Nos Por Hasi Kosnan Difísil pa medio di DjE

Durante e ministerio terenal di e Salbador, El a nota un hòmber ku tabata siegu. E disípulonan di Jesus a puntra, “Maestro, piká di ken a kousa ku e hòmber ei a nase siegu; di dje mes òf di su mayornan?”

Señor su kontestá firme, amoroso, i sinsero ta sigurá nos ku e ta konsiente di nos lucha, “No ta su mes piká ni piká di su mayornan, pero pa e obra di Dios por wòrdu manifestá den dje.”¹

Maske algun desafio por bin dor di desobediensia konsiente, nos sa ku hopi di e desafionan di bida ta bin dor di otro motibunan. Kual sea e fuente di nos desafionan, nan por ta un oportunidat di oro pa krese.

Atversidatnan di bida no a spar nos famia. Kresiendo, mi tabata atmirá famianan grandi. Tipo di famianan asina, tabata parse atraktivo pa mi, spesialmente ora mi a haña e Iglesia, tempu mi tabata un teen-ager, pa medio di mi tio di parti mama, Sarfo, i su kasá na Takoradi, [na] Gana.

Ora Hannah i ami a kasa, nos a deseá e kumplimentu di nos bendishon patriarkal, ku tabata indiká ku nos lo ta bendishoná ku hopi yu. Sinembargo, promé ku e nasementu di nos di tres yu hòmber, tabata medikamente opvio ku Hannah lo no por haña mas yu. Ku gratitut [nos por bisa], ku maske Kenneth a nase den un situashon di bida o morto pa tantu e i su mama, el a nase for di peliger, i su mama a rekuperá. E por a kuminsá partisipá den nos bida familiar—inkluyendo asistí na Iglesia, orashonnan diario di famia, estudio di skritura, noche de hogar, i aktividatnan rekreativo ku ta sano.

Maske nos mester a ahustá nos ekspektativa di un famia grandi, tabata un goso pa pone den práktika enseñansanan di “E famia: Un Proklamashon na e Mundu” ku nos tres yunan stimá. Siguiendo e enseñansanan ei a añadí hopi nifikashon na mi fe kresiente.

Manerá e proklamashon ta deklará: “Matrimonio entre hòmber i muhé ta esensial den Su plan eterno. Muchanan tin e derechi di nase den laso di matrimonio, i pa wòrdu kriá pa un tata i mama ku ta honra e promesanan matrimonial ku fidelidat kompleto.² Ora ku nos pone e prinsipionan aki den práktika, , nos tabata bendishoná.

Sinembargo, un wikènt durante mi servisio komo presidente di estaka, nos a eksperensiá kisas e pió prueba ku mayornan por enfrentá. Nos famia a regresá for di un aktividat di Iglesia i a reuní pa almorsá [lunch]. E ora ei nos tres yunan hòmber a bai den nos kompleho pa bai hunga.

Mi kasá a sintí kada biaha e impreshon ku kisas algu por ta robes. El a puntra mi pa tira un bista riba e muchanan, miéntras ku nos tabata laba e tayónan. Mi a sinti ku nan tabata for di peliger, ya ku nos tabata tende nan stèm di emoshon for di nan wega.

Ora ku nos por fin a bai wak nos yunan, pa nos konsternashon nos a haña nos Kenneth di 18 luna sin por hasi nada den un hèmber di awa, sin ku su rumannan ku por a mir’é. Nos a kore hib’é hòspital, pero tur esfuerso pa rebibé a resultá en vano.

Nos tabata kibrá ku nos lo no bai tin e oportunidat pa lanta nos yu presioso durante su bida mortlal. Maske ku nos tabata sa ku Kenneth lo ta parti di nos famia eterno mi a haña mi mes puntrando dikon Dios a laga e tragedia aki pasa ku mi miéntras mi tabata hasi tur mi posibel pa kumpli ku mi yamamentu. Mi a kaba di yega kas di kumpli ku un di mi debernan den ministrá e santunan. Dikon Dios no por a wak mi servisio i salba mi yu hòmber i nos famia di e tragedia aki? Mas mi a pensa riba esaki, mas amargá mi tabata bira.

Mi kasá nunka a kulpa mi pa no a aktuá riba su impreshonnan, pero mi a siña un lès ku ta kambia bida i a traha dos regla, pa no kibrá nunka:

Regla 1: Skucha i hasi kaso na e impreshonnan di bo kasá.

Regla 2: Si bo no ta sigur pa kualke motibu, referí na regla number 1.

