Kurashi pa Proklamá e Bèrdat

Na 1982, mi tabata kabando mi di dos aña den topografia na un skol tékniko.

Na final di e aña, un kolega a invita mi na un kombersashon. Mi ta kòrda ku nos a laga e otro miembronan di klas i bai den un área banda di e kancha di deporte. Ora nos a yega ei, el a papia ku mi tokante di su konvikshon religioso, i no solamente el a mustra mi un buki, pero [tambe] el a duna mi e buki. Honestamente, mi no ta kòrda tur e palabranan ku el a bisa, pero mi ta kòrda e momentu ei hopi bon i e manera ku mi a sinti ora el a bisa, “mi ke kompartí mi testimonio na bo ku e buki aki ta bèrdat, i ku e evangelio di JesuCristo ta restorá.”

Despues di nos kombersashon,mi a bai kas, wak algun página den e buki, i poné riba un kashi. Pasó nos tabata na final di e aña i tabata e lastu aña di mi diplomqa di topografia, mi no ker a pone muchu atenshon na e buki, ni tampoko na mi kolega ku a kompartié ku mi. E nòmber di e buki bo por rei kaba. Si, e tabata e Buki di Mormon.

Sinku luna despues, e mishoneronan a bin na mi kas; nan tabata bayendo djis promé ku ami ta yegando kas for di trabou. Mi a invitá nan pa bin aden. Nos a sinta den mi patio chikitu dilanti di mi kas, i nan a siña mi.

Den mi búskeda pa e bèrdat, mi a puntra nan kua iglesia tabata bèrdat i kon mi por hañ’é. E mishoneronan a siña mi ku mi por haña e kontesta ei pa mi mes. Ku hopi espektativa i deseo, mi a akseptá e desafio pa lesa vários kapítulo di e Buki di Mormon. Mi a hasi orashon ku un kurason sinsero i ku intenshon bèrdadero (wak Moroni 10:4–5). E kontesta na mi pregunta tabata kla, i vários dia despues—mas presis dia 1 di mei, 1983—mi a wòrdu boutisá i konfirmá un miembro di e Iglesia di JesuCristo di e Santunan di Delaster Dianan.

Awe, ora mi pensa riba e sekuensia di eventonan ku a sosodé, mi ta mira klaramente kon importante e kurashi di mi kolega di skol tabata ora el a kompartí su testimonio tokante e bèrdat restorá i presentá n’ami un prueba tangibel di e Restorashon di e evangelio di JesuCristo, hasta e Buki di Mormon. E akto simpel aki, pero ku signifikado profundo, ta krea un konekshon entre ami i e mishoneronan ora mi a topa ku nan.

E bèrdat a wòrdu presentá n’ami, i despues di mi boutismo, mi a bira un disípulo di JesuCristo. Durante e añanan siguiente, i ku e yudansa di hendenan hopi spesial manera lidernan, maestronan, amigunan, i tambe pa medio di mi propio estudio personal, mi a siña ku ora mi a disidí di ta un disípulo di JesuCristo, mi a akseptá e tarea di no solamente defendé e bèrdat, pero tambe di proklamá esaki.

Ora nos bai di akuerdo pa kere den e bèrdat i siguiÉ, i ora nos hasi un esfuerso pa bira disípulonan bèrdadero di JesuCristo, nos no ta risibí un sertifikado ku un garantia ku nos lo no kometé eror, ku nos lo no wòrdu tentá pa alehá for di e bèrdat, ku nos lo no wòrdu tentá pa alehá for di e bèrdat, òf hasta ku nos lo no eksperensiá aflikshon. Pero e konosimentu di e bèrdat ta siña nos ku ora nos drenta den e kaminda stret i smal ku ta hiba nos bèk na e presensia di Tata Selestial, lo bai tin semper un manera pa skapa di e problemanan aki (wak 1 Korintionan 10:13), lo bai tin semper e posibilidat di duda nos dudanan promé ku nos duda nos fe (wak Dieter F. Uchtdorf, “Come, Join with Us,” Liahona, nov. 2013, 21); i finalmente, nos tin e garantia ku nunka nos lo ta nos so ora nos ta pasa den aflikshonnan, pasobra Dios tei ku Su pueblo mei mei di nan aflikshonnan (wak Mosia 24:14.

Manera nos siña e bèrdat, Señor ta duna nos e oportunidat pa hasi loke E lo hasi si E tabata akinan awe. Bèrdaderamente, El a mustra nos pa medio di su enseñansanan kiko nos tin ku hasi: “I boso lo bai dilanti den e poder di mi Spiritu, predikando mi evangelio, den dos, den mi nòmber, alsando boso bos manera e sonido di trompèt, deklarando mi palabra manera angelnan di Dios” (Doctrina y Convenios 42:6). E oportunidat pa e servisio mishonal den nos húbentut ta úniko!

Por fabor, hombres jóvenes, no posponé boso preparashon pa sirbi Señor komo mishonero. Ora bo ta enfrentá situashonnan ku por hasi bo desishon pa sirbi un mishon unu difísil—manera interumpí bo estudionan pa un tempu, yama ayó na bo frei sin ningun garantia ku lo bo sali kuné atrobe, òf hasta laga un trabou ekselente bai—kòrda e Salbador Su ehèmpel. Durante Su ministerio, E tambe a enfrenta difikultat, inkluyendo kritika, persekushon, i finalmente e kopa marga di Su sakrifisio ekspiatorio. Asina den tur sirkumstansia E la buska pa kumpli ku e boluntat di Su Tata i duna gloria na DjE. (Wak Juan 5:30; 6:38–39; 3 Nefi 11:11; Doctrina y Convenios 19:18–19.)

