Den Kolaborashon ku Señor

Den e promé lunanan di nos matrimonio, mi kasá stimá a ekspresá su deseo pa studia músika. Ku e intenshon di komplas’é, mi a disidí pa orkestrá un sorpresa grandi i sinsero pa mi amor. Mi a bai un tienda ku ta bende instrumento musikal i a kumpra un piano komo regalo. Emoshoná mi a pone e resibu di e kompra den un kaha ku un bog bunita i a dun’é esaki, sperando un erupshon inmenso di gratitut pa ku su kasá ku ta stim’é ekstremadamente i ku ta hopi atento.

Ora el a habri e kaha chikí i a wak su kontenido, el a wak mi amorosamente i a bisa.“O mi amor, bo ta maravioso! Pero laga mi hasi bo un pregunta: Esaki ta un regalo òf un debe?” Despues di a konsulta huntu tokante e sorpresa, nos a disidí pa kanselá e kompra. Nos tabata bibando riba un presupuesto di studiante, manera ta e kaso di hopi di e matrimonionan hóben i nobo. E eksperensia aki a yuda mi rekonosé e importansia di e prinsipio di kolaborashon kompleto den un relashon matrimonial i kon su aplikashon por yuda mi kasá i ami pa ta unu di kurason i unu di mente.¹

E evangelio restorá di JesuCristo ta proklamá e prinsipio di kolaborashon kompletu entre hende muhé i hòmber, tantu den [e] bida mortal komo den e eternidatnan. Maske kada un ta poseé atribútonan i responsabilidatnan spesífiko, hende muhé i hòmber ta kumpli [ku] ròlnan igualmente relevante i esensial den Dios Su plan di felisidat pa Su yunan.² Esaki tabata evidente for di e komienso ora Señor a deklará ku “no ta bon pa e hòmber ta su so; pesei [E lo] krea un yudansa ku ta pas kuné.”³

Den Señor Su plan un “yudansa ku ta pas kuné” ta un kompañero ku lo kana skouder ku skouder ku Adan den kolaborashon kompleto.⁴ De fakto, Eva tabata un bendishon selestial den bida di Adan. Dor di su naturalesa dibino i atributonan spiritual, el a inspirá Adan pa traha den kolaborashon ku ne pa logra Dios Su plan di felisidat pa e género humano.⁵

Laga nos konsiderá dos pririnsipio fundamental ku ta fortalesé e kolaborashon entre un hende hòmber i hende muhé. E promé prinsipio ta nos tur la igual pa Dios.⁶ Di akuerdo ku doktrina di evangelio, e diferensia entre hende muhé i hende hòmber no ta kita e promesanan ku Dios tin pa Su yunan hòmber i su yunan muhé. Un persona no tin posibilidat mas grandi den gloria selestial ku e otro den e eternidatnan.⁷ E Salbador Mes a invitá nos tur, Dios Su yunan, “pa bin na DjE i partisipá di Su bondat; i e no ta nenga niun ku ta bin na DjE.”⁸ Pesei, den e konteksto aki, nos tur ta konsiderá di ta igual dilanti di DjE.

Ora parehanan kasá komprondé i inkorporá e prinsipio aki [den nan bida], nan no ta posishoná nan mes komo presidente òf vise presidente di nan famia. No tin superioridat ni inferioridat den e relashon matrimonial, i niun no ta kana ni dilanti ni patras di e otro. Nan ta kana banda di otro, komo igual, e desendensia dibino di Dios. Nan ta bira unu den pensamentu, deseo, i propósito ku nos Tata Selestial i JesuCristo,⁹ dirigiendo i guiando e unidat familiar huntu.

