Sea Perfekto den DjE

Nos Tata Selestial i nos Salbador, JesuCristo, tin e poder pa salba nos i pa transformá nos. Nan por yuda nos bira manera Nan ta.

Algun aña pasá, un di nos ñetunan menor, Aaron, a kuminsá haña problema ku salú. El a bira fatigá, tabatin basta herida i no tabata mustra salú. Despues di tèstnan médiko, el a wòrdu diagnostiká ku anemia aplástiko severo, un malesa kaminda su “médula” di wesu a stòp di produsí sélulanan di sanger kòra, sélulanan di sanger blanku i plakétanan di sanger. Sin tratamentu i un posibel kura, su sanger lo no por koa korektamente ni bringa infekshonnan, pesei un simpel kaida, herida òf enfermedat lo por bira lihé menasa pa su bida.

Pa un periodo di tempu, Aaron a haña plakéta i transfushon di sanger regularmente pa mantené for di peliger. E dòkternan a splika ku e úniko kura pa e malesa tabata un transplante di médula di wesu i e mihó chèns pa éksito tabata di tin un ruman komo doner. Si un di su rumannan tabata un mèch ideal, e resultado di e transplante lo por salba su bida. Su kuater rumannan a wòrdu di tèst, i unu, Maxwell, a wòrdu konsiderá un mèch perfekto.

Asta ku un doner perfekto, un transplante di médula di wesu ainda tabatin rísikonan serio di komplikashon. E proseso tabata rekerí pa Aaron su propio sélulanan den su médula di wesu malu wòrdu destruí dor di un kombinashon di kimoterapia i radiashon promé ku haña e sélulanan mama di su ruman Maxwell. Dor di Aaron su sistema imunológiko, e mester a wòrdu isolá den hospital pa varisos siman i despues na kas pa varios luna ku protokòlnan spesial, restrikshonnan i remedinan.

E resultado deseá di e transplante tabata pa e kurpa di Aaron no rechasá e sélulanan di e doner i ku Maxwell su sélula nan lo a produsí gradualmente e sélula nan kòra i sélulanan blanku i plakètnan di sanger nesesario den Aaron su kurpa. Un transplante di doner éksitoso ta kousa un kambio fisiológiko hopi real. Sorprendentemente, e dòkter a splika ku si Aaron kometé un krimen i laga sanger na e esena di krimen, polis lo por arestá su ruman Maxwell. Esaki ta paso Aaron su sanger lo bin for di Maxwell su sélulanan transplantá i tin Maxwell su DNA, i esaki lo ta e kaso pa restu di su bida.

E salbashon di Aaron dor di e sanger di su ruman a stimulá hopi pensamentu tokante e sanger ekspiatorio di JesuCristo i e efekto di Su Ekspiashon den nos. Lo mi kier enfoká awe riba e kambio permanente ku ta tuma lugá ora ku nos permití Señor obra milagernan den nos.¹

Aaron no tabata tin e poder den su mes pa surprasá e malesa. Su kurpa no por a traha e sélulanan di sanger nesesario pa mantené su bida. Ni maske kiko e hasi personalmente, e no por a kura su médula di wesu. Meskos ku Aaron no por a kura su mes, nos no por salba nos mes. No ta importá kon kapabel, eduká, briyante òf fuerte nos ta, nos no por limpia nos mes for di nos pikánan, kambia nos kurpa pa un estado inmortal òf eksaltá nos mes. E ta solamente posibel pa medio di e Salbador JesuCristo i Su Ekspiashon infinito. “No tin niun otro manera òf nòmber duná bou di shelu pa medio di kua hende por wòrdu salbá den e reino di Dios.”² Ta su sanger Ekspiatorio ta limpia nos i santifiká nos.³

Maske Aaron no por a kura su mes pa e transplante por traha e mester di ta dispuesto pa hasi loke e dòkternan ta puntra—asta kosnan hopi difísil, i desafiante Ounke nos no por salba nos mes, ora ku nos someté nos mes na e boluntat di Señor i warda nos konvenionan, e kaminda ta habri pa nos redenshon.⁴ Meskos ku e proseso remarkabel di e kambio di DNA di Aaron su sélulanan di sanger, nos por kambia nos kurason,⁵ tin Su imágen den nos rostro,⁶ i bira kriaturanan nobo di Cristo.⁷

