Konstruyendo un Bida Resistente na e Atversario

Durante di añanan, for di e púlpito bunita aki na e Sentro di Konferensia, nos a risibí konsehonan magnífiko, inspirashon, instrukshon i revelashon. Na algun okashon diskursantenan a usa komparashonnan asosiá ku nan área di konosementu i eksperensia pa ilustrá klaramente i ku hopi poder un prinsipio di e evangelio di JesuCristo.

Di e manera aki, por ehèmpel, nos a siña tokante aeroplanonan i buelonan den kual un desviashon inisial chikitu por hiba nos na un luga leu for di loke ta realmente nos destinashon.¹ Di e manera aki tambe, nos a siña for di un komparashon di e funshon di nos kurason físiko ku e kambio poderoso di kurason ku ta wòrdu rekerí pa por respondé na e invitashon di Señor pa siguiÉ. ²

E biaha aki, lo mi kier agregá humildemente un komparashon inspirá for di un área riba tereno di mi preparashon profeshonal. Mi ta refiriendo na e mundu di ingenieria sivil. For di komienso di mi estudio universitario, mi a soña ku e dia ku lo mi por kumpli ku e eksigensianan pa por kalifiká pa sigui e lès ku lo siña mi kon pa diseñá edifisionan i otro strukturanan ku lo por a wòrdu konsiderá e tempu ei “anti-sísmiko.”

E dia finalmente a yega pa mi promé lès riba e tópiko aki. E promé palabranan di e profesor tabata e siguientenan: “Sigur boso lo ta ansioso pa kuminsá e kurso aki i siña kon pa diseñá strukturanan anti-sísmiko,” riba kual hopi di nos a sakudí kabes ku entusiasmo. E orei e profesor a bisa, “Lamentabelmente mi mester bisa boso ku esaki no ta posibel, pasó mi no por siña boso kon pa diseñá un edifisio ku ta kontra, ku ta ‘anti-’ of ku ta kontrali di un teremoto. Esaki no tin sentido,” el a bisa, “pasó teremotonan lo sosodé di tur manera, sea ku nos ta gust’é òf no.”

Despues el a bisa aserka, “Loke mi por siña boso ta kon pa diseñá strukturanan ku ta resistente na sísmikonan, strukturanan ku por resistí e forsa nan ku ta bini for di un teremoto, di manera ku e struktura ta keda para sin sufri dañonan grave i despues por sigui brinda e servisio pa kual el a wòrdu konstruí.”

E ingeniero ta hasi e kalkulashonnan ku ta indiká e dimenshonnan, e kalidatnan i e karakterístikanan di e fundeshi, kolumnanan, balkinan, pida betòn i otro elementonan struktural ku ta wòrdu diseñá. E resultadonan aki ta wòrdu transformá den plannan i spesifikashonnan tékniko, kual mester wòrdu sigui estriktamente dor di e kontratista pa e trabou por wòrdu materialisá i asina aki kumpli ku e propósito pa kual a diseñé i ta wòrdu konstruí.

Aunke mas ku 40 aña a pasa for di dia e promé klas di ingenieria di resistensia sísmiko, mi ta kòrda perfektamente e momentu ku mi a kuminsá atkerí un komprendementu kompletu mas profundo di e importansha vital ku e konsepto aki lo ta presente den e strukturanan ku ami lo diseñá den mi futuro bida profeshonal. No solamente esaki, pero aun mas importante—ku e lo ta presente permanente den e edifikashon di mi propio bida i den esnan riba kual lo mi por ehersé un influensia positivo.

Kon bendishoná nos ta di por konta ku un konosementu di e plan di salbashon kreá pa nos Tata Selestial, di tin e evangelio restorá di JesuCristo, i por konfia riba guia inspirá di profetanan bibu. Tur esnan menshoná promé ta forma e “plannan” divinamente diseñá i e “spesifikashonnan” tékniko ku ta siña nos klaramente kon pa konstruí bida nan felis—bida nan ku ta resistente na pika, resistente na tentashon, resistente na atake nan di Satanas, kende ta desesperadamente ta buska pa frustra nos destino eterno huntu ku nos Tata Selestial i ku nos sernan kerí.

E Salbador Mes, na komienso di Su ministerio, “a keda bandoná pa wòrdu tentá dor di e diabel.“³ Pero Jesus a sali ku éksito for di e gran prueba aki. Kon un aktitut anti-Satanas òf anti-tentashon lo a SirbiE? Loke a laga Jesus sali triunfante for di e momentunan mas difísil aki tabata Su preparashon spiritual, kual a permiti E pa ta den kondishon di resistí e tentashonnan di e atversario.

Kiko tabata algun di e faktornan ku a yuda e Salbador pa ta prepará pa e momentu krusial aki?

Promé, El a yuna pa 40 dia i 40 anochi, un ayuno ku lo mester tabata kompañá pa orashon konstante. Pues, ounke E tabata físikamente débil, Su spiritu tabata hopi fuerte. Ounke, afortunadamente, no ta pidi di nos pa yuna durante un tempu asina aki—si no pa solamente 24 ora i un bes pa luna—ayuno ta duna nos forsa spiritual i prepará nos pa ta resistente na e pruebanan di e bida aki.

