Kpukpru Eyefɔn Ke Ntak mme Ediomi Temple

Ndima nditɔ eka mi, ikpehe mbono emi edi, ɔnɔ mi, edisana ini. Ami menem esit mbaŋa ufaŋ nditiŋ ikɔ nnɔ mme Ndisana Owo million ye mme ufaŋ nnyin ke ofuri ererimbot. Ami memma mbufo, nyuŋ mfiɔk ke Jehovah ama mbufo.

Ke isua 50 emi ekebede, mma nyene ufaŋ ndinam utom nte president Ricks College ke Rexburg, Idaho. Ke usenubɔk June 5, 1976, ŋwan mi, Kathy, ye ami ima iwat ito Rexburg ika Idaho Falls Temple ndikiduk edidian-ndɔ ufan nnyin kiet. Ekedi, ye mkarawa inaŋ emi ekedude ke ufɔk nnyin ke ini oro, edi ke isaŋ temple akana edi ntre ke ndinyene eti edep-eyen! Nnyin ima iyak ndima nditɔ nnyin ke idak esie inyuŋ ika ibio, isaŋ minute 30 oro.

Ifiɔk nnyin ke temple usen oro ama ɔfɔn eti eti, nte esidide. Edi, ke ekekurede edidian oro—nte nnyin ikibeŋede idem ndifiak nyɔŋ ufɔk—nnyinima ikut ediwak mme anam utom temple ye mme andidi temple nte enemede nneme ke ufɔt-ufɔk temple. Ke ekpri ini, anam utom ke temple kiet ama ɔdɔhɔ nnyin ete ke Teton Dam emi ekebɔpde obufa ama owure! Mmɔŋ awakde akan gallon 80 billion (emi edide cubic meter 300 million) ɔkɔwɔrɔ ke dam oro onyuŋ oduk itiat 300 (emi edide 775 km) ke nkan-ŋkuk obio oro. Akamba ubak obio Rexburg ekesine ke idak mmɔŋ, ndien mmɔŋ ama eyet mme ufɔk ye mme moto osio. Iba ke mbahare ita mbon obio oro ama anan ufɔk.

Nte mbufa ekerede, ekikere ye mfina nnyin ama ɔŋwɔŋɔre odu ye ndima nditɔ nnyin, nditɔ ufɔk ŋwed oro ke mme ikie, ye obio emi nnyin ikimade. Nnyin ikidi ŋkpɔ nte itiat 30 (50km) ikpɔŋ ufɔk, ndien ke usen emi mbemiso phone ye uwet ikɔ ke phone edi, nnyin ikinyeneke usuŋ ndomo kiet nditiŋ ikɔ ye nditɔ nnyin, mme ndiwat nto Idaho Falls nka Rexburg, nte ekeberide kpukpru usuŋ.

Nkukure se akanade nte inam ekedi nnyin ndina ke Idaho Falls. Kathy ye ami ima itɔŋɔ edɔŋ kiet ke ubet nna nnyin inyuŋ ibeŋe Ete ke Heaven ukpeme ke n suhɔre-idem inɔ edima nditɔ nnyin ye mme tɔsin mbon efen emi unɔmɔ emi ekesimde. Meti nte Kathy asaŋade ke ubet oro ke usiere usenubɔk ye ekikere nditɔ esie. Ke misehe mme mfina mi, mma nsio ekikere mfep nyuŋ nde idap.

Ikibihike edima nsinsi ada nsaŋa mi ama edemere mi onyuŋ obup ete, “Hal, akan didie ede idap ke utɔ ini ntem?”

Mme ikɔ emi ndien ediduk mi esit ye ekikere. Ami ndɔhɔ ŋwan mi nte: “Kathy, se ekpededi, kpukpru eyefɔn ke ntak temple. Nnyin ima inam mme ediomi ye Abasi ndien ima idian ndɔ nte nsinsi ufɔkemana.”

Ke ini oro, eketie nte Spirit Jehovah ɔkɔsɔŋɔ ɔnɔ ekikere ye esit nnyin se nnyin ima ikifiɔk nte akpanikɔ: mme edinam edidian, emi edude ke ufɔk Jehovah ikpɔŋ ye emi enamde ke nnen nnen unen itie oku, ama adian nnyin kiet nte ebe ye ŋwan, ndien ema edian nditɔ nnyin enɔ nnyin. Ke akpanikɔ ufɔn ndifehe ndik ikiduhe, ndien esit ama enem nnyin ke ini ikidikopde ke ŋkpɔ ikinamke nditɔ nnyin.