Alma a kòrda e pueblo di Zarahemla di e generashon previo ku a kombertí. Papiando di su tata, Alma a splika ku “segun su fe, a bin un gran kambio den su kurason.”⁸ El a puntra e ora ei, “Boso a yega di ekperensiá e gran kambio aki den boso kurason?”⁹ No tabata e hendenan [ku] a kambia nan mes kurason. Ta Señor a realisá e kambio realmente. Alma tabata hopi kla tokante esaki. El a bisa, “Ata’ki, el a kambia nan kurason.”¹⁰ Nan a “humiá nan mes i a pone nan konfiansa den e berdadero Dios … i] tabata fiel te na fina … [i] i a wòrdu salbá.”¹¹ E hendenan tabata dispuesto pa habri nan kurason i ehersé fe i e ora ei Señor a kambia nan kurason. I esta un gran kambio e tabata! Pensa riba e diferensia den e bida di e dos hòmbernan ku e nòmber di Alma aki promé i despues ku nan kurason a wòrdu kambiá.¹²

Nos ta yunan di Dios ku un destino mahestuoso. Nos por wòrdu kambiá pa bira manera E i tin “un plenitut di goso.”¹³ Satanas na otro banda ke pa nos ta miserabel manera e ta.¹⁴ Nos tin e abilidat pa skohe ken nos ta sigui.¹⁵ Ora ku nos ta sigui Satanas, nos ta dun’é poder.¹⁶ Ora ku nos sigui Dios, E ta duna nos poder.

E Salbador a siña ku nos “mester ta perfekto.”¹⁷ Esaki por parse inalkansabel. Mi por wak klaramente mi partinan inadekuá i ta dolorosamente konsiente di e distansia entre ami i perfekshon. Nos por tin e tendensia di pensa ku nos mester perfekshoná nos mes, pero esei no ta posibel. Sigui kada sugerensia den kada buki di yudansa propio den mundu lo no trese esaki. Tin solamente un kaminda i un nòmber pa kual perfekshon ta bini. Nos ta wòrdu perfekshoná pa medio di Cristo e Mediadó di e konvenio nobo, kende a realisá e Ekspiashon perfekto pa medio di e dramamentu di Su propio sanger.”¹⁸ Nos perfekshon ta posibel solamente pa medio di Dios Su grasia.

Bo por imaginá kon abrumadó e lo tabata pa Aaron nos ñetu yòn pa asumí ku e mester a komprondé i hasi tur e proseduranan médiko relashoná ku su transplante e mes? Nos no mester asumí [ku] nos mester hasi loke solanebte e Salbador por hasi den e proseso milagroso di nos perfekshon.

Ora ku Moroni a konkluí su registro, el a siña, “Si, bini na Cristo, i sea perfekto den DjE, … i si boso nenga boso mes di tur inikidat i stima Dios ku hinter boso alma, mente i forsa, e ora ei su grasia ta sufisiente pa boso, ku pa medio di Su grasia boso por ta perfekto den Cristo.”¹⁹ Esta un bèrdat ku ta duna konsuelo i poderoso! Su grasia ta sufisiente pa mi. Su grasia ta sufisiente pa bo. Su grasia ta sufisiente pa tur esnan ku “traha i tin karga pisá.”²⁰

Ku tratamentu médiko manera Aaron, semper tin sierto insertidumbre di e resultado. Aaron tabatin mester di un di dos transplante ora ku e promé ta a haña komplikashon. Afortunadamente, ku un kambio spiritual di kurason, nos no mester keda asombrá si e lo sosodé. Ora ku nos ta biba di akuerdo ku Su boluntat, “konfiando totalmente den e méritonan di esun ku ta poderoso pa salba,”²¹ i hañando i wardando Su konvenionan di salbashon i eksaltashon, tin un 100 porshento di garantia di wòrdu limpia pa e sanger di e Salbador i eventualmente wòrdu perfekshoná den DjE. E ta “un Dios di bèrdat, i [no por] gaña.”²²

No tin duda ku e proseso di kambio aki ta tuma tempu i lo no wòrdu kompletá te despues di e bida aki, pero e promesa nan ta sigur. Ora e kumplimentu di Dios Su promesanan ta parse di ta leu, nos ta sigui brasa e promesanan aki, sabiendo ku nan lo wòrdu kumplí.²³

E kambio milagroso den Aaron su salú a trese un gran goso na nos famia. Imaginá e gran goso den shelu ora ku kambionan grandi tuma lugá den nos bida.

Nos Tata Selestial i nos Salbador, JesuCristo, stima nos i a ofresé gloriosamente pa kambia nos i perfekshoná nos. Nan tabata kier a hasi esaki. E ta sentral pa Nan trabou i gloria.²⁴ Mi ta testifiká ku Nan tin e poder pa hasi esaki si nos bin na Nan den fe. Den e nòmber di JesuCristo, amèn.