Ku Nan Por Konosé Bo

Algun aña pasa, mi tabata tin un eksperensia ku a kambia mi bida durante un reunion sakramental den nos bario na Arizona. Manera e orashon sakramental ta indiká nos disposishon pa “tuma riba [nos mes] e nòmber di [JesuCristo],”¹ e Spiritu Santu a rekòrda mi ku Jesus tin hopi nòmber. E pregunta aki a bin e ora ei na mi kurason: “Kua nòmber di Jesus lo mi tin ku tuma riba mi e siman aki?”

Tres nòmber a bin na mi mente i mi a skirbi nan. Kada un di e tres nòmbernan aki tabata kontené atributonan di Cirsto ku mi tabata kier a desaroyá mas kompletamente. Den e siman ku a sigui, mi a enfoká riba e tres nòmbernan i a purba na brasa nan atributonan i karakteristikanan korespondiente. For di e tempu ei, mi a sigui hasie pregunta ei komo parti di mi adorashon personal: “Kua di Jesus Su nòmbernan lo mi tin ku tuma riba mi e siman aki?” Respondiendo e pregunta ei i purbando pa desaroyá e atributonan di Cristo a bendishoná mi bida.

Den Su gran Orashon Intersesor, Jesus a ekspresá e bèrdat importante aki: “I esaki ta e bida eterno, ku nan por konosé Bo e úniko Dios berdadero i JesuCristo, kende bo a manda.”² Awe lo mi tin gana di kompartí ku boso e bendishonnan i poder ku ta bini dor di konosé JesuCristo pa Su hopi nòmbernan.

Un manera simpel ku nos por konosé un hende ta dor di siña nan nòmber. A wòrdu bisa ku un persona su nòmber ta pa e persona ei e zonido di mas dushi i importante den kualkier idioma.³ Bo a yega di tin e eksperensia di yama un hende na nòmber robes òf lubidá nan nòmber? Mi kasa, Alexis, i ami na un okashon a yega di yama un di nos ñetunan “Lola.” Desafortunadamente, manera bo por a imaginá, Lola ta nos kacho! Pa bon of pa malu, lubidá un hende su nòmber ta bisa e persona ei ku probablemente bo no konosé nan muchu bon.

Jesus tabata konosé i yama hende na nan nòmber. Señor a bisa antiguo Israel, “No tene miedu: paso Ami a redimí bo, Mi a yama bo na bo nòmber; bo ta di Mi.”⁴ E mainta di Pasku di Resurekshon, Maria su testimonio di e resurekshon di Cristo a wòrdu fortifiká ora ku Jesus a yame na su nòmber,⁵ Meskos, Dios a yama José Smith na su nòmber komo kontesta riba su orashon ku fe.⁶

Den algun kaso, Jesus a duna Su disípulonan nòmber nobo ku tabata indiká nan naturalesa, kapasidat i potensial. Jehova a duna Jacob e nòmber nobo di Israel, kual ta nifiká “Esun ku prevalesé ku Dios” òf ”aga Dios prevalesé.”⁷ Jesus a duna Santiago i Juan e nòmber di Boanerges, kual ta nifiká e “yunan di bos.”⁸ Mirando su futuro liderazko, Jesus a duna Simon e nòmber di Cefas òf Pedro, kual ta nifiká un baranka.⁹

Meskos ku Jesus konosé kada un di nos na nòmber, un manera ku nos por yega na konosé Jesus mihó ta dor di siña Su hopi nòmbernan. Manera e nòmbernan di Israel i Pedro, hopi di Jesus su nòmbernan ta títulonan ku ta yuda nos komprondé Su mishon, propósito, karakter i atributonan. Segun nos ta konosé Jesus su hopi nòmbernan, nos lo yega na komprondé Su mishon divino i Su karakter desinteresá mihó. Konosé Su hopi nòmbernan ta inspirá nos tambe pa bira mas manera E—pa desaroyá atributonan paresido na Cristo ku ta trese goso i propósito na nos bida.