Den un kompañerismo igual, “amor no ta poseshon pero partisipashon, … parti di e ko-kreashon ei kual ta nos yamamentu humano.”¹⁰ “Ku partisipashon di bèrdat, e pareha kasá ta drenta den unidat sinérgiko di un ‘dominio sempiterno’ ku ‘sin ta obligatorio ta nifiká’ lo fluí ku bida spiritual pa nan i nan posteridat ‘pa semper i semper.’” ¹¹

E di dos prinsipio relevante ta e Regla di Oro, siñá pa e Salbador den e Sermon di Seru: “I meskos ku boso ke pa hende hasi ku boso, boso tambe hasi ku nan.”¹² E prinsipio aki ta indiká un aktitut di dos banda, resiprosidat, unidat, i interdependensia i ta basá riba e di dos gran mandamentu, “Lo bo stima bo próhimo manera bo mes.”¹³ E ta uni ku otro atributonan Cristian manera longanimidat, benignidat, humildat i bondat.

Pa komprondé mihó e aplikashon di e prinsipio aki, nos por wak e laso sagrado i eterno establesé pa Dios entre nos promé mayornan, Adan i Eva. Nan a bira un karni,¹⁴ kreando un dimenshon di unidat ku a pèrmití nan pa kana huntu ku rèspèt, gratitut, i amor, lubidando nan mes i buskando kada unu e bienestar di e otro den nan biahe pa eternidat.

E mesun karakteristikanan ei ta loke nos ta lucha p’e den un unidat matrimonial awendia. Dor di e seyamentu [den] tèmpel, un muhé i hòmber ta drenta den e òrdu sagrado di matrimonio den e konvenio nobo i eterno. Dor di e orden di saserdosio aki, nan ta risibí bendishonnan eterno i poder dibino pa dirigí nan asuntunan familiar segun nan ta biba di akuerdo ku e konvenionan ku nan a hasi. For di e punto ei, nan ta move bai dilanti [den un relashon] interdependente i den un kolaborashon kompletu ku Señor, spesialmente pa loke ta trata kada unu su responsabilidat dibinamente asigná di nutri i presidí den nan famia.¹⁵ Nutriendo i presidiendo ta responsabilidatnan interrelashoná i ku ta kubri otro, loke ta nifiká ku mamanan i tatanan “ta obligá pa yuda otro komo parehanan igual”¹⁶ i ta kompartí un liderasgo balansá di nan hogar.

“Nutri ta nifiká alimentá, siña, i sostené” miembronan di famia, dor di yuda nan pa “siña bèrdatnan di evangelio i desaroyá fe den Tata Selestial i JesuCristo” den un ambiente di amor. Presidí ta nifiká pa “yuda dirigí e miembro di famia bèk pa mora den presensia di Dios. Ta logra esaki dor di sirbi i siña ku benignidat, humildat i amor puru.” Tambe e ta inkluí “dirigí miembronan di famia den orashon regular, estudio di evangelio, i otro aspektonan di adorashon. Mayornan ta traha den unidat,” siguiendo e ehèmpelnan di JesuCristo, “pa kumpli e [dos gran] responsabilidatnan aki.”¹⁷

Ta importante pa nota ku e manera di dirigí den e famia ta sigui e patronchi patriarkal, diferensiando den sierto aspekto di e liderazgo di saserdosio den iglesia.¹⁸ E patronchi patriarkal ta impliká ku kasánan ta responsabel direktamente na Dios pa e kumplimentu di nan responsabilidatnan sagrado den famia. Ta nesesario un kolaborashon kompletu—un kumplimentu boluntario ku kada prinsipio di rektitut i responsabilidat i proveé opotunidatnan pa desaroyo den un ambiente di amor i ayudo mutuo.¹⁹ E responsabilidatnan spesial aki no ta impliká hirarkia i ta ekskuí apsolutamente kualke sorto di abusu òf uso inapropiá di outoridat.

