tur e diferensia pa sa ken mi famia ta.” Mi amigu ta reflekshoná, “Un taki doblá no ta nifiká ku e palu tabata malu. Kon nos a bin den e mundu aki ta ménos importante ku ken nos tabata ora nos bai for di dje.”

E skrituranan i eksperensianan sagrado di sanashon personal, inkluyendo ku esnan na bida den e mundu di spiritu, ta subrayá sinku prinsipionan doktrinal.

Promé: Sentral den Dios Su plan di redenshon i felisidat, JesuCristo, dor di Su Ekspiashon ta primintí pa unifiká nos spiritu ku nos kurpa, “pa nunka mas wòrdu separá, pa [por] risibí un plenitut di goso. ”⁶

Di dos: Ekspiashon—sakrifisio di Cristo—ta bin ora nos eksperensiá fe i duna fruta ku ta kuadra ku arepentimentu.⁷ Tantu den mortalidat, i komo den inmortalidat. Ordenansanan di tèmpel no ta riba nan mes ta kambia nos òf esnan den e mundu di spiritu. Pero e ordenansanan divino aki ta abilitá kombenionan ku ta santifiká ku Señor, ku por trese harmonia ku n‘E i tur otro.

Nos goso ta bira kompletu ora nos sinti JesuCristo Su grasia i pordón pa nos. I ora nos ta ofresé e milager di Su grasia i pordón pa tur otro, e miserikòrdia ku nos ta risibí i e miserikòrdia ku nos ta ofresé por yuda hasi bida di inhustistia bira hustu.⁸

Di tres: Dios konosé i stima nos perfektamente. “No por hasi bofon di Dios,”⁹ tampoko E no por wòrdu engañá. Ku miserikòrdia i hustisia perfekto, E ta rondoná den Su brasanan di seguridat esnan ku humiá di nan mes i ta penitente.

Den e Tèmpel di Kirtland, E Profeta José Smith a mira su ruman Alvin salbá den e reino selestial. E Profeta José Smith a maraviá, ya ku Alvin a fayesé promé ku e risibí e ordenansa salbadó di boutismo.¹⁰ Konsolando, Señor a splika dikon: Señor “lo husga [nos] di akuerdo ku [nos] obranan, di akuerdo ku e deseo di [nos] kurason”¹¹ Nos almanan ta duna testimonio di nos obranan i deseonan.

Agradesido, nos sa e bibu i “e mortonan ku ta arepentí lo wòrdu redimí, dor di obedensia na e ordenansanan di e kas di Dios.”¹² i Cristo Su Ekspiashon. Den e mundu di spiritu, asta esun den piká i transgreshon tin e oportunidat pa arepentí.¹³

Kontrali, esnan ku deliberadamente skohe malisia, kende konsientemente ta demorá arepentimentu, òf kende di kualke forma premeditá òf konsientemente ta kibra e mandamentunan planiando un arepentimentu fásil lo wòrdu husgá dor di Dios i un “rekuerdo briante di [nan] kulpa.”¹⁴ Nos no por kometé piká konsientemente riba djasabra, i spera pordon outomatikamente dor di partisipá di e Santa Sena riba djadumingu. Pa mishoneronan òf otronan ku ta bisa di ta siguiendo e Spiritu esaki ta nifiká ku nan no mester obedesé e normanan di mishon òf e mandamentunan, por fabor kòrda ku obedesé e normanan di mishon i e mandamentunan ta invitá e Spiritu. Ningun di nos mester posponé nos arepentimentu. E bendishonnan di arepentimentu ta kuminsá ora nos kuminsá arepentí.

Di kuater: Señor ta duna nos oportunidat divino pa bira mas manera E ora nos ta hasi ordenansanan di salbashon den tèmpel pa otronan ku ke pero ku no por hasié pa nan mes. Nos ta bira mas kompletu i perfekshoná¹⁵ segun nos ta bira “salbadornan … riba Seru Sion.”¹⁶7 Ora nos sirbi otro, e Spiritu Santu di Promesa por ratifiká ordenansanan i santifiká tantu esun ku ta duna, komo esun ku ta risibí. Tantu esun ku ta duna, komo esun ku ta risibí por hasi un kombenio ku ta transformá mas profundo, kual ku tempu lo risibí e bendishonnan primintí na Abraham, Isak i Jakob.

Finalmente, e di sinku: Manera e Regla di Oro¹⁸ta siña, un simetria santifiká den arepentimentu i pordón ta invitá nos pa ofresé loke nos mes ke i ta deseá.

Tin biaha nos disponibilidat pa pordoná un otro hende por abilitá tantu nan komo nos pa kere ku nos por arepentí i wòrdu pordoná. Tin biaha un disponibilidat pa arepentí i un abilidat pa pordoná lo bin na un tempu diferente. Nos Salbador ta nos Mediadó ku Dios, pero E tambe ta yuda trese nos na nos mes i na otronan ora nos bin na DjE. Spesialmente ora ta daño i doló ta profundo, drechando nos relashonnan i sana nos kurasonnan ta duru, kisas imposibel pa nos riba nos mes. Pero shelu por duna nos fortalesa i sabiduria mas ayá ku nos mes lo por pa sa ki ora pa tene i kon pa laga lòs.

Nos ta ménos nos so, ora nos realisá ku nos no ta nos só. Nos Salbador semper ta komprondé.¹⁸ Ku nos Salbador Su yudansa, nos por entregá nos orguyo, nos dolónan, nos pikánan na Dios. Sinembargo nos por sinti ora nos kuminsá, ku nos ta bira mas kompletu segun nos ta konfiE pa hasi nos relashonnan sano.

Señor, ku a sirbi i komprondé perfektamente, ta pordoná esun ku E ke, nos (siendo imperfekto) mester pordoná tur. Segun ku nos ta bin na e Salbador, nos ta enfoká ménos riba nos mes. Nos ta husga ménos i ta pordoná mas. Konfiando riba Su meritonan, miserikòrdia, i grasia¹⁹ por liberá nos for di kontenshon, rabia, abusu, abandono, krueldat, i e desafionan físiko i emoshonal ku tin biaha ta bin ku un kurpa físiko den un mundu mortal. Felis i pa semper no ta nifiká ku tur relashonnan lo ta kontentu i pa semper. Pero e mil añanan di milenio kaminda Satanas lo ta mará²⁰ por duna nos tempu nesesario i maneranan sorpresivo pa stima, komprondé, i solushoná, miéntras nos ta prepará pa eternidat.

Nos ta haña e sosialidat di shelu den otro.²¹ Dios Su obra i gloria, ta inkluí logra felis i pa semper.²² Bida eterno i eksaltashon ta pa konosé Dios i JesuCristo kermen, dor di poder divino, kaminda Nan ta nos lo ta.²³

Kerido rumannan, Dios nos Tata Selestial i Su Yu Stimá ta biba. Nan ta ofresé pas, goso, i sanashon na kada famia i lenga, pa kada un di nos. Señor Su profeta ta mustrando e kaminda. Revelashon di e delaster dianan ta kontinuá. Ku nos por aserká nos Salbador mas den Su kas sagrado, i ku E por hala nos mas serka di Dios i na otro, miéntras nos ta mara nos kurason huntu ku kompashon di Cristo, bèrdat, i miserikòrdia den tur nos generashonnan—den tempu i eternidat, felis i pa semper. Den JesuCristo, e ta posibel; den JesuCristo e ta bèrdat. Asina mi ta testifiká, den Su nòmber sagrado, JesuCristo, amèn.