Na di dos lugá, den e relato di e tentashonnan na kual e Salbador a wòrdu someté, nos ta mira ku semper El a kontestá Satanas teniendo skrituranan den Su mente, sitando nan, i aplikándo nan na e momentu adekuá.

Ora ku Satanas a tent’É pa kombertí e piedranan den pan pa E por a satisfasé Su hamber for di Su ayuno largu, Señor a bis’é, “E ta skibí, Hòmber lo no biba di pan solamente, pero di kada palabra ku sali for di e boka di Dios.”⁴ Despues, ora ku Señor tabata riba e tòp di e tèmpel, e diabel a purba na tent’É pa e demostrá Su poder, riba kual Señor a kontestá ku outoridat, “Atrobe ta skibí, lo Bo no tenta Señor bo Dios.”⁵ I riba Satanas su di tres intento, Señor a respondé, “E ta skibí, lo bo adorá Señor bo Dios, i lo bo sirbi e so.”⁶

E suseso di un teremoto ta laga su markanan asta riba strukturanan ku tabata korektamente diseñá i konstruí—e tipo di konsekuensianan manera algun kraknan, muebles i plafònnan ku a kai, bentananan kibrá. Pero e edifisio bon diseñá i bon konstruÍ aki lo kumpli ku su propósito di protehá su okupantenan, i ku algun reparashon e lo rekuperá su kondishon original.

Di mesun manera, e slanan di e atversario tambe por okashoná “skernan” òf algun daño parsial den nos bida, apesar di nos esfuersonan pa konstruÍ nos bida di akuerdo ku e divino diseño perfekto. E “skernan” aki por manifestá nan mes pa medio di sintimentunan di tristesa, òf remordimentu di a kometè algun eror i di no a hasi tur kos perfektamente, òf e sintimentu ku nos no ta asina bon manera nos kier ta.

Pero loke ta relevante di bèrdat ta ku, dor di a sigui e plannan i spesifikashonnan divinamente diseñá, ku ta e evangelio di JesuCristo, nos ta riba pia ainda. E struktura di nos bida no a keda destruí dor di e atversario su esfuersonan òf pa situashonnan difísil ku nos mester a enfrentá; mas bien, nos ta kla pa sigui pa dilanti.

E felisidat prometé den e skrituranan komo e propósito di nos eksistensia⁷ no mester wòrdu komprondé ku e nifikashon ta ku nos lo no tin difikultatnan, i tristesa, ku nos lo no tin “skernan” komo konsekuensia di e tentashonnan di atversidat, òf di e pruebanan aktual di nos bida aki na tera.

E felisidat aki tin di haber ku Nefi su perspektiva pa ku bida ora ku el a bisa, “Mi a mira tantu aflikshon den transkurso di mi dianan, sinembargo, mi a wòrdu altamente favoresé dor di Señor den tur mi dianan.”⁸ Tur su dianan! Asta e dianan ku Nefi a sufri durante e inkomprenshon i rechaso di su propio rumannan, asta ora ku nan a mar’é riba e barku, asta e dia ku su tata, Lehi a muri, asta ora ku Laman i Lemuel a bira enemigunan mortal di su pueblo. Asta den e dianan difísil nan ei, Nefi a sinti altamente favoresé dor di Señor.

Nos por tin e trankilidat di sa ku Señor nunka lo permití nos wòrdu tenta mas aya di loke nos por resistí. Alma ta invitá nos pa “wak i hasi orashon kontinuamente, pa nos no wòrdu tentá mas di loke [nos ]por soportá, i asina nos por wòrdu guiá dor di e Spiritu Santu, birando humilde, mansu, sumiso, ku pasenshi, yen di amor i tin pasenshi den sifrimentu.”⁹

E meskos por wòrdu apliká na e pruebanan di bida. Ammon ta rekordá nos di e palabranan di Señor: “Bai … i soportá bo aflikshonnan ku pasenshi, i Ami lo duna bo éksito.”¹⁰

Señor semper ta proveé nos ku un huida ora ku nos ta enfrentá atversidat, tentashon, inkomprenshon, enfermedatnan i asta morto. El a bisa, “I awor, di bèrdat Mi ta bisa boso, i loke Mi bisa esun mi ta bisa tur, sea di bon animo, yunan; pasó Mi ta entre boso i Mi no a bandoná bosnan.”¹¹ E lo no bandoná nos nunka!

Mi ta resa pa nos por sigui konstruí nos bida nan siguiendo e plannan i spesifikashonnan tékniko di e diseño divino skibí pa nos Tata i lográ pa medio di nos Salbador, JesuCristo. Pues, dor di e grasia ku ta alkansá nos pa medio di e ekspiashon di nos Salbador, nos lo ta éksitoso den konstruí un bida resistente na piká, resistente na tentashon i ku fortalesa pa soportá tempunan tristu i difísil den nos bida. I ademas, nos lo ta den kondishon pa alkansá tur e bendishonnan primintí pa medio di e amor di nos Tata i nos Salbador. Den e nòmber di JesuCristo, amèn.