E eksperensia di Adam i Eva, despues ku nan a sali for di e Hardin di Eden, ta ilustrá na un manera bunita e konsepto di interdependensia entre mama i tata den nutri i presidí riba nan fmia. Manera nos ta siña den e buki di Moises, nan a traha huntu riba e tera ku sodó di nan frenta p’asina por a proveé pa e bienestar físiko di nan famia;²⁰ nan a trese yunan na e mundu;²¹ nan a yama na e nòmber di Señor [hasi orashon] huntu i a skucha Su bos biniendo di direkshon di e Hardin di Eden”;²² nan a akseptá e mandamentunan ku Señor a duna nan i a lucha pa huntu obedesé nan.²³ E ora ei nan a “hasi e kosnan [aki] konosí na e yunan”²⁴ i “no para di yama na Dios” huntu di akuerdo ku nan nesesidatnan.²⁵

Mi kerido rumannan, nutri i presidí ta oportunidat, no ta limitashon eksklusivo. Un persona por tin un responsabilidat pa algu pero kisas no ta e úniko persona ku ta hasié. Ora mayornan amoroso kompronde e dos responsabilidatnan prinsipal aki, nan lo lucha huntu pa protehá i kuida e bienestar físiko i emoshonal di nan yunan. Tanbe nan lo yuda nan pa enfrentá e peligernan spiritual di nos tempu dor di nutri nan ku un bon palabra di Señor manera revelá na su profetanan.

Maske kasánan ta sostené otro den nan responsabilidatnan dibinamente asigná, “desabilidat, morto, òf otro sirkumstanshanan mester di adaptashon individual.”²⁶ Tin biaha un kasá òf e otro lo tin e responsabilidat di aktuá den tur e dos ròlnan na mes momento, sea temporal òf permanente.

Resientemente mi a topa un hermana i un hermano ku kada unu tabata biba den e kondishon ei. Komo mayornan soltero, kada unu di nan, den nan ambiente familiar i den e kolaborashon ku Señor, a disidí pa dediká nan bida kompletamente na e kuido spiritual i emoshonal di nan yunan. Nan no a pèrdè bista riba nan kombenionan di tèmpel ku nan a hasi ku Señor i Su promesanan eterno no opstante nan divorsio difísil. Nan tur dos a buska Señor Su ayudo den tur kos miéntras na ta lucha kontinuamente pa soportá nan desafionan i kana den e kaminda di kombenio. Nan ta konfia ku Señor lo sòru pa nan nesesidatnan, no solamente den e bida aki pero durante eternidat. Tur dos a nutri nan yunan dor di siña nan ku benignidat, humildat, i amor puru. asta ora nan a eksperensiá sirkumstansianan difísil den bida. Di loke mi sa, e dos mayornan soltero aki no ta kulpa Dios pa nan [mala]suerte. Na lugá di esaki, nan ta wak dilanti ku un brio perfekto di speransa i konfiansa riba e bendishonnan ku Senor tin wardá pa nan.²⁷

Rumannan, e Salbador a pone e ehèmpel perfekto di union i harmonia di proposito i doktrina ku nos Tata den Shelu. El a hasi orashon pa Su disípulonan, bisando, “Ku nan tur por ta unu; manera abo, Tata, ta den mi, i ami den bo, pa nan tambe por ta unu den nos: … pa naan por ta unu, hasta manera nos ta unu.”²⁸

Rumannan, mi ta testifiká na boso ku si nos—muhénan i hòmbernan— traha huntu den un kolaborashon bèrdadero i igual, nos lo gosa di e unidat siñá pa e Salbador ora nos kumpli e responsabilidatnan dibino den nos relashonnan matrimonial. Mi ta primintí boso, den e nòmber di Cristo, ku kurasonnan lo ta “mará huntu den un unidat i den amor un pa otro,”²⁸ nos lo haña mas goso den nos biahe pa bida eterno, i nos kapasidat pa sirbi un na otro i huntu lo multipliká signifikativamente.³⁰ Mi ta komparti mi testimonio di e bèrdatnan aki den e nòmber sagrado di e Salbador JesuCristo, amèn.