Maske e eksperensia tabata devastador i nos ta sigui afligí, nos karga difísil pa hiba, ku tempu a bin bira mas suave.³ Mi kasá i ami siña un lès di nos pèrdidá. Nos a bin sinti uní i mará pa nos kombenionan di tèmpel; nos sa ku nos por reklamá Kenneth komo di nos den e próksimo mundu pasó el a nase den e kombenio. Tambe nos a gana eksperensia nesesario pa ministrá otronan i tin empatia pa nan doló. Mi ta testifiká ku nos amargura for di e tempu ei a bin disparsé segun nos tabata ehersé fe den Señor. Nos eksperensia a kontinuá di ta duru, pero nos a siñá meskos ku e Apòstel Pablo ku nos “por hasi tur kos pa medio di Cristo ku [ta fortalesé nos]” si nos enfoká riba DjE.⁴

Presidente Russell M. Nelson a siñá, “Ora e enfoke di nos bida ta riba Dios Su plan di salbashon … i JesuCristo i Su evangelio, nos por sinti e alegria sin importá kiko ta pasando—òf kiko no ta pasando—den nos bida.” El a sigui bisa, “Goso ta bin for di i pa motibu di DjE.”⁵

Nos por ta di bon ánimo i ta yen di pas den nos tempunan difísil. E amor ku nos ta sinti pa motibu di e Salbador i Su Ekspiashon ta bira un fuente poderoso pa nos den nos momentunan di prueba. “Tur lokual ku ta inhustu [i difísil] di bida por wòrdu reglá mediante e Ekspiashon di JesuCristo.”⁶ El a mandá: “Den e mundu boso lo tin tribulashon: pero sea di bon animo; mi a vense e mundu.”⁷ E por yuda nos perseverá den kualke doló, malesa, i pruebanan ku nos ta enfrentá den mortalidat.

Nos ta haña hopi historia den skritura di lidernan grandi i noble, manera Yeremias, Job, José Smith, i Nefi, kendenan ku no a keda di spar di e luchanan i desafionan di mortalidat. Nan tabata mortalnan ku a siña pa obedesé Señor asta den kondishonnan duru⁸

Durante e dianan teribel den prison di Liberty José Smith a sklama, “O Dios na unda bo ta? I el a puntra unda e pabeliun ku ta tapa Su kaminda di skonde taI unda e pabeliun ta ku ta tapa bo lugá di skonde?”⁹ Señor a siña José pa “soportá esaki bon”¹⁰ i a primintí ku si e hasi esaki, tur e kosnan aki lo dun’é eksperensia i lo ta pa su benefisio ¹¹

Reflekshonando riba mi propio eksperensianan, mi a realisá ku mi a siña algun di mi mihó lèsnan durante e tempunan di mas difísil, tempunan ku a saka mi for di zona di komodidat. Difikultatnan ku mi a enkontrá den mi hubentut, miéntras mi tabata siñando tokante e Iglesia dor di seminario, komo un konversio nobo, i komo un misionero di tempu kompleto i desafionan ku mi a enfrentá den mi edukashon, luchando pa magnifiká mi yamamentunan, i den lanta un famia a prepará mi pa e futuro. Mas mi reakshoná ku alegria na e situashonnan difísil ku fe den Señor, mas mi ta krese den mi disípulado.

E kosnan duru den nos bida no mester bin manera un sorpresa ora nos drenta den e kaminda stret i smal.¹² Jesus a siña “obedensia dor di e kosnan ku El a sufri.”¹³ Segun nos ta siguiÉ, spesialmente den nos tempunan difísil, nos por krese pa bira mas manera E.

Un di e konvenionan ku nos a hasi ku Señor den e tèmpel ta pa biba e lei di sakrifisio. Sakrifisio semper tabata parti di e evangelio di JesuCristo. E ta un rekordatorio di e gran sakrifisio ekspiatorio di JesuCristo pa tur ku a biba òf lo biba na mundu.

Imagen

Elder Morrison su mishoneronan

Mi sa ku Señor semper lo kompensá nos deseonan hustu. Bo ta kòrda e hopi yunan ku a primintí mi den mi bendishon patriarkal? E bendishon ei ta realisá: Mi kasá i ami a sirbi ku diferente sentenar di mishionero di mas di 25 pais, na e Mishon di Gana Cape Coast. Nan ta mes kerí pa nos komo si fuera nan tabata literalmente nos propio yunan.

Mi ta testifiká ku nos ta krese den nos disípulado ora nos ehersé fe den Señor durante tempunan difísil. Ora nos hasi asina ei, E lo fortalese nos ku miserikordia i yuda nos por hiba nos karganan. Den e nòmber di JesuCristo, amèn.