Algun aña pasa, Presidente Russell M. Nelson a studia tur e skrituranan relashoná ku JesuCristo den e guia di tópiko.¹⁰ Despues el a invitá adulto nan hóben pa studia e mesun skrituranan. Relashoná ku e hopi nòmbernan di JesuCristo, Presidente Nelson a bisa, “Studia tur loke JesuCristo ta pa medio di orashon i buskeda vigorosamente pa komprondé kiko kada un di Su varios título i nòmbernan ta nifiká personalmente pa bo.”¹¹

Siguiendo Presidente Nelson su invitashon, mi a kuminsá desaroyá mi propio lista di Jesus su hopi nòmbernan. Mi lista personal tin mas ku 300 nòmber awor, i mi tin sigur ku tin hopi mas ku mi no a deskubrí ainda.

Ounke tin algun di JesuCristo su nombernan ku ta reservá pa solamente E¹² lo mi kier kompartí sinku nòmber i título ku tin aplikashon pa kada un di nos. Mi ta invitá bo pa desaroyá bo propio lista segun bo ta yega na konosé Jesus pa Su hopi nòmbernan. Si bo hasi esaki, lo bo deskubrí ku tin otro nòmbernan—huntu ku nan atributonan korespondiente di Cristo—ku lo bo kier tuma riba bo komo disípulo di e kombenio di Jesus.¹³

Prome, Jesus ta e Bon Pastor.¹⁴ Komo tal, Jesus konosé Su karnenan,¹⁵ “e ta yama su propio karnenan na nan nòmber,”¹⁶ i komo e Lamchi di Dios, a duna Su bida pa Su karnenan.¹⁷ Di mes manera, Jesus kier pa nos ta bon pastornan, partikularmente den nos famia i komo rumannan ministrante. Un manera ku nos ta demostrá nos amor pa Jesus ta dor di alimentá Su karnenan.¹⁸ Pa e karnénan ku por a dualu, e bon pastornan ta bai den desierto pa bai buska e karné pèrdí, despues keda ku nan te ora ku nan regresá na un lugá ku siguridat¹⁹ Komo bon pastornan i segun e kondishon lokalnan ta pèrmití, nos mester buska pa pasa mas tempu ministrando na hendenen den nan kas. Den nos ministerio, manda mensahe i teknologia mester wòrdu usá pa mehorá, i no remplasá kontakto persona.²⁰

Di dos, Jesus ta e Sumo Saserdote di e Bon Kosnan na Kaminda.²¹ Sabiendo ku Su krusifikashon tabata den algun ora pa, Jesus a bisa: “E kosnan aki mi a papia ku boso, pa boso por tin pas. Den e mundu boso lo tin tribulashon: pero sea di bon ánimo; Mi a vense e mundu.”²² Awendia, dor ku nos mundu ta frekuentemente polarisá i dividí, tin un gran nesesidat pa nos prediká i praktiká positivismo, optimismo i speransa. Apesar di kualkier reto den nos pasado, fe semper ta mustra pa futuro,²³ yena ku speransa, permitiendo nos pa kumpli ku Jesus Su invitashon pa ta di bon ánimo.²⁴ Biba e evangelio ku goso ta yuda nos bira disípulonan di e bon kosnan ku ta na kaminda.

Un otro di Jesus su título nan ta ku E ta e Mesun, Ayera, Awe i pa Semper.²⁵ Konsistensia ta un atributo paresido na Cristo. Jesus semper a hasi e boluntat di Su Tata,²⁶ i Su man ta ekstendékonstantemente pa salba nos, yuda i sana nos.²⁷ Segun nos ta bira mas konsistente den biba e evangelio, nos lo bira mas manera Cristo.²⁸ Ounke e mundu lo eksperensiá un drain grandi den su péndulonan di popularidat segun hendenan ta wòrdu tira di aki pa aya i wòrdu hiba di un lado pa otro ku e bientu di e doktrina,²⁹ biba e evangelio konstantemente ta yuda nos pa ta stabil i firme durante e tormentanan di bida.³⁰ Nos por demostrá konsistensia tambe dor di aseptá Presidente Nelson su invitashon pa “traha tempu pa Señor”³¹ Fortalesa spiritual grandi ta bin for di kosnan chiki i simpel³² manera desaroyá “kustumbernan santu i rekto”³³ di orashon diario, arepentimentu, estudio di skritura i servisio na otronan.