Mujeres Jovenes, bo ta bonbiní, si bo ta deseá, pa traha den e viña di Señor, i ora boso prepará boso mes pa sirbi komo mishonero di tempu kompletu, lo bo no ta liber di e mesun desafionan aki.

Na tur esnan ku disidí di sirbiÉ, mi ta primintí bo ku e 24 ò 18 lunanan di servisio lo pasa den e kampo mishonal meskos ku nan lo pasa si bo keda kas, pero e oportunidatnan ku ta warda e hòmber hóben i muhé hóben digno di e Iglesia aki den e kampo mishonal ta úniko. E privilegio di representá e Salbador JesuCristo i e Iglesia di e Salbador no por wòrdu ignorá. Partisipando den multiple orashon, desaroyando i kompartiendo testimonio vários biaha durante e dia, studiando di skrituranan, i topando hende ku nunka lo bo a topa si bo a keda kas, ta eksperiensianan ku bo no por deskribí. E mesun nivel di eksperiensia ta reservá pa hóbennan di kua Señor a yama pa sirbi mishonnan di servisio. Bo ta hopi bon biní i nesesario. Por fabor no minimalisá e importansia di un mishon di servisio, pasó mishonnan di servisio tambe ta proveé eksperiensianan ku no por deskribí. “E balor di alma ta grandi den e bista di Dios” (Doctrina y Convenios 18:10), inkluyendo e balor di bo alma.

Na regreso di bo servisio, kisas bo frei no ta wardando mas riba bo, pero lo bo a siña hopi bon kon pa hasi kontaktonan efektivo. Bo estudionan akadémiko lo tin mas sentido ku e bista parsial ku bo tabata tin preparando mas adekuadamente pa un kampo laboral, i finalmente, lo bo tin e siguridat kompletu di a proklamá ku kurashi e evangelio di pas, testifikando di e bèrdat restorá.

Pa esnan di boso ku ta kasá i na diferente etapa di bo bida, bo ta hopi nesesario den e obra di Señor. Prepará boso mes. Biba bidanan saludabel, buska outosufisiensia spiritual i temporal, pasobra oportunidatnan pa hasi loke Señor lo hasi pa Su yunan no ta limitá na un grupo di edat. E eksperiensia mas enkantante ku mi kasá i ami ta tin den añanan resién, ta di sirbi huntu ku parehanan spesial, na lugánan spesial, i sirbiendo hendenan hopi spesial.

E eksperiensia ku mi ta tin na final di mi estudio di topografia a siña mi ku semper nos ta defendé e bèrdat ora nos ta proklam’é i ku defendé e bèrdat ta algu pro aktivo. E defensa di e bèrdat nunka mester ta hasí den un manera agresivo pero mas bien ku interes genuino pa stima, kompartí, i invitá e hendenan ku nos ta testifiká na dje tokante e bèrdat, pensando solamente e bienestar temporal i spiritual di e yunan di un Tata Selestial amoroso. (wak Mosia 2:41.

Den e konferensia general di òktober 2021, Presidente Russell M. Nelson, nos kerido profeta, a siña nos ku kontrali na loke algun ta pensa, di bèrdat tin loke nos ta yama bon i malu. Di bèrdat ta eksistí un bèrdat apsoluto—un bèrdat eterno. (Wak “Pure Truth, Pure Doctrine, and Pure Revelation,” Liahona, nov. 2021, 6.)

Eskrituranan ta siña nos, “Bèrdat ta konosimentu di e kosnan manera nan ta, manera nan tabata, i manera nan ta bai bira.”{ (Doctrina y Convenios 93:24.

E konosimentu di e bèrdat no ta hasi nos mihó ku otro hende, pero e ta siña nos kiko nos tin ku hasi pa regresá den presensia di Dios.

Ora bo ta sigui firmemente den Cristo i ku kurashi no solamente pa proklamá e bèrdat pero pa biba e bèrdat, lo bo haña konsuelo durante e turbulenshanan ku bo lo enkontrá den e dianan aki.

E desafionan di bida por benta nos abou, pero sa ku ora nos ehersé fe den JesuCristo,“[nos] aflikshonnan lo no dura mas ku un momentu kòrtiku” (Doctrina y Convenios 121:7 den e gran alkanse di eternidat Por fabor no krea un fecha final pa e fin di bo difikultatnan i desafionan. Konfia den Tata Selesial i no entregá, pasó si nos entregá, nunka nos lo sa kon e fin di nos biahe lo por ta den e reino di Dios.

Wanta na e bèrdat, siña for di fuentenan di bèrdat:

• E skrituranan (wak 2 Nefi 32:3

• E palabranan di e profetanan (wak Amos 3:7

• E Spiritu Santu (wak Juan 16:13).

Mi ta kompartí mi testimonio di JesuCristo i ku esaki ta Su Iglesia. Nos tin un profeta bibiente, i semper nos lo sinti liber ora nos ta proklamá e bèrdat ku kurashi. Den e nòmber di JesuCristo, amèn.