Ekeme ndidi ke ikɔ emi otode President Thomas S. Monson etim owut se Kathy ye ami ikikutde ke okoneyo mendifreke oro. “Nte nnyin ikade temple, se idide itiene nnyin edi idaha eke spirit ye ekikere peace. … Nnyin iyitimifiɔk se mme ikɔ Andinyaŋa ɔwɔrɔde ke ini Enye ɔdɔhɔde ete: ‘Emem ke nnɔ mbufo, emem mi ke nnɔ mbufo. … Ekuyak esit etimere mbufo, ekunyuŋ eyak esit mbufo ekop ndik[John 14:27].’”

Ediɔŋ mi nte nkopde emem oro kpukpru ini emi ndukde edisana temple. Meti akpa usen emi nkodukde Salt Lake Temple. Nkedi ekpri eyen.

Mma mmenere enyin nse nkon-nkon enyɔŋ ceiling emi akanamde ubet oro ayama nte ekese ika enyɔŋ. Ndien ke ini oro, ekikere ama ediduk mi esit ke mme ikɔ emi: “Ami modu ke ebiet emi ayamde emi akpa.” Edi ke ndondo oro ama ediduk mi esit, idihe ke uyo mi, mme ikɔ emi: “Iŋ iŋ, afo udihe mi akpa. Afo eketi ini emi afo mukumanake kaŋa. Afo okodu ke edisana ebiet ntem emi Jehovah ekekemede ndidi.”

Ndima nditɔ eka, metie ntiense ke nsuhɔre-idem nte ke nte ikade temple, ekeme nditi nnyin mbaŋa nsinsi obot mme spirit nnyin, ebuana nnyin ye Ete ye edisana Eyen Esie, ye akpatre udɔŋ nnyin ndifiak nyɔŋ nka ufɔk nnyin ke heaven.

Ke mme akwa mbono ke mibihike, President Russell M. Nelson ama ekpep ete:

“Ebiet emi ɔfɔnde akan ndidu ke spirit edi ndidu ke esitmme ediomi temple mbufo!”

“Kpukpru ŋkpɔ emi nnyin inimde ye kpukpru eŋwɔŋɔ emi Abasi anamde ɔnɔ mbon ediomi Esie edi ini kiet ke temple.”

“Owo kiet kiet emi anamde mme ediomi … ke mme temple—onyuŋ enimde mmɔ—enyene akamba ufaŋ ndisim odudu Jesus Christ.”

Enye ŋko ama ekpep ete ke “ini eke nnyin inamde ediomi ye Abasi, nnyin imikpɔŋ ikpikpu isɔŋ ke nsinsi. Abasi idikpɔŋke ebuana Esie ye mbon emi ekebɔpde utɔ ebuana oro ye Enye. Ke akpanikɔ, kpukpru mbon emi enmade ediomi ye Abasi enyene ufaŋ enɔ saŋa-saŋa ima ye mbɔm.”

Ke idak etiukara President Nelson, Jehovah anam ɔsɔp, ndien eyeka iso anam ɔsɔp, nte ebɔpde mme temple ke ofuri ererimbot. Emi eyenɔ nditɔ Abasi ufaŋ ndibɔ mme edinam erinyaŋa ye eke edimenere ye ndinam nyuŋ nnim mme edisnan ediomi. Ndidot ndinam mme edisana ediomi idihe ŋkpɔ ini kiet edi edi ndidomo ukeme ke ofuri eyo uwem. Jehovah ɔdɔhɔ ete ke edida ofuri esit, ukeme, ekikere, ye odudu nnyin.

Ke ndibuana ke mme edinam temple kpukpru ini ekeme ndisiak edu ndikpono Jehovah. Ke ini enamde mme ediomi temple mbufo enyuŋ eti mmɔ, mbufo ekot adansaŋa eke Edisana Spirit ete ɔnɔ mbufo odudu onyuŋ anam mbufo esana.

Mbufo ndien emekeme ndinyene ntuk unwana ye idorenyin emi etiede ntiense ete ke mme eŋwɔŋɔ oro edi akpanikɔ. Mbufo eyedifiɔk ete ke kpukpru ediomi ye Abasi edi ufaŋ ndisik mkpere Enye, emi ndien edisinde udɔŋ ke esit mbufo ndinim mme ediomi temple.

Eŋwɔŋɔ enɔ nnyin ete, “Ke ntak mme ediomi nnyin ye Abasi, Enye idikpaha mba ke utom Esie ndinwam nnyin, ndien nnyin idikureke ime mbɔm Enye enyenede ɔnɔ nnyin.”