Kuater, Jesus ta e Santu di Israel.³⁴ Jesus Su bida tabata un modèl di santidat. Ora nos sigui Jesus, nos por bira un santu den Israel.³⁵ Nos ta oumentá den santidat si nos bishitá e tèmpel regularmente, kaminda “Santidat na señor” ta graba na kada entrada. Kada bes ku nos alaba den tèmpel, nos ta sali ku un poder mas grandi pa hasi nos kasnan luganan di santidat.³⁶ Pa esnan ku aktualmente no tin un rekomendashon pa drenta e tèmpel santu, Mi ta invitá bo pa reuni ku bo obispu i prepará bo mes pa drenta òf regresá na e lugá santu ei. Tempu den tempel lo oumentá santidat den nos bida.

Un delaster nòmber di Jesus ta ku E ta Fiel i Berbadero.³⁷ Meskos ku Jesus tabata semper fiel i semper berdadero, Su deseo sinsero ta pa nos demostrá e kualidat nan aki den nos bida. Ora ku nos fe flakia, nos ta yora na Jesus, “Señor, salba mi,” meskos ku Pedro a kuminsá senk den e laman tormentoso di Galilea.³⁸ E dia ei, Jesus a baha pa reskatá e disípulo ku tabata hogando. El a hasi e meskos pa mi, i El lo hasi e meskos pa bo. No rindi nunka pa ku Jesus—Nunka E lo hasié ku bo!

Ora ku nos ta fiel i bèrdadero, nos ta sigui Jesus Su yamada pa “Permanesé serka Mi,” kual por nifiká tambe “keda ku mi”³⁹ Ora ku nos ta konfrontá ku preguntanan, ora ku nan hasi mofa di nos kerensia, ora ku dedenan di despresio ta mustra riba nos dor di esnan den e edifisionan grandi i espasioso di mundu, nos ta permanesé fiel i nos ta keda leal. Na e momentunan aki, nos ta kòrda Jesus Su súplika, “Wak na Mi den tur pensamentu; no duda, no tene miedu.”⁴⁰ Si nos hasi asina, E ta duna nos fe nesesario, speransa, i fortalesa pa keda ku ’E.⁴¹

Kerido rumannan, Jesus kier pa nos por konos’E pasó e ta e úniko nòmber bou di shelu den kual nos por wòrdu salbá.⁴² Jesus ta e Kaminda, e Bèrdat, i e Bida—niun hende no por regresá na e Tata si no ta dor di DjE.⁴³ Jesus ta e úniko kaminda! Pa e rason ei, Jesus ta yama, “Bini na Mi,”⁴⁴ “Sigui Mi,”⁴⁵ “Kana ku Mi,”⁴⁶ i “Siña di Mi.”⁴⁷

Ku tur mi kurason, mi ta duna mi testimonio di JesuCristo—ku E ta bibu, ku E ta stima nos i ku E konosé bo na nòmber. E ta e Yu di Dios,⁴⁸ E Úniko Yu DjE Tata.⁴⁹ E ta nos Baranka, nos fortalesa, nos eskudo, nos refugio i nos Salbador.⁵⁰ E ta e lus ku ta Bria den Skuridat.⁵¹ E ta nos Salbador⁵² i nos Redentor.⁵³ E ta e Resurekshon i e bida.⁵⁴ Mi deseo sinsero ta pa bo yega na konosé Jesus na Su hopi nòmbernan i ku bo lo bira manera E segun bo ta mustra ehèmpel di Su atributonan divino den bo bida. Den e nòmber di JesuCristo, amèn.