Oto ke mme ediomi edidian ke temple ke nnyin ikeme ndinyene idorenyin ima ebuana ufɔkemana emi edikade iso ke ima ikpa ye ke nsinsi. Ndikpono mme ediomi ndɔ ye eke ufɔkemana emi enamde ke mme temple Abasi eyenɔ ukpeme osio ke idiɔk unyim ye ntaŋidem.

Nkaiso ukpeme nditɔ eka iren ye iban nnɔ idem mmɔ edidi ke ini ekade iso ndinam utom ndikara mbon ufɔkemana ke usuŋ Jehovah. Enɔ nditɔ ufaŋ ndibɔŋ akam nnɔ kiet eken. Sɔp fiɔk mme ntɔŋɔ utɔk, nyuŋ kut mme ido utom efad, akpan akpan ye kiet eken. Ke ini mme nditɔ eka ebɔŋde akam enɔ kiet eken enyuŋ enamde ŋkpɔ enɔ kiet eken, mme esit eyemem enyuŋ eŋwɔŋre etiene kiet eken ye ete ye eka mmɔ.

Ke ubak, emi edi se Malachi eketiŋde nte enye akadakde etiŋ abaŋa edidi prophet Elijah: “Enye eyesin ke esit nditɔ mme eŋwɔŋɔ emi ekenamde enɔ mme ete, ndien esit nditɔ eyeŋɔŋɔre etiene mme ete. Mikpidihe ntre, ekpebiat ofuri ererimbot ofuri ofuri ke edidi esie.”

Mme idomo, mme mfina, ye mme nkɔŋibuot ke akpanikɔ eyesim ofuri nnyin. Owo nnyin ndomo kiet ibɔhɔke “mme nkukim ke idem.” Edi, nnyin ikade temple inyuŋ itide mme ediomi nnyin, nnyin imikeme ndibɔ nnɔ idem nnyin nto Jehovah.

Ke ini Kathy ye ikidɔde ndɔ inyuŋ idian ke Logan Utah Temple, Elder Spencer W. Kimball ke ini oro akadian ndɔ oro. Ke mme ikɔ ifaŋ emi enye eketiŋde, enye ama ɔnɔ item emi: “Hal ye Kathy, edu uwem man ke ini ikoot edidide, mbufo eyekan esaŋa ebe ke emem.”

Ke ntɔŋɔ, nnyin ikifiɔkke se item oro ɔkɔwɔrede ɔnɔ nnyin, edi nnyin ima inam se ikikande ndidu ke usuŋ emi ikibeŋede idem ndika ndinam utom nnɔ Jehovah ke ini ikoot oro edide. Ke ima ikidɔ ndɔ ke ŋkpɔ nte isua 10, ikoot emi owo mikidotke enyin ama oto Commissioner ek Church Education, Neal A. Maxwell edi.

Edima item emi President Kimball ɔkɔnɔde ke temple ete “esaŋa ebe ke emem” ama ɔwɔrɔ owut idem. Kathy ye ami ima ibɔ ikoot ndikpɔŋ se ikitiede nte eti uwem ufɔkemana ke California ndinam utom ye ke ebiet emi meŋkefiɔkke ŋkpɔ ndomo kiet mbaŋa. Edi, mbon ufɔkemana nnyin ema ebeŋe idem ndiwɔrɔ koro prophet, ke edisana temple, ebiet ereriyarare, ama okut ŋkpɔ ke ini iso emi nnyin ikidude ke mbeŋe idem ini oro.

Ndima nditɔ eka mi, metie ntiense nte ke ŋkpɔ ndomo kiet iduhe emi okponde akan ndikpono mme ediomi emi mbufo enamde mme emi edinamde ke temple. Ke ebiet emi okpododu ke usuŋ ediomi, mebeŋe nte yak odot onyuŋ akan aka temple. Eke ke nte mme idaha eyakde eka. Enam enyuŋ enim mme ediomi ye Abasi. Ami mekeme ndidɔhɔ mbufo mbaŋa ukem akpanikɔ emi nkabuanade ye Kathy ke ufɔt okoneyo ke ŋkpɔ nte isua aba ye duop ekebede ke Idaho Falls: “Ke se ikpededi, kpukpru eyefɔn ke ntak mme ediomi temple.”

Ami ndi ntiense ke Jesus edi Christ. Enye odu uwem onyuŋ ada Ufɔk Abasi Esie usuŋ. Mme temple edi mme ufɔk Jehovah. President Russell M. Nelson edi oduwem prophet Abasi ke isɔŋ. Ami mema enye nyuŋ mma mbufo kiet kiet. Ke edisana enying Jesus Christ, amen.